Valuumi 10

1 Vahuvililaaji vayangu, nidobokha mandu mu numbula yangu kiija, aVaisilaheli vakulusiwe. Ilyo lilyene lina nikivafuunyila mandu kwa Nguluvi.2 Nikivajovela omwe kiija, avaanu awo vana ludali mandu kimusakula uNguluvi, hata ndeeno vasinaamanye shina uNguluvi idobokha vamusakule.3 Aveene vasikiyiyinatila insila yina uNguluvi ikivavasa avaanu kiiva vagolofu, kwa kiiva vasiyimeenye, khanji vifwata insila yaanave iya kivasiwa uwugolofu, kwa kisiyinatila indaji sa Musa.4 UKilisito wákwisaaga indaji soona sa Musa, baheene avaanu woona vina vikimuhuviilila, vavasiwe kiiva vagolofu pa Nguluvi.

Avaanu woona vakwiliile kikulusiwa

5 UMusa wáyandikhaga ulwa kiiva mugolofu pa Nguluvi kwa kisiyinatila indaji kiija, “Umuunu yuna iyinatila goona gina galajisiiwe mu ndaji, akhava muumi.” 6 Leelo, ulwa kivasiwa kiiva mugolofu pa Nguluvi kwa kimuhuviilila, uMusa wájovile kiija, “Musikhayiposaaji mu numbula seenyu kiija, ‘Yu naani yuna akwiliile kitaana mbakha kifikha kushaanya kwa Nguluvi?’” Kijova ndeeno kuli ngaja kimulomba uKilisito ayiishe pansi apa pa nyi. 7 “Wala kiyiposa kiija, ‘Yu naani yuna akwiliile kiyiikha mbakha kwa vina vafwile?’” Kijova ndeeno kuli ngaja kisakula kimufyusa uKilisito. 8 Leelo, aMayandikhwa aManofu giijova, “Iliswi lya Nguluvi lili nkholeela baaho noowe, lili mu mulomo gwakho na mu numbula yaakho.” Lulwene kiija, iMola iya kimuhuviilila uKilisito, yina tikiyikhoma. 9 Imola iyo kiija, nda ulogole kwa mulomo gwakho kiija, “UYeesu yumwene Mutwa,” na kihuviilila mu numbula yaakho kiija, uNguluvi wámufyusaaga kihuma kwa vina vafwile, ukhakulusiwa. 10 Ndeeno, umuunu nda ahuviilile kwa numbula yaakwe, baheene ivasiwa kiiva mugolofu pa Nguluvi, nda alogole kwa mulomo gwakwe yumwene, baheene ikulusiwa.

11 AMayandikhwa aManofu giijova, “Shila muunu yuna ikimuhuviilila, asikhayegukha kaa.” 12 Amaswi ago giwonensa kiija, uMutwa asibaniilila aVayahuudi awu vina vasili Vayahuudi. Kuna Mutwa yumo hela kwa vaanu woona. Umwene munofu mandu kwa vaanu woona vina vikimulomba. 13 Ngaja shina yiyandiikhwe mu Mayandikhwa aManofu kiija, “Shila muunu yuna ikilishemeela ilitaawa lya Mutwa kiija akulusiwe kihuma mu wunansi, akhakulusiwa.”

14 Lino avaanu vakwiliile wuli kimufuunya, nda vasikimuhuviilila? Khanji vakwiliile wuli kimuhuviilila, nda vasipulikha imola yaakwe? Khanji vakwiliile wuli kipulikha imola yaakwe, nda vasiikhomwa? 15 Khanji, avaanu vakwiliile wuli kiluta kikhoma imola iso, nda vasifiliikhwe? Ngaja shina yiyandiikhwe mu Mayandikhwa aManofu kiija, “Kiyinsa kwa muunu yuna ileeta iMola iNofu, kushendeefya mandu avaanu!” 16 Hata ndeeno, lusili kiija aVaisilaheli woona vayitikhaga iMola iNofu iyo iya Yeesu. Umukuwamalago uIsaaya wájovile kiija, “Wee Mutwa, yu naani yuna ahuviliile imola seesu?” 17 Ndeeno, avaanu vakwiliile kimuhuviilila uKilisito, nda vapulishe imola sa Kilisito. Leelo vakwiliile kipulikha hela, nda imola iyo yikhomwe.

18 Ino, nda shilushwali ndeeno, niiposa ndeeni, wuli, aVaisilaheli vasinawaahaje kipulikha imola iyo? Shiyooli vakhapuliishe, kwa kiiva aMayandikhwa aManofu giijova,

“Imola saanave sapulisikhaga mu nyi soona,

na maswi gaanave gafikhaga mbakha kuwudugo wa nyi soona.”

19 Nipose iliposo ilinji khanji. Wuli, aVaisilaheli vaganaga kipulikha imola iyo, vasikhayimeenye? Shiyooli kiija vamanyaga, kwa kiiva uluhaavi lwa Musa, uNguluvi wávajovelaga aVaisilaheli kiija,

“Nikhavagaha omwe muve nu wiifu

kwa vaanu vina vasili vaanu vangu.

Avaanu vina vasimeenye shoshoona,

nikhavagaha omwe, muve mukivakhalalila mandu.”

20 Khanji, umukuwamalago uIsaaya ilogola kwa wukhangafu amaswi ga Nguluvi kiija,

“Avaanu vina vasikinisakula,

vaveene vanyaaga.

Na avaanu vina vasiiposa imola sangu,

nikiyiwonensa kuveene.”

21 Leelo ulwa Vaisilaheli, uNguluvi wájovaga kiija,

“Wiila, nikhandi nisakula kivatinia kunyangu

avaanu vina vasikinitiila,

khanji, vanya lukhaania.”