Luuka 1

IMola iNofu ya Yeesu Kilisito

ngaja shina yayandiikhwe nu

Luuka

Amaswi aga wutasi

1 Kunyaakho mutiilwa Teofilo,

Avaanu vinshi vayandiishe imola sa Yeesu Kilisito ngaja shina sasenjekhaga kunyeesu. 2 Vakhayandiishe imola isi ngaja shina tajovelwagwa na vina valoleelaga kwa meeho gaanave na vasiyalalisaaga kihuma shiyanso shaakwe. 3 Lino na yuune, nisakwile finofu ishiyooli sha mola sa Yeesu kihuma pashiyanso, niiwona lunofu kikuyandishila aga goona kwa lugoto, 4 baheene umanye ishiyooli sha mola soona sina umanyisiiwe.

Uwukuwamalago uwa kisawa uYohana uMutwiniaji

5 Uluhaavi luna uHelode akhandi mutwa mu nyi ya Yudeya, akhandi akwali umutambule yumonga yuna akhandi itambulwa Sakaliya, kihuma mu shipuga sha shitambule sha Abiya. Umudala waakwe akhandi itambulwa Elisabeti. Woope wáhumile mu shikholo sha shitambule sha Haluni. 6 USakaliya nu Elisabeti vakhandi vagolofu pa Nguluvi, vayinatilaga wunofu indaji soona sa Nguluvi, vasipiikhwa. 7 Avaanu ava vakhandi vagaya mwana, kwa kiiva uElisabeti akhandi mugumba, khanji woona vavili vakhandi vagosiipe.

8-9 Kukhandi nu lugoto lwa kisenga insengo mu nanda imbaagule iya kifuunyila. Uluhaavi lumonga, mu lugoto ulo yikhandi lutando lwa shipuga sha Abiya. Ilijuva limonga uSakaliya wáhagulwagwa kihuluta mu nanda imbaagule iya Mutwa ngaja shina yikhandi ngʼoma ya vatambule, kiija anyaanye ifiinu fina finunshilila wunofu. 10 Pina akhandi mukhati itinshilisa ingaagulwa sina sinunshilila, avaanu vinshi vakhandi vifuunya mu lukeeke lwa nanda imbaagule. 11 Baheene umalayikha wa Mutwa wámutwiwushila uSakaliya. Umalayikha uyo wáyiima ulubali ulwa kundiilo pa luvala ulwa kitinshilisisa ingaagulwa sina sinunshilila. 12 USakaliya pina wámwajile umalayikha yula, wátungumeele na kitiila mandu. 13 Baheene umalayikha yula wámujovile wáaja, “Usikhatiilaga Sakaliya, uNguluvi wápulikha ilifuunyo lyakho, kwa kiiva umudala waakho uElisabeti asikusavile umwana. Umwana uyo umupeelaje ilitaawa lya Yohana. 14 Pina akhava wáasawa, ukhava ni limwemwe mandu, khanji avaanu vinshi vakhava ni limwemwe, 15 kwa kiiva uMutwa akhamupeela uwutawulilwa wukhome. Uyo asikhangʼwesaga idivaayi awu shoshoona shina shigaasa, khanji ingufu sa Numbula uMunofu sikhava nu mwene kihuma pina ali mu wutumbu wa maayi waakwe. 16 Akhavatinia aVaisilaheli vinshi valambiisile uwunansi waanave na kivagomosa kwa Mutwa uNguluvi waanave. 17 Uyo asimulongole uMutwa mu ngufu sa Numbula uMunofu ngaja uEliya shina akhandi akwali, kivalingaania avasafi na vaana vaanave. Khanji akhavatinia avaanu avanansi mu wugolofu na kivagaha vayipinyangaje kimuposheela uMutwa.”

18 Baheene uSakaliya wámujova umalayikha, “Wuli, shiinu shishi shina shisinigahe nimanye kiija amaswi aga ga shiyooli? Kiiva one nu mudala wangu tigosiipe.” 19 Pina wámalaga kilogola ilyo, umalayikha wámuyankha wáaja, “One yuune Gabiliyeli, yuna niyiima pa Nguluvi, uyo yumwene yuna anifiliishe nikujovele imola inofu iyi. 20 Lino puliisa! Kwa kiiva usikiyihuviilila gina nikikujovela, usiive mbwibwi. Usiiva wulogola mbakha ilijuva pina gakhava giwonekha aga, shiyooli gakhawonekha pina lukhava lwafikha uluhaavi lwakwe!”

21 Uluhaavi ulo avaanu vala vina vakhandi mu lukeeke, vakhandi vamuhepeleese uSakaliya kuno viswiga, kwa kiiva wádiilaga mandu mu nanda imbaagule. 22 Pina akhandi iihuma wágombolaga kilogola na woope, baheene aveene vaamanya kiija, lwawonekha ulujowo lwa mabikha umo. Umwene wáava ilogola injowo kwa shimanyilo sha mawokho, wásigala kiiva mbwibwi. 23 Pina lwasilile uluhaavi lwakwe ulwa kisenga insengo isa shitambule mu nanda imbaagule, wáwuyile kukhaaya.

24 Paanyuma umudala waakwe uElisabeti wáapata ulwanda, wáyaalama mu litembe meesi gasaanu. Umwene wáava ikiyilogolela mwene kiija, 25 “Ili lilyene lina uMutwa wánisenjela one, wányaaga na kiniwuusisa insoni pa vaanu.”

Uwukuwamalago uwa kisawa uYeesu

26 Uluhaavi ulwa mwesi gwa mutanda gwa lwanda lwa Elisabeti, uNguluvi wámufilikhaga umalayikha uGabiliyeli mu lijumbi lya Nasaleti, lina likhandi mu nyi ya Galilaya, 27 kwa muhinja yuna akhandi itambulwa Maliya. Umuhinja uyo wáali abanyiilwe nu Yusufu uwa shikholo sha mutwa uDawudi. 28 Umalayikha pina wáyinjiile mu litembe wámuvejeela uMaliya, wámujova, “Nikikuhunjila owe yuna upeliilwe imota, uMutwa ali lumo noowe.”

29 UMaliya wáganile kipulikha imola iso, wálavaga mandu mu numbula ikiyiposa iija, “Inyunjila iyi, uluganulo lwakwe shishi!” 30 Baheene umalayikha wáajova, “Maliya, usikhatiilaga kwa kiiva uNguluvi wákusungupila. 31 Loleela! Usiive nu lwanda usiisave umwana wa shidiimi, ilitaawa lyakwe usimutambulile Yeesu. 32 Umwana uyo asiive mukhome, khanji asiive itambulwa Lusawo lwa Nguluvi uMukhome. UMutwa uNguluvi asimupeele uwutawulilwa wa shitwa, ngaja shina akhandi ashwali umbuye umutwa uDawudi. 33 Khanji, asiive ikivatema aVaisilaheli luhaavi loona, uWutwa waakwe wusikhava nu wudugo.”

34 UMaliya wámuposa umalayikha wáaja, “One nisimumeenye umugoosi, lino iliswi ili lisiive wuli?” 35 Umalayikha wámugomosesa wáaja, “UNumbula uMunofu asikuyinsile, nasi ngufu sa Nguluvi uMukhome sisikugubishe ngaja mumepo, baheene umwana yuna hambi iisawa asiive Munofu, asitambulwe Lusawo lwa Nguluvi. 36 Loleela! Woope ulukholo lwakho uElisabeti mu wugogolo waakwe ana lwanda lwa mwana wa shidiimi. Lino, ugu mwesi gwa mutanda, kwa yuna vakhandi vikimushemeela mugumba! 37 Kwa kiiva kusiina lujowo luna lukwiliile kimumena uNguluvi.” 38 Baheene uMaliya wáajova, “Loleela, one nili muvanda wa Mutwa, luve ndeeno kunyangu ngaja shina walogola.” Baheene umalayikha wámulekha.

UMaliya iiluta kimuhunjila uElisabeti

39 Saganile kishila insiku nyasilinga ndeeni, uMaliya wáwuukha iiluta nyangu mu lijumbi limonga lina likhandi mu nyi inya fidunda iya ku Yudeya. 40 Ukho wáhuluta mu litembe lya Sakaliya, wámuhunjila uElisabeti. 41 UElisabeti pina ipulikha inyunjila ya Maliya, umwana wáneena mukhati mu wutumbu waakwe. Ingufu sa Numbula uMunofu samuyinsila uElisabeti, 42 wáyansa kilogola kwa ngufu wáaja, “Uyimiliilwe owe kishila avashimaayi woona, khanji ayimiliilwe nayu mwana yuna usimusave. 43 One nili naani pina nayu maayi wa Mutwa wangu ayinse kunyangu? 44 Naagana kipulikha inyunjila yaakho, umwana mu wutumbu wangu, wáneena kwa wushendeefu. 45 Shiba owe yuna uhuviliile kiija, ago gina uMutwa ilogola kunyaakho gasisenjeshe.”

Uluyeyemo lwa Maliya ulwa kimusufya uMutwa

46 Woope uMaliya wáajova,

“Nikimusufya uMutwa

kwa numbula yangu yoona,

47 inumbula yangu yishendeeva

mwa Nguluvi uMukulusaaji wangu.

48 Kiiva wáwaaga uwupiina wa muvanda waakwe.

Loleela, kiyansa lino avaanu va fisafi fyona,

vasiive vikinitambula one muyimiililwa.

49 UMutwa uMunya Ngufu Soona wánigahila miitu,

ilitaawa lyakwe linofu.

50 Ulusungu lwakwe lwa nsiku soona,

ku fisafi fyona fina fikimutiila.

51 Iliwokho lyakwe ilinya ngufu,

lisenjile insengo nkhome nyinshi,

avanya matuupa mu numbula saanave, avanyameenie.

52 Avawusiise avatwa vamonga mu wutwa waanave,

na kivatupikha avapiina.

53 Avanya njala avakutiise ifiinu finofu,

leelo avanya wusi avawusiise vawuushile mawokho shiishi.

54 Avatanjile avavanda vaakwe aVaisilaheli,

na kiiva nu luuju lwa lufingo lwakwe lwa kivasungupila.

55 Ngaja shina wájovaga ku vambuyeesu,

uAbulahamu ni shisafi shaakwe shoona uluhaavi loona.”

56 UMaliya wákheele kwa Elisabeti meesi gatatu ndeeni, baheene wáwuukha iiwuya kunyaanave.

Kisawa kwa Yohana uMutwiniaji

57 Uluhaavi lwa Elisabeti ulwa kisava lwafishile, baheene wásavile umwana wa shidiimi. 58 Avashegamane nu lukholo lwakwe pina vapuliishe kiija uMutwa wámusungupila mandu, vaava vishendeeva lumo nu mwene.

59 Ilijuva lya munaana kihuma asawe umwana, vayinsa kimuyinjisa ijando ngaja shina yikhandi ngʼoma mu ndaji sa Nguluvi kwa Vayahuudi. Baheene vaava visakula kimupeela umwana ilitaawa lya wiihe, uSakaliya. 60 Leelo umaayi wa mwana wávajovela wáaja, “Ndaali, asiive itambulwa Yohana.” 61 Aveene vamugomosesa vaaja, “Mu shikholo shaakho kusiina hata muunu umunya litaawa ilyo.” 62 Baheene vamuposa uwiihe kwa fimanyilo fya mawokho kiija, avajovele ilitaawa lina hambi ikimupeela umwanaakwe. 63 USakaliya wálomba ulubawo ulwa kiyandikha, wáyandikha ndeeni, “Ilitaawa lyakwe ave yu Yohana.” Avaanu woona vaswiga. 64 Baaho ulumili lwakwe lwahogokha, wáyansa kilogola na kimusufya uNguluvi. 65 Apo avashegamane woona va Sakaliya, vatungumala. Imola isi sayalaalila mu nyi yoona iya fidunda fya ku Yudeya. 66 Avaanu woona vina vapulikhaga, vakhandi vihiiva mu numbula saanave kiija, “Umwana uyu asiive wa wuli wuli?” Vahiivaga ilyo kwa kiiva vamanyaga kiija, uMutwa ali lumo nu mwene.

Uluyeyemo lwa Sakaliya ulwa kimusufya uMutwa

67 Baheene ingufu sa Numbula uMunofu samuyinsila uSakaliya, uwiihe wa mwana, wáyansa kikuwa amalago wáaja,

68 “Atunwajwe uMutwa uNguluvi wa Isilaheli,

kwa kiiva wáyinsa na kivakulusa avaanu vaakwe.

69 Atupeelile uMukulusaaji uMunya Ngufu

kihuma mu shikholo sha muvanda waakwe uDawudi.

70 Ngaja uNguluvi shina wájovaga kihuma pashiyanso

kishilila avakuwamalago vaakwe avabaagule kiija,

71 akhatukulusa ku valugu veesu,

na kituhumya mu mawokho ga vaanu woona vina vikitukhalalila.

72 UNguluvi atusungupiile ngaja shina wátahisaaga kwa vambuyeesu,

ana luuju luhaavi loona ulufingo lwakwe lunofu.

73 Ulu lulwene luna wáyiyiigaga kwa mbuyeesu uAbulahamu kiija,

74 akhatukulusa mu mawokho ga valugu veesu,

tive tikimusenjela umwene tisitiila,

75 khanji tive vabaagule na vagolofu pamwene mu luhaavi loona ulwa wuumi weesu.

76 Lino owe mwanangu,

usiive wishemeelwa mukuvamalago wa Nguluvi uMukhome,

kwa kiiva usiive ukimulongola uMutwa,

baheene umunosese umwene insila,

77 uvajove avaanu vaakwe kiija,

viipata uwukulukho pina uNguluvi ikivasaajila uwunansi waanave.

78 Kwa kiiva uNguluvi ana lusungu kunyeesu,

ulumuli lwakwe kihuma kushaanya luvejeela kitumulishila,

79 lukitumulishila ose woona vina tili mu nshiisi ya wuhigo wa mfwa,

na kitulongosa mu nsila ya wulindamafu.”

80 Nayu Yohana wáava iikula, na kiyonjelela kiiva ni ngufu sa Numbula uMunofu. Wákhalaga mu lihakha mbakha pina wáyansaaga kikhoma iliswi ku Vaisilaheli.