Nsengo sa Vanandeje 19

UPawulo iikhoma ku Efeso

1 Uluhaavi ulo luna uApolo akhandi ku lijumbi lya Kolinto, uPawulo woope akhandi ishuula mu nyi ya Asiya, wáafikha ku lijumbi lya Efeso. Pina ali pala pa Efeso, wátangaana na vahuvililaaji vamonga va Yeesu, 2 wávaposa wáaja, “Mwaganile kimuhuviilila uYeesu, wuli, mwamuposheelaga uNumbula uMunofu?” Vamugomosesa vaajova, “Hata kipulikha kiija akwali, tisinapulishe kaa!” 3 Wávaposa wáaja, “Lino, mwatwinisiwaagwa kwa wutwiniaji wushi?” Vamugomosesa vaajova, “Tatwinisiwaagwa kwa wutwiniaji wa Yohana.”

4 UPawulo wávajovela wáaja, “UYohana akhandi ikivatwinia avaanu kiwonensa kiija, valambiisila uwunansi waanave. Akhandi ikivajovela kiija, vamuhuviilile yuna asiyinse kunyuma yaakwe, yumwene uYeesu.” 5 Avaanu vala, vaganile kipulikha amaswi ago, woope vatwinisiwa kwa litaawa lya Mutwa uYeesu. 6 UPawulo wáganile kivaviishila amawokho, uNumbula uMunofu wávayiishila, vayansa kilogola kwa shilogolo shinji, na kikuwa amalago. 7 Avaanu awo vakhandi vagoosi ishumi na vavili ndeeni.

8 Kwa luhaavi lwa meesi gatatu, uPawulo akhandi iyinjila mu nanda iya kifuunyila, akhandi ilogola na vaanu kwa wujimfu na kivajovela kiija, avaanu vahuvililaje ulwa Wutwa wa Nguluvi. 9 Leelo avamonga vakhaana kihuviilila, vayansa kiliga amamanyiso aga Nsila ya Mutwa uYeesu baaho pa lilugu. Baheene uPawulo wávalekha, wávatoola avahuvililaaji, akhandi imanyisa nsiku soona mu nanda ya kiyimanyisisa, pina pakhandi pa muunu yuna wátambulwagwa Tilano. 10 UPawulo wáyitenekha kigaha ndeeno kwa maakha gavili. Baheene woona vina vakhandi viikhala mu nyi ya Asiya, aVayahuudi na vina vasili Vayahuudi, vapulikha injowo isa Mutwa uYeesu.

Avaana va Sikewa viijesa kilidaga ililungu

11 Uluhaavi ulo uNguluvi akhandi iigaha amabikha makhome kishilila kwa Pawulo. 12 Avaanu vakhandi vitoola ifitambala na menda aganji ga nsengo sina uPawulo wásikhataga, vakhandi vikisitwala kwa vatamu, woope vakhandi viipona amatamu gaanave, khanji amalungu gakhandi gikivahuma.

13-14 Pakhandi na Vayahuudi vamonga vina vakhandi viyulutikha kuno na ukho, vikigadaga amalungu mu vaanu. Mu Vayahuudi awo, vina vakhandi viigaha ndeeno, vakhandi vaana va shigoosi fungati va muunu yuna wátambulwagwa Sikewa. Uyo akhandi mutambule mukhome wa Vayahuudi. Ilijuva limonga vajesaaga kilidaga ililungu kwa muunu yumonga vaajova, “Kwa litaawa lya Yeesu yuna uPawulo ikimukhoma, nikikujova muhuma umuunu uyu.” 15 Leelo, ililungu lyavagomosesa lyajova, “UYeesu nimumeenye, nayu Pawulo nimumeenye, leelo omwe yuumwe vava naani?” 16 Baheene umuunu yula yuna ililungu lyamukhataga, wávagulushila woona wávamena ingufu. Wávatova mandu, vaasiga, vaahuma mu nanda vali bwinda, vana nyeeya mu muvili.

17 Imola iso samanyikhaga mandu kwa Vayahuudi na vina vasili Vayahuudi woona vina vakhandi viikhala pala pa Efeso. Woona vatiilaga, valisufya ilitaawa lya Mutwa uYeesu. 18 Avaanu vinshi vina vamuhuvililaga uYeesu valambiisila pa vaanu uwunansi waanave wuna vagahaga. 19 Mu awo, vakhandi vakwali vinshi vina vakhandi viigaha uwuhavi. Valeeta amataafili gaanave gina vakhandi vigahila uwuhavi, vaganyaanya mu mooto pa vaanu woona. Vaganile kigavasa amafungu ga mataafili gala, vaawona giifisa magana ishumi mashumi gasaanu (50,000) kwa hela yaanave. 20 Shilushwali ndeeno, injowo isa Mutwa uYeesu sikhandi siyalaalila mu vaanu na kiyonjelela kiiva ni ngufu.

Ilibaatu ilikhome ku Efeso

21 Gaganile kishila ago goona, uPawulo wáhiivile kiija alute ku lijumbi lya Yelusalemu, kishilila ku nyi ya Makedoniya na ku nyi ya Akaya. Wálogola wáaja, “Uluhaavi luna nikhafikha ku Yelusalemu, nisakulwa nifishe na ku lijumbi lya Luumi.” 22 Baheene wávafilikha avaanu vavili mu vala vina vakhandi vikimutanjilisa, wávajova kiija valongole kiluta ku nyi ya Makedoniya. Avaanu awo vava Timoteo nu Elasito. Umwene wásigala ku nyi ya Asiya kwa luhaavi lufupi.

23 Kwa luhaavi ulo pala pa Efeso, lyatimukha ilibaatu likhome mandu kwa kiiva ya mamanyiso ga Nsila ya Mutwa uYeesu. 24 Mu lijumbi ilyo mukhandi nu muunu yumonga umuponda sanaamu isa fyuma isa mafungu makhome, ilitaawa lyakwe akhandi itambulwa Demetiliyo. Akhandi iponda inanda ndoodo sina sihwanana ni lilonjelo likhome ilya Alitemi, ilinguluvi lyanave ilya shidala. Insengo iyo yikhandi yikivapeela avaponda fyuma vayine, kikwava ihela nyinshi. 25 UDemetiliyo wávakungaania avaponda fyuma vayine, lumo na vasenga nsengo avanji vina vakhandi visenga insengo ngaja yiiyo. Wávajovela wáaja, “Omwe vagoosi, mumeenye wunofu kiija, tiipata ihela nyinshi kihuma mu nsengo iyi. 26 Lino mupulikha na kiloleela shina woope uPawulo aasi, ikivaseetula avaanu vinshi ava pa Efeso apa, na mu mbali soona isa nyi ya Asiya kwa kivajova kiija, isanaamu sina avaanu vitenda kwa mawokho gaanave, gasili manguluvi ga shiyooli. 27 Lino, nitiila kiija insengo yeesu iyi avaanu vakhayisala, yisili ndeeno hela, ndaali, leelo ililonjelo ilikhome ilya Alitemi umukhome, ilinguluvi lyesu, lyope vakhalisala. UAlitemi umukhome linguluvi lina tikilifuunya mu nyi yoona iyi iya Asiya, na mu nyi isinji soona, ilishima lyakwe lisiisile.”

28 Avaponda fyuma vayaanave vaganile kipulikha imola iso, vakhalala mandu. Vakhandi vilyova ilyowo viija, “UAlitemi uwa apa pa Efeso mukhome!” 29 Ilijumbi lyona ilya Efeso lyava ni libaatu. Ililugu lya vaanu lyakungaana, vavakhata avaanu vavili ava ku nyi ya Makedoniya, uGaayo nu Alisitaliko, vina vakhandi vishuula lumo nu Pawulo. Vavatwala ku luvala ulwa kineenela. 30 UPawulo akhandi isakula kiija, alute mu lilugu lya vaanu vala, leelo avahuvililaaji vayine vamukhaana. 31 Hata avamanyi vaakwe avanji vina vakhandi vakhome va ku Asiya, woope vatwala iliswi lya kimupavila kiija, asikhayinjilaga mu luvala lwa shiwungu shila.

32 Uluhaavi luulo avaanu vina vakungaanile pala, vakhoosa ishawuti valogola. Avanji vakhandi viijova ili, avanji lila. Vinshi vasikhameenye gina vakunganilaga panu pamo. 33 AVayahuudi vamuyiimya umuunu yuna akhandi itambulwa Alekisanda pa vaanu vala. Avaanu avanji mu lilugu lila vamupwepela aga kilogola. Woope wávanyenyulila iliwokho avaanu woona kiija vasisime, kwa kiiva akhandi isakula kiyitanga. 34 Leelo avaanu va lilugu lila, vaganile kimanya kiija Muyahuudi, woona vakhandi vilyova lumo kwa masala gavili viija, “UAlitemi uwa ku Efeso mukhome!”

35 Kuwudugo, umuyandikhaaji umukhome wa lijumbi lila wávasimila avaanu vala wáaja, “Omwe vagoosi va ku Efeso, kusiina yuna asiimanya kiija, ilijumbi ili lilyene lisunga ililonjelo ilikhome ilya Alitemi ilinguluvi lyesu, lumo ni sanaamu yaakwe yina yagwisaga kihuma kushaanya. 36 Kusiina umuunu yuna akwiliile kikhaana imola isi. Lino omwe musakulwa kisisima, musikhasengaji lyolyona nyangu. 37 Muvaleetile apa avaanu ava, kiiva vasihiijile shiinu shoshoona mu lilonjelo ilikhome ilya linguluvi lyesu, khanji vasililijile ilinguluvi lyesu. 38 UDemetiliyo na vaponda fyuma vayine, nda vana lujowo lumonga na vaanu ava, visakulwa kivasitaakha pa valamulaaji va ndaji. 39 Nda muna lujowo ulunji, mulutwale pa shiwungu shina shiyiitikhwa ni ndaji seesu. 40 Ngaja shina tiigaha iminsiyaano, tikwiliile kiyambusiwa vatusitaashe kiija, tapinsa ilibaatu likhome. Nda vatusitaashe kwa libaatu ili, tisiina iliswi lina tisiyanshe, kwa kiiva ilibaatu ili lya bule hela.” 41 Wáganile kimala kilogola ago, wáaja vapalankhanaje, vawuyaje kunyaanave.