Nsengo sa Vanandeje 10

UKolineliyo ikimushemeela uPetulo

1 Mu lijumbi lya Kayisaliya, kukhandi nu Muluumi yumonga, akhandi itambulwa Kolineliyo. Akhandi umuyimililaaji wa vasulukhali. Akhandi ilongosa avasulukhali ligana, kihuma mu shipuga ishikhome sha vasulukhali, shina shatambulwagwa shipuga sha Vaitaliya. 2 Khanji akhandi muunu munofu yuna akhandi ikimuyinatila uNguluvi, lumo na vaanu woona va mukhaaya yaakwe. Akhandi ikimufuunya uNguluvi luhaavi loona na kivatanga mandu avapiina.

3 Ilisiku limonga, yikhandi mu masala ga gonja paminsi, uKolineliyo wámwagaga umalayikha wa Nguluvi mu mahilu. Umalayikha wámujovela wáaja, “Wee Kolineliyo!” 4 UKolineliyo wámungʼalulila ameeho umalayikha yula kwa kitungumala, wámuposa wáaja, “Wee mutwa, kuli shi?” Umalayikha wámujovela wáaja, “UNguluvi wápulikha amafuunyo gaakho, wákwaga shina ukivatanjilisa avapiina. Ago goona ikigaaga kushaanya ukho ngaja sadaakha ya kimushendeefya. 5 Lino, uvafilishe avaanu ku lijumbi lya Yopa, vamushemeele umuunu yuna itambulwa Simoni, ilitaawa ilinji itambulwa Petulo. 6 Iikhala kwa muunu yuna itambulwa Simoni, yuna iinosa inkwembe. Inanda yaakwe yili kulubali lwa bahali.”

7 Umalayikha wáganile kimala kimujovela uKolineliyo, wáwuukha. Baheene uKolineliyo wávashemeela vavili mu vavanda vaakwe, lumo nu musulukhali yumo mu vatanjilisaaji vaakwe, yuna akhandi ikimuyinatila uNguluvi. 8 UKolineliyo wáganile kimala kivataviilila goona gina umalayikha wámulajisaaga, wávafilikha ku Yopa.

UPetulo ikigaaga amahilu

9 Pamulaawu njine ilisala lya mutanda paminsi, avaanu vina uKolineliyo wávafilikhaga vavejeela ku Yopa. Uluhaavi ulo uPetulo wátaana kushaanya ya nanda, kiija amufuunye uNguluvi. 10 Injala yamuluma, wádobokha kiilya. Pina vitelekha ishakiilya shina asiilye, wágaaga amahilu. 11 Mu mahilu ago, wákwaga kushaanya kudindule, ishiinu shina shili ngaja mutote mukhome guna gukhandi gukhatiilwe imbali saakwe sina, gwayiikha pansi. 12 Mukhati yaakwe mukhandi ni nkhanu sa fihwano fyona. Mukhandi ni nkhanu inya magulu gana, inkhanu sina sitambala ni nyuni sina sigulukha ku wulanga.

13 Baheene, uPetulo wápulikha ishawuti yikimujova kiija, “Wee Petulo, yiima! Ushinje, ulye!” 14 UPetulo wámugomosesa wáaja, “Ndaali mutwa! Loleela, nisinajelaje kiilya shoshoona shina indaji sa Musa sikishijova sha mwikho!” 15 Baheene ishawuti yamujovela uPetulo mala khavili kiija, “Ishiinu shoshoona shina uNguluvi ashivaleese, owe usikhashijovaga mwikho.” 16 Ago gasenjekhaga mala khatatu yoona, baaho umutote gula gwatinisiwa kushaanya.

17 UPetulo pina ihiviilila kiija amahilu ago uluganulo lwakwe shi, avaanu vina uKolineliyo wávafilikhaga, pina vayimanyaga inanda ya Simoni, vayiima pa mulyango. 18 Vahoodesa, vaaposa vaaja, “Wuli, apa papeene iikhala kwa luhaavi uSimoni yuna itambulwa Petulo?” 19 Pina uPetulo ihiviilila ulwa mahilu ago, uNumbula uMunofu wámujovela wáaja, “Pansi vakwali avaanu vatatu vina vikikusakula. 20 Lino yiima, yiikha, ulute lumo nawo. Usikhaveesaga nu muninu khabisa, kwa kiiva yuune navafilikha.”

21 UPetulo wáganile kiyiikha pansi, wávajovela avaanu vala wáaja, “One yuune yuna mukinisakula. Lino! Kwashi mwayinsa?” 22 Vamugomosesa vaaja, “Umuyimililaaji yumonga wa vasulukhali wátufilikha, ilitaawa lyakwe yu Kolineliyo, mugolofu, ikimuyinatila uNguluvi, khanji aVayahuudi woona vikimusufya. Lino umalayikha wa Nguluvi wámujovela kiija, akusaajise kunyaakwe, apuliise amaswi gina usimujovele.” 23 Baheene uPetulo wávasaajisa avaanu vala mukhati, vaava vahensa vaakwe.

UPetulo mu nanda ya Kolineliyo

Kwaganile kiisha, uPetulo na vaanu va Kolineliyo vaaluta na vahuvililaaji avanji ava ku Yopa. 24 Ilijuva lya wuvili, vaafikha ku lijumbi lya Kayisaliya. Vamwaga uKolineliyo avakunganiise avalukholo lwakwe, lumo na vamanyi vaakwe, avaheepile.

25 UPetulo wáganile kifikha, uKolineliyo wámusaajisa, wáfugama pansi pa magulu gaakwe kimupeela ulugoto. 26 Leelo uPetulo wámunyenyula, wámujovela wáaja, “Yiima! Loleela, na yuune nili muunu ngaja yuuwe!” 27 Baheene uPetulo nu Kolineliyo vahuluta mukhati yaakwe kuno vilogola, vavaaga avaanu vinshi vakungaanile mula. 28 UPetulo wávajovela wáaja, “Omwe mwimanya wunofu kiija, ose tili Vayahuudi, ingʼoma seesu sikitukhaana kihansinkhana na vaanu vina vasili Vayahuudi, hata kijendelana na woope. Leelo uNguluvi wániwonensa kiija, nisikhamujovaga umuunu yoyoona kiija mwikho awu mwafu. 29 Mwagana kinishemeela, nayinsa, lulwene nisakhaana. Lino, mwanishemeelela shi?”

30 UKolineliyo wámugomosesa wáaja, “Sishilile nsiku sitatu kihuma uluhaavi luna nikhandi nikimufuunya uNguluvi mu nanda yangu iyi, uluhaavi ngaja ulu ulwa lisala lya gonja lya paminsi. Baaho namwaga umuunu ayiimile kumwandi yangu afwalile amenda gina gingʼaala ngʼaala. 31 Wánijovela wáaja, ‘Wee Kolineliyo, uNguluvi wápulikha amafuunyo gaakho, ishendeeva na shina ukivatanjilisa avapiina. 32 Baheene lino, uvafilishe avaanu valute ku Yopa, vamushemeele uSimoni yuna itambulwa Petulo. Iikhala kwa muunu yuna itambulwa Simoni, yuna iinosa inkwembe. Inanda yaakwe yili kulubali lwa bahali.’ 33 Ago gageene ganigaha kiija, nivafilishe nyangu avaanu vakushemeele, na yuuwe waagaha wunofu kiyinsa. Lino woona tili pa Nguluvi, tipuliise amaswi goona gina uMutwa uNguluvi wákulajisa kiija, utujovele.”

34 Baheene uPetulo wávajovela avaanu vala wáaja, “Lino naamanya kiija, shiyooli uNguluvi asikivabaniilila avaanu! 35 Leelo, ikivayiitikha avaanu va nyi soona vina vikimuyinatila na kisenga gina ikigadobokha umwene. 36 Omwe mwimanya kiija, uNguluvi wávafilikhaga avaanu vaakwe kivakhoma aVaisilaheli vayeesu iMola iNofu, kiija vapate uwulindamafu kwa nsila ya Yeesu Kilisito, uMutwa wa vaanu woona. 37 Mwimanya gina gasenjeeshe mu nyi yoona iya Yudeya, gayansaga mu nyi ya Galilaya. Wáyansaaga kivakhoma avaanu pina uYohana ikivakhoma, kiija vatwinisiwe. 38 Mwimanya kiija, uNguluvi wámubagulaga uYeesu uwa ku Nasaleti wámupeela uNumbula uMunofu ni ngufu. UYeesu wálutaga mbali soona, iigaha amanofu na kiponia avaanu woona vina vilafisiwa nu Shetaani, kwa kiiva uNguluvi akhandi lumo na woope.

39 “Goona ago gina uYeesu wágahaga mu nyi ya Vayahuudi na mu lijumbi lya ku Yelusalemu, ose tili valunjikhaaji. Baheene vamubuda kwa kimukhomeelela pa musalaaba. 40 Leelo ilisiku lya wutatu, uNguluvi wámufyusa, wámuwonensa kwa vaanu. 41 Vasili vaanu woona vina vamwagaga, leelo ose tamwagaga, ose uNguluvi wátubagulaga kiija, tisiive tili valunjikhaaji va ago. Uluhaavi ulo luna uYeesu wáfyukhaga kihuma kwa vina vafwile, ose tikhaliile na kiingʼwa lumo. 42 Wátulajisaaga kiija, tikhome ku vaanu iMola iNofu na kihumya uwulunjikhaaji kiija, yumwene yuna uNguluvi amubagwile. Khanji uNguluvi amubagwile umwene kiija, avahije avaanu awuumi na vina vafwile. 43 UYeesu uyo yumwene yuna avakuwamalago woona vajovaga kiija, umuunu yoyoona yuna ikimuhuviilila, akhasaajilwa uwunansi waakwe kwa litaawa lyakwe.”

Vina vasili Vayahuudi vamuyanushila uNumbula uMunofu

44 UPetulo pina ilogola amaswi ago, uNumbula uMunofu wávayiishila woona vina vagapulikhaga. 45 AVayahuudi vina vikimuhuviilila uYeesu vina vamusindihisaaga uPetulo, vaganile kiwona kiija, avaanu vina vasili Vayahuudi woope uNumbula uMunofu wávayiishila, vaswiga mandu. 46 Vaswigaga kwa kiiva vavapulikhaga vilogola kwa filogolo ifinji vikimusufya uNguluvi.

Baheene uPetulo wáaja, 47 “Avaanu ava woope vamuyanushila uNumbula uMunofu ngaja ose. Kusiina umuunu yuna angavakhaana ava kiija, vasikhatwinisiwaagwa kwa malenga!” 48 Baheene uPetulo wálajisa kiija, uKolineliyo na vayine vatwinisiwe kwa litaawa lya Yeesu Kilisito. Kuunyuma, uKolineliyo na vayine vamulomba uPetulo kiija, asigale lumo na woope kwa nsiku ndoodo.