Nsengo sa Vanandeje 18

UPawulo ku Kolinto

1 Gaganile kishila ago, uPawulo wáwuukhaga ku lijumbi lya Atene, wáaluta mu lijumbi lya Kolinto. 2 Wátangaana nu Muyahuudi yumonga, ilitaawa lyakwe akhandi itambulwa Akila. Umuunu uyo wásawaagwa ku nyi ya Ponto. UAkila akhandi nu mudala waakwe yuna akhandi itambulwa Pulisika. Avaanu ava vakhandi vahumile lilino ndeeni, mu lijumbi lya Luumi mu nyi ya Italiya. Vagahaga ndeeno kwa kiiva umutwa umukhome uKilawudiyo wálajisaaga kiija, aVayahuudi woona vawuushe ku Luumi. Baheene uPawulo wáaluta kivahunjila uAkila nu mudala waakwe. 3 Aveene vakhandi visenga insengo ya kihona amaheema, insengo yina woope wáyisengaga, wáyansa kikhala nawo, na kisenga insengo yila lumo. 4 Shila lijuva lya Sabaato, uPawulo akhandi iyinjila mu nanda iya kifuunyila, akhandi ijovana na Vayahuudi na vina vasili Vayahuudi kiija, pamonga woope ndi vamuhuviilila uYeesu.

5 Uluhaavi luulo, uSiila nu Timoteo vaafikha kihuma ku nyi ya Makedoniya. UPawulo wáyansa kimanyisa iLiswi lya Nguluvi uluhaavi lwakwe loona kwa Vayahuudi. Akhandi iikhoma kiija, uYeesu yu Mukulusaaji yuna uNguluvi wátahisaaga kimufilikha. 6 Leelo aVayahuudi vamukhaana na kimuliga uPawulo. Baheene wákungʼuuna amankundi mu menda gaakwe, wávajovela wáaja, “Nda uNguluvi avatove, maanyi yuumwe! Kusiina uwa kinipiikha one kwa liswi ilyo. Kihuma lino, nisiive niiluta kikhoma iMola iNofu kwa vaanu vina vasili Vayahuudi.”

7 Baheene uPawulo wáwuukha mu nanda iya kifuunyila, wáhuluta mu nanda ya muunu yumonga ilitaawa lyakwe yu Tito Yusito, akhandi ihuviilila ilihuuvi ilya Shiyahuudi. Inanda iyo yikhandi yivejeleene ni nanda iya kifuunyila. Umo wáyitenekhaga kikhoma iMola iNofu ya Mutwa uYeesu. 8 Umuyimililaaji wa nanda iya kifuunyila yila, yuna akhandi itambulwa Kilisipo, wámuhuviilila uMutwa uYeesu, lumo na vaanu woona mu nanda yaakwe. AVakolinto vinshi pina vakhandi vipulikha amaswi ga Pawulo, woope vakhandi vikigahuviilila na kitwinisiwa.

9 Ilijuva limonga paashilo, uMutwa uYeesu wámujovela uPawulo mu mahilu wáaja, “Usikhatiilaga, uyitenekhaje kikhoma, usikhasisimaga. 10 One nili lumo noowe. Kusiina umuunu yuna angakuyalushila kiija akulemase, kwa kiiva mu lijumbi ili, nivabagwile avaanu vinshi kiiva vahuvililaaji vangu.” 11 Baheene uPawulo wáakhala mwakha gumo na meesi mutanda ku Kolinto, akhandi imanyisa avaanu iLiswi lya Nguluvi.

12 Leelo uluhaavi luna uGaliyo akhandi mukhome wa nyi ya Akaya, aVayahuudi woona vamuyalushila uPawulo kwa numbula yimo. Vamukhata, vamutwala uluvala luna ihijila amakhole uGaliyo, 13 vaajova, “Umuunu uyu ikivamanyisa avaanu kiija, vave vikimufuunya uNguluvi kwa nsila yinji yina yipungana ni ndaji seesu.”

14 UPawulo pina isakula kilogola, uGaliyo wávajovela aVayahuudi wáaja, “Omwe Vayahuudi nda mwali mumusitaashe umuunu uyu kwa kiiva ya wunansi, awu kwa kiiva ya wuvi, naali nikwiliile kivapuliisa. 15 Leelo, kwa kiiva mukhaanania ulwa maswi na mataawa mu ndaji seenyu, mugamale yuumwe. One nisigeene kiiva mulamulaaji wa njowo isi.” 16 Baheene uGaliyo wálajisa avasulukhali kiija, vavadaje aVayahuudi awo vawuushe uluvala luna ihijila amakhole. 17 Baheene avaanu vina vasikhandi Vayahuudi vina vakhandi pala, vamukhata uSositene, umuyimililaaji wa nanda iya kifuunyila, vayansa kimutova panja bahala pina akhandi ihijila. Leelo uGaliyo asikhandi ihiiva hata padoodo ago gina vagahaga.

UPawulo iitina ku Antiyokiya ya ku nyi ya Siliya

18 UPawulo wáyitenekha kikhala ku Kolinto nsiku nyinshi. Kuunyuma, wávahwesa avahuvililaaji vayine, wáaluta lumo nu Akila nu Pulisika mu lijumbi lya Kenikileya. Ukho, avaanu vamonga vamusheeta inyele saakwe uPawulo kwa kiwonensa kiija akhandi akwisiise uluyiigo lwakwe, baheene ava Pawulo vayangala ishipugo ishikhome sha kiluta ku Siliya. 19 Vaganile kifikha ku lijumbi lya Efeso, uPawulo wávalekha uPulisika nu Akila kiija vakhale ukho. Wáhuluta mu nanda iya kifuunyila, wáakhoma iMola iNofu kwa Vayahuudi. 20 Baheene vamulomba uPawulo kiija ayonjelese insiku isa kikhala kunyaanave, leelo wákhaana. 21 Wávahwesa, wávajovela wáaja, “UNguluvi nda agane, nikhatina khanji kunyeenyu.” Baheene wáwuukha pala pa Efeso ni shipugo ishikhome.

22 UPawulo wáganile kifikha ku lijumbi lya Kayisaliya, wáaluta ku Yelusalemu kivahunjila avahuvililaaji, baheene wáaluta ku Antiyokiya. 23 Wáganile kikhala kwa luhaavi lufupi, wáwuukha, wáatina ku nyi ya Galatiya na ku nyi ya Filigiya, akhandi ikivajinia avahuvililaaji woona.

UApolo iikhoma ku Efeso

24 Uluhaavi ulo, kukhandi kuna Muyahuudi yumonga, yuna akhandi itambulwa Apolo. Umuunu uyo wásawaagwa mu lijumbi lya Alekisandiliya. Uyo akhandi munya wumanyi wa kilogola, wámanyaga mandu aMayandikhwa aManofu. 25 Khanji akhandi amanyisiiwe insila ya Mutwa uYeesu, akhandi imanyisa avaanu ulwa Yeesu kwa wugolofu, kiiva akhandi ana lihaahi mandu ilya kimanyisa, hata ave akhandi awumeenye uwutwiniaji uwa Yohana hela. 26 Wáyinsaga ku Efeso, wáhuluta mu nanda iya kifuunyila, wáyansa kimanyisa iMola iNofu kwa wujimfu. UPulisika nu Akila, vaganile kipulikha amamanyiso aga Apolo, vamutoola, vaaluta na woope kunyaanave, vamumanyisa insila iyo iya Nguluvi, baheene ayimanye wunofu mandu.

27 Kuunyuma, uApolo akhandi isakula kiluta ku nyi ya Akaya. Avahuvililaaji vayine vamujinia inumbula. Vavayandishila ibalula avahuvililaaji vayaanave ava ku Akaya, kiija vamuposheele wunofu. Wáganile kifikha kula, wávatanjilisa mandu vina vamuhuvililaga uYeesu kwa mota ya Nguluvi. 28 Akhandi ikivamena aVayahuudi kwa ngufu mu lilugu lya vaanu, kwa nsila ya kivawonensa mu Mayandikhwa aManofu kiija, uYeesu yu Mukulusaaji yuna uNguluvi wátahisaaga kimufilikha.