Luuka 4

UYeesu iijelwa nu Shetaani

(Mataayo 4:1-11; Maluko 1:12-13)

1-2 UYeesu wáwuukha pa mukhoga gwa Yolodani amemile uNumbula uMunofu. UNumbula uMunofu wámulungamyaga mu lunyikha nsiku mashumi gana. Ukho uShetaani akhandi ikimujela. Uluhaavi loona ulo asikhaliile shakiilya shoshoona, kuwudugo wa luhaavi ulo injala yamulumile mandu. 3 Baheene uShetaani wáaluta kimujela uYeesu wáaja, “Owe, nda uli Lusawo lwa Nguluvi, lijova ilingʼanga ili liseetushe kiiva mukhaate.” 4 UYeesu wámugomosesa wáaja, “Mu Mayandikhwa aManofu yiyandiikhwe kiija, ‘Ishakiilya sheene shisikimugaha umuunu kiiva muumi.’ ”

5 Baheene uShetaani wámutwalaga uYeesu pa shidunda shimonga ishitali mandu, wámuwonensa uwutwa wa nyi soona kwa luhaavi lufupi hela. 6-7 UShetaani wámujovela, “Nisikupeele owe uwutawulilwa uwa wutwa uwu woona nu wutupikho waakwe, nda owe unifugamile na kinifuunya. Kwa kiiva uwutawulilwa uwu woona wangu, na nikimupeela umuunu yoyoona yuna nidobokha.” 8 UYeesu wámugomosesa wáaja, “Mu Mayandikhwa aManofu yiyandiikhwe kiija, ‘Umufuunyaje uMutwa uNguluvi waakho, khanji umusenjelaje mwene duguli.’”

9 Baheene uShetaani wámulungamya uYeesu ku lijumbi lya Yelusalemu, wámutwala uluvala ulwa pashaanya mandu pa nanda imbaagule iya kifuunyila. UShetaani wámujovela wáaja, “Owe, nda uli Lusawo lwa Nguluvi, yigwisa pansi, 10 kwa kiiva mu Mayandikhwa aManofu yiyandiikhwe kiija, ‘UNguluvi asivafilishe avamalayikha vaakwe vakuyangalile, 11 woope vasikuyanshe mu mawokho gaanave, uleshe kigwila pa lingʼanga na kitesekha.’” 12 UYeesu wámugomosesa wáaja, “Mu Mayandikhwa aManofu yiyandiikhwe kiija, ‘Usikhamujelaga uMutwa uNguluvi waakho.’” 13 UShetaani wáganaga kimala kimujela uYeesu kwa nsila soona iso, wámulekha kwa luhaavi.

UYeesu ikhaanwa ku Nasaleti

(Mataayo 13:53-58; Maluko 6:1-6)

14 Baheene uYeesu wáawuya ku Galilaya, ana ngufu sa Numbula uMunofu. Imola saakwe sayalaalila mu nyi yila yoona. 15 Umwene wáava imanyisa mu nanda saanave isa kifuunyila isa Vayahuudi, na vaanu woona vina vakhandi vikimupuliisa vaava vikimusufya.

16 UYeesu wáafikha ku Nasaleti, ku lijumbi lina wákulilaga. Ilijuva lya Sabaato wáyinjilaga mu nanda iya kifuunyila ngaja shina yikhandi ngʼoma yaakwe. Wáyiima baheene ayimbe aMayandikhwa aManofu. 17 Wápeelwa ilitaafili lya mukuwamalago uIsaaya, baheene umwene wágubutula pa Mayandikhwa gina giijova,

18 “UNumbula wa Mutwa uNguluvi ali noone,

kwa kiiva uNguluvi wánibaagula kivakhoma avapiina iMola iNofu.

Anifiliishe kivakhoma vina vali mu shifungo,

imola iya wuyeeshelo waanave,

na vapofu imola iya kiloleela.

Khanji anifiliishe kivakulusa vina viwonelwa,

19 na kivayalalisisa avaanu uluhaavi ulwa mota ya Mutwa.”

20 Wáganile kiyimba, wágubikha ilitaafili lila, wámuwuyiisisa umulongosaaji wa nanda iya kifuunyila, wáakhala kiija ayanse kimanyisa. Avaanu woona vina vakhandi vakwali mu nanda yila vamuloleela. 21 Baheene wáyansa kivamanyisa, wáaja, “Aga gina mwagapulikha niyimba, iminsiyaano gawonekha.” 22 Woona vayiitikha kiija, wálogola amaswi amanofu. Vaava vikigaswiga amaswi gina ilogola viija, “Uyu asili muswamuve wa Yusufu?”

23 Baheene woope wávajovela wáaja, “Nimeenye kiija, musinilogole ululogolo ulu, ‘Owe muhusi, yiponia yuuwe!’ Insengo sa mabikha sina tapulikhaga usenjile mu lijumbi lya Kapelinawumu, lino usengaje na baaha pa lijumbi lyakho yuuwe.” 24 Wáyenjelesa kilogola wáaja, “Shiyooli nikivajovela, kusiina umukuwamalago yuna iyiitikhwa ku nyi yaakwe. 25 Uluhaavi lwa Eliya, inoonya yisikhatoonyile maakha gatatu na meesi mutanda, injala inkhome yagwile mu nyi yoona ya Isilaheli. Shiyooli nikivajovela, uluhaavi ulo vakhandi vakwali avafwile vinshi mu nyi iyi. 26 Leelo uEliya asikhafiliikhwe kwa yumo mu vafwile vala ava mu nyi ya Isilaheli, leelo wáfilikhwagwa kwa mufwile wa mu nyi ya Sidoni mu lujinji lwa Saleputa. 27 Khanji uluhaavi lwa mukuwamalago uElisha mu nyi ya Isilaheli, vakhandi vakwali avaanu vinshi avanya nyawulova. Leelo akhandi akwasiina hata yumo yuna wávalasiwaagwa nu mwene, ila uNaamani mwene duguli yuna wáhumile mu nyi ya Siliya.” 28 Baheene avaanu woona vina vakhandi mu nanda iya kifuunyila, pina vapuliishe amaswi ago, vakhalalaga mandu. 29 Bahala, vayiima, vamuhumya uYeesu mu lijumbi lyanave lina likhandi lisenjiilwe pashaanya pa shidunda. Apo baheene vaava visakula kimubunshilisa ku munjeema kiija agwe pansi. 30 Leelo umwene wáashila paakhati naakhati yaanave, wávapulumukha wáaluta.

UYeesu ikilidaga ililungu limuhume umuunu

(Maluko 1:21-28)

31 Baheene uYeesu wáaluta ku lijumbi lya Kapelinawumu, mu nyi ya ku Galilaya. Ilijuva lya Sabaato, wáhuluta mu nanda iya kifuunyila, wáyansa kivamanyisa avaanu. 32 Avaanu vaava viswiga mandu amamanyiso gaakwe, kwa kiiva gakhandi nu wutawulilwa. 33 Na mu nanda ya kifuunyila, akhandi akwali umuunu umunya lilungu. Umuunu uyo wákhoolile inkhoolo mandu, 34 wáaja, “Wisakula shi kunyeesu, owe Yeesu wa ku Nasaleti? Uyinsile kitunanganga? Nimeenye kiija owe uli Munofu kihuma kwa Nguluvi.” 35 UYeesu wálikhajila ililungu wáaja, “Sisima! Muhuma umuunu uyu!” Baheene ililungu lila lyamugwisa paakhati naakhati yaanave, lyamuhuma lisaawuya limutese. 36 Avaanu woona vaswigaga mandu, vaava vilogolelana vaveene viijova, “Aga miitu makhome! Umuunu uyu ana wutawulilwa uwa kigadaga amalungu kwa ngufu, goope gipoola!” 37 Imola sa Yeesu sikhandi siyalaalila mandu mu nyi yila yoona.

UYeesu ikivaponia avatamu vinshi

(Mataayo 8:14-17; Maluko 1:29-39)

38 UYeesu wáahuma mu nanda yila iya kifuunyila, wáaluta mu nanda lya Simoni. Mu litembe umo, wámwajile umukweye uwa shidala uwa Simoni yimukheete mandu insegema, baheene vamulomba uYeesu kiija amuponie. 39 Baheene wáyiima nkholeela pa mutamu, wáyikhajila insegema yila. Luhaavi luulo insegema yamuleshela, baaho wáyiima wáyansa kivasunga.

40 Ilijuva pina likhandi liisota, avaanu woona vina vakhandi na vatamu, avanya matamu gina gali paayo paayo, vamutwaliile uYeesu avatamu vaanave. Umwene wáava ikivapyasa woona, wáava ikivaponia. 41 Khanji wáava ikigadaga amalungu kihuma ku vaanu avanji vinshi, kuno gilyova giijova, “Owe uli Lusawo lwa Nguluvi!” Kwa kiiva gamumanyaga kiija umwene yu Mukulusaaji, uYeesu akhandi ikigakhajila na kigajova kiija, gasikhalogolaga hata liswi ilinji lyolyona ilya mwene.

42 Ulwamilaawu njine kwaganile kiisha, uYeesu wáahuma mu lijumbi lila wáaluta pashipata, pina pangaya vaanu. Ishipuga ishikhome sha vaanu shayansa kimusakula, vaafikha pina akhandi akwali. Pina vamwagaga, vayansa kimuyiimya kiija aleshe kiwuukha kunyaanave. 43 Leelo umwene wávajovela wáaja, “Nisakulwa kikhoma iMola iNofu ya Wutwa wa Nguluvi mu majumbi aganji, kwa kiiva ya ilyo lilyene nafilikhwagwa kisenga.” 44 Baheene uYeesu wáaluta mu majumbi minshi aga ku Yudeya, kuno iikhoma imola iso mu nanda saanave isa kifuunyila isa Vayahuudi.