Valuumi 3

UNguluvi munya shiyooli

1 Lino kilingana na ago, kuna lutono lushi kiiva Muyahuudi? Awu kiyinjisiwa ijando kuna lutono lushi? 2 Shiyooli, kiiva Muyahuudi, kuna lutono kwa nsila nyinshi. Ilya wutasi mu goona, uNguluvi wávapeelaga aVayahuudi iliswi lyakwe. 3 Leelo shiyooli, aVayahuudi vamonga vasikhandi va kihuviililwa. Wuli! Tijove kiija aVayahuudi awo, vikimugaha uNguluvi woope asikhahuvililwagwa mu maswi gaakwe? 4 Ndaali, hata padoodo! Avaanu woona vadehi, leelo uNguluvi wáwonensa kiija iigaha gina ilogola, ngaja shina yiyandiikhwe mu Mayandikhwa aManofu kiija,

“Nda uvajovele avaanu vaakho uwunansi waanave,

injowo saakho sa shiyooli.

Nda uvahije,

uwuhigo waakho wa shiyooli.”

5 Leelo avaanu avanji vakwiliile kihiiva kiija, nda uwunansi weesu ose ti Vayahuudi wiwonensa kiija, uNguluvi iihiga kwa shiyooli, tisiijove shi? Wuli, tijove kiija uNguluvi asili wa shiyooli pina akhatulafya? 6 Ndaali, hata padoodo! Kiiva, yaali yive ndeeno, ndi lwava wuli khanji uNguluvi kivahiga avaanu? 7 Umuunu akwiliile kiposa kiija, “Nda uwudehi wangu, witanga kiwonensa ishiyooli sha Nguluvi na kishisa uwutupikho waakwe, lino kwashi one niihigwa kiiva munya wunansi?” 8 Ukho kulingeene na kiija, “Tive tiigaha uwunansi, baheene uNguluvi awonense uwunofu waakwe.” Avaanu avanji vikitudehela kiija, na yuuse timanyisa shiisho. Avaanu woona awo vakhalafisiwa kilingana na matofolo gaanave.

Kusiina umuunu umugolofu

9 Lino, tijove shishi? Wuli, ose ti Vayahuudi tiyiitikhwa mandu kishila avaanu avanji vina vasili Vayahuudi? Ndaali! Ngaja shina nawonensaaga kiija, aVayahuudi na vina vasili Vayahuudi, woona viitemwa nu wunansi. 10 Ngaja shina yiyandiikhwe mu Mayandikhwa aManofu kiija,

“Kusiina umuunu umugolofu pa Nguluvi,

kusiina hata yumo.

11 Kusiina umuunu yuna ameenye injowo sa Nguluvi,

khanji kusiina yuna ikimusakula.

12 Avaanu woona valeshile kimuyinatila uNguluvi,

woona vasifwaya pamwene.

Kusiina umuunu yuna iigaha amanofu,

kusiina hata yumo.”

13 “Amalomo gaanave, gali ngaja majooja gina gali mwasi,

iimili saanave silogola wudehi.”

“Mu malomo gaanave,

siihuma injowo isa wanga ngaja wa njokha.”

14 “Mu ndogolo saanave,

simemile injowo isa kivayiijila avaanu avanji

na kivalemasa.”

15 “Amagulu gaanave mapeefu kiluta kibuda.

16 Popoona pina viiluta,

vipinsa amalava na kivalemasa avaanu.

17 Aveene vasimeenye kikhala lumo na vanji kwa wulindamafu.”

18 “Vasikimutiila uNguluvi kaa.”

19 Ndeeno timeenye kiija, aMayandikhwa aManofu pina giijova ishiinu shoshoona, gikivajova avaanu vina vapelwagwa aMayandikhwa ago. AMayandikhwa gavikhwagwa kiija, vasikhaveesaga nu ludeheeleso loloona pina uNguluvi akhavahiga avaanu. Yikhawonekha bahawuvalafu kiija, woona visakulwa kihigwa nu Nguluvi. 20 Kusiina umuunu yuna ivasiwa kiiva mugolofu pa Nguluvi, kwa kisiyinatila indaji sa Musa. Insengo ya ndaji iso, kiwonensa avaanu woona kiija vanansi.

Kiyiitikhwa nu Nguluvi kwa lihuuvi

21 Hata ndeeno, lino uNguluvi atuwonensiise insila yaakwe, yina umuunu ivasiwa kiiva mugolofu pamwene, bila ndaji. Soope indaji sa Musa na Mayandikhwa aga vakuwamalago gilogola bahawuvalafu imola isa nsila iyo. 22 Insila iyo yiyeene iya kimuhuviilila uYeesu Kilisito. UNguluvi ikivavasa kiiva vagolofu avaanu woona vina vikimuhuviilila uYeesu. Umwene asibaniilila umuunu yoyoona, 23 kiiva avaanu woona vagahile uwunansi, soope injendo saanave sisiwonensa uwutupikho wa Nguluvi. 24 Leelo, uNguluvi kwa mota yaakwe, avavasiise avaanu kiiva vagolofu pamwene, bila kihombwa shoshoona. Vakulusiiwe kihuma ku wunansi waanave, kishilila uKilisito Yeesu. 25 UNguluvi wámuhumyaga uYeesu ave shadanda sha kivalingaania avaanu nu mwene, baheene avaanu vasaajilwe uwunansi waanave kwa kihuviilila kiija, uYeesu wáfwisaga kwa kiiva yaanave. UNguluvi wágahaga ndeeno, baheene awonense kiija umwene munya shiyooli. Loleela, umwene asikhavalafiise kwa wunansi waanave uwa luhaavi ulwa kunyuma. 26 Khanji, wágahaga ndeeno awonense kwa luhaavi ulu kiija, umwene wa shiyooli, hata pina ikivavasisa kiiva vagolofu avaanu vina vikimuhuviilila uYeesu.

27 Ndeeno, injowo isi sikitusivila khabisa kiyitumfya, kwa kiiva tisivasiwa kiiva vagolofu pa Nguluvi kwa kisiyinatila indaji sa Musa, leelo kwa kimuhuviilila uYeesu hela. 28 Lino, timeenye kiija umuunu ivasiwa nu Nguluvi kiiva mugolofu, kwa kimuhuviilila uYeesu, leelo yisili kwa kisiyinatila indaji sa Musa. 29 Nda yaali yive kwa nsila ya ndaji, uNguluvi ndi wáava Nguluvi wa Vayahuudi veene duguli. Leelo, umwene asili Nguluvi wa vaanu avanji woope? Shiyooli, umwene Nguluvi wa vaanu woona, 30 kwa kiiva kuna Nguluvi yumo, khanji, kuna nsila yimo iya kivavasa avaanu kiiva vagolofu pamwene. Kiyansisa kwa Vayahuudi mbakha kwa vina vasili Vayahuudi. Woona vavasiiwe nu Nguluvi kiiva vagolofu, kwa kimuhuviilila uYeesu hela. 31 Lino, pina tikuviilisa kihuviilila, wuli, uluganulo lwakwe kiija indaji isi isa Musa singaya lutono? Ndaali, hata padoodo! Leelo nda tive ni lihuuvi, baheene tisiive tiigaha gala goona gina indaji siijova.