Luuka 5

UYeesu ikivabaagula avamanyisiwa ava wutasi

(Mataayo 4:18-22; Maluko 1:16-20)

1 Ilijuva limonga, uYeesu wáyiimaga mulubali lwa lilamba ilikhome lya Genesaleti, akhandi imanyisa iLiswi lya Nguluvi. Avaanu vinshi vakhandi vivejeela kunyaakwe kimupuliisa, mbakha vikimuminyiilisa. 2 UYeesu wáfyajile ifipugo fivili mulubali lwa lilamba ilikhome. Avalovaaji vakhandi vapoolile mu fipugo viyoosa inyaafu saanave. 3 UYeesu wáyinjila mu shipugo, shina shikhandi sha Simoni. Wámulomba uSimoni ashivejeese padoodo mukhati mu lilamba ilikhome, baheene uYeesu wáakhala mu shipugo imanyisa ishipuga sha vaanu.

4 Wáganile kimala kimanyisa, wámujovile uSimoni wáaja, “Twala ishipugo pa shoogo, apo muyiise inyaafu seenyu, mulove inswi.” 5 USimoni wámuyankha uYeesu wáaja, “Wee Mutwa, taava tisenga insengo ishilo shoona, tisaalova shoshoona. Leelo, kwa kiiva owe waajova, apo nisiyiise inyaafu.”

6 Baheene uSimoni na vayine vayiisa inyaafu saanave mu malenga. Pina vayisiise, inswi nyinshi mandu sapitiilwe, mbakha inyaafu sayansa kideemukha. 7 Baheene vavasinisa avayaanave kwa liwokho vina vakhandi mu shipugo ishinji, kiija vayinse kivatanjilisa. Pina vayinsa, vamemyaga inswi fipugo fyona fivili, inswi sikhandi nyinshi mandu mbakha ifipugo fyava fiilwa kitwina. 8 USimoni Petulo pina akhasaajile inswi nyinshi, wámufugamiile uYeesu wáaja, “Wee Mutwa, nikikulomba uwuushe kunyangu, kwa kiiva one nili munansi.” 9 USimoni wájovile ago, kwa kiiva umwene na vayine woona vina vakhandi lumo, vaswigaga mandu aga nswi nyinshi sina valovaga. 10 Woope avaana va Sebedayo uYaakobo nu Yohana, vina vakhandi valova nswi vayine nu Simoni, vaswigaga mandu. Baheene uYeesu wámujovela uSimoni wáaja, “Usikhatiilaga Simoni, kihuma lino usiive wiilova avaanu.” 11 USimoni na vayine vafitwalaga ifipugo fyanave palubali lwa lilamba ilikhome, apo vafilekha fyona vawuukha vikimufwata uYeesu.

UYeesu ikimuponia umunya nyawulova

(Mataayo 8:1-4; Maluko 1:40-45)

12 Ilijuva limonga uYeesu wáyinjiile mu lijumbi limonga, umo akhandi akwali umuunu umunya nyawulova mu muvili goona. Umuunu yula pina wámwajile uYeesu, wágalagandile na kifugama pamwene, baheene wámulomba mandu, wáaja, “Wee Mutwa, nda widobokha, nilomba univalase.” 13 UYeesu wágolosa iliwokho lyakwe, wámupyasa, wámujova wáaja, “Nidobokha, uvalale.” Baaho inyawulova yamuwuukha mu muvili gwakwe. 14 Wámukhaania umuunu yula wáaja, “Usikhajelaga kimujovela muunu yoyoona imola isi! Lino, lutaga uyiwonense kwa mutambule. Khanji uhumye ishadanda isha kiwonensa kiija waapona, ngaja shina yiijova indaji ya Musa.” 15 Leelo imola sa Yeesu sashilile kipuliisikha imbali soona. Avaanu vinshi vakhandi vikungaana kimupuliisa amamanyiso gaakwe, na kivaponia avaanu amatamu gaanave. 16 Leelo umwene wáava iiluta kuna kugaya vaanu, kiija amufuunye uNguluvi.

UYeesu munya wutawulilwa wa kisaajila uwunansi

(Mataayo 9:1-8; Maluko 2:1-12)

17 Ilijuva limonga uYeesu akhandi imanyisa avaanu. Mu awo vakhandi vakwali aVafalisaayo na vamanyisaaji va ndaji sa Musa, kihuma mu njinji soona isa ku Galilaya ni sa ku Yudeya, na mu lijumbi lya Yelusalemu. Ingufu sa Mutwa sikhandi nu mwene pina iiponia avatamu.

18 Baheene avaanu vamonga vayinsaga, vamusumwile pa lupaasa umuunu yuna atengelemwishe umuvili, vaava visakula kimuyinjisa mu litembe kiija vamuviishe kwa Yeesu. 19 Leelo vagombwele kimuyinjisa umutamu yula pa mulyango, kwa kiiva avaanu vakhandi vamemile mandu. Baheene vataana kushaanya ya litembe, vadowola ulwansa. Apo vamuyiisa umunya kitengelemukha umuvili yula pa lupaasa, paakhati naakhati ya vaanu pina akhandi akwali uYeesu.

20 UYeesu pina wályajile ilihuuvi lyanave, wámujovile umutamu yula, “Wee lusawo lwangu! Wasaajilwa uwunansi waakho.” 21 Avamanyisaaji va ndaji sa Musa na Vafalisaayo vala vayansa kihiiva, viija, “Lino umuunu uyu yu naani? Umwene ikimutofola uNguluvi. Kusiina umuunu yuna akwiliile kisaajila uwunansi, leelo yu Nguluvi mwene duguli.” 22 UYeesu wámanyaga goona gina vakhandi vihiiva, wávaposa wáaja, “Kwashi muhiiva ndeeno mu numbula seenyu? 23 Lino! Lili kwi lina lipeefu? Kimujova kiija, ‘Wasaajilwa uwunansi waakho,’ awu kiija, ‘Yiima, ujende’? 24 Lino mumanye kiija, one Lusawo lwa Muunu nitawuliilwe uwutawulilwa uwa kisaajila avaanu uwunansi mu nyi muno.” Baheene wámujovela umunya kitengelemukha umuvili, “Nikikujova, yiima! Yitwikha umushekha gwakho, ulutaje kukhaaya yaakho.” 25 Baaho wáyiima bahaveene, wásumula umushekha gwakwe, wáwuukha iiwuya kukhaaya yaakwe kuno ikimusufya uNguluvi. 26 Avaanu awo woona vaswiga na kimusufya uNguluvi, vaava ni shitiilo, vaajova, “Iminsiyaano tagaaga aga ga kiswiga!”

UYeesu ikimushemeela uLaawi ave mumanyisiwa waakwe

(Mataayo 9:9-13; Maluko 2:13-17)

27 Baheene uYeesu wáahuma mu litembe lila, wámwaga umutofya khoodi yumonga, ilitaawa lyakwe yu Laawi, akheele mu nanda muna akhandi itofesa ikhoodi. UYeesu wámujovela wáaja, “Nifwataga.” 28 Baaho uLaawi wáfilekha fyona, wáwuukha, wáyansa kimufwata uYeesu. 29 Baheene uLaawi wámunosesa uYeesu ishiwungo mu litembe lyakwe. Khanji pakhandi ni shipuga shikhome sha vatofya khoodi na vaanu avanji vinshi. 30 Ulu lwavagaha aVafalisaayo na vamanyisaaji vaanave va ndaji sa Musa, vayanse kivangʼuulila avamanyisiwa va Yeesu viija, “Kwashi mwilya na kiingʼwa lumo na vatofya khoodi na vanya wunansi?” 31 UYeesu wávayankha wáaja, “Avaanu vina vasili vatamu vasikimusakula umuhusi, leelo avatamu vaveene vina vikimusakula umuhusi! 32 Nisiyinsile kivashemeela avaanu vina vikiyiwona kiija vagolofu pa Nguluvi. Leelo niyinsile kivashemeela avaanu vina vikiyiwona kiija vanansi, baheene valambiisile.”

Iliposo ilya kilekha kiilya

(Mataayo 9:14-17; Maluko 2:18-22)

33 Avaanu vala vamujovela uYeesu, “Avamanyisiwa va Yohana na vamanyisiwa va Vafalisaayo vana ngʼoma iya kilekha kiilya insiku isinji, kiija vayiviishe mu mafuunyo. Kwashi avamanyisiwa vaakho viilya na kiingʼwa insiku soona?” 34 Umwene uYeesu wávagomosesa wáaja, “Vina vayaniilwe ku shiwungo sha noolana, pina vali nu munya shiwungo isho, omwe musikwiliile kivakhaana kiilya. 35 Leelo, sikhayinsa insiku sina vakhamuwuusa umunya shiwungo, baheene vakhalekha kiilya.” 36 Khanji, wávataviilila ululogolo wáaja, “Kusiina umuunu yuna ideemula ishilakha mu mwenda umupya, baheene ahone mu mwenda umukuulu. Nda agahe ndeeno, asiive wádeemula umwenda umupya, na ishilakha shila shisihwanana nu mwenda umukuulu. 37 Khanji kusiina umuunu yuna iviikha idivaayi imya mu fiiwo ifikuulu. Nda agahe ndeeno, idivaayi imya yila yisideemule ifiiwo, baheene yisikunushe nafi fiiwo fisinanjishe. 38 Leelo, idivaayi imya yisakulwa kiviikhwa mu fiiwo ifipya. 39 Khanji kusiina umuunu yuna isakula kiingʼwa idivaayi imya, pina wáangʼwa inkuulu, kwa kiiva iija, idivaayi inkuulu yiyeene nofu.”