Yohana 4

UYeesu ilogola nu washimaayi uMusamaliya

1 Lino aVafalisaayo vapulikha imola sa Yeesu, kiija itwinia na kipata avamanyisiwa vinshi, kimushila uYohana. 2 Leelo, umwene uYeesu asikhatwiniise, ila avamanyisiwa vaakwe vaveene vatwiniaga. 3 UYeesu wáganaga kimanya kiija imola iso siyalaliile, wáwuukha mu nyi ya Yudeya lumo na vamanyisiwa vaakwe, wáaluta ku nyi ya Galilaya. 4 Pina viiluta ku Galilaya, vakhandi visakulwa kishilila ku nyi ya Samaliya. 5 Ndeeno vaafikha ku Samaliya, mu lijumbi limonga lina likhandi litambulwa Sikaali. Ilijumbi ilyo, likhandi nkholeela nu mugunda guna uYaakobo wámuhasaaga umuswamu waakwe uYusufu. 6 Apo pakhandi pana lisima lya malenga lina vikilitambula lisima lya Yaakobo. UYeesu pina wáali akhateele kwa kiiva ya lushuulo lutali, wátuuyile palubali ya lisima ilyo. Uluhaavi ulo yikhandi minsi ya lisala lya mutanda ndeeni.

7 Baheene uwashimaayi yumonga uMusamaliya, wáafikha kinega amalenga pa lisima ilyo. UYeesu wáganaga kimwaga, wámujovela wáaja, “Owe washimaayi, nilomba amalenga masheefu aga kiingʼwa.” 8 Uluhaavi ulo uYeesu akhandi mwene duguli, kwa kiiva avamanyisiwa vaakwe vakhandi valutile kigula ishakiilya ku lijumbi. 9 Baaho uwashimaayi yula wámugomosesa uYeesu wáaja, “Owe uli Muyahuudi, one nili Musamaliya. Ukwiliile wuli kinilomba one amalenga?” Wájovaga ndeeno kwa kiiva, aVayahuudi vakhaanaga kiilya lumo na Vasamaliya. 10 UYeesu wámugomosesa wáaja, “Nda waali umanye yu naani yuna ikikulomba amalenga aga kiingʼwa na kimanya shina uNguluvi isakula kikupeela, nda wanilomba one, na yuune ndi nakupeela amalenga, gina gikivapeela avaanu uwuumi wa shiluta.” 11 Uwashimaayi yula wámugomosesa uYeesu wáaja, “Wee mutwa, owe ugaya shiinu isha kinejela amalenga, khanji ilisima ili litali mandu. Lino, owe usigaaje kwi amalenga ago, gina gikivapeela avaanu uwuumi? 12 Umbuyeesu uYaakobo yumwene yuna wátupeelaga ilisima ili ilya malenga, lina akhandi iingʼwa na vanaakwe lumo ni fidiimwa fyakwe. Wuli, owe ukiyiwona kiija uli mukhome kimushila umwene?”

13 UYeesu wámugomosesa wáaja, “Umuunu yoyoona yuna iingʼwa amalenga ga lisima ili, hambi ikhawukha khanji. 14 Leelo umuunu yuna iingʼwa amalenga gina nikimupeela one, asikhakhawukha shiluta. Amalenga gina nisimupeele one, gakhava ngaja shisansa sha malenga mukhati yaakwe, shina shisiyuuma hata padoodo. Ishisansa isho, shisimupeele uwuumi wa shiluta.” 15 Baheene uwashimaayi yula wámulomba uYeesu wáaja, “Wee mutwa, lino nikikulomba unipeele amalenga gina walogola kiija nisikhakhawukhaga, nileshe kiyinsa khanji kinega amalenga mu lisima ili!”

16 UYeesu wámugomosesa wáaja, “Luta umushemeele umugoosi waakho, muyinse lumo panu.” 17 Wámugomosesa wáaja, “One nisiina umugoosi.” UYeesu wámugomosesa wáaja, “Walogola shiyooli kiija usiina mugoosi! 18 Kiiva mbakha lino, utoliilwe na vagoosi vasaanu, nayu mugoosi yuna wiikhala nawo lino, asili mugoosi waakho. Apo, injowo sina wilogola, sa shiyooli.” 19 Uwashimaayi yula wámugomosesa wáaja, “Eena mutwa, lino naamanya kiija, owe uli mukuwamalago. 20 Avambuyeesu vakhandi vikimufuunya uNguluvi mu shidunda ishi isha Gelasiimu, leelo omwe mu Vayahuudi, mwijova yisakulwa kimufuunya uNguluvi ku Yelusalemu. Lino, ishiyooli shili kwi?”

21 UYeesu wámugomosesa wáaja, “Owe nyineesu, nihuvililaga. Uluhaavi luna luyinsa, musikhamufuunya uDaada uNguluvi mu shidunda ishi, awu ku Yelusalemu. 22 Omwe Vasamaliya, mukimufuunya uNguluvi yuna musimumeenye, leelo ose ti Vayahuudi tikimufuunya uNguluvi yuna timumeenye, kwa kiiva akhavakulusa avaanu kishilila kwa Vayahuudi. 23 Uluhaavi luyinsa khanji shi lwafikha, luna avaanu vina visakula kimufuunya uNguluvi, vakhamufuunya kwa numbula ni shiyooli. UDaada uNguluvi, isakula avaanu vina vikimufuunya kwa nsila iyo. 24 UNguluvi yu Numbula. Avaanu vina vikimufuunya, visakulwa vave vikimufuunya kwa numbula ni shiyooli.” 25 Uwashimaayi yula wámugomosesa wáaja, “Nimeenye kiija iyinsa uMukulusaaji, yuna itambulwa Kilisito. Khanji nimeenye kiija, pina akhayinsa akhatutaviilila goona.” 26 Baheene uYeesu wámugomosesa wáaja, “One yuna nilogola noowe, yumwene yuna owe ukimulogola.”

27 Uluhaavi ulo avamanyisiwa vaakwe vayinsa, vaswiga mandu kimwaga uYeesu ilogola nu washimaayi. Leelo, kusiina hata umumanyisiwa yumo yuna wámuposaaga uYeesu kiija, “Wisakula shishi kunyaakwe?” Awu kiija, “Kwashi wilogola na woope?”

28 Uwashimaayi yula wáyilekha injiilo yaakwe iya malenga bahala, wáaluta ku lijumbi. Wáganaga kifikha wávajovela avaanu wáaja, 29 “Shoshi mumuloleele umuunu yuna wánijovela goona gina niwaahile kigasenga. Wuli, umuunu uyo akwiliile kiiva yu Mukulusaaji yuna uNguluvi wátahisaaga kimufilikha?” 30 Lino, avaanu vaganaga kipulikha ago, vawuukha mu lijumbi lila, na kiyansa kiluta kuna akhandi akwali uYeesu.

31 Pina vasinaafishe avaanu vala, avamanyisiwa vaakwe vamulomba uYeesu vaajova, “Wee Mumanyisaaji, yinsa, ulye ishakiilya.” 32 Leelo umwene wávagomosesa wáaja, “One nina shakiilya ishinji, shina omwe musishimeenye.” 33 Baheene avamanyisiwa vaakwe vayansa kiposania veene viija, “Wuli, kuna muunu yuna wámuleetela ishakiilya?” 34 UYeesu wávagomosesa wáaja, “Ishakiilya shangu one, kigaha gina ageene uDaada uNguluvi yuna wánifilikhaga, na kimaliisa insengo yaakwe. 35 Omwe mwijova, ‘Gasigeele meesi gana hela kifikha inkungulo.’ Leelo yisili ngaja ndeeno! Loleelaji amagunda shina gashwali. Inkungulo sakhangala, siheepile kikungulwa. 36 Khanji, nayu mukungulaaji ahombiilwe ilihombo lyakwe. Ikungaania inkungulo na kiyiviikha mu fihenje fyakwe, uluganulo lwakwe uwuumi wa shiluta. Ndeeno, umuvyalaaji nu mukungulaaji woona vakhashendeeva. 37 Kuna lulogolo lumonga lwijova ndeeni, ‘Umuunu yumonga ivyala imbeyu, uyunji ikungula.’ Ululogolo ulo, lwa shiyooli. 38 One navafilikhaga omwe, mulute kikungula fina musikhavyalile. Avaanu avanji vatalaga kisenga insengo inkhamu mandu, leelo omwe mwipata inkungulo, kwa kiiva ya nsengo yaanave.”

AVasamaliya vikimuhuviilila uYeesu

39 AVasamaliya vinshi ava ku lijumbi ilya Sikaali, vamuhuviilila uYeesu, kwa kiiva vapulikhaga gina uwashimaayi yula wávajovelaga kiija, “Umuunu uyo wánijovela goona gina niwaahile kigasenga.” 40 AVasamaliya vala vaafikha pina akhandi akwali uYeesu, vamulomba mandu kiija akhale nawo. Baheene wáakhala mu lijumbi ilyo, nsiku sivili. 41 Mu luhaavi ulo, avaanu vinshi mandu vamuhuviilila uYeesu, kwa kiiva ya gina akhandi ilogola. 42 Vamujovela uwashimaayi yula vaajova, “Mbakha lino, tamuhuviilila umuunu uyu kwa kiiva ya gala hela gina watujovela. Leelo lino, tikwiliile kimuhuviilila mandu, kiiva tapulikha yuuse, gina ilogola. Khanji taamanya kiija umuunu uyu, shiyooli Mukulusaaji wa nyi.”

UYeesu ikimuponia umwana wa mukhome wa vasulukhali

(Mataayo 8:5-13; Luuka 7:1-10)

43 Saganaga kishila nsiku sivili, uYeesu wáwuukha ku lijumbi lya Sikaali, wáaluta ku nyi ya Galilaya. 44 UYeesu akhandi avajoveele avamanyisiwa vaakwe kiija, umukuwamalago asitiilwa ku nyi yaakwe. 45 Avaanu ava ku Galilaya vamuposheelaga wunofu, kiiva woope vakhandi ku Yelusalemu ku shiwungo sha Pasaakha, na woope vakhandi vagaajile goona gina uYeesu wágasengaga.

46 Baheene uYeesu wáaluta khanji ku lujinji lwa Kana, luna lukhandi ku nyi ya Galilaya. Mu lujinji ulo mumwene muna wásetulaga amalenga gaava divaayi. Akhandi akwali umukhome wa vasulukhali yumonga wa selekhaali ku lijumbi lya Kapelinawumu, yuna umuswamuve wáali mutamu. 47 Umukhome uyo, akhandi apuliishe kiija uYeesu wáyinsa ku Galilaya, kihuma ku nyi ya Yudeya. Wáaluta kwa Yeesu na kimulomba mandu kiija, alute ku lijumbi lya Kapelinawumu kimuponia umwanaakwe, yuna akhandi nkholeela kiifwa. 48 UYeesu wámugomosesa umukhome yula wáaja, “Mwe vaanu omwe, wuli, musikwiliile kinihuviilila nda musifyajile ifimanyilo na mabikha amakhome?” 49 Umukhome uyo wámugomosesa wáaja, “Wee mutwa, nikikulomba tilute umuponie umwanangu, pina ashaanali asinaafwe.” 50 Leelo uYeesu wámugomosesa wáaja, “Wuyaga kunyeenyu, umwanaakho wáapona.” Umukhome uyo wágahuviilila amaswi ga Yeesu, wáawuya kunyaakwe.

51 Umukhome wa vasulukhali yula pina ali mu nsila iiwuya, wátangaana na vavanda vaakwe. Vamujovela vaajova, “Umwanaakho wáapona, muumi hela.” 52 Baaho wávaposa wáaja, “Wáapona kiyansisa yooli?” Aveene vamugomosesa vaajova, “Wáponaga kiyansisa imihe paminsi, mu lisala lya fungati.” 53 Baheene uwiihe wa mudiimi yula wáamanya kiija, wáponaga kiyansisa uluhaavi lulula luna uYeesu wájovaga kiija, “Umwanaakho wáapona.” Baheene umukhome yula na vaanu va mu nanda yaakwe, vamuhuviilila uYeesu. 54 Ishi shikhandi shimanyilo sha wuvili shina uYeesu wágahaga, pina atinile ku Galilaya, kihuma ku Yudeya.