Mataayo 8

UYeesu iiponia umunya nyawulova

(Maluko 1:40-45; Luuka 5:12-16)

1 UYeesu wáganaga kiyiikha kihuma ku shidunda, ishipuga ishikhome sha vaanu shamufwataga. 2 Baaho umuunu umunya nyawulova, wáyinsile kwa Yeesu, wáfugama, wámulomba wáaja, “Wee Mutwa, nda widobokha, nilomba univalase.” 3 UYeesu wágolosa iliwokho lyakwe, wámupyasa, wámujova wáaja, “Nidobokha uvalale!” Baaho umuunu yula wávalala uwutamu waakwe uwa nyawulova, wáapona. 4 UYeesu wámukhaana umuunu yula wáaja, “Usikhajelaga kimujovela muunu yoyoona imola isi! Lino, lutaga uyiwonense kwa mutambule. Khanji, uhumye ishadanda isha kiwonensa kiija waapona, ngaja shina yiijova indaji ya Musa.”

Ilihuuvi lya muyimililaaji wa vasulukhali

(Luuka 7:1-10; Yohana 4:43-54)

5 UYeesu pina wáyinjiile mu lijumbi lya Kapelinawumu, umuyimililaaji yumonga wa vasulukhali va Shiluumi wálutile kunyaakwe wámulomba umutango, 6 wáaja, “Wee Mutwa, umuvanda wangu atengelemwishe, mutamu mandu.” 7 UYeesu wámugomosesa wáaja, “Nisiyinse nimuponie.” 8 Leelo umuyimililaaji yula wámujovela wáaja, “Mutwa, usikhayilafyaga kiyinjila mu litembe lyangu, kwa kiiva nisikwiliile kitiilwa ngaja ndeeno. Lino, nikikulomba ulogole iliswi hela, umuvanda wangu asiipone. 9 Kiiva, na yuune nina vakhome vangu. Khanji, na yuune nina vasulukhali vina vali mu wutawulilwa wangu. Nda yumo nimujove, ‘Luta!’ iiluta. Khanji uyunji nimujove, ‘Yinsa!’ iyinsa. Umuvanda wangu nda nimujove kiija, ‘Gaha ndeeni!’ iigaha.”

10 UYeesu wáganaga kipulikha injowo iso, wáswigaga mandu. Wáshijova ishipuga sha vaanu shina shikhandi shikimufwata, wáajova, “Shiyooli nikivajovela kiija, hata mu Vaisilaheli woona, nisinamwagaje umuunu umunya lihuuvi ndawuli ili! 11 Nikivajovela kiija, avaanu vinshi vakhayinsa kihuma mbali soona isa nyi, vakhava viilya lumo na vambuyeesu uAbulahamu, uIsaaka nu Yaakobo mu Wutwa wa Nguluvi. 12 Leelo aVaisilaheli vinshi vina vasaviilwe kiija vave va Wutwa uwo, awo vakhataagwa kunja ku nshiisi, kuna vakhakhoola na kigegejula ameeno kwa kiiva ya wuvafi wukhome.”

13 Baheene uYeesu wámujovela umuyimililaaji yula wáaja, “Lutaga! Yive ngaja shina uhuviliile.” Baaho, umuvanda waakwe yula, wáapona kwa luhaavi luulo.

UYeesu iiponia avatamu vinshi

(Maluko 1:29-34; Luuka 4:38-41)

14 Uluhuma apo, uYeesu wáyinjila mu nanda ya Petulo yina yikhandi nkholeela. Wámwaga umukweye uwa shidala uwa Petulo, agonile pa wusaga, mutamu insegema. 15 UYeesu wámupyasa iliwokho, luhaavi luulo insegema yamuleshela. Woope wáyiima wáyansa kimusunga.

16 Ilijuva pina likhandi liisota, avaanu woona ava mu lijumbi lila, vamuleteele avatamu na vanya malungu vinshi. UYeesu wávaponiaga avatamu woona na kigadaga amalungu kwa liswi lyakwe. 17 Ago gasenjekhaga baheene iliswi lila likwilane, lina uNguluvi wálilogolaga kwa nsila ya mukuwamalago uIsaaya kiija,

“Wátoolile amatamu geesu, wágasumula.”

Amaswi gina gisakulwa kwa vina vikimufwata uYeesu

(Luuka 9:57-62)

18 UYeesu wáganaga kiwona kiija avaanu vinshi vikimupilima, wávalajisaaga avamanyisiwa vaakwe kiija, valowoshe ku mwambwa yila iya lilamba ilikhome ilya Galilaya. 19 Baheene umumanyisaaji yumonga uwa ndaji sa Musa wávejeelile kwa Yeesu, wámujovela wáaja, “Mumanyisaaji, one nisakula kiiva mumanyisiwa waakho, nisikufwate kokoona kuna hambi wiiluta.” 20 UYeesu wámugomosesa wáaja, “Insheve sina malindi, inyuni sina fiwanso, leelo one Lusawo lwa Muunu nimungaya litembe!”

21 Baheene umumanyisiwa uyunji wámujovela uYeesu wáaja, “Wee Mutwa, unitawule tangusiina niwuye kukhaaya, nimuhepelese uwiheesu mbakha afwe nimusiile.” 22 UYeesu wámugomosesa wáaja, “Owe nifwataga! Valekha vina vafwile, vavasiile vina vafwile vaanave.”

UYeesu ivatamya ilipepo ilikhome na mavingu

(Maluko 4:35-41; Luuka 8:22-25)

23 Baheene uYeesu wáyinjila mu shipugo, avamanyisiwa vaakwe woope vamufwata mumula. 24 Pina vilowokha ililamba, baaho ilipepo ilikhome lyayansa kipuga na kiviikha amavingu makhome. Amalenga gayansa kimema mu shipugo, leelo uYeesu akhandi agonile utulo. 25 Baheene avamanyisiwa vaaluta kwa Yeesu, vamulamusa, vaaja, “Wee Mutwa weesu! Tikulusa! Tiifwa!”

26 Woope wáaja, “Kwashi mutiila, omwe vaanu vanya lihuuvi lidoodo?” Baheene wáyiimile, wálikhajila ilipepo ilikhome lila, baaho kwavatama kwava tototo. 27 Avamanyisiwa vaakwe vaswigaga, vaajova, “Uyu yu naani yuna hata ilipepo na mavingu fyona fikimutiila?”

UYeesu iiponia avaanu vavili avanya malungu

(Maluko 5:1-20; Luuka 8:26-39)

28 UYeesu na vamanyisiwa vaakwe wáganile kilowokha ililamba ilikhome ilya Galilaya, wáfishile ku nyi ya Vagadala. Wátangaanile na vaanu vavili avanya malungu vina vahumile uluvala lwa majooja. Avaanu ava vakhandi vakhali mandu mbakha kusiina umuunu yuna akhandi akwiliile kishila insila yila, kiiva vakhandi vitiila kiyalushilwa na vanya malungu vala.

29 Baheene galyova ilyowo gaajova, “Wee Lusawo lwa Nguluvi, wisakula shi kunyeesu? Wuli, wayinsa kitulafya hata luhaavi lushaanali lusinaafishe?” 30 Kwa kutali kukhandi kuna shidiimilo shikhome sha ngubi shidiimwa. 31 Lino, amalungu gala gamubembelesa uYeesu gaajova, “Nda ukitudaga, tutawula tihulute ku shidiimilo ishikhome shila, isha ngubi.”

32 Woope wáajova, “Lutaji!” Baaho amalungu gawuukha kwa vaanu vala, gayinjila kwa ngufu mu ngubi sila. Baheene ingubi soona sayiikha luvilo ku munjeema, sagwila mu lilamba ilikhome na kiifwa.

33 Avadimaaji va ngubi sila vaganaga kigaaga ago, vasijile luvilo, vaaluta mu lijumbi. Vayansa kivataviilila avaanu goona gina gasenjekhaga kwa vanya malungu. 34 Avaanu woona va lijumbi lila valutile kwa Yeesu. Vaganile kimwaga vamubembelesa mandu kiija, awuushe mu nyi yaanave.