UYeesu atulingeenie nu Nguluvi
5
1 Lino,
uNguluvi atuvasiise kiiva vagolofu kwa kimuhuviilila umwene.
Ndeeno tina wulindamafu nu Nguluvi kwa kishilila uMutwa weesu uYeesu Kilisito.
2 Uyo yumwene yuna atulongwese mu lihuuvi lyesu,
kiyinjila mu luvala lwa mota muna tikwali.
Tishendeeva mandu kwa kiiva tihuviilila kiija tikhahanga lumo nu Nguluvi na kiiva mu wutupikho waakwe.
3 Lino,
hata nda gave gikituyinsila amalava gogoona,
ose tisiyiteneshe kishendeeva,
kwa kiiva timeenye kiija,
amalava gikituleetela ulugugumilo.
4 Ulugugumilo lulwene lukituleetela uwujimfu,
woope uwujimfu wukituleetela uluhuviililo.
5 Uluhuviililo ulo lusikwiliile kituyegula,
kwa kiiva Nguluvi aponyiise ulugano lwakwe mu numbula seesu,
kishilila uNumbula waakwe uMunofu.
6 Ose pina tikhandi tipili vawoto,
uKilisito wáyinsile wátufwila ose vina tili vanansi,
uluhaavi luna lwapangwagwa nu Nguluvi.
7 Shiyooli,
lukhamu umuunu kiyiitikha kibudwa kwa kiiva ya muunu yuna iyinatila indaji,
pamonga umuunu akwiliile kiyiitikha kibudwa,
kwa kiiva ya muunu umugolofu.
8 Leelo uNguluvi awonensiise kiija atugeene mandu,
kwa kimuhumya uKilisito afwe kwa kiiva yeesu pina ose tikhandi tipili vanansi.
9 Lino,
nda uNguluvi atuvasiise kiiva vagolofu pamwene,
kishilila idanda ya Kilisito pina wáfwisaga pa musalaaba,
shiyooli tikhakulusiwa nu mwene kihuma mu nkhalasi ya Nguluvi.
10 Pina tikhandi tipili valugu nu Nguluvi,
uNguluvi wátulinganiaga ose nu mwene kwa nsila ya mfwa ya Lusawo lwakwe.
Ndeeno,
nda tilinganisiiwe nu Nguluvi kishilila imfwa yaakwe,
shiyooli tikhakulusiwa kihuma mu malava ga Nguluvi kishilila uwuumi waakwe.
11 Lino,
kishila ago goona,
uNguluvi atugahile tishendeeve mandu,
kwa kishilila uMutwa weesu uYeesu Kilisito,
tilinganisiiwe nu Nguluvi.
UAdamu wátupinsisaaga imfwa leelo uYeesu atupeelile uwuumi
12 Ino,
uwunansi wayinsaga mu nyi kwa nsila ya muunu yumo,
baheene watupinsisa imfwa.
Lulwene avaanu woona viifwa,
kwa kiiva woona vagahile uwunansi.
13 Kihuma uAdamu pina wágahaga uwunansi,
mbakha uMusa pina wápelwagwa indaji,
uwunansi wukhandi shiwukwali mu nyi.
Leelo uNguluvi asikhavahijile avaanu kiija vasiyinatila indaji,
kwa kiiva kukhandi kusiina indaji.
14 Lino,
avaanu woona va luhaavi ulo,
vakhandi viifwa.
Imfwa yavatemaga,
hata nda avaanu vasikhagahile uwunansi wa kilekha kiyinatila indaji ngaja uAdamu.
Lino uAdamu akhandi shihwano sha Yeesu Kilisito yuna akhayinsile paanyuma.
15 Leelo,
uwunansi wa Adamu wusihwanana nu lusungu lwa Nguluvi.
Uwunansi wa muunu yumo wapinsaaga imfwa ku vaanu woona,
leelo kwa lusungu lwa muunu yumo uYeesu Kilisito,
avaanu vinshi vayonjeleele mandu kisungupilwa nu Nguluvi.
16 Khanji shina uNguluvi ikivasaajila avaanu kwa lusungu lwakwe,
yisihwanana nu wunansi wa Adamu.
Loleela,
uAdamu pina wágahile uwunansi,
uNguluvi wávahigaga avaanu na kivapeela amalava.
Loleela lino pina vagahaga uwunansi winshi,
uNguluvi kwa mota yaakwe ikivavasa avaanu kiiva vagolofu pamwene.
17 Uwunansi wa muunu yumo uAdamu,
wapinsaaga imfwa yivateme avaanu woona.
Leelo shiyooli vala vina visungupilwa nu Nguluvi,
ulusungu ulo lungaya shijelo,
vivasiwa kiiva vagolofu pamwene.
Awo vakhatema mu wuumi wa shiluta,
kishilila umuunu yumo uYeesu Kilisito.
18 Lino,
shina avaanu woona vahigwagwa kilingana nu wunansi uwa muunu yumo,
shiisho ndeeno avaanu woona vivasiwa kiiva vagolofu pa Nguluvi na kipeelwa uwuumi kilingana ni nsengo yimo ya wugolofu wa muunu yumo.
19 Umuunu yumo yuna wákhaanaga kimuyinatila uNguluvi,
wávapinsaaga avaanu vinshi vave vanansi,
shiisho ndeeno umuunu yumo yuna wámuyinatilaga uNguluvi,
asivapinsiise avaanu vinshi vave vagolofu pa Nguluvi.
20 Indaji sa Musa sayinsaga baheene uwunansi wuyonjelele mandu.
Hata ndeeno uwunansi pina wayonjelelaga mandu,
loope ulusungu lwa Nguluvi lwashilaga kiyonjelela.
21 Lino,
ngaja shina uwunansi wukhandi ni ngufu ya kitema avaanu na kivapinsisa imfwa,
shiisho ndeeno ulusungu lwa Nguluvi lukivatema avaanu,
kwa kivasiwa kiiva vagolofu pamwene.
Ikivapeela uwuumi wa shiluta,
kishilila kwa Mutwa weesu uYeesu Kilisito.