Valuumi 1

Ibalula ya Pawulo kwa

Valuumi

UPawulo ikivahunjila aValuumi

1 Ibalula iyi yihumile kunyangu one Pawulo, yuna nili muvanda wa Kilisito Yeesu. UNguluvi wánishemeelaga nive mwanandeje waakwe, na kinibaagula nive niikhoma iMola iNofu yaakwe. 2 IMola iNofu iyo, yiyeene yina wátahisaaga kihuma pawukuulu, kwa nsila ya vakuwamalago vaakwe, ngaja shina yiyandiikhwe mu Mayandikhwa aManofu. 3 IMola iNofu iyi, yiyeene yina yilogolela ulwa Lusawo lwakwe. Shimuvili umuunu uyu wásawaagwa mu shikholo sha mutwa uDawudi, 4 leelo, kwa Numbula uMunofu, uNguluvi wámufyusaaga kihuma kwa vina vafwile. Kwa nsila iyo, wámubagulaga kiiva Lusawo lwakwe umunya ngufu soona. Uyo yumwene Yeesu Kilisito, uMutwa weesu. 5 Kishilila kwa mwene uyo, imota ya Nguluvi yanigwililaga, nive mwanandeje waakwe. Wágahaga ndeeno kiija, avaanu woona vina vasili Vayahuudi vamuhuviilile na kimutiila uMutwa uYeesu, baheene ilitaawa lyakwe litupikhwe. 6 Na yuumwe muli vavaamo va vala vina mushemeliilwe muve vaanu va Yeesu Kilisito.

7 Lino nikivayandishila omwe woona muna muli vahuvililaaji vayangu, vina muli ku lijumbi lya Luumi, vina uNguluvi avaganile mandu na kivabaagula muve vabaagule vaakwe.

Imota nu wulindamafu kihuma kwa Nguluvi uWiheesu nu Mutwa uYeesu Kilisito, five lumo noomwe.

UPawulo ana lihaahi lya kiluta ku Luumi

8 Iliswi ilya wutasi mu goona, nikimuhonjesa uNguluvi wangu kishilila kwa Yeesu Kilisito kwa kiiva ya omwe woona, kiiva ilihuuvi lyenyu liikhomwa mu nyi soona. 9 UNguluvi yuna nikimusenjela kwa numbula yangu yoona kwa kivakhoma avaanu iMola iNofu iya Lusawo lwakwe, ameenye shina nikivafuunyila omwe uluhaavi loona. 10 Wiila nikimufuunya uNguluvi kiija, nda agane, anipeele lino imwenshe iya kiyinsa kunyeenyu. 11 Nifuunya ndeeno, kwa kiiva nina lihaahi mandu ilya kitangaana noomwe, baheene nivapeele ifipeelwa kihuma kwa Numbula uMunofu, kiija mujine. 12 One nisakula kiija, ilihuuvi lyenyu linijinie one, ilihuuvi lyangu livajinie omwe.

13 Vahuvililaaji vayangu, nisakula mumanye wunofu kiija, nikhandi nigulumiile mandu kiyinsa kunyeenyu, leelo mbakha lino, nisiviilwe. Nisakula niyinse kunyeenyu, baheene nivakwehelese avaanu mu omwe vamufwate uMutwa uYeesu, ngaja shina nagahaga kwa vaanu avanji, vina vasili Vayahuudi. 14 UNguluvi anilajiise nive niikhoma iMola iNofu kwa vaanu woona, kwa Vayunaani na vina vasili Vayunaani, kwa vina vayimbiile na vina vasiyimbiile. 15 Ndeeno, nina lihaahi mandu niyinse kivakhoma iMola iNofu, hata ukho kunyeenyu ku Luumi.

Ingufu sa Mola iNofu

16 One nisiiwona nsoni hata padoodo kiyikhoma iMola iNofu iyo, kwa kiiva yiyeene ngufu ya Nguluvi ya kivakulusa avaanu woona vina vikimuhuviilila uYeesu, kiyansisa kwa Vayahuudi, mbakha kwa vina vasili Vayahuudi. 17 IMola iNofu iyo, yiwonensa bahawuvalafu shina uNguluvi ikivavasa avaanu kiiva vagolofu. Avaanu vivasiwa kiiva vagolofu pa Nguluvi kwa lihuuvi hela, ngaja shina yiyandiikhwe mu Mayandikhwa aManofu kiija, “Umuunu umugolofu kwa nsila ya lihuuvi, uyo asiive nu wuumi.”

UNguluvi ikivalafya avaanu kwa kiiva ya wunansi waanave

18 UNguluvi yumwene ikivawonensa bahawuvalafu kihuma kushaanya kiija, ikivakhalalila avaanu awo vina vikimukhaana na viigaha uwunansi. Avaanu awo vikishikhaana ishiyooli shaakwe kwa wunansi waanave. 19 Yisili kiija vasimeenye shoshoona ulwa mola sa Nguluvi, ndaali. Lino, gala gina gisakulwa kimanyikha, gali bahawuvalafu, kwa kiiva uNguluvi yumwene wágagubutulaga kwa vaanu. 20 Apo pashiyanso uNguluvi wáwumbile ifiinu fyona. Ndeeno kiyansisa uluhaavi ulo, avaanu vakwiliile kimumanya uNguluvi shina ashwali, hata nda vasikimwaga. Ifiinu fina wáwumbile, fiwonensa kiija uNguluvi ana ngufu soona. Khanji umwene yu Nguluvi mwene duguli, kusiina uyunji. Ndeeno, avaanu vasikwiliile kilogola kiija vasimumeenye uNguluvi. 21 Loleela hata nda vamumeenye uNguluvi shina ashwali, hata ndeeno vasikimutupikha wala kimuhonjesa ngaja shina yisakulwa. Leelo aveene vana mahiiva ga wunansi, uluhala lwanave lungaya shiinu, luli mu nshiisi. 22 Aveene vaava vikiyitumfya viija vanya wumanyi, humbe vayasu. 23 Vaalekha kimufuunya uNguluvi uwa shiluta, vaava vifuunya isanaamu isa manguluvi sina sihwanana na vaanu vina viifwa, isinji sihwanana ni nyuni, isinji sihwanana ni nkhanu, isinji sihwanana na makhookho gina gitambala pansi.

24 Kwa kiiva ya ilyo, uNguluvi wávalekha vave vifwata uwupafu waanave uwuvi, vave vigahilana injowo sa nsoni kwa nsila ya mavili gaanave. 25 Vaalekha kihuviilila ishiyooli sha Nguluvi, vawuyinatila uwudehi. Vaava vifuunya ifiwumbwa na vikifitiila, leelo vaalekha kisenga ago kwa Muwumbaaji yuna isakulwa kisufisiwa shiluta! Amina.

26 Kwa kiiva ya ilyo, uNguluvi wávalekha vave viigaha injowo saanave isa wunansi wa nsoni, shina visakula. Avashimaayi vayansa kigonana vaveene kwa vaveene, vaalekha kigasenjela amavili gaanave ngaja shina gakhandi gawumbiilwe. 27 Shiisho ndeeno avagoosi woope, vaalekha kisenjela amavili ngaja shina vawumbiilwe, uluganulo lwakwe, umugoosi nu mudala. Leelo vakhandi vigonana vaveene kwa vaveene. Vakhandi viigaha injowo sa nsoni isa kitoolana vaveene kwa vaveene. Kwa kigaha ndeeno, vikiyileetela vaveene amalava gina visakulwa vagapate, kilingana ni njendo saanave isa wunansi.

28 Lino, ngaja avaanu awo shina vakhaanaga amamanyiso ga Nguluvi, woope uNguluvi wávalekha, kiiva vave nu luhala luna luwolile khabisa, vagahe gina gasifwaya kigahwa. 29 Vamemile uwunansi wuna wuli paayo paayo, viigaha injowo sina sisifwaya pa Nguluvi, khanji vana wupafu uwa fiinu fyona. Avaanu awo vana wiifu, visakula ilibaatu, uwubudaaji nu wuhomegania. Viideha na vana lugulumilo luvi. Vasenkhaaji va vaanu, 30 khanji vamyansi, vikimukhalasa uNguluvi, vasikisituna injowo sa vayaanave, vaanu va kiyitumfya na kiyisufya. Luhaavi loona visakula insila imya iya kigaha uwunansi, khanji vasikivayinatila avasafi vaanave, 31 khanji vayasu, vasiigaha ngaja imfingo saanave shina siijova, vangaya lugano wala lusungu. 32 Avaanu awo vameenye wunofu kiija, umuunu nda agahe injowo sa wunansi ngaja isi, isakulwa kibudwa nu Nguluvi. Hata ndeeno, vasiituna kibudwa! Vapikiyitenekha kigaha uwunansi, khanji vikivasufya avaanu vina vana njendo imbi ngaja iso.