UYeesu yumwene Mutwa wa lijuva lya Sabaato
6
1 Ilijuva limonga ilya Sabaato,
uYeesu na vamanyisiwa vaakwe vakhandi viishila mu magunda ga ngano.
Avamanyisiwa vaakwe vakhandi videenya amahoojo ga ngano,
na kifigiha ingano na kiilya.
2 Baheene aVafalisaayo avanji vamujovela uYeesu vaaja,
“Kwashi avamanyisiwa vaakho vikigasenga gina gakhaniilwe pa lijuva lya Sabaato?”a
3 UYeesu wávayankha wáaja,
“Wuli,
musinayimbe mu Mayandikhwa aManofu umutwa uDawudi na vayine shina vagahile,
pina vakhandi ni njala?b
4 UDawudi wáhulwite mu liheema lya Nguluvi wátoola wáalya na vayine amakhaate gina gakhandi gavishiilwe pa Nguluvi.
Indaji sa Musa sikhandi sikivakhaana kiilya amakhaate ago,
ila avatambule veene duguli.”
5 UYeesu wávajovela wáaja,
“One,
Lusawo lwa Muunu,
yuune Mutwa wa lijuva lya Sabaato.”
UYeesu ikimuponia umuunu mu lijuva lya Sabaato
6 Ilijuva ilinji ilya Sabaato,
c uYeesu wáyinjiile mu nanda iya kifuunyila,
wáyansa kimanyisa avaanu.
Mu nanda mula,
wáali akwali umuunu yumonga yuna iliwokho lyakwe ilya kundiilo likhandi likholoweeshe.
7 AVafalisaayo na vamanyisaaji va ndaji sa Musa,
vaali vikimutejela uYeesu kiija,
vamwaje nda asimuponie umuunu yula mu lijuva lya Sabaato.
Vaali viigaha ilyo,
kwa kiiva vakhandi visakula umutego ugwa kimuhijila uYeesu.
8 Leelo uYeesu wámanyaga amahiiva gaanave.
Baheene,
wámujovela umuunu yula umunya liwokho likholoweeshe wáaja,
“Yiima,
ulute paakhati naakhati.”
Baheene wáyiima wáaluta paakhati naakhati yaanave.
9 UYeesu wávajovela aVafalisaayo vala wáaja,
“Nikivaposa,
indaji seesu sikitutawula kigaha shishi mu lijuva lya Sabaato?
Kigaha inofu awu imbi?
Kiwukulusa uwuumi awu kiwuyasa?”
10 UYeesu wávangʼalulila ameeho avaanu mbali soona,
baheene wámujovela umuunu yula wáaja,
“Golosa iliwokho lyakho.”
Woope wágolosa iliwokho lyakwe,
baaho lyapona.
11 AVafalisaayo vala vakhalala mandu.
Vapulinkhana kiija vamugahe shi uYeesu.
UYeesu ikivabaagula avanandeje ishumi na vavili
12 Ilijuva limonga,
uYeesu wálutile ku shidunda kifuunya,
ukho kukwene wáava ifuunya kwa Nguluvi ishilo shoona.
13 Ulwamilaawu njine,
wávashemeela avamanyisiwa vaakwe.
Mu awo wávabaagula ishumi na vavili,
wávatambula vanandeje.d
14 Avanandeje awo vaveene ava,
uSimoni (yuna uYeesu wámupeelaga ilitaawa lya Petulo) nu Andeleya umunangʼana waakwe uSimoni,
uYaakobo,
uYohana,
uFilipo,
uBatolomaayo,
15 uMataayo,
uTomasi,
uYaakobo umushina Alufaayo,
uSimoni uMulwila Nyi,e
16 uYuuda umushina Yaakobo nu Yuuda uIsikaliyoote,
yuna kuwudugo wámudolelaga uYeesu.
UYeesu iiponia avatamu vinshi
17 UYeesu wáyiikha kihuma ku shidunda,
lumo na vamanyisiwa vaakwe.
Pina wáafikha pa luvala ulwa lunyikha,
wáyiima.
Pala,
pakhandi ni shipuga sha vamanyisiwa vaakwe,
lumo ni shipuga shikhome sha vaanu.
Avaanu awo vakhahumile imbali sa ku Yudeya na ku Yelusalemu,
ni mbali sa kulubali lwa bahali ya Tiilo ni Sidoni.
18 Avaanu vala vakhalutile pala kimupuliisa uYeesu,
na kiponisiwa amatamu gaanave.
Woope vina vakhandi vilafisiwa na malungu,
wáava ikivaponia.
19 Avaanu woona,
vaali visakula kimupyasa uYeesu,
kwa kiiva ingufu saakwe saali sikivaponia woona.
Amamanyiso aga kiyimiililwa na ga aka
20 UYeesu wávaloleela avamanyisiwa vaakwe,
wávajovela wáaja,
“Shiba omwe,
muna muli vapiina,
kwa kiiva uWutwa wa Nguluvi weenyu.
21 Shiba omwe,
muna muli ni njala lino,
kiiva uNguluvi akhavapeela muyikute!
Shiba omwe,
muna mwikhoola lino,
kwa kiiva mukhahekha.
22 “Shiba omwe,
avaanu vina vikivakhalalila,
vikivakhaana na kivaliga,
na kivajova kiija muli vanya wunansi pina mukiniyinatila one Lusawo lwa Muunu.
23 Kiiva shiisho ndeeno hata avambuyaanave shina vavalafyaga avakuwamalago.
Baheene ago pina gakhava gisenjekha,
shendeevaji na kishima,
kwa kiiva uNguluvi avavishiile amahombo amakhome kushaanya.
24 “Leelo aka,
omwe muna muli vanya wusi,
kwa kiiva ulutono lwenyu,
shi mwiva mwapata lino!
25 Aka,
omwe muna muyikwite lino,
kwa kiiva mukhava ni njala!
Aka,
omwe muna mwihekha lino,
kwa kiiva mukhakhoola!
26 Aka,
omwe pina avaanu woona vikivasufya,
kwa kiiva,
ilyo lilyene lina avambuyaanave
vakhandi vikivasufya avakuwamalago avadehi.
Amamanyiso aga kivagana avalugu
27 “Leelo,
nikivajovela omwe muna mukinipuliisa,
muvaganaje avalugu veenyu!
Avaanu vina vikivakhalalila,
omwe muvagahilaje amanofu.
28 Avaanu vina vikivayiijila,
muveesaje mukivafuunyila kwa Nguluvi avayimililaje.
Na vina vikivagahila amavi,
muveesaje mukivafuunyila kwa Nguluvi.
29 Umuunu nda akusale kwa kikutova ilikhatu ulubali lumo,
mulekhaga akutove na ulubali ulunji.
Khanji,
umuunu nda akuposhe ilikhooti lyakho,
mulekhaga atoole nayi gwanda.
30 Umuunu nda ikikulomba ishiinu shoshoona,
mupeelaga.
Khanji umuunu nda atoole ifiinu fyakho,
usikhamujovaga akugomosese.
31 Muvagahilaje avaanu avanji,
ngaja omwe shina mwidobokha kigahilwa na veene.
32 “Nda muvagane vala hela vina vikivagana,
musiipate lutono lushi?
Hata vina vasiyinatila indaji sa Nguluvi,
vikivagana hela vala vina vikivagana!
33 Khanji,
nda mukivagahila amanofu hela vala vina vikivagahila amanofu,
mukhava nu lutono lushi?
Hata vina vasiyinatila indaji sa Nguluvi,
viigaha shiisho ndeeno!
34 Nda muvakhopese hela,
vala vina mwimanya kiija vakhavahomba,
mukhava nu lutono lushi?
Hata vina vasiyinatila indaji sa Nguluvi,
vikivakhopesa avayaanave,
kwa kiiva viimanya kiija,
avayaanave awo vakhavahomba fyona!
35 “Leelo omwe,
muvaganaje avalugu veenyu na kivagahila amanofu.
Vakhopesaaji,
bila kihuviilila kiija vakhavagomosesa.
Nda mugahe ago,
uNguluvi uMukhome akhavapeela amahombo makhome.
Khanji mukhava vanaakwe kwa kiiva,
umwene munofu kwa vina vasihonjesa na vina vanansi.
36 Lino,
muveesaje vanya kivasungupila avaanu woona,
ngaja uWiheenyu shina ikivasungupila avaanu.
Kivahiga avaanu avanji
37 “Musikhavahigaji avaanu avanji,
baheene na yuumwe musikhahigwa nu Nguluvi.
Musikhavapiikhaji avaanu avanji,
baheene na yuumwe musikhapiikhwa.
Muvasajilaje avayeenyu,
baheene na yuumwe mukhasaajilwa.
38 Muvapeelaje avaanu ifiinu,
baheene na yuumwe mukhapeelwa,
mu shijelo shina shisindiliilwe,
khanji shimemile na kikunukha.
Kwa kiiva,
ishijelo shina mukivajelela avanji,
shiisho na yuumwe shina uNguluvi akhavajelela.”
39 UYeesu wávajovela kwa shihwano wáaja,
“Aasi,
umupofu akwiliile kimulongosa umupofu muyine?
Nda yive ndeeno,
woona vasidubujila mu lilindi?
40 Umumanyisiwa asili mukhome kimushila umumanyisaaji waakwe.
Leelo,
yuna wáamala kimanyisiwa goona,
baheene asiive ngaja umumanyisaaji waakwe.
41 “Kwashi wiloleela akhabando khina khali mu liiho lya muyaago,
leelo usiloleela ulupaati ulukhome luna luli mu liiho lyakho?
42 Khanji ukwiliile kimujova umuyaago kiija,
‘Wee lukholo lwangu,
lekha nikuwuuse akhabando khina khali mu liiho lyakho,’
leelo owe usiloleela ulupaati ulukhome luna luli mu liiho lyakho?
Owe uli mumyansi!
Wuusa tangusiina ulupaati ulukhome luna luli mu liiho lyakho.
Apo baheene ukwiliile kiloleela wunofu na kiwuusa akhabando khina khali mu liiho lya muyaago.
Ilipishi limanyikha kwa makhomo gaakwe
43 “Khanji,
ilipishi ilinofu liikhoma amakhomo amanofu,
leelo ilipishi ilivi liikhoma amakhomo amavi.
44 Avaanu vikilimanya ilipishi kwa kigamanya amakhomo gaakwe,
kiiva vasiiyava amakhomo ga litiini awu ga lisabiibu ku lihakha lya mimfwa.f
45 Shilushwali,
hata umuunu umunofu ilogola amaswi amanofu kihuma mu manofu gina gamemile mu numbula yaakwe.
Leelo umuunu umunansi ilogola amaswi amavi kihuma mu wunansi wuna wumemile mu numbula yaakwe.
Kwa kiiva,
amaswi gina umuunu iijova,
giihuma mu gala gina gamemile mu numbula yaakwe.
Kisenga mu lipaama, awu kisenga mu luhankha
46 “Kwashi mukinishemeela ‘Wee Mutwa,
wee Mutwa,’
leelo musiigaha amaswi gina nikivajovela?
47 Umuunu yoyoona yuna iyinsa kunyangu,
na kipulikha amaswi gangu na kiyinatila,
nisivajovele shina ashwali kwa shihwano.
48 “Ihwanana nu musengaaji wa litembe yuna wáhimbile pansi mandu,
mbakha wáafikha pa lipaama.
Wásenga uluutu,
baheene wásenga ilitembe pashaanya yaakwe,
wáamala.
Uluhaavi pina yitoonya inoonya,
umukhoga gwamemile amalenga gafuwukha,
galitova ilitembe ilyo.
Hata ndeeno gasikhayihegensiise,
kwa kiiva yikhandi yisenjiilwe wunofu.
49 Leelo,
umuunu yuna ipulikha iliswi lyangu na asikiliyinatila,
uyo ihwananisiwa nu muunu yuna asenjile ilitembe lyakwe pa luhankha pina pagaya luutu.
Amalenga ga mu mukhoga pina gafuwukha na kiita kwa ngufu ku litembe,
baaho ilitembe liigwa na kibomokha lyona.”