Yohana 21

UYeesu ikivatwiwushila avamanyisiwa vaakwe ku Galilaya

1 Gaganile kishila ago, uYeesu wávatwiwushila khanji avamanyisiwa vaakwe mulubali lwa lilamba ilikhome lya Tibeliya. 2 Vakhandi vakwali uSimoni Petulo, uTomasi yuna ilitaawa ilinji itambulwa Lipasa, uNatanaheeli yuna wáhumile ku lujinji lwa Kana ku Galilaya, avaana vavili ava Sebedayo, na vamanyisiwa avanji vavili. 3 USimoni Petulo wávajovela avayine wáaja, “Niiluta kilova inswi.” Aveene vamugomosesa vaajova, “Na yuuse tiiluta lumo noowe.” Lino vaaluta, vayangala mu shipugo, vaalova ishilo shoona, leelo vasikhalovile nswi yoyoona. 4 Pina kwihenga kunena, uYeesu wáyiima mulubali lwa lilamba ilikhome, leelo avamanyisiwa vaakwe vasikhameenye kiija yu Yeesu. 5 Lino uYeesu wávashemeela wáaja, “Omwe vamanyi vangu, wuli, mwalova inswi sosoona?” Aveene vamugomosesa vaajova, “Tisaalova.” 6 UYeesu wávajovela wáaja, “Toosi inyaafu ulubali lwa kundiilo ulwa shipugo, musiilove inswi.” Lino vatoosa inyaafu mu lilamba ilikhome, leelo vapootwa kikweha kwa kiiva valovaga inswi nyinshi mandu. 7 Lino umumanyisiwa yula yuna uYeesu akhandi amugeene mandu, wámujovela uPetulo wáaja, “Yu Mutwa!” USimoni Petulo wáganaga kipulikha kiija yu Mutwa, wáfwala amenda gaakwe gina wáyawulaga pina ayansiise kilova, wáyitoosa mu malenga, wáaluta kimuhunjila uMutwa. 8 Avamanyisiwa avanji vala, vaaluta ni shipugo mulubali lwa lilamba ilikhome, kwa kiiva vasikhandi kutali, leelo vakhandi ngaja nambo ligana limo ndeeni. Vawukweha uwaafu wuna wamemaga inswi.

9 Vaganaga kifikha mulubali lwa lilamba ilikhome, vagwaga umooto. Pa mooto gula vakhandi vabaniishe inswi nu mukhaate. 10 UYeesu wávajovela avamanyisiwa vaakwe wáaja, “Yinsi, leeti apa inswi simonga sina mwalova.” 11 Lino uSimoni Petulo wáhuluta mu shipugo, wawukwehela mulubali uwaafu wula wuna wamemaga inswi. Mu waafu wula sikhandi sikwali inswi nkhome ligana limo na mashumi gasaanu na sitatu (153). Hata nda sikhandi sikwali inswi nyinshi mandu, hata ndeeno uwaafu wusikhademwishe.

12 UYeesu wávajovela avamanyisiwa vaakwe wáaja, “Yinsi mulye ishakiilya.” Kusiina umumanyisiwa yuna wájelaga kimuposa kiija, “Owe yuuwe naani?” Kwa kiiva vamanyaga kiija yu Mutwa. 13 Lino uYeesu wáyinsa, wátoola umukhaate, wávapeela avamanyisiwa vaakwe. Khanji, wátoola nasi nswi, wáagava shishila. 14 Ulo lukhandi lwa wutatu uYeesu kivatwiwushila avamanyisiwa vaakwe, pina wáfyusiwaagwa nu Nguluvi.

UYeesu ilogola nu Petulo

15 Vaganile kiilya, uYeesu wámuposa uPetulo wáaja, “Owe Simoni mwana wa Yohana, wuli, unigeene mandu one kivashila shina vanigeene avayaago ava?” UPetulo wámugomosesa wáaja, “Eena Mutwa, owe umeenye kiija nikugeene.” UYeesu wámujovela wáaja, “Diimaga inyana nkholo sangu.”

16 UYeesu wámuposa uPetulo ulwa wuvili wáaja, “Simoni mwana wa Yohana, wuli, unigeene?” UPetulo wámugomosesa wáaja, “Eena Mutwa, owe umeenye kiija nikugeene.” UYeesu wámujovela wáaja, “Diimaga inkholo sangu.”

17 Wámuposa ulwa wutatu wáaja, “Simoni mwana wa Yohana, wuli, unigeene?” Lino uPetulo wásugumilwa kwa kiiva wámuposaaga ulwa wutatu kiija, “Wuli, unigeene?” Wámugomosesa wáaja, “Wee Mutwa, owe ugameenye goona. Umeenye kiija nikugeene.” UYeesu wámujovela wáaja, “Diimaga inkholo sangu. 18 Shiyooli nikikujovela, pina ukhandi mudiimi, ukhandi wifwala amenda gaakho yuuwe, na kiluta kokoona kuna wisakula. Leelo pina ukhagoosipa, ukhagolosa amawokho gaakho, umuunu uyunji akhakufwasa amenda gaakho, na kiluta noowe kuna usisakula kiluta.” 19 UYeesu wájovile ndeeno, kiwonensa shina hambi iifwa uPetulo na kimusufya uNguluvi. Lino uYeesu wámujovela uPetulo wáaja, “Nifwataga.”

20 UPetulo wáseetukha, wámwaga umumanyisiwa yuna uYeesu akhandi amugeene mandu, akhandi ikivafwata. Umumanyisiwa uyo, akhandi yula yuna wákhalaga nkholeela nu Yeesu uluhaavi viilya ishakiilya, na kimuposa kiija, “Wee Mutwa, yu naani asikudoolele?” 21 Lino uPetulo pina wámwaga umumanyisiwa yula, wámuposa uYeesu wáaja, “Wee Mutwa, wuli, shiinu shishi shisiwoneshe kwa mumanyisiwa uyo?” 22 UYeesu wámugomosesa wáaja, “Nda nisakula kiija ave muumi mbakha pina nikhatina, kwashi ago gikikulafya? Owe nifwataga.” 23 Kwa kiiva ya ilyo, avamanyisiwa vinshi vahiivaga kiija, umumanyisiwa uyo asiifwa kaa. Leelo uYeesu asikhamujoveele umumanyisiwa uyo kiija asiifwa kaa, leelo wájovaga kiija, “Nda nisakula kiija ave muumi mbakha pina nikhatina, kwashi ago gikikulafya?”

24 Umumanyisiwa uyo yumwene yuna ikigakuviilisa aga na kigayandikha. Ose timeenye kiija, gina ilogola ga shiyooli.

UYeesu wágahaga aganji minshi

25 Gakwali aganji minshi gina uYeesu akhandi iigaha. Nda goona ago gaali gave gayandiikhwe, niiwona inyi yoona, nda pasakwila apa kiviikha amataafili ago.