Nsengo sa Vanandeje 22

1 “Valukholo lwangu na vawiheesu, munipuliise! Lino nikiyitanga panyeenyu.”2 Avaanu vala, vaganile kipulikha kiija uPawulo ilogola kwa shilogolo shaanave isha Shihebulaniya, vaava vapisisiime tototo mandu. UPawulo wáyitenekha kivajovela wáaja,3 “One nili Muyahuudi, nikhasaviilwe mu lijumbi lya Taliso mu nyi ya Kilikiya. Leelo nikuliile baaha pa Yelusalemu. UGamaliyeli yumwene yuna animanyiise indaji soona kwa wuyinatifu sina avambuyeesu vatuleshelaga. Nikhayihumiise kwa ngufu soona kimuyinatila uNguluvi, ngaja omwe shina mukiyihumya kwa ngufu iminsiyaano.

4 “Nikhavalemeese na hata kivabuda avahuvililaaji va Nsila ya Mutwa uYeesu avagoosi na vashimaayi, nikhandi nikivakhata na kivadindila mu shifungo. 5 Ago gina nikivajovela omwe, hata nu mutambule umukhome lumo ni livansa lya Vayahuudi vakwiliile kilunjikha kiija ga shiyooli. Aveene vakhanipeelile ibalula isa kivatwalila aVayahuudi vayeesu vina vakhandi mu lijumbi lya Damesiki. One nikhandi niiluta ukho, kiija nivapinye avaanu ava, na kivaleeta pa Yelusalemu apa, kiija valafisiwe.

6 “Pina nili mu nsila nkholeela na kifikha ku Damesiki, paminsi mu lisala lya mutanda, shitu baaho ulungʼali ulukhome kihuma kushaanya lwaningʼalikha mandu imbali soona. 7 Naagwa pansi, napulikha ishawuti yikinijova yiija, ‘Sawuli! Sawuli! Kwashi ukinilafya?’ 8 Baheene one naaposa naajova, ‘Owe yuuwe naani mutwa?’ Wánigomosesa wáaja, ‘One yuune Yeesu wa ku Nasaleti yuna owe ukinilafya.’ 9 Avayangu vina tikhandi lumo valwaga ulumuli, leelo ishawuti iyo vasikhayimeenye. 10 Baheene naaposa naajova, ‘Wee Mutwa, nigahe wuli?’ Wánigomosesa wáaja, ‘Yiima! Ulute ku Damesiki. Umo mumwene muna muunu yumonga asikujovele insengo soona sina one nikugulumiile owe usisenje.’ 11 Kwa luhaavi ulo nikhandi nisiloleela, kwa kiiva ya lumuli ulukhome ulo, lukhanipofwese ameeho. Baheene avayangu awo vanikhata amawokho, vanifisa ku Damesiki.

12 “Apo pakhandi nu muunu yumonga, ilitaawa lyakwe yu Ananiya. Uyo akhandi ikiyihumya mandu kiyinatila indaji seesu, aVayahuudi woona ava ukho vakhandi vikimusufya viija uyo muunu munofu. 13 Wáyinsa, wáyiima panyangu palubali, wánijovela wáaja, ‘Lukholo lwangu Sawuli, uyanse kiloleela.’ Shitu baaho ameeho gangu gagubutukha, namwaga.

14 “Baaho wánijovela wáaja, ‘UNguluvi wa vambuyeesu wákubaagula, kiija umanye ulugano lwakwe, umwaje yula yuna wa Shiyooli, na kipulikha ishawuti yaakwe yumwene. 15 Goona gina wagaaga na kigapulikha kunyaakwe, usiive mulunjikhaaji waakwe wa kivajovela avaanu woona. 16 Lino, uheepile shishi? Yiima! Utwinisiwe, umulombe uNguluvi kiija uvalasiwe uwunansi waakho, kwa kiiva ya kilihuviilila ilitaawa lya Yeesu.’

17 “Baheene naatina ku Yelusalemu. Pina nikimufuunya uNguluvi mu nanda imbaagule iya kifuunyila, nagaaga amahilu. 18 Mu mahilu ago, namwaga uMutwa uYeesu ikinijovela kiija, ‘Wuukha nyangu mu Yelusalemu! Kiiva avaanu va lijumbi ili vasiyiitikha uwubedelo waakho uwa one.’ 19 Namuyankha naaja, ‘Wee Mutwa, aveene vameenye wunofu kiija nikhandi niishila mu nanda sa kifuunyila, nikhandi nikivadindila mu shifungo na kivatova vina vikikuhuviilila! 20 Hata pina vamubudaga umulunjikhaaji waakho uSitefano, na yuune naali niyiimile baaho. Niyitiishe kiija vamubude, amakhooti ga vina vakhamubudile, one nikhagayangaliile.’ 21 Baaho uMutwa uYeesu wániyankha wáaja, ‘Lutaga! Nikhakufilikha ulute kutali kwa vaanu vina vasili Vayahuudi.’”

UPawulo ikiyikhoona kiija umwene Muluumi

22 Amaswi ago goona aga Pawulo, avaanu vagapuliisa. Leelo wáganile kilogola ago aga kuwudugo, valyova kwa ngufu vaajova, “Vamuwuuse umuunu uyu mu nyi iyi! Isakulwa kiifwa!” 23 Khanji vayitenekha kilyova, vakhandi vipunga amakhooti gaanave na kitiimula amankundi kushaanya. 24 Baheene umukhome wa vayimililaaji va vasulukhali wávalajisa avasulukhali vaakwe kiija vamuyinjise uPawulo mu litengule lya vasulukhali. Wálajisa kiija vamutove kwa majalidi, kuno vikimuposa kiija alogole ishiinu shina shahonsa avaanu vala vamulyovele uPawulo. 25 Avasulukhali vala pina vikimupinya uPawulo kiija vamutove na majalidi, uPawulo wámuposa umuyimililaaji waanave yuna ayiimile baaho wáaja, “Wuli, indaji sikivatawula kimutova kwa majalidi uMuluumi, yuna asinaahigwe?”

26 Umuyimililaaji yula wáganile kipulikha ndeeno, wáaluta wámuposa umukhome waakwe wáaja, “Wisakula kigaha shi? Umuunu uyo mukhaaya wa ku Luumi!” 27 Baheene umukhome wa vayimililaaji va vasulukhali yula wáafikha kwa Pawulo, wámuposa wáaja, “Nijovela, wuli, owe uli mukhaaya wa ku Luumi?” UPawulo wámugomosesa wáaja, “Eena. Nili Muluumi.” 28 Umukhome yula wámujovela wáaja, “Na yuune nikhawupatile uwukhaaya uwa Shiluumi kwa nsila ya kihumya ihela nyinshi mandu.” UPawulo wámugomosesa wáaja, “Leelo, one nili Muluumi wa kisawa.”

29 Baaho, avasulukhali vala vina vakhandi vihiiva kimuposa uPawulo, vaalekha. Umukhome yula woope wátiila, kiiva wáamanya kiija uPawulo Muluumi, khanji amupinyile kwa manyololo.

UPawulo pa livansa lya Vayahuudi

30 Kwaganile kiisha, umukhome uyo uwa vayimililaaji wa vasulukhali, akhandi isakula kimanya lyolyona lina lyahonsa kiija aVayahuudi awo vamusitaashe uPawulo. Ndeeno wámudindulila, wálajisa kiija avatambule avakhome lumo ni livansa lyona vakungaane. Baheene wámuleeta uPawulo, wámuyiimya paveene.