Musikhavahigaji avahuvililaaji vayeenyu
14
1 Muyanushilaji umuyeenyu yuna asikhangeele mu lihuuvi,
musikhakhananiaji nawo ulwa mahiiva gaakwe gina gipungana na mahiiva geenyu.
2 Umuunu yuna akhangeele mu lihuuvi iiwona kiija akwiliile kiilya ishiinu shoshoona,
leelo uyunji yuna asikhangeele mu lihuuvi,
iiwona kiija atawuliilwe kiilya mboga hela.
3 Uyo yuna iilya shoshoona shila,
asikhamusalaga yuna iilya mboga hela,
woope yuna iilya imboga hela,
asikhamuhigaga yuna iilya shoshoona shila,
kwa kiiva uNguluvi amuyanushiile shina ashwali.
4 Owe ungaya wutawulilwa wowoona uwa kimuhiga umuvanda wa muunu uyunji.
Umutwa waakwe yumwene ameenye nda umuvanda waakwe wánangania awu asinangeenie.
Umuvanda uyo akhava iigaha ngaja shina yisakulwa,
kwa kiiva uMutwa uYeesu akwiliile kimugaha ave iigaha ndeeno.
5 Umuunu yumonga ikilwaga ulusiku lumonga luna wutupikho kishila ulusiku ulunji,
umuunu uyunji akwiliile kisaaga insiku soona kiija silingaanile.
Shila muunu ayinatilaje shina ikigaaga mu numbula yaakwe kiija manofu.
6 Umuunu yuna iiwona kiija ilisiku limonga kiiva lina wutupikho,
iigaha ndeeno kwa lugulumilo ulwa kimushendeefya uMutwa uYeesu.
Woope uyo yuna iilya shoshoona,
iigaha ndeeno kwa lugulumilo lwa kimushendeefya uMutwa uYeesu,
kwa kiiva asiilya shoshoona bila kimuhonjesa uNguluvi.
Woope yuna iilya imboga hela,
iigaha ndeeno kwa kiiva ya kimushendeefya uMutwa uYeesu,
woope akhava ikimuhonjesa uNguluvi ndeeno.
7 Niijova ndeeno kwa kiiva,
kusiina umuhuvililaaji mu omwe yuna iikhala kwa kiiva yaakwe yumwene,
wala yuna iifwa kwa kiiva yaakwe yumwene.
8 Uluhaavi tili wuumi awu pina tiifwa,
ulugulumilo lwesu kimusenjela uMutwa.
Lino,
nda tili wuumi awu tifwile,
ose tili vaanu vaakwe.
9 UKilisito wáfwisaga khanji wáfyukhaga,
lino apili muumi,
baheene umwene ave Mutwa wa vaanu woona,
vina vafwile na vina wuumi.
10 Lino,
kwashi avanji mu omwe vikivahiga avahuvililaaji avayaanave?
Khanji,
kwashi avanji vikivasala avahuvililaaji avayaanave?
Kiiva,
ose woona tikhayiima pa shitengo sha Nguluvi,
kiija tihigwe.
11 Ngaja shina yiyandiikhwe mu Mayandikhwa aManofu kiija,
“UMutwa uNguluvi ilogola kiija,
‘Shiyooli,
shila muunu akhafugama panyangu,
na shila muunu akhalogola kwa lumili lwakwe kiija,
one nili Nguluvi.’”a
12 Ndeeno,
shila muunu munyeenyu,
akhayikhoona yumwene pa Nguluvi,
imola saakwe.
Usikhavakuvasaaga avahuvililaaji vayaago
13 Ndeeno,
tileshe kihigana.
Tilamule kilekha kigaha shoshoona shina shikimupinsa umuhuvililaaji muyeesu akuvale awu agahe uwunansi.
14 Nimeenye kishilila amamanyiso ga Mutwa uYeesu kiija,
kusiina ishakiilya shoshoona isha mwikho.
Leelo,
umuunu nda iiwona kiija ishakiilya shimonga mwikho,
apo baheene ishakiilya isho shiiva mwikho kwa mwene.
15 Ndeeno,
nda owe ukimupinsa umuhuvililaaji muyaago kisugumilwa mandu mu numbula yaakwe pina wiilya ishakiilya shimonga,
apo baheene usiive ungaya lugano kwa muyaago uyo.
Ino,
usikhayitikhaga kiija,
kwa nsila ya shakiilya shaakho isho,
umuyase umuunu yuna uKilisito wámufwililaga!
16 Lino,
owe usikhagahaga ishiinu shina ukishaaga shinofu,
shive shiisalwa na vanji kiija shiinu shivi.
17 Injowo sa Wutwa wa Nguluvib sisili njowo sa kiilya awu kiingʼwa,
leelo njowo sa kigaha uwugolofu,
kiiva nu wulindamafu na kikhala kwa wushendeefu,
ago goona gisenjekha kwa mutango gwa Numbula uMunofu.
18 Woope yuna ikimusenjela uKilisito shina ndeeno,
ikimushendeefya uNguluvi,
khanji ifwaya pa vaanu.
19 Ndeeno uluhaavi loona tijimbaje kisenga ifiinu fina fikitugaha tikhale lumo kwa wulindamafu na fina fikitutanga kijinisania mu lihuuvi.
20 Usikhanangaga insengo ya Nguluvi kwa kiilya ishakiilya shoshoona shina wisakula.
Shiyooli,
ifyakiilya fyona fiyiitikhwa kiliiwa,
leelo lusili lunofu kwa muunu kiilya ishakiilya shoshoona,
shina shikwiliile kimujidiwusa umuyine.
21 Shiba uleshe kiilya inyama,
awu kiingʼwa idivaayi,
c awu kisenga shoshoona shina shikimupinsa umuhuvililaaji muyaago ajidiwushe.
22 Lino owe,
shila shina wihuviilila ulwa lujowo ulo,
luve lujowo lwakho nu Nguluvi hela.
Shiba umuunu yuna asikiyihiga pina iigaha ishiinu shina ikishaaga kiija shili wunofu.
23 Leelo,
yuna ana muninu kwa njowo sa shakiilya shina iilya,
asiihigwe nu Nguluvi kwa kiiva ihiiva kiija lila lina iigaha,
livi pa Nguluvi.
Umuunu nda agahe ishiinu shoshoona shina asihuviilila kiija sha shiyooli,
apo baheene asiive wáagaha uwunansi.