Avahuvililaaji va Yeesu vasiitemwa ni ndaji sa Musa
7
1 Omwe vahuvililaaji vayangu,
nilogola noomwe vaanu vina musimeenye indaji sa Musa.
Mumeenye kiija,
umuunu isakulwa kitemwa ni ndaji pala hela pina ashaanali muumi.
2 Lino,
lekha niganule imola iyi,
ngaja shina yishwali indaji kwa vaanu vina vatoleene shina yiijova,
umudala asiyiitikhwa kimulekha umugoosi waakwe pina muumi.
Leelo umugoosi nda afwe,
baheene umudala uyo iiva ayiyesheele,
kiiva asiitemwa khanji ni ndaji ya vaanu vina vatoleene.
3 Ndeeno,
nda atoolwe nu mugoosi uyunji pina umugoosi waakwe ashaanali muumi,
iiva mushemi.
Leelo umugoosi waakwe nda afwe,
indaji iyo yisikimusivila,
akwiliile kitoolwa nu mugoosi uyunji,
asiiva mushemi.
4 Vahuvililaaji vayangu,
shilushwali shiisho ndeeno na kunyeenyu.
Hata omwe musiipinywa khanji ni ndaji sa Musa,
kwa kiiva mufwile lumo nu Kilisito pa musalaaba.
Lino omwe muli vaanu vaakwe,
yuna wáfyusiwaagwa kihuma mu mfwa,
kiija uwiikhasi weesu wuve na makhomo amanofu kwa kiiva ya Nguluvi.
5 Uluhaavi lula,
pina tikhandi tiitemwa nu wiikhasi uwa wunansi,
indaji sagahaga uwupafu weesu uwuvi wuve ni ngufu mandu.
Tadobokha kigaha uwunansi luhaavi loona.
Lulwene takhomaga amakhomo amavi gina gileeta imfwa.
6 Tikhandi tipinyiilwe ni ndaji,
leelo lino tifwile lumo nu Kilisito,
ndeeno tipatile uwuyeeshelo kihuma mu ndaji.
Lino tisikimusenjela uNguluvi kwa nsila ya paanyuma iya kiyinatila indaji sina sayandikhwagwa,
leelo kwa nsila imya iya kilongosewa nu Numbula uMunofu.
Uwunansi wumanyikha kwa ndaji
7 Lino tijove shi?
Tijove indaji,
wunansi?
Ndaali,
hata padoodo!
Leelo nda indaji saali sive sikusiina,
ndi nisaamanya kiija uwunansi shiinu shishi.
Nda yaali yive yikusiina indaji yina yiijova kiija,
“Usikhadobokhaga ishiinu sha muyaago,”
a ndi nisaamanya kiija,
kidobokha ishiinu sha muunu uyunji,
wunansi.
8 Leelo uwunansi walamusaaga uwupafu uwuvi,
wuna wuli paayo paayo mukhati mu numbula yangu kwa nsila ya ndaji.
Nda indaji iso saali sive sikusiina,
uwunansi waali wiiva wungaya ngufu.
9 Ulwamwandi nikhandi niikhala nisisimeenye indaji sa Nguluvi,
leelo naganaga kisimanya indaji,
uwunansi waava nu wutawulilwa,
10 khanji,
wanipinsisa imfwa.
Naawona kiija,
indaji iso sina sikhandi kwa kiiva ya kinipeela uwuumi,
saniviikhaga kutali nu Nguluvi.
11 Uwunansi wanijangaga kwa ndaji iyo,
na kiniviikha kutali nu Nguluvi.
12 Hata ndeeno yili bahawuvalafu kiija,
indaji sihumile kwa Nguluvi yumwene.
Khanji,
iseene iso ndaji nofu na sa shiyooli.
13 Leelo nda ndeeno,
shiiva shiinu shinofu shina shinipinsisiise imfwa?
Ndaali,
hata padoodo!
Uwunansi wuweene wanipinsisaaga imfwa kwa nsila ya ndaji inofu,
baheene yiwoneshe kiija wunansi.
Kwa nsila ya ndaji,
uwunansi wakuvilisiwaagwa kiija shiinu shivi.
14 Timeenye kiija indaji wásileetaga uNguluvi,
leelo one niitemwa nu wupafu uwa muvili,
lulwene kiija,
one nigusiiwe nive muvanda wa wunansi.
15 Injowo sina nisenga,
shiyooli one nisikiyiwona.
Nda nidoboshe kigaha gala gina nisakula,
baheene nisiigaha.
Leelo injowo sina nisidobokha,
siseene niigaha.
16 Leelo nda nimanye kiija lina niigaha livi,
yiwonensa kiija,
niyiitikha kiija indaji nofu.
17 Apo niiva nisili yuune yuna niigaha uwunansi,
leelo wiiva wunansi wula wuna wuli mukhati yangu.
18 Nimeenye kiija mukhati yangu,
uluganulo lwakwe mu wiikhasi wangu uwa wunansi,
kusiina ishiinu shinofu shoshoona.
Nisakula kisenga amanofu,
leelo nigombola kigaha ndeeno.
19 Lulwene kiija,
nisiigaha amanofu gina nisakula kigaha,
leelo niigaha gala amavi gina nisisakula nigagahe.
20 Lino,
nda niigaha gala gina nisisakula,
lino giwonensa kiija nisili yuune yuna niigaha uwunansi,
leelo wiiva wunansi wula wuna wuli mukhati yangu.
21 Lino naamanya ishiinu ishi,
pina nisakula kigaha ishiinu ishinofu,
nikwehwa kigaha ishiinu ishivi.
22 Indaji sa Nguluvi nikisidobokha kwa numbula yangu yoona.
23 Leelo naamanya kiija,
ifilungo fya muvili gwangu fiimenwa ni ngufu sa wunansi wuna wumenana na mahiiva gangu.
Wukinigaha nive muvanda wa wunansi,
wuna wisenga insengo mu muvili gwangu.
24 Aka one!
Yu naani umunya kinikulusa,
kihuma mu wiikhasi uwa wunansi wuna wukinipinsisa imfwa?
25 Nikimuhonjesa uNguluvib yuna ikinikulusa kihuma mu ngufu sa wunansi,
kwa nsila ya Yeesu Kilisito,
uMutwa weesu.
Ndeeno,
one nisenjela indaji sa Nguluvi mu mahiiva gangu,
leelo kwa kiiva ya wiikhasi wangu uwa wunansi,
nisenga indaji sa wunansi.