Nsengo sa Vanandeje 1

Nsengo sa Vanandeje

Kitahisiwa kwa Numbula uMunofu

1 Mutiilwa Teofilo, mu litaafili lyangu lila ilya wutasi, nayandikhaga shina uYeesu akhandi iigaha, na shina akhandi imanyisa kihuma pashiyanso, 2 mbakha ilisiku lina wátolwagwa kiluta kushaanya. Pina akhandi asinatupulwe kiluta kushaanya, wávapeelaga indaji avanandeje vaakwe vina akhandi avabagwile, kwa nsila ya Numbula uMunofu, ulwa nsengo sina vakhasisenga. 3 Kwa luhaavi lwa nsiku mashumi gana kihuma pina wáfyukhaga mu mfwa, akhandi ikivatwiwushila avanandeje vala wiila wiila, akhandi ikiyiwonensa bahawuvalafu kiija umwene muumi, kwa nsila nyinshi sina sili paayo paayo. Khanji akhandi ikivamanyisa imola sa Wutwa wa Nguluvi.

4 Ilijuva limonga, uYeesu pina akhandi iilya lumo na vanandeje vaakwe, wávalajisaaga wáaja, “Musikhawuukhaji mu lijumbi lya Yelusalemu, leelo hepelesaaji mumuno, mbakha pina mukhayanushila uNumbula uMunofu, yuna uDaada uNguluvi akhavatahisiise kiija, akhavapeela ngaja shina mwapulikhaga kunyangu. 5 UYohana wávatwiniaga avaanu kwa malenga, leelo kwa luhaavi lufupi luna luyinsa, omwe mukhatwinisiwa kwa Numbula uMunofu.”

UYeesu itupulwa iiluta kushaanya

6 Avanandeje pina vakungaanile lumo nu Yeesu, vamuposa vaaja, “Mutwa weesu, wuli, uluhaavi ulu lulwene luna ukhatutinisa ose ti Vaisilaheli uwutwa weesu?” 7 UYeesu wávayankha wáaja, “Ilisiku nu luhaavi ulwa kisenjekha ago, yisili nsengo yeenyu kimanya. UDaada yumwene aluviishile kwa wutawulilwa waakwe. 8 Leelo mukhayanushila ingufu pina uNumbula uMunofu akhavayinsila, omwe mukhanibedela mu Yelusalemu, mu nyi yoona iya Yudeya na mu nyi ya Samaliya, mbakha kifikha kuwudugo wa nyi.”

9 UYeesu wáganile kimala kivajovela ndeeno avanandeje vaakwe vala, baaho wátupulwa bahaveene kiluta kushaanya. Ilifunde lyamugubikha, vasikhamwajile khanji. 10 Uluhaavi luulo pina vangʼalwile ameeho viloleela kushaanya kuna iiluta, vayiima avagoosi vavili vafwele amenda amavalafu. 11 Vavajovela vaaja, “Omwe vagoosi va ku Galilaya, kwashi muyiimile apa muloleela kushaanya? UYeesu yuna wátupulwa panyeenyu kiluta kushaanya, akhatina khanji ngaja shina mwamwaga itupulwa.”

UMatiya ihaagulwa kipyanila pa Yuuda

12 Baheene avanandeje vawuukha pa shidunda shina shikhandi shitambulwa shidunda sha Miseyituni. Vaawuya mu lijumbi lya Yelusalemu, lina likhandi lujendo lwa kilomiita yimo kihuma pa shidunda isho. 13 Vaganile kihuluta mu lijumbi lila, vaaluta mu wudaama uwa juulu, muna vakhandi vitangaana. Avanandeje awo vaveene ava, uPetulo, uYohana, uYaakobo nu Andeleya, uFilipo nu Tomasi, uBatolomaayo nu Mataayo, uYaakobo umuswamuve wa Alufaayo, uSimoni uMulwila Nyi, nu Yuuda umuswamuve wa Yaakobo. 14 Woona awo vakhandi vikungaana kimufuunya uNguluvi kwa lugulumilo lumo, nu Maliya umaayi wa Yeesu, avashimaayi avanji na vanangʼana va Yeesu.

15 Ilijuva limonga, avahuvililaaji vakungaanile lumo, pamonga vafishile avaanu ngaja ligana limo na mashumi gavili ndeeni (120). Baheene uPetulo wáyiima paakhati naakhati yaanave, wávajovela wáaja, 16 “Omwe vahuvililaaji vayangu, injowo sina sayandikhwagwa mu Mayandikhwa aManofu sina sitaviilila ulwa Yuuda uIsikaliyoote, sisakulwa mbakha sisenjeshe. Iso salogolwagwa nu Numbula uMunofu kishilila kwa mutwa uDawudi ulwa Yuuda, yuna wávalongosaaga avaanu kimukhata uYeesu, lino sakwilana. 17 UYuuda akhandi muyeesu noose ti vanandeje, tasengaga lumo insengo iyi.”

18 UYuuda yuna uPetulo ikimulogola apa, wáposheelaga ihela sila isa wunansi waakwe uwa kidoolela. Ihela iso wágulila umugunda. Mu mugunda ugo, mumwene wágwisaga agubeeme, wálandukha umuvili, uwutumbu woona waveyukha pansi. 19 Ulujowo ulo lwamanyikhaga mu vaanu woona vina viikhala ku Yelusalemu. Umugunda gula vagutambulilaga ilitaawa lya Akelidama. Kwa shilogolo shaanave uluganulo lwakwe, Mugunda gwa Danda. 20 UPetulo wáyitenekha kilogola kiija, “Ago gageene gayandiikhwe mu litaafili lya Sabuli kiija,

‘Inanda yaakwe yikhava yigaya shiinu,

khanji asikhasigala muunu yoyoona mukhati yaakwe.’

“Khanji yiyandiikhwe kiija,

‘Insengo yaakwe iya kilongosa, apyanile umuunu yunji.’

21 “Kwa kiiva ya ilyo, yisakulwa timuhaagule umugoosi uyunji mu awo vina vakhandi lumo noose, mu luhaavi loona luna uMutwa uYeesu akhandi lumo noose. 22 Uyo ave akhandi akwali kihuma uluhaavi uYeesu itwinisiwa nu Yohana, mbakha ilijuva lila uYeesu pina wátupulwagwa panyeesu kiluta kushaanya. Uyo ave mulunjikhaaji lumo noose kiija, uMutwa uYeesu wáfyukhaga kihuma kwa vina vafwile.”

23 Baheene avahuvililaaji vagabaagula amataawa ga vagoosi vavili. Yumonga akhandi yu Yusufu yuna akhandi itambulwa Balisaba, awu Yusito, nu wa wuvili akhandi yu Matiya. 24 Apo baheene, vafuunya kwa Nguluvi vaaja, “Wee Mutwa Nguluvi, ugameenye gina gali mu numbula sa vaanu woona. Lino, utusoonele yuna umubagwile mu vavili ava, 25 kiija apyanile pa nsengo ya mwanandeje uYuuda, yina wáyilekhaga. Pina wáganaga kiifwa, wáaluta pina pikimufwaya umwene kwa gala gina wágasengaga.” 26 Baheene vamuhaagula yumo mu vaanu vavili vala. Uluhaagulo ulo lwamugwila uMatiya, yumwene wáava lumo na vanandeje avanji ishumi na yumo.