Valuumi 9

UPawulo ana wuvafi kwa kiiva ya Vaisilaheli

1 UKilisito ameenye kiija, gina nilogola lino ga shiyooli hela. Hata inumbula yangu yina yilongosewa nu Numbula uMunofu, yoope yikinibedela kiija, nisilogola wudehi. 2 Shiyooli, one nisugumiilwe mandu na kiiva nu wuvafi wuna wusiisila mu numbula, 3 kwa kiiva ya vaanu va nyi yangu. Yaali yive lugano lwangu, naava niyiitikha kiyiijilwa yuune na kiiva kutali nu Kilisito, nda kigaha ndeeno kwali kuve kukivatanga avalukholo lwangu awo, vamuhuviilile uKilisito. 4 Awo vaveene Vaisilaheli, avaanu vina uNguluvi wávabagulaga vave vanaakwe, wávawonensaaga uwutupikho waakwe na wáfingaga nawo. Khanji wávapeelaga indaji saakwe, lumo ni naahiso saakwe, wávawulanisaaga shina yisakulwa vamufuunyaje. 5 AVaisilaheli awo vaveene shisafi sha vambuya ava Abulahamu, uIsaaka nu Yaakobo. Shimuvili, hata uKilisito woope Muisilaheli. UKilisito yumwene Nguluvi, Mukhome wa fyona, asufisiwaajwe shiluta! Amina.

6 Hata ndeeno, nisiijova kiija uNguluvi wápotwagwa kikwisa ulutaahiso lwakwe kwa Vaisilaheli. Ndaali! Nilogola ndeeni kwa kiiva vasili vaanu woona ava mu nyi ya Isilaheli, Vaisilaheli va shiyooli, 7 wala yisili kiija ishisafi shoona sha Abulahamu vaveene vaana va shiyooli va Abulahamu. Ndaali! Ila, uNguluvi wámutahisaaga uAbulahamu wáaja, “Ishikholo shaakho shikhahuma kwa Isaaka.” 8 Lulwene kiija, avaana va Nguluvi vasili vaana woona va Abulahamu vina vasawaagwa shimuvili, leelo vanaakwe vina vasawaagwa kilingana nu lutaahiso lwa Nguluvi. 9 Ulutaahiso lulwene lwijova ndeeni, “Nikhayinsa umwakha guna gwiyinsa uluhaavi ngaja ulu, uSaala akhava ana mwana umudiimi.”

10 Khanji lisili liilyo hela, leelo woope uLebeka wásavaga nu mbuyeesu uIsaaka, amapasa ga vaana vavili. 11-12 Hata ndeeno, pina asinaasave amapasa ago, khanji pina vasinaagahe shoshoona, shive shinofu awu shivi, uNguluvi wámujovelaga uLebeka wáaja, “Umukhome asiive ikimusenjela umunangʼana.” Ndeeno yiwonensa kiija, uNguluvi ikimubaagula umuunu kilingana nu lugulumilo lwakwe, yisili kilingana ni njendo sa muunu yula. 13 Ngaja shina yiyandiikhwe mu Mayandikhwa aManofu kiija, “UYaakobo namuganaga, leelo uEsawu namukhaanaga.”

UNguluvi iigaha ngaja shina ageene

14 Lino tijove shi? Tijove uNguluvi asili wa shiyooli? Ndaali, hata padoodo! 15 UNguluvi wámujovelaga uMusa wáaja, “One nikimusungupila umuunu yuna nigeene kimusungupila, khanji nikimutanga umuunu yuna nigeene kimutanga.” 16 Ndeeno, uNguluvi yumwene ilamula kimusungupila umuunu, yisili kwa ludali awu kwa kigana kwa muunu yumwene. 17 Khanji, mu Mayandikhwa aManofu uNguluvi wámujovaga uFalawo, umutwa wa Misili, wáaja, “Nakuviikhaga uve mutwa, kiija nivawonense avaanu ingufu yangu kishilila kunyaakho, baheene ilitaawa lyangu live liyalalisiwa mu nyi soona.” 18 Ndeeno, uNguluvi ikimusungupila umuunu yoyoona yuna idobokha kimusungupila, na idobokha kimugaha umuunu ave ana numbula nyuumu, ikimugaha ave ndeeno.

19 Lino, umuunu yumonga anganiposa kiija, “Nda yive ndeeno, kwashi uNguluvi ikitupiikha? Yu naani yuna akwiliile kisivila shina isakula uNguluvi?” 20 Owe yuuwe naani, uve wa kimenana nu Nguluvi? Wuli, ishiinu shina shiwumbiilwe shikwiliile kimenana na yuna ashiwumbile na kiposa kiija, “Kwashi waniwumbaga ndeeni?” 21 Yisili kiija umuwumba figaana ana wutawulilwa uwa kisenjela ililongo shina ageene? Akwiliile kiwumba ifigaana fivili kihuma mu lilongo liilyo, ishigaana shimo shive sha nsengo imbaagule, ishinji shive sha nsengo sa shila lisiku.

22 Shilushwali kwa Nguluvi. Wásakulaga kivawonensa avaanu inkhalasi yaakwe na kivawonensa ingufu saakwe, leelo wávagugumilaga mandu avaanu vina visakulwa kibudwa. 23 Wágahaga ndeeno, kiija avawonense uwutupikho waakwe uwukhome kwa kiiva ya vaanu vina wávayandaalaga kiyanushila ulusungu lwakwe. Wágulumilaga kihuma pawukuulu kiija tipate uwutupikho lumo na woope. 24 Ose vaveene vina uNguluvi wávashemeelaga, yisili kihuma mu Vayahuudi hela, leelo na kihuma kwa vaanu vina vasili Vayahuudi. 25 Ishi shisheene shiinu shina uNguluvi ilogola mu litaafili lya mukuwamalago uHoseya kiija,

“Aveene vina vasili vaanu vangu,

nikhavashemeela ‘vaanu vangu.’

Avaanu vina nisivageene,

nikhavashemeela ‘vagani vangu.’”

26 Khanji yijovile kiija,

“Pala pina vajowaagwa kiija, ‘Omwe musili vaanu vangu,’

apo baheene vakhava vishemeelwa ‘vaana va Nguluvi yuna muumi.’”

27 Khanji umukuwamalago uIsaaya alogwele ulwa Vaisilaheli kiija,

“Hata nda aVaisilaheli vinshi ngaja luhankha lwa mu bahali,

hata ndeeno vina vakhakulusiwa, vasheefu.

28 UMutwa uNguluvi akhavapeela ululawo khamili avaanu va nyi soona bila kidiila

ngaja shina wájovaga.”

29 Yili ngaja shina wájovaga umukuwamalago uIsaaya ulwamwandi kiija,

“Nda asikhandi uMutwa uMunya Ngufu Soona ashisigeese ishisafi sha Vaisilaheli,

ndi taava tisilile ngaja avaanu va ku Sodoma na ku Gomola.”

Ishiinu shina shavapinsaaga aVaisilaheli kiiva vagolofu pa Nguluvi

30 Lino, tijove shishi ulwa njowo iso? Avaanu vina vasili Vayahuudi vasikhasakwile kivasiwa kiiva vagolofu pa Nguluvi, leelo uNguluvi wávavasaaga avaanu kiiva vagolofu kwa kimuhuviilila uKilisito. 31 Leelo aVayahuudi vina vakhandi vijimba kisiyinatila indaji sa Musa, kiija vavasiwe kiiva vagolofu, vasikhavasiiwe kiiva vagolofu. 32 Kwashi vasikhavasiiwe kiiva vagolofu? Vasikhavasiiwe kwa kiiva vayihuvililaga injendo saanave, vasikhamuhuviliile uKilisito. Apo vakuvala pa lingʼanga lila ilikhome yuna yu Kilisito, vaagwa. 33 Ngaja shina yiyandiikhwe mu Mayandikhwa aManofu kiija,

“Puliisi, niviishile ilingʼanga ilikhome lya luutu ku lijumbi lya Sayuni.

Ilingʼanga ili lilyene lina avaanu vakhakuvala,

ilingʼanga lina likhavapinsa avaanu vave viigwa.

Leelo shila muunu yuna ikimuhuviilila uKilisito yuna ali lingʼanga ilyo,

asikhayegukha kaa!”