UPawulo iiluta ku Yelusalemu
21
1 Taganagaa kihwesania na vayimililaaji va ku Efeso vala,
tayinjila mu shipugo ishikhome,
tawuukha,
taafikha ku shigunguli sha Kosi.
Kwaganile kiisha,
taaluta ku shigunguli ishinji isha Lodo.
Kihuma apo,
tawuukha khanji taafikha ku lijumbi lya Patala.
2 Apo tashaaga ishipugo ishikhome ishinji shina shiiluta ku nyi ya Foyinike.
Baheene tayangala,
taaluta nasho.
3 Taganile kifikha pina shiwonekha ishigunguli sha Kipulo,
taashila ulubali lwa kunyagamo,
tayitenekha mbakha taafikha ku lijumbi lya Tiilo mu nyi ya Siliya.
Apo tayiikha mu shipugo ishikhome isho,
pala baheene pakhandi pisakulwa kiyiisa amasigo.
4 Tavasakula avahuvililaaji apo tavaaga,
taakhala nawo kunyaanave majuva fungati.
Woope vakhandi vikimulomba uPawulo kiija asikhalutaga ku Yelusalemu,
kwa kiiva uNumbula uMunofu akhandi avawonensiise amalava gina gakhasa kimupata ukho.
5 Leelo,
taganaga kimala nsiku fungati iso,
tawuukha.
Avamanyisiwa woona ava pa Tiilo apo,
avagoosi na vadala vaanave na vaana vaanave,
vatusindihisa mbakha kunja ya lijumbi ilyo,
vatufisa mulubali lwa bahali.
Apo tafugama,
tamufuunya uNguluvi.
6 Taganaga kihwesania,
ose tayangala mu shipugo ishikhome isho,
woope vaawuya kunyaanave.
7 Tawuukha ku Tiilo,
tayitenekha kishuula,
mbakha taafikha mu lijumbi lya Tolomeyi.
Tavahunjila avahuvililaaji vayeesu,
taakhala apo lijuva limo.
8 Kwaganile kiisha,
tawuukha,
taaluta ku lijumbi lya Kayisaliya.
Taakhala mu nanda ya Filipo yuna akhandi mukhomaaji wa Mola iNofu.
Uyo akhandi munyaayumo mu vatanjilisaaji fungati,
vala vina vakhavahagwile ku Yelusalemu.b
9 UFilipo akhandi na vaana vahinja vana,
vina vasinatwalwe,
vakhandi ni shipeelwa sha wukuwamalago.
10 Taganile kikhala kwa luhaavi apo pa Kayisaliya,
wáafikha umukuwamalago kihuma ku nyi ya Yudeya,
ilitaawa lyakwe yu Agabo.c
11 UAgabo uyo wáyinsa,
wátoola ulukhova lwa Pawulo,
wáyipinya mu magulu na mu mawokho,
wáaja,
“UNumbula uMunofu iija ndeeni,
‘Umuunu uwa lukhova ulu,
shiisho ndeeno aVayahuudi ava ku Yelusalemu vakhamupinya,
vakhamutwala kwa vaanu vina vasili Vayahuudi.’”
12 Taganile kipulikha ndeeno,
ose lumo na vayeesu ava ku Kayisaliya,
tikhandi tikimulomba mandu uPawulo kiija asikhalutaga ku Yelusalemu.
13 Leelo wátugomosesa wáaja,
“Mwigaha shishi?
Mwikhoola,
mwisakula kiniyoolofya?
One niyipinyile kidindilwa hata kifwila ku Yelusalemu,
kwa kiiva ya Mutwa uYeesu.”
14 Taganile kimanya kiija uPawulo asikitupuliisa,
taalekha kimusimila taaja,
“Gina uMutwa uYeesu isakula,
gageene gasenjekhaje.”
15 Paanyuma taapinya amasigo geesu,
tayansa kishuula kiluta ku Yelusalemu.
16 Avahuvililaaji vamonga va apo pa Kayisaliya vatusindihisa,
vatufisa mu nanda ya Munasoni,
muna tikhandi tiiluta kikhala na woope kwa luhaavi.
UMunasoni uyo akhandi muunu wa ku shigunguli sha Kipulo,
khanji munyaayumo mu vahuvililaaji va wutasi ava Yeesu.
UPawulo iifikha ku Yelusalemu
17 Taganile kifikha ku Yelusalemu,
avahuvililaaji vayeesu ava apo vatuposheela kwa wushendeefu.
18 Kwaganile kiisha,
ose nu Pawulo taaluta kitangaana nu Yaakobo.
Avayimililaaji woona va shipuga sha vahuvililaaji,
woope vakhandi vakwali.
19 UPawulo wáganaga kivahunjila,
wávajovela goona gina uNguluvi akhandi agahile kwa vaanu vina vasili Vayahuudi,
kwa nsila ya nsengo saakwe.
20 Vaganile kipulikha ago,
vamusufya uNguluvi.
Baheene vamujovela uPawulo vaajova,
“Owe lukholo lwesu,
wiloleela aVayahuudi vinshi mandu shina vamuhuviliile uYeesu.
Awo woona viyinatila mandu indaji sa Musa kwa shiyooli.
21 Vapulikhaga kiija wimanyisa aVayahuudi woona vina viikhala mu nyi sina sisili sa Vayahuudi kiija vasikhasiyinatilaga indaji sa Musa.
Ukivakhaana kivayinjisa mu jando avaana vaanave,
khanji vasikhafwataga ingʼoma seesu isa Shiyahuudi.
22 Lino,
tigahe wuli?
AVayahuudi vayeesu ava apa,
vakhapulikha kiija shiyooli wayinsa panu.
23 Lino,
gaha ngaja shina tisikujovele.
Mu ose apa,
vakwali avagoosi vana,
vina vayiyiijile pa Nguluvi.
24 Ulute lumo nawo mu luvala lwa kihumisa ishadanda kwa kiiva ya kiyivalasa.
Uvahombele isadaakha yina visakulwa kihumya,
apo vasheete inyele saanave.
d Shiisho ndeeno,
avaanu woona vakhamanya shiyooli kiija,
imola saakho sina vapuliishe sisili sa shiyooli.
Vakhamanya kiija,
owe yuuwe ukisiyinatila indaji sa Musa.
25 Lino,
kwa vahuvililaaji vina vasili Vayahuudi,
vina vamuhuviliile uYeesu,
tikhavayandishiile ibalula kivajovela uwulamulaaji weesu kiija,
vasikhaliisaga ifyakiilya fina fihumisiiwe ku mafuunyo ga manguluvi.
Vasikhaliisaga idanda,
awu inyama ya nkhanu yina vayikhomwele,
khanji vasikhagahaga uwushemi.e”
26 Kwaganile kiisha,
uPawulo wávatoola avagoosi vala,
wáagaha amafuunyo ga kiyivalasa lumo na woope.
Paanyuma wáhuluta mu nanda imbaagule iya kifuunyila,
kiija amujovele umutambule ilijuva lina vakhamala kiyivalasa kuveene na yumo yumo kihumya ishadanda.
Kikhatwa kwa Pawulo
27 Insiku fungati isa kiyivalasa,
pina savejeelile kisila,
aVayahuudi vamonga vina vahumile ku nyi ya Asiya vamwaga uPawulo mu lukeeke lwa nanda imbaagule iya kifuunyila.
Vahonsa ililugu lyona lya vaanu vina vakhandi pala,
vamukhata uPawulo.
28 Vayansa kilyova viija,
“Omwe vagoosi va Isilaheli,
mututanje!
Umuunu uyu yumwene yuna imanyisa avaanu woona va popoona pala kiija vave vikitusala ose Vaisilaheli,
vave vikisisala indaji sa Musa,
hata ni nanda iyi imbaagule iya kifuunyila.
Uluvi mandu ayishafwile inanda imbaagule,
pina avahulwise avaanu vina vasili Vayahuudi mu lukeeke lwesu.”
29 Vajovaga ndeeno,
kwa kiiva vakhamwajile uTolofimo uwa ku Efeso yuna asikhandi Muyahuudi ali lumo nu Pawulo ku Yelusalemu.
Vakhandi vihiiva kiija,
uPawulo wámuhulusa uTilofimo mu lukeeke lwa nanda imbaagule iya kifuunyila.
30 Baheene ilijumbi lyona ilya Yelusalemu lyava ni libaatu.
Avaanu vayinsa viisiga kihuma kuno na ukho,
kifikha mu lukeeke lwa nanda imbaagule muna akhandi uPawulo.
Vamukhata,
vamuduluuna mbakha kunja ya nanda imbaagule.
Avayangalilaaji vadinda amalyango nyangu.
31 Pina avaanu awo vikimutova uPawulo kiija vamubude,
imola samufishila umukhome wa vayimililaaji va vasulukhali va Shiluumi kiija ilijumbi lyona ilya Yelusalemu limemile amabaatu.
32 Gwalimo umukhome uyo wávatoola vasulukhali na vayimililaaji vaanave,
vaasiga kiluta ku lilugu lya vaanu.
Avaanu vala vaganile kivaaga avasulukhali vali lumo nu mukhome wa vayimililaaji waanave,
vaalekha kimutova uPawulo.
33 Umukhome uyo uwa vayimililaaji va vasulukhali wámuvejeela uPawulo,
wámukhata,
wálajisa kiija apinywe na manyololo gavili.
Baheene wáaposa wáaja,
“Yu naani uyu?
Wáagaha shi?”
34 Avaanu vala vayansa kilyova.
Avanji vakhandi viijova ili avanji lila.
Umukhome yula wápotiilwe kimanya ishiyooli kwa kiiva ya libaatu lila.
Baheene wálajisa kiija vamutwale uPawulo mu litengule lya vasulukhali.
35 Vaganile kimufisa uPawulo pa wutaanilo wa litengule lila,
avasulukhali vala vamusumula kiija vamukuluse ku vaanu,
kwa kiiva kukhandi ni libaatu mandu.
36 Ililugu lya vaanu vakhandi vikivafwata munyuma yaanave,
kuno vilyova viija,
“Mubudi!”
UPawulo ikiyitanga pa Vayahuudi
37 Pina avasulukhali vala vikimuhulusa uPawulo mu litengule lyanave,
wámuposa umukhome wa vayimililaaji va vasulukhali wáaja,
“Wuli,
nikwiliile kikujovela iliswi limonga?”
Umukhome yula wámugomosesa wáaja,
“Humbe,
na yuuwe umeenye kilogola iShiyunaani!
38 Wuli,
owe usili yuuwe Mumisili yula yuna wáhonsiise uwunansi uwa kiyikhaana iselekhaali ya Shiluumi,
avatwalile avabudaaji magana mashumi gana (4,000) mu luvanda?”
39 UPawulo wávagomosesa wáaja,
“One nili Muyahuudi,
nisaviilwe mu lijumbi ilikhome lya Taliso ku nyi ya Kilikiya,
lijumbi lina limanyikha.
Nilomba unitawule nilogole na vaanu ava.”
40 Umukhome yula wáganile kimutawula,
uPawulo wáyiima pa wutaanilo wula,
wávayinulila iliwokho avaanu vala,
kiija vasisime.
Vaganile kisisima woona,
wáyansa kivajovela kwa shilogolo shaanave isha Shihebulaniya wáaja,