UPawulo iiluta khanji ku Makedoniya na ku Wuyunaani
20
1 Ilibaatu lila ilya ku Efeso lyagana kisila,
uPawulo wávakunganiaga avahuvililaaji ava pala,
wávakhangasa inumbula,
wávahwesa.
Wáwuukha,
wáaluta ku nyi ya Makedoniya.
2 Wáava iishila mu nyi iyo,
ikivajovela avahuvililaaji imola nyinshi isa kivakhangasa.
Baheene wáafikha mu nyi ya Vayunaani,a
3 wáakhala meesi gatatu.
Pina akhandi ikiyipinyanga kitina kwa shipugo ishikhome kiluta ku nyi ya Siliya,
wáamanya kiija aVayahuudi vakhandi vagulumiile kimugahila fivi pina akhava ishuula.
Baheene wálamula kitina lwa magulu,
kishilila ku nyi ya Makedoniya.
4 Kwa luhaavi ulo,
uPawulo akhandi ishuula lumo nu Sopatulo umwana wa Pilo uwa ku lijumbi lya Beloya,
uAlisitaliko nu Sekundo ava ku lijumbi lya Tesalonike,
uGaayo uwa ku lijumbi lya Delibe,
uTimoteo uwa ku lijumbi lya Lisitila,
uTikiko nu Tilofimo ava ku nyi ya Asiya.
5 Avaanu awo woona valongola,
vaaluta kituheepab ose ku lijumbi lya Tulowa.
6 Leelo,
shaganaga kishila ishiwungo sha makhaate gina gasiponyisiiwe ishiwumulilo,
ose tawuukha pala pa lijumbi lya Filipi,
kwa shipugo ishikhome.
Tashuula nsiku sisaanu,
taafikha ku Tulowa.
Taganaga kifikha,
tatangaana na vayeesu vina valongwele,
tikhakheele kula nsiku fungati.
UPawulo ikimufyusa uEwutikho
7 Lyaganile kifikha ilisiku lya Nguluvi,
takungaana kiija tilye lumo iShakiilya iShinofu isha Mutwa uYeesu.
Baheene uPawulo wáyansa kivakhoma avaanu mbakha paashilo sha paakhati,
kwa kiiva akhandi isakula kiwuukha pamulaawu njine.
8 Kumwandi iya pa juulu iya nanda yina tikhandi tikungaanile,
mukhandi muna lifushe mandu,
kiiva ya muli nyinshi sina sikhandi siveekha.
9 Umudiimi yumonga,
ilitaawa lyakwe akhandi itambulwa Ewutikho,
wáali akheele pa ndwi iya kumwandi.
UPawulo pina ayiteneeshe kilogola kwa luhaavi lutali mandu,
baaho uEwutikho wáyansa kisinsila lushe lushe mbakha wágoneelela utulo.
Pina agoneleele,
wáagwa kihuma ku ndwi iya mwandi iya juulu ya wutatu.
Avaanu pina valutile kimuloleela,
vamwaga afwile.
10 UPawulo wáyiikha pansi,
wámugwila umudiimi yula,
wámukumbaatila,
wávajovela avaanu wáaja,
“Musikhatungumalaji,
umuunu uyu muumi hela.”
11 Baheene uPawulo wátaana khanji ku shumba shila,
vaalya iShakiilya iShinofu isha Mutwa uYeesu.
Wáyitenekha kikhoma kwa luhaavi lutali mbakha kwasha,
baheene wáwuukha.
12 Avaanu vala vashendeeva mandu,
kiiva umudiimi yula wáava muumi,
vamutoola vamutwala kukhaaya.
Ulushuulo ulwa kiluta ku Mileeto
13 UPawulo wálamula kijenda lwa magulu kiluta ku lijumbi lya Asosi.
Akhandi isakula kiija timwaje ukho,
timuyangase mu shipugo ishikhome.
Baheene ose tayangala ishipugo ishikhome,
taafikha ukho.
14 Wáganile kitufikha ku Asosi,
tamuyangasa mu shipugo,
taaluta lumo mu lijumbi lya Mitileene.
15 Ilijuva lya wuvili shi taava tipishuula kwa shipugo isho,
tavejeela mulubali lwa shigunguli sha Kiyo.
Ilijuva lya wutatu taafikha pa shigunguli sha Samo.
Ilijuva lya wuna,
taafikha mu lijumbi lya Mileeto.
16 UPawulo wáali agulumiile kishuula kwa shipugo ishikhome bila kishilila ku lijumbi lya Efeso,
kiiva asikhandi idobokha kikhala mandu ku nyi ya Asiya.
Leelo akhandi idobokha kiija,
anyangupe kifikha ku Yelusalemu,
pina shishaanali kifikha ishiwungo sha Pentekositi.
UPawulo ikivahwesa avayimililaaji va shipuga sha vahuvililaaji
17 UPawulo pina akhandi ku Mileeto,
wávafilikha avaanu kivashemeela avayimililaaji va shipuga sha vahuvililaaji va ku Efeso.
18 Vaganile kifikha kunyaakwe,
wávajovela wáaja,
“Omwe mumeenye shina nikhandi nikheele noomwe nsiku soona,
kihuma ilijuva lina nafikhaga pa nyi ya Asiya panu.
19 Mumeenye shina nikhandi nikimusenjela uMutwa uYeesu kwa kiyiyiisa koona,
kwa maanyosi na malava gina ganipataga kwa kiiva ya lugulumilo uluvi lwa Vayahuudi.
20 Mumeenye kiija pina nikhandi nikivamanyisa mu fipuga fya vaanu na mu nanda seenyu,
nikhayihumiise kivakhoma lyolyona lina lisivatanje.
21 Nikhandi nikivabedela aVayahuudi na vina vasili Vayahuudi kiija valambiisile uwunansi waanave,
vagomoshe kwa Nguluvi,
na kimuhuviilila uMutwa weesu uYeesu.
22 “Lino puliisi!
UNumbula uMunofu ikinikhamiilisa one,
kiija nilute ku Yelusalemu,
leelo nisigameenye gina gasinipate ukho.
23 Nimeenye hela kiija,
mu lijumbi lyolyona lina nishilila,
uNumbula uMunofu ikiniwonensa kiija,
ku Yelusalemu vasinilemase na kinidindila mu shifungo.
24 Leelo hata nda nifwe,
nisisaajila uwuumi wangu.
Ishiinu ishikhome mandu kunyangu,
niyimaliise insengo yina uMutwa uYeesu anipeelile,
kiija nivakhome avaanu iMola iNofu iya mota ya Nguluvi.
25 “Nikhandi niishila kunyeenyu kivakhoma isa Wutwa wa Nguluvi.
Lino leelo,
nimeenye kiija omwe woona musikhanyaaga khanji kaa.
26 Ndeeno,
nikivajovela woona iminsiyaano kiija,
nda kuna muunu yoyoona yuna asiiyaje,
kusiina umuunu uwa kinipiikha.
27 Nikhayihumiise kikhoma goona gina uNguluvi akhandi agulumiile kwa lugano lwakwe.
28 UNumbula uMunofu wávaviikhaga omwe muve vayimililaaji va shipuga sha vahuvililaaji va Nguluvi.
Muyiyangalilaje yuumwe na kishidiima ishipuga shaakwe,
shina uNguluvi wáshikulusaaga kwa danda ya Mwanaakwe.
29 Nimeenye kiija,
one pina nawuukha na kivalekha omwe,
avamanyisaaji va wudehi vakhayinsa kunyeenyu.
Avamanyisaaji ava vakhava vakhali ngaja mbwawa sa mu lihakha,
vasikhashisungupila ishipuga.
30 Hata munyeenyu omwe,
vakhawonekha avaanu vina vakhava viijova imola isa wudehi isa kivayasa avahuvililaaji,
kiija omwe muvafwate hela.
31 Kwa kiiva ya ilyo,
muveesaje meeho!
Muveesaje nu luuju kiija,
kwa maakha gatatu ishilo ni shiminsi nisikhakhateele kivapavila omwe shila muunu kwa maanyosi.
32 “Nikimufuunya uNguluvi avadiime na kiija iliswi lya mota yaakwe,
livalongose.
Iliswi ilyo lina ngufu iya kivajinia na kivayimiilila mu goona gina uNguluvi avavishiile omwe na vabaagule avanji woona.
33 One nisikhasidobweshe ihela sa muunu yoyoona,
awu umwenda gwakwe.
34 Omwe mumeenye shina nikhandi nisenga insengo kwa mawokho gangu,
kwa kiiva ya fiinu fyangu fina nikhandi nikifisakula,
ni fya vayangu vina tikhandi lumo noone.
35 Mu goona gina nagasengaga,
nikhandi nisakula kivawonensa kiija,
tiveesaje tijimba kisenga insengo.
Baheene tive tiipata ifiinu ifya kivatanga avaanu vina vashepushiilwe.
Muveesaje nu luuju kwa maswi gina uMutwa uYeesu wájovile kiija,
‘Vayimiliilwe mandu vina viihumya,
kishila vina viposheela.’”
36 UPawulo wáganile kimala kilogola amaswi ago,
wáfugama lumo nawo woona,
vamufuunya uNguluvi.
37 Baheene woona vakhoola,
vamukumbaatila na kimunoonela pina vikimuhwesa uPawulo.
38 Iliswi lina lyavagahaga vasugumilwe mandu,
lila lina wávajovile kiija,
vasikhamwaga khanji kaa.
Baheene vamusindishila,
vamufisa pa shipugo ishikhome.