UPetulo ilogola gina gisenjekha kwa vina vasili Vayahuudi
11
1 Avanandeje na vahuvililaaji va Yeesu avanji vina vakhalaga ku nyi ya Yudeya,
vapulikha kiija,
vina vasili Vayahuudi woope valiyiitikha iLiswi lya Nguluvi.
2 Baheene uPetulo pina wátinaga ku Yelusalemu,
aVayahuudi avahuvililaaji,
vayansa kikhaanania nawo
3 vaaja,
“Kwashi owe ukhandi wihuluta mu nanda sa vaanu vina vasiyinjisiiwe ijando na kiilya lumo na woope?”
4 Baaho uPetulo wáyansa kivajovela shila shiinu kwa lugoto,
wávajovela wáaja,
5 “Ilisiku limonga nikhandi ku lijumbi lya Yopa.
Pina nikhandi nikimufuunya uNguluvi,
nagaagaga amahilu.
Mu mahilu ago,
nashaagaga ishiinu shina shili ngaja mutote mukhome guna gukhandi gukhatiilwe imbali saakwe sina.
Gukhandi guyiikha kihuma kushaanya,
gwayiikha nkholeela noone.
6 Naganaga kiloleela mukhati yaakwe,
mukhandi ni nkhanu sa fihwano fyona.
Mukhandi ni nkhanu inya magulu gana,
inkhanu sina sitambala ni nyuni sina sigulukha ku wulanga.
7 “Baheene napulikha ishawuti yiijova,
‘Wee Petulo,
yiima!
Ushinje,
ulye!’
8 Namugomosesa naaja,
‘Ndaali mutwa!
Loleela,
nisinajelaje kiilya shoshoona shina indaji sa Musa sikishijova sha mwikho!’
9 Leelo ishawuti iyo kihuma kushaanya yanijovela mala khavili kiija,
‘Ishiinu shoshoona shina uNguluvi ashivaleese,
owe usikhashijovaga mwikho.’
10 Ago gasenjekhaga mala khatatu yoona,
baheene ifiinu ifyo fyona fyatina kushaanya.
11 “Baaho avaanu vatatu vina vavafilikhaga kihuma kula ku Kayisaliya,
vakhandi vayiimile kumwandi ya nanda yina nakhalaga.
12 UNumbula uMunofu wánijovela kiija,
nilute lumo na woope,
nisikhaveesaga nu muninu.
Baheene naaluta lumo na vahuvililaaji vayangu mutanda kiluta ku Kayisaliya.
Taganaga kifikha kula,
tayinjila mu nanda ya muunu ilitaawa lyakwe yu Kolineliyo,
13 woope wátutaviilila shina umalayikha wámutwiwushilaga mu nanda yaakwe umo.
Umalayikha uyo wámujovaga wáaja,
‘Uvafilishe avaanu valute ku Yopa,
vamushemeele uSimoni yuna itambulwa Petulo.
14 Uyo yumwene asikujovele amaswi,
na kishilila kwa maswi ago,
usikulusiwe owe lumo na vaanu woona mu nanda yaakho.’
15 “Pina niyansa kilogola na vaanu awo,
baaho uNumbula uMunofu wávayiishila ngaja shina wátuyishilaga ose ulwamwandi.
16 Nakumbukha iliswi lila lina uMutwa uYeesu wátujovelaga wáaja,
‘UYohana wávatwiniaga avaanu kwa malenga,
leelo omwe mukhatwinisiwa kwa Numbula uMunofu.’
17 UNguluvi wávapeelaga awo vina vasili Vayahuudi uNumbula uMunofu,
yuna wátupeelaga ose pina tikhandi timuhuviliile uMutwa uYeesu Kilisito.
Lino ngaja shina lushwali,
one yuune naani nimukhaane uNguluvi?”
18 AVayahuudi vaganile kipulikha ago,
vaalekha kikhaania.
Vamusufya uNguluvi vaaja,
“Humbe uNguluvi wávapeela woope avaanu vina vasili Vayahuudi,
insila yina vilambiisila uwunansi waanave,
vapate uwuumi wa shiluta!”
Ishipuga sha vahuvililaaji ava ku Antiyokiya viyimiililwa
19 Avahuvililaaji va Yeesu vina vapalankhanaga kwa kiiva ya malava,
gina gafwataga kibudwa kwa Sitefano,
vaaluta mu nyi sa Foyinike,
shigunguli sha Kipulo,
na mu lijumbi lya Antiyokiya.
Koona ukho,
vakhandi viikhoma imola sa Mutwa uYeesu kwa Vayahuudi veene duguli.
20 Leelo mu Antiyokiya,
avamonga mu awo,
vina vayinsaga kihuma mu shigunguli sha Kipulo,
na mu lijumbi lya Kileene,
vayansa kikhoma iMola iNofu iso isa Mutwa uYeesu na kwa vina vasili Vayahuudi.
21 Ingufu sa Mutwa uNguluvi sikhandi lumo nawo,
avaanu vinshi mandu vahuviilila na kimufwata uMutwa uYeesu.
22 Ishipuga sha vahuvililaaji va ku Yelusalemu,
vaganile kipulikha ago gina gasenjekhaga kwa vaanu va ku Antiyokiya,
vamufilikha uBalinaaba kula.
23 Wáganile kifikha ukho,
wáawona shina uNguluvi avayimiliile avaanu awo,
wáshendeeva mandu.
Akhandi ikivakuviilisa woona kiija,
vayitenekhaje kimuyinatila uMutwa uYeesu kwa numbula saanave soona.
24 UBalinaaba akhandi muunu munofu,
akhandi amemile uNumbula uMunofu ni lihuuvi.
Baheene avaanu vina vamuhuvililaga uMutwa,
vayonjelela vaava vinshi mandu.
25 Kuunyuma uBalinaaba wáaluta mu lijumbi lya Taliso kimusakula uSawuli.
26 Wáganile kimwaga,
wámuleeta ku Antiyokiya.
Baheene vaakhala ukho mwakha goona,
vakhandi vikungaana lumo ni shipuga sha vahuvililaaji,
vakhandi vimanyisa avaanu vinshi mandu ulwa mola sa Yeesu.
Apo pa Antiyokiya,
avaanu vayansaaga kivatambula avahuvililaaji va Yeesu kiija,
Vakilisito.
27 Mu nsiku iso,
vayinsaga pala pa Antiyokiya avakuwamalago avamonga kihuma ku Yelusalemu.
28 Yumo mu awo,
ilitaawa lyakwe akhandi itambulwa Agabo.
Uyo,
wáyiima wáakuwa amalago kishilila kwa Numbula uMunofu kiija,
injala inkhome yikhagwa mu nyi soona.
(Injala iyo yiyeene yikhagwile pina uKayisaali Kilawudiyo,
umutwa wa Valuumi akhandi atemile.)
29 Kwa kiiva ya ago,
avahuvililaaji va Yeesu vapulinkhana kiija,
shila muunu mu veene ahumye ifiinu,
mu fiinu fina anafyo.
Ifiinu ifyo,
fivatanje avahuvililaaji vayaanave ava ku nyi ya Yudeya.
30 Vafikungaania,
vavapeela uBalinaaba nu Sawuli kiija,
vafitwale kwa vayimililaaji va shipuga sha vahuvililaaji va Yeesu ava ku Yelusalemu.