Valuumi 15

Tisikhayishendefyaga yuuse

1 Lino ose vina tikhangeele mu lihuuvi, tisakulwa kivatanga avawoto vina vasikhangeele na tisikhagahaga gina gikitushendeefya yuuse duguli hela. 2 Shila muunu mu ose, amugahilaje ifiinu fya kimushendeefya umuhuvililaaji muyine kwa lutono lwakwe, baheene ajine mu lihuuvi lyakwe. 3 Hata uKilisito yumwene, asikhagahile gina gikimushendeefya yumwene duguli hela. Leelo gina wágagahaga gakhandi ngaja shina yiyandiikhwe mu Mayandikhwa aManofu kiija, “Amaligo gina vikikuliga owe Nguluvi, ganipataga na yuune yuna wanibagulaga.” 4 Goona gina gayandikhwagwa pawukuulu mu Mayandikhwa aManofu, gakhayandiikhwe kwa kiiva ya kitumanyisa ose. AMayandikhwa ago, gikitutanga kigugumila mu malava geesu na gikituyishilisa, baheene tive nu luhuviililo.

5 Nilomba kiija, uNguluvi yuna ikitupeela kiyijimfilisa na kituyishilisa, avagahe mukhale mu shipuga kwa wulindamafu, kwa kiiva mukimufwata uKilisito Yeesu. 6 Apo baheene omwe woona kwa lugulumilo lumo na kwa shawuti yimo, mukwiliile kimutupikha uNguluvi uDaada, wa Mutwa weesu uYeesu Kilisito.

UNguluvi ikivayiitikha aVayahuudi na vina vasili Vayahuudi

7 Lino, yanushilanaji yuumwe kwa yuumwe ngaja uKilisito shina wávayanushilaga omwe, baheene avaanu vamutupishe uNguluvi. 8 Nikivajovela omwe kiija, uKilisito wáyinsile kivatanga aVayahuudi baheene kiwonensa kiija, uNguluvi muyaminifu, uluganulo lwakwe kwa nsila ya Kilisito wáagaha gagala gina wávatahisaaga avambuyaanave. 9 Khanji, wáyinsile baheene avaanu vina vasili Vayahuudi, vamusufye uNguluvi kwa lusungu lwakwe. Ngaja shina yiyandiikhwe mu Mayandikhwa aManofu kiija,

“Lino, nisikuyeyemele injeyemo isa kikusufya

ku vaanu va nyi isinji.”

10 Khanji aMayandikhwa aManofu giijova,

“Omwe vaanu va nyi isinji,

mushendeevaje lumo na Vaisilaheli,

avaanu va Nguluvi.”

11 Khanji aMayandikhwa aManofu giijova,

“Omwe vaanu vina musili Vaisilaheli,

musufyaji uMutwa uNguluvi.

UNguluvi asufiwaajwe,

na vaanu va nyi soona!”

12 Woope umukuwamalago uIsaaya wájovile,

“Umuunu yumonga mu lusawo lwa Yeese akhayinsa,

woope akhatema ifimyanja fyona,

na vaanu va nyi soona vakhava nu luhuviililo kwa mwene, kiija akhavakulusa.”

13 Lino, nikivafuunyila kwa Nguluvi yuna ikitupeela kiiva nu luhuviililo, avapeele uwushendeefu nu wulindamafu, uluhaavi luna mukiyitenekha kimuhuviilila uNguluvi. Apo baheene musiive nu luhuviililo lukhome, kwa kiiva mukhatanjilisiwa ni ngufu ya Numbula uMunofu.

Ulugulumilo lwa Pawulo ulwa balula iyi

14 Vahuvililaaji vayangu, one nimeenye kwa shiyooli kiija, omwe vaanu vanofu mandu, mumeenye shina mwisakulwa kisenga, khanji omwe mukwiliile kipavilana. 15 Hata ndeeno, navayandishila amaswi aganji mu balula iyi kwa wukhangafu, kiija nivakumbuse amaswi ago. Naagaha ndeeno kilingana ni mota yina uNguluvi anipeelile, 16 baheene nive muvanda waakwe uKilisito Yeesu kwa vaanu vina vasili Vayahuudi. Uluganulo lwakwe, navikhwagwa kiiva muvanda wa kivakhoma iMola iNofu kihuma kwa Nguluvi, kiija vavalasiwe nu Numbula uMunofu. Ndeeno, vasiive ngaja sadaakha yina yikimushendeefya uNguluvi.

17 Lino, kilingana kwangu nu Kilisito Yeesu, nikwiliile kiyisufya pina nikimusenjela uNguluvi, kishilila umwene. 18 Nisiijela kilogola shiinu shoshoona ishinji, leelo gala hela gina wágahaga uKilisito kishilila kunyangu. Wávagahaga avaanu vina vasili Vayahuudi kiyinatila, kishilila amaswi gina nikhandi niijova ni nsengo yina nikhandi nisenga. 19 Vakwehwagwa mu lihuuvi kwa nsila ya kisaaga ingufu isa Kilisito sina sawonekhaga mu fimanyilo, miitu na mu mabikha. Nagahaga ago goona kwa ngufu ya Numbula wa Nguluvi. Lino napilimilaga shila luvala kikhoma iMola iNofu ya Kilisito, kiyansisa mu lijumbi lya Yelusalemu, mbakha ku nyi ya Ililiko. 20 Mu ago goona, ulugulumilo lwangu kikhoma iMola iNofu, ku luvala luna avaanu avanji vasinakhomaje imola sa Kilisito. Ndeeno nisikhawuyiilaga khanji, uluvala luna umuunu uyunji shi asenjile. 21 Shina niigaha yihwaneene ngaja shina gayandiikhwe mu Mayandikhwa aManofu kiija,

“Avaanu vina vasikhajoveelwe imola saakwe, vakhasaaga,

na vaanu vina vasikhapuliishe, vakhasimanya.”

Ilihaahi lya Pawulo ilya kiluta mu lijumbi lya Luumi

22 Insengo iyo yikhandi yikinisivila mala nyinshi, kiyinsa kunyeenyu. 23 Lino, naamala insengo yangu mu mbali isinji. Maakha minshi lino, kiiva nikhandi nisakula kiyinsa kunyeenyu. 24 Ndeeno, nihuviilila kivajendela na kikhala lumo noomwe kwa luhaavi lufupi, pina nikhashila kiluta ku nyi ya Hisipaniya. Nilomba munipeele umutango ugwa kinifisa ku Hisipaniya.

25 Lino niiluta ku Yelusalemu, baheene nitwale umutango kwa vahuvililaaji ava kula. 26 Avahuvililaaji va Mutwa uYeesu vina vali ku nyi ya Makedoniya na ku nyi ya Akaya, vawonaga kiija lunofu kihumya ifiinu fyanave ifya kivatanga avapiina mu vahuvililaaji vina vali ku Yelusalemu kula. 27 Awo vaveene valamulaga kigaha ndeeno. Shiyooli kiija, visakulwa kivatanga, kwa kiiva avahuvililaaji vina vasili Vayahuudi, vahanjile na Vayahuudi mu mota sina sishilila kwa Vayahuudi. Ndeeno, avahuvililaaji vina vasili Vayahuudi, visakulwa kivatanga aVayahuudi kwa fiinu fyanave. 28 Pina nikhava naamala insengo iyo iya kivapeela avahuvililaaji va ku Yelusalemu umutango ugo, nikhashilila nivaloleele omwe pina niiluta ku Hisipaniya. 29 Nimeenye kiija, pina nikhava kunyeenyu na kikhala lumo, uKilisito akhaluyimiilila mandu uluhaavi lwesu.

30 Vahuvililaaji vayangu, kilungana kwesu nu Mutwa weesu uYeesu Kilisito, na kilingana nu lugano luna uNumbula uMunofu atupeelile, nikivalomba mandu kwa numbula yangu yoona kiija, mujimbaje kihanga noone kinifuunyila kwa Nguluvi. 31 Nifunyilaji kiija, avaanu vina vasikimuhuviilila uYeesu Kilisito kula ku nyi ya Yudeya, vasikhanigahilaga fivi one. Khanji fuunyaji, baheene avahuvililaaji va Kilisito kula ku Yelusalemu, vayiitishe kiposheela umutango guna nikivatwalila. 32 Ndeeno nda uNguluvi agane, nikhayinsa kunyeenyu kwa wushendeefu mandu, baheene nive nu luhaavi ulwa kituuya lumo noomwe. 33 Nikimulomba uNguluvi yuna ikivapeela uwulindamafu, ave lumo noomwe woona! Amina.