UPawulo ifilikha inyunjila kwa vaanu paayo paayo
16
1 Nisakula kimukhoona kunyeenyu,
uFoyibe umuhuvililaaji muyeesu,
kwa kiiva muunu munofu.
Umwene muvanda wa shipuga sha vahuvililaaji va mu lijumbi lya Kenikileya.
2 Nilomba musajisaaji wunofu,
kwa kiiva woope muhuvililaaji wa Mutwa uYeesu.
Musajisaaji ngaja shina yisakulwa mu vahuvililaaji va Yeesu Kilisito.
Khanji,
nilomba kiija,
mumutangaje shoshoona shina isakula,
kwa kiiva woope uyo wávatangaga avaanu vinshi,
hata na yuune.
3 Muvahunjilaje uPulisika nu mugoosi waakwe uAkila na vavanda vayangu mu nsengo ya Kilisito Yeesu.
4 Khanji vakhasheele vawuyase uwuumi waanave kwa kiiva yangu.
Yisili yuune duguli yuna nikivahonjesa,
leelo hata ifipuga fyona ifya vahuvililaaji,
vikivahonjesa mandu aveene.
5 Khanji,
vahunjilaji avaanu va shipuga sha vahuvililaaji vina vikungaana mu nanda yaanave,
nu mugani wangu uEpayineto.
Umwene wa wutasi kimuhuviilila uKilisito kula ku nyi ya Asiya.
6 Muhunjilaji uMaliya,
yuna wásengaga insengo kwa wujimfu kwa lutono lwenyu.
7 Vahunjilaji aVayahuudi vayangu,
uAndiloniko nu Yuniya,
vina vadindilwagwa noone mu shifungo.
Awo vanilongolaga kimuhuviilila uKilisito,
khanji vimanyikha mandu mu vanandeje.a
8 Muhunjilaji uAmupiliyato,
umugani wangu khanji umuhuvililaaji wa Mutwa uYeesu Kilisito.
9 Muhunjilaji Ulibano,
umuvanda muyeesu mu nsengo ya Kilisito,
nayu mugani wangu uSitakisi.
10 Muhunjilaji uApeele.
Umwene akhandi muyaminifu mu majelo minshi,
kwa kiiva ya Kilisito.
Khanji vahunjilaji avaanu va mu nanda ya Alisitobulo.
11 Muhunjilaji uHelodiyoni,
uMuyahuudi muyangu,
na vaanu va kukhaaya ya Nalikiso,
vina vikimuhuviilila uMutwa uYeesu Kilisito.
12 Muhunjilaji uTilifeena nu Tilifoosa.
Avashimaayi awo vijimba mandu kisenga insengo ya Mutwa uYeesu.
Khanji,
muhunjilaji umugani wangu uPelisisi.
Uyu woope washimaayi yuna wásengaga insengo ya Mutwa uYeesu kwa wujimfu.
13 Muhunjilaji uLufo,
umubaagule wa Mutwa uYeesu,
khanji muhunjilaji nayu nyina yuna wánitanjilisaaga one ngaja maayi wangu.
14 Khanji,
muhunjilaji uAsinikilito,
uFilegoni,
uHelime,
uPatiloba,
uHelima,
na vahuvililaaji va Yeesu Kilisito woona vina vali lumo nawo.
15 Kuwudugo,
muhunjilaji uFilologo nu Yuliya,
uNeleya nu wulumbu waakwe,
uOlimupa,
lumo na vahuvililaaji va Yeesu Kilisito woona vina vali lumo nawo.
16 Hunjilanaji kwa lugano lwa Yeesu Kilisito.
b Avahuvililaaji woona ava fipuga fya Kilisito,
vina vali kuno vikivahunjila.
Amapavilo ga Pawulo
17 Lino vahuvililaaji vayangu,
nikivajovela kiija muveesaje meeho na vaanu vala vina amamanyiso gaanave gikivagaha avahuvililaaji vabagunkhane fipuga fipuga,
khanji,
ginanga ilihuuvi ni njendo saanave.
Khalaji kutali nawo,
kwa kiiva amamanyiso gaanave gipingana na gala gina mwamanyisiwaagwa.
18 Avaanu ngaja awo vasikimusenjela uMutwa weesu uKilisito,
leelo visenga kwa kifwata uwupafu waanave.
Vilogola amaswi amanofu aga kishendeefya,
leelo vikivajanga avahuvililaaji avawoto.
19 Woona vapulikha kiija,
omwe muliyinatiile wunofu iLiswi lya Nguluvi.
Ishiinu isho shikinishendeefya one mandu.
Hata ndeeno,
nisakula muveesaje nu luhala mu njowo inofu,
khanji musikhakwehwaji nu wunansi.
20 Lino,
uNguluvi yuna ikivapeela uwulindamafu,
asimuponde uShetaanic lilino ndeeni na kivapeela omwe ingufu iya kimumena.
Imota ya Mutwa weesu uYeesu,
yive lumo noomwe.
21 UTimoteo umuvanda muyangu,
ikivahunjila.
Khanji,
aVayahuudi vayangu,
uLukiyo,
uYasoni nu Sosipatilo woope vikivahunjila.
22 Na yuune Telitiyo,
yuna nili muyandikhaaji wa maswi ga balula iyi iya Pawulo,
nikivahunjila ngaja muhuvililaaji muyeenyu wa Mutwa uYeesu.
23 UGaayo,
yuna one Pawulo niikhala mu nanda yaakwe,
woope ikivahunjila.
Kunyaakwe kukwene kuna shipuga sha vahuvililaaji woona ava apa,
vikungaana.
Khanji uElasito,
yuna itunsa ihela isa lijumbi ili,
d woope ikivahunjila.
Kuwudugo,
umuhuvililaaji muyeesu uKwalito,
ikivahunjila. [
24 Ulusungu lwa Mutwa weesu uYeesu Kilisito,
luve lumo noomwe woona.
Amina.]e
UPawulo ikimusufya uNguluvi
25 Lino,
timusufyaje uNguluvi!
Umwene akwiliile kivagaha omwe muve ni lihuuvi lina lijinile kishilila mu Mola iNofu iya Yeesu Kilisito,
yina nikhandi niikhoma kunyeenyu.
IMola iNofu iyo,
yiyeene yina yikhandi yifihiilwe kihuma pawukuulu.
26 Leelo lino,
yivishiilwe bahawuvalafu,
na kishilila mu Mayandikhwa aManofu ga vakuwamalago,
imola iso simanyikha kwa vaanu va nyi soona.
UNguluvi wa shiluta,
yumwene alajiise ishiyooli isho shijowe ku vaanu,
baheene avaanu awo vamuhuviilile na kimuyinatila uMutwa uYeesu.
27 UNguluvi mwene duguli,
yumwene umunya wumanyi woona.
Umwene ave itupikhwa shiluta,
kwa nsila ya Yeesu Kilisito!
Amina.