Maluko 2

UYeesu munya wutawulilwa wa kisaajila uwunansi

(Mataayo 9:1-8; Luuka 5:17-26)

1 Insiku nyasilinga ndeeni saganile kishila, uYeesu wátinile khanji mu lijumbi lya Kapelinawumu. Avaanu vapuliishe kiija uYeesu wáatina. 2 Avaanu vinshi vakungaanile mu nanda muna wáali akwali uYeesu, vamemile mandu mukhati na pa mulyango hata mwenshe iya kihuluta yisikhawoneeshe. Uluhaavi ulo uYeesu akhandi apiikhoma iLiswi lya Nguluvi. 3 Baheene vayinsa avaanu vana (4), vamusumwile umuunu yuna atengelemwishe umuvili. 4 Leelo vagombwele kimuyinjisa pina akwali uYeesu kwa kiiva avaanu vakhandi vamemile mandu. Baheene vataanile pashaanya pa nanda vayansiise kidowola ulwansa, uwiima wuna akhandi akwali uYeesu. Vamuyinjisa baaho, akhandi agonile pa lupaasa. 5 UYeesu pina wályajile ilihuuvi lyanave, wámujovile umutamu yula, “Wee lusawo lwangu, wasaajilwa uwunansi waakho.”

6 Avaanu vamonga mu vamanyisaaji va ndaji sa Musa vakhandi vakwali pala. Vaganile kipulikha iliswi ilyo, vahiivile vajeele, 7 “Kwashi uyu iijova akwiliile kisaajila uwunansi? Umwene ikimutofola uNguluvi. Kusiina umuunu yuna akwiliile kisaajila uwunansi leelo yu Nguluvi mwene duguli.” 8 Baaho uYeesu wámanyile luna vaali vihiiva mu numbula saanave, wávajovile, “Kwashi muhiiva ndeeno mu numbula seenyu? 9 Lino! Lili kwi lina lipeefu? Kimujova umunya kitengelemukha umuvili kiija, ‘Wasaajilwa uwunansi waakho,’ awu kiija, ‘Yiima, yitwikha umushekha gwakho, ujende’? 10 Lino mumanye kiija, one Lusawo lwa Muunu nitawuliilwe uwutawulilwa uwa kisaajila avaanu uwunansi mu nyi muno.” Baheene wámujovela umunya kitengelemukha umuvili, 11 “Nikikujova, yiima! Yitwikha umushekha gwakho, ulutaje kukhaaya yaakho!” 12 Baaho wáyiima, wáyitwikha umushekha gwakwe wáawuya, avaanu woona vapikimwaga. Vaswijile mandu, khanji vamusufya uNguluvi kiija, “Iliswi ili tisinalyaje kaa.”

UYeesu ikimushemeela uLaawi ave mumanyisiwa waakwe

(Mataayo 9:9-13; Luuka 5:27-32)

13 UYeesu wálutile, wáafikha khanji kulubali lwa lilamba ilikhome ilya Galilaya. Ishipuga sha vaanu shalutile kwa Yeesu, baheene umwene wáyansiise kivamanyisa iliswi. 14 Wáwuushile pala wáshilile kulubali lwa lilamba ilikhome. Pina akhandi ijenda wámwajile uLaawi, umutofya khoodi yumonga, umuswamuve wa Alufaayo, yuna wáali akheele mu nanda muna akhandi itofesa ikhoodi. UYeesu wámujovela wáaja, “Nifwataga.” ULaawi wáyiima, wáyansa kimufwata.

15 UYeesu na vamanyisiwa vaakwe, valutile kiilya ishakiilya kwa Laawi. Avatofya khoodi vinshi na vanya wunansi vinshi, vina vaali vamufwatile uYeesu, vaali vakheele lumo nawo. 16 Avamanyisaaji va ndaji sa Musa avamonga vina vakhandi Vafalisaayo woope vaali pala. Vaganile kimwaga iilya na vanya wunansi na vatofya khoodi, baheene vavaposiise avamanyisiwa vaakwe kiija, “Kwashi iilya lumo na vatofya khoodi na vanya wunansi awo?” 17 UYeesu wáganile kipulikha ago wávajovela wáaja, “Avaanu vina vasili vatamu vasikimusakula umuhusi, leelo avatamu vaveene vina vikimusakula. Nisiyinsile kivashemeela avaanu vina vikiyiwona kiija vagolofu, leelo niyinsile kivashemeela avaanu vina vikiyiwona kiija vanansi.”

Iliposo ilya kilekha kiilya

(Mataayo 9:14-17; Luuka 5:33-39)

18 Uluhaavi lula avamanyisiwa va Yohana uMutwiniaji na vamanyisiwa va Vafalisaayo yaali ngʼoma yaanave iya kilekha kiilya, kiiva vifuunyaga. Ilisiku limonga avaanu vayinsile vamuposa uYeesu, “Kwashi avamanyisiwa va Yohana na vamanyisiwa va Vafalisaayo vihwesaga vasiilya, leelo avamanyisiwa vaakho kwashi vasiigaha ngaja vala?” 19 UYeesu wájovile, “Wuli, vina vayaniilwe ku shiwungo sha noolana, pina vali nu munya shiwungo isho, vakwiliile kilekha kiilya? Luhaavi loloona pina vali nu munya shiwungo akwali, vasihwesaga kiilya. 20 Leelo, sikhayinsa insiku sina vakhamuwuusa umunya shiwungo, baheene vakhalekha kiilya.

21 “Kusiina umuunu yuna itoola ishilakha ishipya na kihona mu mwenda umukuulu. Nda agahe ndeeno, ishilakha shilekhana nu mwenda, umwenda ugo gwideemukha mandu. 22 Khanji kusiina umuunu yuna iviikha idivaayi imya mu fiiwo ifikuulu. Kiiva nda agahe ndeeno ifiiwo fideemukha, idivaayi yikunukha na ifiiwo finanjikha. Leelo, avaanu viviikha idivaayi imya mu fiiwo ifipya.”

UYeesu yumwene Mutwa wa lijuva lya Sabaato

(Mataayo 12:1-8; Luuka 6:1-5)

23 Ilijuva limonga ilya Sabaato uYeesu na vamanyisiwa vaakwe vakhandi viishila mu magunda ga ngano. Avamanyisiwa vaakwe vakhandi vijenda kuno videenya na kipulula amahoojo ga ngano. 24 AVafalisaayo vina vaali pala vavaajile, vamuposiise uYeesu kiija, “Loleela, kwashi avamanyisiwa vaakho vikigasenga gina gakhaniilwe pa lijuva lya Sabaato?”

25 UYeesu wávayankha wáaja, “Wuli, musinayimbe mu Mayandikhwa aManofu umutwa uDawudi na vayine shina vagahile, pina vakhandi ni njala? 26 Uluhaavi luna akhandi uAbiyatali mutambule mukhome, uDawudi wáhulwite mu liheema lya Nguluvi wátoola wáalya na vayine amakhaate gina gakhandi gavishiilwe pa Nguluvi. Indaji sa Musa sikhandi sikivakhaana kiilya amakhaate ago, ila avatambule veene duguli.” 27 UYeesu wájovaga ndeeni, “Avaanu vasikhavishiilwe kwa lugulumilo lwa lijuva lya Sabaato, leelo ilijuva lya Sabaato lyavikhwagwa kwa lugulumilo lwa vaanu. 28 Mumanye kiija one Lusawo lwa Muunu, yuune Mutwa hata wa lijuva lya Sabaato.”