Valuumi 11

UNguluvi asivakhaanile avaanu vaakwe aVaisilaheli

1 Lino niiposa, wuli, uNguluvi avakhaanile avaanu vaakwe? Ndaali, hata padoodo! Yuune one, nili Muisilaheli wa shisafi sha Abulahamu, uwa shikholo sha Benyamini. 2 UNguluvi asivakhaanile avaanu vaakwe vina wávabagulaga kihuma inyi pina asinayiwumbe. Aasi, musimeenye aMayandikhwa aManofu shina giijova ulwa mukuwamalago uEliya, shina wámungʼulilaga uNguluvi ulwa mola iya Vaisilaheli? 3 Wáajova, “Mutwa, avaanu ava vavabuda avakuwamalago vaakho, na kibomola uluvala ulwa kihumisa ishadanda kunyaakho. Lino ndeeni, nisigeele yuune duguli, na yuune visakula kinibuda!” 4 Leelo uNguluvi wámugomosesaaga wáajova shishi? Wájovaga kiija, “Niyisigasiise avagoosi magana mashumi fungati (7,000), vina vasikimufuunya uBaali.”

5 Hata lino ndeeni shilushwali, vasigeele vaanu vasheefu hela vina uNguluvi wávabagulaga kwa lusungu lwakwe. 6 Vabagulwagwa kwa lusungu lwa Nguluvi, ndeeno vasikulusiwa kwa kiiva ya njendo saanave. Nda yaali yive vikulusiwa kwa kiiva ya njendo saanave, apo ulusungu nda lusaava lusungu khanji. 7 Ndeeno yili ndeeni, aVaisilaheli visakulaga kivasiwa uwugolofu pa Nguluvi, leelo vasikhavasiiwe. Ila vavala hela vina vabagulwagwa nu Nguluvi, vaveene vavasiwaagwa. Avanji woona vina vasigalaga, uNguluvi wávagahaga vave vasiyinatila. 8 Ngaja shina yiyandiikhwe mu Mayandikhwa aManofu kiija,

“UNguluvi wávagahaga vave ni numbula inyuumu,

wávadindaga ameeho kiija vasikhaloleelaga,

khanji wávadindaga amakutu kiija vasikhapulikhaga.

Shivashwali mbakha iminsiyaano.”

9 Woope umutwa uDawudi wájovile kiija,

“Pina vali mu shiwungo shaanave,

uNguluvi ashiseetule shive

mutego gwa kivapiita na kivalafya.

10 Ameeho gaanave, gave mu nshiisi,

kiija vagombole kiloleela shoshoona khanji,

na magongo gayiteneshe kiidova

kiiva ya malava gaanave.”

Kikhaana kwa Vaisilaheli kuveele mota kwa vina vasili Vaisilaheli

11 Lino niiposa khanji, wuli, aVaisilaheli vakuvalaga, vaagwa na kilalila khabisa? Ndaali, hata padoodo! Leelo, kwa kiiva ya kikhaana kwanave, uwukulukho wavayinsila hata avaanu vina vasili Vaisilaheli. Kwa nsila iyo, uNguluvi wágahaga ndeeno kiija aVaisilaheli vave ni lihaahi ilya kipata uwukulukho, ngaja shina vapataga vina vasili Vaisilaheli. 12 Lino nda avaanu vina vasili Vaisilaheli vasungupilwagwa, kwa kiiva aVaisilaheli vamukhaanaga uMukulusaaji, lino aVaisilaheli vakhasungupilwa mandu, pina vakhava vaatina na kimuhuviilila uMukulusaaji.

13 Lino, nilogola noomwe vaanu vina musili Vaisilaheli. UNguluvi wánifilikhaga nive mwanandeje weenyu, one nikiyitupikha insengo iyo yina uNguluvi ikivasenjela omwe kishilila kunyangu. 14 Nina luhuviililo ulwa kiija, pamonga aVaisilaheli vayangu, vasiive ni lihaahi ilya kipata uwukulukho ngaja omwe shina mwapataga, kiija vamonga mu veene, vakulusiwe. 15 AVaisilaheli pina vamukhaanaga uMukulusaaji, uNguluvi woope wávakhaana aveene, wápulinkhana na vaanu vina vasili Vaisilaheli. Ndeeno, uluhaavi pina uNguluvi akhavayiitikha aVaisilaheli khanji, yikhava ngaja avaanu vina vafwile, vafyukha! 16 Umuunu nda ahumye kwa Nguluvi uwutine wa ngano uwa wutasi mu shijelo ishinofu, apo baheene uwutine woona wusiive wavalasiwa. Khanji, nda indela sa miseyituni sive nofu, hata na mansamba gaakwe goope, gasiive gavalasiwa.

17 Lino, amansamba aganji gadumulwagwa na mansamba aganji ga museyituni ugwa mu lihakha, gavyalwagwa paakhati naakhati ya mansamba ga wutasi. Amansamba goona giipata ishakiilya kihuma mu ndela sisila, isa museyituni. 18 Ndeeno, omwe musikhasalaji amansamba gina gavyaliilwe. Musikhayitumfyaji, leelo manyaji kiija indela sisikivahuviilila omwe, leelo omwe mukisihuviilila indela. 19 Pamonga mukwiliile kijova kiija, “Amansamba ago gadumulwagwa, baheene one nilunganisiwe apo pina gadumulwagwa.” 20 Ilyo lya shiyooli. Amansamba ago gadumulwagwa kwa kiiva gasihuviilila, na yuumwe muli ngaja shina mushwali, kwa kiiva mwihuviilila. Ndeeno, musikhayitumfyaji, leelo mumutiilaje uNguluvi. 21 UNguluvi nda asikhavasungupiile aVaisilaheli vina vali ngaja amansamba aga wutasi aga museyituni, wuli, mwihiiva kiija angavasungupila omwe?

22 Loleeli shina uNguluvi ikivagahila amanofu avaanu avanji, na shina ikivalafya mandu avaanu avanji kwa malava makhome. Ikivalafya vina vakhaanaga kimuhuviilila, na ikikugahila amanofu owe, nda usiyiteneshe kimuhuviilila. Leelo nda uleshe kimuhuviilila, na yuuwe ukhadumulwa. 23 Woope aVaisilaheli awo, nda vatine na kimuhuviilila uNguluvi, vakhalungwa khanji mu mansamba, kwa kiiva uNguluvi akwiliile kivalunganisa khanji. 24 Omwe vina musili Vaisilaheli, muli ngaja mansamba ga museyituni gwa mu lihakha. Mwadumulwagwa na kilunganisiwa ku museyituni guna guvyaliilwe, isho shiinu shihensa kisenjekha. Mumanyaje kiija, yisili nsengo nkhamu kwa Nguluvi kiwuyiila kivalunganisa aVaisilaheli, vina vali ngaja mansamba ga museyituni guna gusakulwa, ku mupishi gwakwe!

UNguluvi isungupila avaanu woona

25 Vahuvililaaji vayangu, nisakula mumanye wunofu imola sa Nguluvi sina sikhandi sifihiilwe, kiija musilaave muyihuviilile uluhala lwenyu hela. AVaisilaheli vamonga vakhandi ni numbula nyuumu, mbakha lwakwilana uluvaso lwa vaanu luna uNguluvi wáluviikhaga kwa vina vasili Vaisilaheli, luyanushila uwukulukho. 26 Kwa nsila iyo, aVaisilaheli woona vakhakulusiwa. Ngaja shina yiyandiikhwe mu Mayandikhwa aManofu kiija,

“UMukulusaaji akhayinsa kihuma ku Sayuni,

akhashigaha ishisafi sha Yaakobo shileshe kimukhaana uNguluvi.

27 Apo baheene ulufingo lwangu kuveene lukhakwilana,

pina nikhavasaajila uwunansi waanave.”

28 AVaisilaheli pina vakhandi vikhaana khaana iMola iNofu ulwa Yeesu Kilisito, vayiviikhaga kiiva valugu va Nguluvi. Leelo iliswi ilyo, lyava lutono kwa kiiva yeenyu, omwe vaanu muna musili Vaisilaheli. Hata ndeeno, uNguluvi apishaanali avageene awo, kwa kiiva akhandi avabagwile avambuyaanave na kifinga nawo. 29 UNguluvi nda avabaagule avaanu vaakwe na kivayimiilila, asikwiliile kiseetukha. 30 Ulwamwandi omwe musikhandi mukimutiila uNguluvi, leelo lino musungupiilwe nu Nguluvi, kwa kiiva aVaisilaheli vasikhamutiilile. 31 Shiisho ndeeno, kisaajilwa kwenyu omwe, kukhavagaha kisaajilwa aveene, hata nda vasikimutiila uNguluvi uluhaavi ulu. 32 Avaanu woona vakhaanaga kimuhuviilila uNguluvi, woope wávadindilaga mu wunansi waanave, baheene avasungupile avaanu awo woona.

UNguluvi atunwajwe

33 Haa! Yu naani yuna akwiliile kimanya shina wushwali uwusi wuna wungaya shijelo, uluhala nu wumanyi wa Nguluvi! Khanji, yu naani yuna akwiliile kimanya uwulamulaaji waakwe awu kitaviilila insila saakwe!

34 “Kusiina umuunu yuna agameenye amahiiva ga Mutwa uNguluvi,

khanji kusiina umuunu wa kimutanga amahiiva.”

35 “Yu naani umuunu yuna wámukhopelaga uNguluvi ishiinu,

shina umwene uNguluvi isakulwa kihomba?”

36 UNguluvi yumwene yuna wáwumbaga ifiinu fyona.

Na kishilila umwene, ifiinu fyona fiyiteneeshe kiiva fikwali,

khanji ifiinu fyona fikwali kwa kiiva ya wutupikho waakwe.

UNguluvi atupikhwe shiluta! Amina.