Valuumi 4

UAbulahamu akhavasiiwe uwugolofu kwa lihuuvi

1 Lino, tijove shishi ulwa wiheesu uAbulahamu, uNguluvi wámuvasaaga kiiva mugolofu pamwene, shihwana wuli? 2 Nda tijove kiija uAbulahamu akhavasiiwe kiiva mugolofu pa Nguluvi kwa kiiva ya njendo saakwe inofu, baheene umwene ndi wáava ni shiinu sha kiyihalila. Leelo shiyooli kiija, angaya shiinu sha kiyisufya pa Nguluvi. 3 AMayandikhwa aManofu giijova, “UAbulahamu wámuhuviilila uNguluvi, ndeeno uNguluvi wámuvasa kiiva mugolofu pamwene.”

4 Shiyooli, umuunu nda asenje insengo, amahombo gaakwe gasiiva lutono, leelo giiva shiinu shina akwiliile kihombwa. 5 Umuunu yuna asihuviilila insengo saakwe, leelo ikimuhuviilila uNguluvi yuna ikimuvasa umuunu umunansi kiiva mugolofu, uyo yumwene yuna uNguluvi ikimuvasa kiiva mugolofu, kwa lihuuvi lyakwe. 6 Woope umutwa uDawudi, wájovile ulwa kiyimiililwa umuunu yuna uNguluvi ikimuvasa kiiva mugolofu, bila kiloleela injendo saakwe. Wájovile,

7 “Vayimiliilwe vala vina uNguluvi avasajiile uwunansi waanave,

na kiwuwuusa khabisa.

8 Ayimiliilwe umuunu yuna uMutwa uNguluvi asikimuvasa kiiva, munansi.”

9 Wuli, kiyimiililwa ukho kwa vala hela vina vayinjisiiwe ijando, awu lumo na vaanu avanji vina vasiyinjisiiwe ijando? Nikivakumbusa shina aMayandikhwa aManofu giijova, “UNguluvi wámuvasa uAbulahamu kiiva mugolofu, kwa lihuuvi lyakwe.” 10 Wuli, uNguluvi wámuvasaaga uAbulahamu kiiva mugolofu payooli, pina akhandi ayinjisiiwe ijando, awu pina akhandi asinayinjisiwe ijando? Lukhandi luhaavi luna asinayinjisiwe ijando! 11 Kiyinjisiwa ijando kwa mwene, kukhandi shimanyilo shina shikimuwonensa kiija, uNguluvi wámuvasa kiiva mugolofu kwa lihuuvi hela, lina akhandi analyo pina akhandi asinayinjisiwe ijando. Kwa nsila iyo, uAbulahamu wáava wihaanave woona vina vihuviilila, hata vave vasinayinjisiwe ijando, kiija woope vavasiwe kiiva vagolofu pa Nguluvi. 12 UAbulahamu yumwene wihaanave wa vaanu vina vayinjisiiwe ijando, nda vikimuhuviilila uNguluvi. Asiiva wihaanave kwa kiiva vayinjisiwa ijando, leelo kwa kiiva vikimuhuviilila uNguluvi, ngaja uAbulahamu yumwene shina wáhuvililaga pina akhandi asinayinjisiwe ijando.

13 UNguluvi wámutahisaaga uAbulahamu na vaanu va shikholo shaakwe kiija, akhavapeela inyi soona sive wuhaasi waanave. UNguluvi asikhamutahiise ndeeno uAbulahamu kwa kiiva akhandi iigaha goona ngaja indaji shina siijova, leelo kwa kiiva akhandi ikimuhuviilila uNguluvi. Baheene uNguluvi, wámuvasa uAbulahamu kiiva mugolofu pamwene. 14 Lino, nda avaanu vina viyinatila indaji, vaveene viyanushila gina uNguluvi wávatahisaaga, kimuhuviilila uNguluvi kungaya lutono. Khanji, loope ulutaahiso lwa Nguluvi lwa wudehi, 15 kwa kiiva indaji yiyeene yipinsa inkhalasi ya Nguluvi. Leelo nda kungaya ndaji, usikwiliile kipiikhwa kiija usikisiyinatila indaji.

16 Lino, gina wátahisaaga uNguluvi, giyanushilwa kwa kimuhuviilila umwene, kwa lusungu lwakwe. Ilyo, lisiiva kwa vina viyinatila indaji veene hela, leelo kwa woona vina vikimuhuviilila uNguluvi ngaja uAbulahamu. UAbulahamu yumwene wiheesu ose woona vina tikimuhuviilila uNguluvi. 17 Shiisho ndeeno amaswi aga shina gayandiikhwe mu Mayandikhwa aManofu kiija, “Nakugaha uve daada wa vaanu va nyi nyinshi.” UAbulahamu wápelwagwa nu Nguluvi ulutaahiso ulo, wámuhuviilila uNguluvi yuna ikivapeela uwuumi vina vafwile, khanji yumwene yuna ikifiviikha ifiinu fina fisinawaahaje kiiva fikwali.

18 UAbulahamu wágahuvililaga gina gakhandi makhamu kihuviilila. Ndeeno wáava daada wa vaanu va nyi nyinshi, ngaja aMayandikhwa aManofu shina giijova, “Ishisafi shaakho shikhayoolokha na kiiva ngaja nondwe.” 19 Uluhaavi ulo uAbulahamu akhandi na maakha ligana limo ndeeni. Umwene akhandi ameenye kiija, agogolweshe, khanji woope umudala waakwe uSaala, akhandi mugumba. Leelo lumo na ilyo, ilihuuvi lyakwe lisikhashepwishe. 20 Khanji, asikhandi nu muninu ulwa lutaahiso luna wápelwagwa nu Nguluvi. Leelo wáyitenekhaga kiyijimfilisa kwa kimuhuviilila na kimutupikha, 21 kwa kiiva akhandi ameenye khabisa kiija, uNguluvi akwiliile kigaha gala gina wámutahisaaga. 22 Lulwene aMayandikhwa aManofu giijova, “UNguluvi wámuvasa kiiva mugolofu pamwene.”

23 Leelo amaswi aga gina giijova, “UNguluvi wámuvasaaga kiiva mugolofu,” gasikhayandiikhwe kwa kiiva ya Abulahamu mwene duguli, 24 leelo gakhayandiikhwe kwa kiiva ya ose woona. Amaswi ago gikitujovela shiyooli kiija, nda timuhuviilile uNguluvi, yuna wámufyusaaga uYeesu, uMutwa weesu, baheene hata na yuuse tivasiwe kiiva vagolofu pamwene. 25 UNguluvi wámuhumyaga uYeesu abudwe kwa kiiva ya wunansi weesu, khanji wámufyusaaga, baheene ose tive vagolofu pamwene.