UPawulo ikiyitanga pa mutwa uAgilipa
26
1 Baheene uAgilipa wámujovela uPawulo wáaja,
“Witawulwa yuuwe kiyitanga injowo saakho.”
Baheene uPawulo wáyiimya iliwokho,
wáyansa kiyitanga wáaja,
2 “Mutwa Agilipa,
shiba iminsiyaano,
nikiyiwona kiija niyimiliilwe,
kwa kiiva nili panyaakho kiyitanga kwa goona gina aVayahuudi vikinisitaakha.
3 Niijova ndeeno,
hasa kwa kiiva owe umeenye wunofu ingʼoma soona isa Vayahuudi na goona gina vikhaanania.
Lino,
nikikulomba unipuliise kwa lugugumilo.
4 “AVayahuudi woona vameenye shina nisunjiilwe,
kihuma uwaana wangu.
Vameenye shina nikhandi niikhala kihuma pawutasi mu Vayahuudi vayangu,
hata pina nikhandi ku Yelusalemu.
5 Vanimeenye kihuma khala,
khanji nda vageene,
aveene vakwiliile kinibedela kiija nikhandi munyaayumo mu shipuga sha Vafalisaayo.
Awo vasiyinatilaga mandu indaji sa Nguluvi kishila ifipuga fyona.
6 Lino niyiimile panu nihigwe,
kwa kiiva ya luhuviililo lwangu mu lutaahiso,
luna uNguluvi wátahisaaga kwa vambuyeesu.
7 Ulutaahiso ulo lulwene luna avaanu va fikholo ishumi na fivili,
vijimba kimufuunya uNguluvi ishiminsi ni shilo,
kwa kiiva vihuviilila kiija uNguluvi akhakwisa ngaja shina wátahisaaga.
Wee mutwa,
uluhuviililo ulo lulwene aVayahuudi vikinisitaakha iminsiyaano!
8 Ndeeno,
kwashi omwe mwikhaana kiija uNguluvi asikwiliile kivafyusa vina vafwile?
9 “Ulwamwandi na yuune nikhandi nihuviilila kiija nigahe shila shiinu isha kilikhaana ilitaawa lya Yeesu uwa ku Nasaleti.
10 Ago gageene nagahaga ku Yelusalemu.
Ukho nikhandi nikivadindila mu shifungo avahuvililaaji va Yeesu vinshi kwa wutawulilwa wa vatambule avakhome.
Avanji vaganaga kihigwa kiija vabudwe,
na yuune nikhatovile ikuula iya kiyiitikha kiija vabudwe.
11 Nikhandi niiluta wiila kivalemasa mu nanda sa kifuunyila soona,
kiija nivakhamiilise kimutofola uYeesu.
Nikhandi nikivakhalalila mandu,
hata nikhandi niiluta kivalafya mu majumbi aga kutali.
12 “Ilisiku limonga,
nikhandi mu nsila kiluta ku lijumbi lya Damesiki,
kwa wutawulilwa ni ndaji kihuma kwa vatambule avakhome.
13 Mutwa,
pina nikhandi mu nsila,
paminsi mu lisala lya mutanda,
nalwaga ulungʼali ulukhome kihuma kushaanya.
Lukhandi lungʼalikha kishila ulwa lijuva,
lwatungʼalikha mandu mbali soona,
one na vayangu vina vakhandi vishuula noone.
14 Woona taagwa pansi.
Napulikha ishawuti yikinijova mu shilogolo sheesu isha Shihebulaniya yiija,
‘Sawuli!
Sawuli!
Kwashi ukinilafya?
Ukiyilafya yuuwe hela,
ngaja dogovi yina yiitova amanaala ulukwegu ulwa mutwa waakwe.’
15 “One naaposa naajova,
‘Owe yuuwe naani mutwa?’
UMutwa wánigomosesa wáaja,
‘One yuune Yeesu,
yuna owe ukinilafya.
16 Lino,
yiima!
Nakutwiwushila kiija nikugahe uve muvanda wangu,
na mulunjikhaaji wangu.
Usivabedele avaanu gina wagaaga iminsiyaano na gala gina nikhakuwonensa kumwandi.
17 Nikhakukulusa mu mawokho ga Vayahuudi vayaago,
na kwa vaanu vina vasili Vayahuudi.
Nikikufilikha kuveene,
18 kiija uvadindule ameeho gaanave,
vahume mu nshiisi vayinjile mu wuvalafu na vahume mu wutwa uwa Shetaani,
vayinjile mu Wutwa wa Nguluvi.
Kwa kigaha ndeeno,
baheene vakhasaajilwa uwunansi waanave na vakhava lumo na vala vina vavalasiiwe kwa nsila ya kinihuviilila one.’
19 “Lino wee mutwa Agilipa,
lulwene nagayinatilaga amahilu gala gina nagaagaga kihuma kushaanya.
20 Baheene nayansa kivakhoma avaanu ava ku Damesiki,
paanyuma avaanu va ku Yelusalemu na va nyi yoona iya Yudeya na kwa vina vasili Vayahuudi.
Nikhandi nikivakhoma kiija valambiisile uwunansi waanave,
vamusetushile uNguluvi na kigaha gina giwonensa kiija,
shiyooli vaseetukha mu numbula saanave.
21 Ago gageene gapinsaaga aVayahuudi vanikhate mu lukeeke lwa nanda imbaagule iya kifuunyila,
visakulaga kinibuda.
22 Leelo uNguluvi wánitanjilisa mbakha kifikha iminsiyaano.
Ago gageene ganigaha kiija niyiime pa vakhome na pa vanangʼana kihumya uwulunjikhaaji.
Kusiina amaswi aganji gina nilogola,
leelo gagala gina avakuwamalago nu Musa vajovaga,
kiija gakhasenjekha.
23 Woona awo vajovaga kiija,
uMukulusaajia akhalafisiwa,
khanji akhava wa wutasi kifyukha kihuma kwa vina vafwile,
b kiija ayalaalise imola isa lumuli ulwa wukulukho kwa vaanu veesu aVayahuudi na kwa vaanu vina vasili Vayahuudi.”
24 Pina uPawulo ikiyitanga,
uFesito wályova wáaja,
“Wee Pawulo!
Una lukwale!
Kiyimba kwakho mandu kukwene kukupeelile ulukwale!”
25 UPawulo wámugomosesa wáaja,
“Wee mutiilwa Fesito,
one nimugaya lukwale.
Amaswi aga gina nilogola ga shiyooli,
khanji ga luhala loona.
26 Umutwa woope agameenye wunofu amaswi aga.
Nimeenye kusiina lyolyona lina lyamushilaga,
kwa kiiva gasenjekha bahawuvalafu.
Lulwene kiija namujovela ago kwa wujimfu.
27 Wee mutwa Agilipa,
wuli,
ukigahuviilila gina avakuwamalago vajovaga?
One nimeenye kiija ukigahuviilila.”
28 Baheene uAgilipa wámujovela uPawulo wáaja,
“Wuli,
wihiiva kiija usiniseetule kiiva Mukilisito kwa luhaavi lufupi ngaja ulu?”
29 UPawulo wámugomosesa wáaja,
“Hata yive kwa luhaavi lufupi,
awu lutali,
nikimufuunya uNguluvi kiija owe lumo na vaanu woona vina vikinipuliisa iminsiyaano,
muve ngaja shina nishwali one,
leelo bila kipinywa na manyololo aga.”
30 Baheene umutwa uAgilipa lumo nu mukhome wa nyi uFesito nu Belenike,
na vanji vina vakhandi vakheele lumo nawo,
vayiima.
31 Vaganile kiwuukha apo,
vajovelana vaajova,
“Umuunu uyu asigahile shiinu shoshoona shina shikwiliile kimugaha afwe,
awu kidindilwa mu shifungo.”
32 UAgilipa wámujovela uFesito wáaja,
“Umuunu uyu,
wáali alekhaje kilomba kiija umukhole gwakwe guhigwe kwa Kayisaali,
nda wáava adinduliilwe.”