Valuumi 13

Vatiilaji avayimililaaji va selekhaali

1 Shila muunu isakulwa kivatuna avayimililaaji va selekhaali. Mumanyaje kiija, uwutawulilwa woona waanave uwa kitema, wiihuma kwa Nguluvi, khanji woona vavishiilwe mu wutawulilwa nu mwene. 2 Ndeeno, umuunu yoyoona yuna ikhaana uwutawulilwa waanave, imenana nu Nguluvi yuna wávaviikhaga mu wutawulilwa uwo. Woope yuna imenana nawo, akhahigwa. 3 Avayimililaaji vasikimutiisa umuunu yuna iigaha amanofu, leelo yula yuna iigaha amavi. Ndeeno, nda usigeene kitiisiwa nu muyimililaaji, sengaga amanofu, woope asikusufye. 4 Mumanyaje kiija umuyimililaaji wa selekhaali muvanda wa Nguluvi, insengo yina isenga yina lutono kunyeenyu. Leelo nda usenje amavi, utiilaje! Shiyooli umuyimililaaji uyo akwiliile kitumila ngufu, akulafye. Kigaha ndeeno, umwene akhava ikwisa inkhalasi ya Nguluvi kwa munansi. 5 Lino, avaanu visakulwa kivatuna avayimililaaji. Musikhavatunaji hela kwa kiiva ya kiyitiila inkhalasi ya Nguluvi, leelo kwa kiiva omwe mumeenye mu numbula seenyu kiija, uNguluvi idobokha muveesaje mwigaha ndeeno.

6 Khanji, lulwene kiija muhomba ikhoodi. Avayimililaaji va selekhaali vina vijimba kisenga insengo yaanave, vikimusenjela uNguluvi yumwene. 7 Ndeeno, gahaji gala gina avayimililaaji visakulwa kigahilwa. Nda mwidaayiwa ikhoodi, hombaji, nda wuve wushulu, woope hombaji, khanji nda kuna muunu yumonga wa kitunwa, woope mutunaji.

Ulugano lulwene lukwilano lwa ndaji sa Nguluvi

8 Musikhadayiwaaji shoshoona nu muunu yoyoona, leelo muve mwidaayiwa kiganana, kwa kiiva yuna ikimugana umuyine iiva iigaha ngaja indaji shina siijova. 9 Loleela, indaji siijova, usikhawafukhaga, usikhabudaga, usikhahiijaga, na usikhadobokhaga ishiinu sha muyaago. Leelo, indaji isi ni sinji soona sili mukhati ya ndaji iyo yimo yina yiijova, “Umuganaje umuyaago ngaja shina uyiganile yuuwe.” 10 Umuunu yuna ikimugana umuyine, asikimugahila amavi. Ndeeno, umuunu yuna ikivagana avaanu avanji, iiva iigaha goona ngaja indaji shina siijova.

11 Muve mwigaha aga, kwa kiiva mumeenye kiija, ilisala lya kilamukha lyafikha. Loleela, uluhaavi lwa wukulukho weesu luli nkholeela kishila ulwamwandi, pina tayansaaga kimuhuviilila uMutwa uYeesu. 12 Lino ishilo shaasila, na ilisiku ilipya lihejeela kiyansa. Ndeeno, tileshe injowo soona imbi sina siigahwa mu nshiisi, titoole amahomelo ga mu wuvalafu aga kilwilana. 13 Tive ni njendo inofu ngaja shina yisakulwa kwa vaanu vina viikhala mu wuvalafu. Khanji, tisikhaveesaga vaanu va kigaha ishiwungo sha wupafu uwuvi nu wugaasi. Tisikhagahaga uwushemi wowoona, wala kigaha injowo isa nsoni, wala kiiva vanya libaatu awu kiiva vanya shooyo. 14 Leelo lino, mu wiikhasi weenyu woona, mulongosewaajwe nu Mutwa uYeesu Kilisito, musikhayitikhaji hata padoodo kilongosewa na wiikhasi weenyu uwa wunansi na kiwuyinatila uwupafu uwuvi uwa muvili.