Uwiikhasi weenyu wuve shadanda kwa Nguluvi
12
1 Lino vahuvililaaji vayangu,
kwa kiiva uNguluvi ikitusungupila,
ndeeno nikivalomba mandu kwa numbula yangu yoona kiija,
muyihumye muve ngaja shadanda isha nkhanu inyuumi,
a shina shivalasiiwe,
shina shikimushendeefya uNguluvi.
Kigaha ndeeno kukwene nsila ya shiyooli iya kimufuunya uNguluvi.
2 Musikhahwananisaaji ingʼoma sa vaanu va mu nyi iyi,
leelo mulekhaji uNguluvi aseetule inumbula seenyu,
kiija muve na mahiiva amapya.
Apo baheene musigamanye gina agageene uNguluvi.
Uluganulo lwakwe,
musigamanye amaswi amanofu gina gakhamiliishe,
khanji gina gikimushendeefya.
3 Lino,
uKilisito anipeelile imota nive mwanandeje waakwe.
Ndeeno,
nikivajovela omwe woona kiija,
shila muunu asikhayiwonaga kiija,
ifwaya kishila shina ashwali,
leelo aveesaje nu wumanyi.
Muve muhiiva kiija,
shila muunu apeliilwe ilihuuvi lilila nu Nguluvi.b
4 Ngaja shina mumeenye kiija,
umuvili guli gumo,
leelo guna filungo finshi,
shila shilungo shina nsengo yaakwe.
5 Shiisho ndeeno na yuuse.
Ose tili vinshi,
leelo tili muvili gumo kwa kilungana kwesu nu Kilisito.
Mu muvili gwakwe,
shila muunu ali shilungo kwa muyine,
na ana nsengo yaakwe.
6 Ndeeno,
tina fipeelwa fina fili paayo paayo,
ngaja shina uNguluvi wátupeelaga kwa lusungu lwakwe.
Umuunu yuna apeliilwe ishipeelwa sha wukuwamalago,
ashisenjele ishipeelwa isho kilingana ni lihuuvi lyakwe.
7 Umuunu yuna apeliilwe ishipeelwa sha kivasenjela insengo avayine,
avasenjelaje wunofu.
Woope yuna apeliilwe ishipeelwa sha kimanyisa,
amanyisaaje wunofu.
8 Umuunu yuna apeliilwe ishipeelwa sha kivakhangasa avayine,
avakhangasaaje.
Umuunu yuna apeliilwe ishipeelwa isha kivapeela avaanu ifiinu,
avapeelaje kwa numbula yoona.
Umuunu yuna apeliilwe ishipeelwa sha wulongosaaji,
alongosaaje kwa wujimfu mandu.
Woope umuunu yuna apeliilwe ishipeelwa sha kivasungupila avayine,
avasungupilaje kwa wushendeefu.
Mugananaje
9 Vaganaji avayeenyu kwa numbula mbalafu.
Muleshe khabisa kigaha uwunansi,
leelo muveesaje mwigaha amanofu uluhaavi loona.
10 Mugananaje yuumwe kwa yuumwe,
ngaja vanyalukholo.
Shila muunu ajimbaje kimutiila umuyine.
11 Musikhaveesaji woolo kisenga insengo ya Nguluvi,
leelo uNumbula uMunofu avatanje kiyitenekha kisenga insengo iyo kwa numbula yoona.
Musenjelaji uMutwa uYeesu.
12 Shendeevaji kwa kiiva muhuviilila kiposheela gala amanofu gina uNguluvi wávatahisaaga.
Gugumilaji pina gavayinsila amalava na yitenekhaji kimufuunya uNguluvi.
13 Vatangaji avahuvililaaji vayeenyu mu fiinu fina vashepushiilwe,
khanji vaposheelaji avahensa kwa wushendeefu,
mu nanda seenyu.
14 Vafunyilaji avaanu vina vikivalafya,
baheene uNguluvi avayimiilile awo,
musikhavafunyilaji kiija vayiijilwe.
15 Mushendeevaje lumo nawo vina vishendeeva,
khoolaji lumo nawo vina vikhoola.
16 Khalaji kwa wulindamafu yuumwe kwa yuumwe.
Musikhayitumfyaji,
leelo yiyisaaji na kiiva mwitanjilisania na vaanu va pansi,
khanji musikhayiwonaji kiija,
muna luhala mandu.
17 Avaanu nda vavagahile wuvi,
omwe musikhavahombesaaji kwa kivagahila uwuvi.
Leelo,
hivililaji tangusiina na kisenga gala gina giwonekha manofu kwa vaanu woona.
18 Mujimbaje kigaha lyolyona lina omwe mukwiliile,
baheene muve nu wulindamafu na vaanu woona.
19 Vagani vangu,
musikhahombesaaji,
leelo muleshelaji uNguluvi agahe ago.
Niijova ndeeno kwa kiiva mu Mayandikhwa aManofu uMutwa uNguluvi iijova,
“One yuune yuna nihombesa.”c
20 Khanji,
aMayandikhwa aManofu giijova ulwa kilekha kihombesa kiija,
“Nda umulugu waakho ana njala,
mupeelaga ishakiilya.
Khanji nda ana nkhawu,
mupeelaga isha kiingʼwa.
Nda ugahe ndeeno,
usiive ngaja wámulundishila umukhala gwa mooto,
guna guveekha pa mutwe gwakwe.”d
21 Usikhamenwagwa nu wunansi wuna wigahilwa na vaanu,
leelo uwunansi uwo uwumenaje kwa kivagahila amanofu.