Valuumi 8

Kilongosewa nu Numbula uMunofu

1 Ndeeno lino, uNguluvi asikhavalafya avaanu vina avalungeenie nu Kilisito Yeesu. 2 Kwa kilunganisiwa nu Kilisito Yeesu, ingufu sa Numbula uMunofu yuna itawula uwuumi wa shiluta, aniviishile niyiyesheele kihuma mu ngufu sa wunansi ni mfwa. 3 Indaji sa Musa sikhandi singaya ngufu ya kituviikha tiyiyeeshele, kwa kiiva ya wuwoto wa mavili gasikhakwiliile kisiyinatila. Leelo, shina indaji sisikhakwiliile kigaha, uNguluvi wágahaga kwa kimufilikha uLusawo lwakwe yumwene, ayinse mu nyi ave muunu ngaja ose vanya wunansi, baheene ayihumye ave shadanda kwa kiiva ya wunansi weesu. Kwa kigaha ndeeno, uNguluvi wásimenaga ingufu sa wunansi mu wiikhasi weesu. 4 UNguluvi wágahaga ago, kiija injowo soona isa shiyooli sina sisakulwa mu ndaji sikwisiwe wunofu mukhati yeesu. Ose tilongosewa nu Numbula uMunofu, tisiitemwa khanji nu wiikhasi wa wunansi.

5 Avaanu vina viitemwa nu wiikhasi wa wunansi, uluhala lwanave lwihiiva kigaha uwunansi. Leelo, vina vilongosewa nu Numbula uMunofu, uluhala lwanave lwihiiva kisenga insengo sina inojelwa uNumbula uMunofu. 6 Avaanu vina uluhala lwanave lwitemwa nu wiikhasi wa wunansi, vikiyipinsisa imfwa. Leelo, avaanu vina vilongosewa nu Numbula uMunofu, viyanushila uwuumi wa shiluta nu wulindamafu. 7 Avaanu vina uluhala lwanave lwitemwa nu wiikhasi wa wunansi, awo valugu va Nguluvi, vasiyiitikha kiyinatila indaji saakwe, khanji vasikwiliile kisiyinatila hata padoodo. 8 Avaanu vina viitemwa nu wiikhasi wa wunansi, vasikwiliile kimushendeefya uNguluvi.

9 Leelo omwe lino, musiitemwa nu wiikhasi wa wunansi, leelo mwitemwa nu Numbula wa Nguluvi, kwa kiiva uyo iikhala mu numbula seenyu. Umuunu yoyoona yuna asiina uNumbula wa Kilisito, asili mumanyisiwa shiyooli wa Yeesu Kilisito. 10 Lino, uKilisito iikhala mu numbula seenyu. Apo, hata yive amavili geenyu giifwa kwa kiiva ya wunansi, uNumbula uMunofu ikivapeela uwuumi, kwa kiiva uNguluvi avavasiise omwe kiiva vagolofu pamwene. 11 Khanji, uNumbula wa Nguluvi yuna iikhala mu numbula seenyu, yumwene uNumbula yuna wámufyusaaga uYeesu Kilisito kihuma kwa vina vafwile. Lino, kwa ngufu ya Numbula yuyula, uNguluvi asigafyuse hata amavili geenyu gina gasiifwe.

12 Lino, vahuvililaaji vayangu, ose yisisakulwa kitemwa nu wiikhasi wa wunansi. 13 Nda mwikhala kwa kitemwa nu wiikhasi wa wunansi, mukhafwa. Leelo nda tileshe kigaha injowo isa wiikhasi wa wunansi kwa ngufu ya Numbula uMunofu, apo mwiva nu wuumi wa shiluta.

14 Woona vina vilongosewa nu Numbula wa Nguluvi, awo vaveene vaana va Nguluvi. 15 UNguluvi asikhavapeelile omwe uNumbula uMunofu wa kivapinsisa muve khanji vavanda vina vitiila. Leelo wávapeelaga omwe uNumbula uMunofu, baheene muve vanaakwe. UNumbula uyo, yumwene ikitutanga tive tikimushemeela uNguluvi “Aba” uluganulo lwakwe, “Daada.” 16 UNumbula uyo yumwene ikuviilisa mu numbula seesu kiija, ose tili vaana va Nguluvi. 17 Lino, nda ose tili vaana va Nguluvi, tili vahaasi va Nguluvi, ose lumo nu Kilisito. Leelo lina lisakulwa kunyeesu, tihanje mu malava lumo nu Kilisito, baheene na yuuse titupikhwe lumo nawo.

UNguluvi akhavapeela uwutupikho avanaakwe

18 One niiwona amalava geesu ga luhaavi ulu, gasili shiinu kilingana nu wutupikho wuna uNguluvi akhatupeela uluhaavi luna luyinsa. 19 Ifiwumbwa fyona fihepelesa kwa lihaahi mandu, uluhaavi luna uNguluvi akhavagubutulila avanaakwe. 20 Ifiinu fyona fina fyawumbwagwa fiyijiilwe kiiva mwalu, yisili kiija ifyene fikhasakwile ndeeno, ndaali, leelo ngaja shina wádobokhaga uNguluvi yumwene. Hata ndeeno, fihepelesa kwa lihaahi 21 kikulusiwa kihuma mu wuvanda, kiija fisikhabudwagwa, baheene fipeelwe uwuyeeshelo nu wutupikho, wuna uNguluvi akhavapeela avanaakwe.

22 Timeenye kiija mbakha kifikha lino, ifiwumbwa fyona filemala kwa wuvafi, ngaja wuvafi wa kisava umwana. 23 Khanji, yisili kiija ifiwumbwa hela fina filemala, leelo hata ose vina tipeliilwe uNumbula uMunofu, kiija tijese uwunofu wuna tisipeelwe, hata ose tilemala mu numbula seesu. Tilemala, kwa kiiva tihepeleese mandu uluhaavi luna uNguluvi akhatukwisa kiiva vanaakwe. Apo baheene tikhakulusiwa na kihambusiwa amavili geesu gave mapya. 24 Uluhuviililo ulo tinalo kihuma pala pina uNguluvi wátukulusaaga. Leelo nda tihuviilila ishiinu shina tikishaaga, shisiiva sha kihuviililwa khanji. Wuli, yu naani yuna ihuviilila kipeelwa ishiinu shina anasho? 25 Leelo nda tihuviilila kipeelwa ishiinu shina tisikishaaga, baheene tihepelesa, tisiyoolopwa.

26 Lumo na ago, uNumbula uMunofu yumwene ikitutanga mu wuwoto weesu. Ose tili vawoto kiiva tisimeenye kifuunya shina yisakulwa kimufuunya uNguluvi, leelo uNumbula uMunofu yumwene yuna ikitufuunyila kwa Nguluvi kwa nkhoolo ya wuvafi wuna wusitaviililwa. 27 UNguluvi yuna ameenye gina gali mu numbula sa vaanu, agameenye amahiiva ga Numbula waakwe uMunofu, kwa kiiva uNumbula uyo ikivafuunyila avahuvililaaji ngaja uNguluvi yumwene shina idobokha.

28 Timeenye kiija, uNguluvi iigaha injowo soona kileeta amanofu kwa vaanu vina vikimugana, vala vina avashemeelile kifwatana nu lugulumilo lwakwe. 29 UNguluvi wávamanyaga avaanu vaakwe kihuma pina akhandi asinayiwumbe inyi. Awo vaveene wávabagulaga vave ngaja shina ashwali uLusawo lwakwe uYeesu Kilisito. Wágahaga ndeeno, baheene uLusawo uyo ave yumwene mukhome kwa vaana woona va Nguluvi. 30 Lino, awo vina wávabagulaga, vaveene wávavasaaga kiiva vagolofu pamwene, khanji vaveene wávatahisaaga kivapeela uwutupikho.

Kusiina ishiinu isha kitubaagula nu lugano lwa Nguluvi

31 Lino, tijove shishi ulwa njowo iso? Nda uNguluvi ali lubali lwesu, yu naani yuna akwiliile kitumena? 32 UNguluvi asikhamusungupiile uLusawo lwakwe yumwene, leelo wámuhumyaga afwe kwa kiiva yeesu woona. Lino, nda wámuhumyaga uLusawo lwakwe kwa kiiva yeesu, shiyooli akhatusungupila mandu kishilila kunyaakwe. 33 Shiyooli kusiina umuunu yuna akwiliile kidaayi kiija, avabaagule va Nguluvi vahigwe, kwa kiiva uNguluvi yumwene yuna ikivavasa kiiva vagolofu. 34 Khanji, kusiina umuunu yuna akwiliile kituhiga, kwa kiiva hata uKilisito Yeesu, yuna wáfwisaga na kifyukha, yuna akheele ku liwokho ilya kundiilo ilya Nguluvi, mu luvala ulwa lishima likhome mandu, uyo yumwene yuna ikitufuunyila.

35 Kusiina ishiinu shoshoona shina shikwiliile kitubagulania nu lugano lwa Kilisito! UKilisito akhayitenekha kitugana hata tive tilafisiwa mandu na kiiva mu malava, tili mu malemaso, tili mu njala, tishepushiilwe amenda, tili nkholeela kiifwa, awu kibudwa. 36 Ngaja shina yiyandiikhwe mu Mayandikhwa aManofu kiija,

“Nsiku soona tifwimwa, kwa kiiva tikikusenjela owe.

Ose tigahilwa fivi na vaanu, ngaja nkholo sina sitwalwa kishinjwa.”

37 Leelo hata nda aga goona gasituyinsile, ose tisiyiteneshe kimena, kwa kiiva uKilisito yuna atuganile, ikitutanga. 38-39 Nimeenye kwa shiyooli kiija, kusiina ishiinu shina shikwiliile kitubagulania nu lugano lwa Nguluvi. UNguluvi akhayitenekha kitugana hata yive tili wuumi awu tifwile. Khanji kusiina umalayikha, awu avanya wutawulilwa, awu ifiwumbwa fyofyona ifinya ngufu, awu ifiinu fina fikwali lino ndeeni awu fina fikhayinsa, awu ifiinu fya kushaanya, awu ifiinu fya ku wusimu, awu ifiwumbwa ifinji fyofyona fina fikwiliile kitubagulania nu lugano lwa Nguluvi. Ulugano ulo alugubutwile kunyeesu kwa nsila ya Kilisito Yeesu, uMutwa weesu.