IMola iNofu ya Yeesu Kilisito
ngaja shina yayandiikhwe nu
Luuka
Imola yina yilongola
Ilitaafili ili lyayandikhwagwa nu Luuka, yumwene yuna wáyandikhaga na ilitaafili lya Nsengo sa Vanandeje. ULuuka asikhandi Muyahuudi, leelo akhandi Muyunaani yuna ayimbiile, khanji akhandi muhuvililaaji wa Yeesu Kilisito. Uluhaavi lumonga wáali ijendaga lumo nu Pawulo, kikhoma iMola iNofu. Mu litaafili ili, uLuuka itaviilila insengo ya Yeesu kwa lugoto ulunofu, baheene avaanu vina vasili Vayahuudi vamanye.
Mu litaafili ili, sikwali imola nyinshi sina sisiyandiikhwe mu mataafili aganji aga mu Lufingo uLupya, ngaja kisawa kwa Yohana uMutwiniaji, kisawa kwa Yeesu ni mola isa waana waakwe, na kikhoma kwa Yohana uMutwiniaji. Khanji iwonensa shina lukwali ulugano lwa Nguluvi, kwa vaanu paayo paayo. UYeesu wáwonensa ulugano ulo, kwa nsila ya kivamanyisa avaanu kwa fihwano, ngaja ulusimo lwa Musamaliya umunofu (Luuka 10) nu mwana yuna akhandi ayajile (Luuka 15) na kwa nsila ya kikhala wunofu lumo nu mutofya khoodi yuna wákhalalilwagwa mandu na vaanu (Luuka 19) na kitaahisa kimupeela uwuumi wa shiluta na shiluta, umunansi yuna wákhomelelwagwa lumo nu Yeesu pa musalaaba (Luuka 23).
| Umulyango | Gina gakwali mu litaafili ili |
| 1:1-4 | Amaswi aga wutasi |
| 1:5–2:52 | Kisawa kwa Yohana nu Yeesu nu waana wa Yeesu |
| 3:1–4:13 | Insengo ya Yohana uMutwiniaji na kijelwa kwa Yeesu |
| 4:14–9:50 | UYeesu imanyisa ulwa Wutwa wa Nguluvi na kigaha amabikha ku nyi ya Galilaya |
| 9:51–19:27 | UYeesu imanyisa minshi ulwa vina vikimufwata, pina ali mu nsila kiluta ku Yelusalemu |
| 19:28–21:38 | UYeesu iyinjila ku Yelusalemu na kimanyisa insiku sa wudugo |
| 22:1–23:56 | Kiifwa kwa Yeesu |
| 24:1-53 | Kifyukha kwa Yeesu |