Maluko 1

IMola iNofu iya Yeesu Kilisito

ngaja shina yayandiikhwe nu

Maluko

UYohana uMutwiniaji iikhoma ku lunyikha

(Mataayo 3:1-12; Luuka 3:1-18; Yohana 1:19-28)

1 Ishi shiyanso sha Mola iNofu iya Yeesu Kilisito, Lusawo lwa Nguluvi. 2 Injowo sayansaaga ngaja shina yiyandiikhwe mu litaafili lya mukuwamalago uIsaaya. UNguluvi wájovile,

“Loleela, nikimufilikha umunjaajila wangu

yuna akhakulongola kumwandi.

Uyo yumwene yuna akhakunosesa insila yaakho.”

3 “Ishawuti ya muunu yipuliisikha mu lunyikha yiija,

‘Mumunosesaaje uMutwa insila yaakwe

na kimugolosesa muna akhashila.’”

4 Umunjaajila yula yu Yohana Mutwiniaji. Wáhumiliile ku lunyikha, iikhoma imola iija, avaanu valambiisile uwunansi waanave na kitwinisiwa, baheene uNguluvi avasaajile. 5 Avaanu kihuma ku lijumbi lya Yelusalemu na ku mbali soona isa nyi ya Yudeya, vamulutiile uYohana. Vakhandi vilambiisila uwunansi waanave, woope akhandi ikivatwinia mu mukhoga gwa Yolodani.

6 Amenda ga Yohana gakhandi gatendiilwe kwa waaji wa ngamiya, akhandi ikiyipinya ulukhova lwa nkwembe mu shigudi na kiilya inkumbi nu wuushi uwa mu lihakha. 7 Baheene uYohana akhandi iikhoma iija, “Kunyuma yangu iyinsa uyunji, umunya ngufu kishila one, yuna nisikwiliile kiiva muvanda waakwe wa kigondama na kihudula ingalawo sa ndaatu saakwe. 8 One nikivatwinia kwa malenga, leelo umwene akhavatwinia kwa Numbula uMunofu.”

UYeesu itwinisiwa na kijelwa

(Mataayo 3:13–4:11; Luuka 3:21-22; 4:1-13)

9 Uluhaavi ulo, pina uYohana itwiniaga, uYeesu wáhumile ku lijumbi lya Nasaleti ku nyi ya Galilaya, wálutile ku mukhoga gwa Yolodani, kiija atwinisiwe nu Yohana. 10 UYeesu wáganile kitwinisiwa, baaho hela wáganile kihuma mu malenga, wáawona uwulanga widindukha, nayu Numbula uMunofu iyiikha pamwene kwa shihwano sha nkunda. 11 Baheene iliswi lyapuliisikha kihuma kushaanya liija, “Owe yuuwe Lusawo lwangu, nikugeene na ukinishendeefya.”

12 Baaho uNumbula uMunofu wámulungamyaga uYeesu kiluta ku lunyikha. 13 Wákheele ukho nsiku mashumi gana, kuno uShetaani akhandi ikimujela. Wáali lumo ni nkhanu, na vamalayikha va Nguluvi vaava vikimusunga.

UYeesu ikivabaagula avamanyisiwa ava wutasi

(Mataayo 4:12-22; Luuka 4:14-15; 5:1-11)

14 Kuunyuma, uYohana uMutwiniaji wádindiilwe mu shifungo, uYeesu wálutile ku Galilaya kikhoma iMola iNofu isa Nguluvi. 15 Wájeele kiija, “Uluhaavi luna lwatahisiwaagwa nu Nguluvi lwafikha. Khanji uWutwa wa Nguluvi wahejeela kunyeenyu. Mulambiisile uwunansi weenyu na kihuviilila iMola iNofu isa Nguluvi.”

16 UYeesu wáfikhaga ku lilamba ilikhome ilya Galilaya. Pina akhandi iishila mulubali, wávaajile avalova nswi uSimoni nu Andeleya umaame, vakhandi viilova inswi ni nyaafu. 17 UYeesu wávashemeelile wávajovela, “Munifwataje, kiyansisa lino nikivapeela insengo iya kilova avaanu.” 18 Baaho vasilekha inyaafu saanave vayansa kimufwata.

19 UYeesu wálutile pamwandi padoodo, wávaajile uYaakobo nu Yohana avashina Sebedayo, vaali mu shipugo shaanave viinosa inyaafu saanave isa kilovela inswi. 20 Baaho wávashemeela, vawuukha vamulekha uwihaanave uSebedayo mu shipugo, wáali na vasenga nsengo vaakwe, vamufwata uYeesu.

UYeesu ikilidaga ililungu limuhume umuunu

(Luuka 4:31-37)

21 UYeesu na vamanyisiwa vaakwe awo, vaatile ku lijumbi lya Kapelinawumu. Lyaganile kifikha ilijuva lya Sabaato valutile mu nanda iya kifuunyila, umo mumwene wáyansaaga kimanyisa. 22 Avaanu woona vina vakhandi mula vaswijile mandu. Kiiva uYeesu asikhandi imanyisa ngaja avamanyisaaji vaanave ava ndaji sa Musa, leelo wámanyisaaga ngaja muunu munya wutawulilwa.

23 Uluhaavi ulo, mu nanda ya kifuunyila, akhandi akwali umuunu umunya lilungu. 24 Umuunu uyo wákhoolile inkhoolo mandu wáaja, “Wisakula shi kunyeesu, owe Yeesu wa ku Nasaleti? Uyinsile kitunanganga? Nimeenye kiija owe uli Munofu kihuma kwa Nguluvi.” 25 UYeesu wálikhajila ililungu wáaja, “Sisima! Muhuma umuunu uyu!” 26 Baheene ililungu lila lyamudegensa degensa umuunu yula, lyalyova kwa shawuti nkhome, lyamuhuma.

27 Avaanu woona vina vaali pala vaswijile mandu, vaposeenie vaajova, “Isi njowo nshi? Imanyiso isi mya, sina ngufu! Khanji ikigadaga amalungu goope gikimutiila!” 28 Ndeeno imola sa Yeesu, sayalaliile nyangu nyangu uluvala loona ulwa nyi ya Galilaya.

UYeesu ikivaponia avatamu vinshi

(Mataayo 8:14-17; Luuka 4:38-41)

29 UYeesu na vamanyisiwa vaakwe, uSimoni, uAndeleya, uYaakobo nu Yohana, vahumile mu nanda iya kifuunyila, valutile shiluta mbakha ku nanda ya Simoni nu Andeleya. 30 Pina vafishile pala, baaho vamujoveele uYeesu kiija, umukweye uwa shidala uwa Simoni mutamu insegema, agonile pa wusaga. 31 UYeesu wávejeelile pa mutamu, wámukhata iliwokho, wámunyenyula. Luhaavi luulo insegema yamuleshela, wáyansa kivasunga.

32 Lyaganile kisota ilijuva, pashaamihe avaanu woona ava mu lijumbi lila, vamuleteele avatamu na vanya malungu. 33 Vakungaanile pa mulyango gwa nanda yila, muna wáali uYeesu. 34 UYeesu wávaponiaga avatamu woona, vina vaali na matamu minshi paayo paayo na kigadaga amalungu minshi. Asikhagatawuliile kilogola hata padoodo, kiiva gaali gamumeenye, leelo umwene asikhandi idobokha avaanu vamumanye.

UYeesu ifuunya mwene duguli pashipata

(Luuka 4:42-44)

35 Ulwamilaawu njine pina kusinahenje kunena, uYeesu wálamwishe, wáwuukha iiluta pashipata, pina pangaya vaanu, apo wáfuunyile. 36 USimoni na vayine valutile kimusakula. 37 Vaganile kimwaga vamujoveele kiija, “Avaanu woona vikikusakula.” 38 UYeesu wáaja, “Tilute mu njinji sina sili nkholeela, koope nikhome iliswi. Ulu lulwene luna nayinsila, kikhoma iliswi na kiponia imbali soona.” 39 Baheene wálutile mu nyi yoona iya Galilaya, wákhomile iliswi mu nanda saanave isa kifuunyila isa Vayahuudi, na kidaga amalungu.

UYeesu ikimuponia umunya nyawulova

(Mataayo 8:1-4; Luuka 5:12-16)

40 Uluhaavi lumonga umuunu umunya nyawulova, wáyinsile kwa Yeesu, wáfugama, wámulomba wáaja, “Nda widobokha, nilomba univalase.” 41 UYeesu wámusungupiile wágolosa iliwokho lyakwe wámupyasa wámujova wáaja, “Nidobokha, uvalale.” 42 Luhaavi luulo inyawulova yawushile mu muvili gwakwe, wávalala. 43 Baaho pina akhandi ikimuwuusa umuunu yula, uYeesu wámukhaana wáaja, 44 “Usikhajelaga kimujovela muunu yoyoona imola isi! Lino, lutaga uyiwonense kwa mutambule. Khanji, uhumye ishadanda isha kiwonensa kiija waapona, ngaja shina yiijova indaji ya Musa.”

45 Leelo umuunu uyo asawuyile asisime, wáwuushile wáyansiise kiyalaalisa imola iya kivalala umwene. Kilingana ni njowo iso, uYeesu wágombwele kihuluta mu majumbi pina avaanu vikimwaga, kiiva avaanu vamuyinsilaga kwa winshi. Leelo akhandi akheele kunja kulubali. Koope ukho ifipuga fya vaanu, kihuma imbali soona vamulutilaga umwene.