Luuka 8

Avashimaayi vina vikimutanjilisa uYeesu

1 Kuunyuma uYeesu akhandi iishila mu majumbi amakhome na manangʼana, iikhoma iMola iNofu iya Wutwa wa Nguluvi. Akhandi lumo na vamanyisiwa vaakwe ishumi na vavili. 2 Khanji akhandi lumo na vashimaayi vamonga vina wávaponiaga amatamu gaanave, na vina wávahumiise amalungu. Mu vashimaayi awo akhandi akwali uMaliya uwa ku Magidala, yuna uYeesu wámuhumiise amalungu fungati. 3 Woope uYowana umudala wa Kuusa, akhandi akwali. UKuusa uyo, wáali muyangalilaaji wa fiinu fya Helode. Khanji, akhandi akwali uSusana na vashimaayi avanji vinshi. Avashimaayi ava vakhandi viihumya ifiinu fyanave ifya kimusunga uYeesu na vamanyisiwa vaakwe.

Ishihwano isha munyansa mbeyu

(Mataayo 13:1-9; Maluko 4:1-9)

4 Ilijuva limonga avaanu vinshi kihuma mu majumbi minshi, vakungaanile kwa Yeesu. Apo uYeesu wávajovela mu shihwano, wáaja, 5 “Umulimaaji yumonga wálutile kinyansa imbeyu. Pina wáali inyansaga imbeyu, isinji sagwiliile pa nsila, inyuni sayinsa sayilya. 6 Isinji sagwiliile pa shivakwe. Pina saamela sayansa kikula, leelo sayuuma, kwa kiiva pagaya wiigu. 7 Isinji sagwiliile mu mapishi ga mimfwa, pina samelile lumo na mimfwa saminyilisiiwe. 8 Isinji sagwiliile pa lilongo ilinofu, saamela na kikula. Saakhoma wunofu mandu, shila shimelo mbumbulu ligana.”

UYeesu pina wáamala kilogola ilyo, wákhoosa ishawuti wáaja, “Umuunu yoyoona umunya makutu, apulishe!”

UYeesu iganula ishihwano sha munyansa mbeyu

(Mataayo 13:10-23; Maluko 4:10-20)

9 Avamanyisiwa va Yeesu vamuposa vaaja, “Ishihwano ishi uluganulo lwakwe shishi?” 10 Wávayankha wáaja, “Omwe mupeliilwe kimanya imbuusa isa Wutwa wa Nguluvi. Leelo avanji vijovelwa imola soona kwa fihwano kiija,

‘Valoleele gina nikigasenga, leelo vasikhagaaga.

Vipulikha gina nilogola, leelo vasikhagamanyaga.’

11 “Lino, ishihwano ishi uluganulo lwakwe ndeeni, imbeyu Liswi lya Nguluvi. 12 Imbeyu sina sagwiliile mu nsila, sihwananisiwa na vaanu vina vipulikha iLiswi lya Nguluvi, leelo luhaavi luulo, uShetaani iyinsa kiliwuusa iLiswi ilyo mu numbula saanave, kiija vasilaave vahuviilile na kikulukha. 13 Imbeyu sina sagwiliile pa shivakwe, sihwananisiwa na vaanu vina vipulikha iLiswi lya Nguluvi, baaho vikiliposheela kwa wushendeefu, leelo vasikiliviikha mu numbula. Ava vihuviilila luhaavi lufupi, nda vajelwe vikililekha ilihuuvi. 14 Imbeyu sina sagwiliile pa mimfwa, sihwananisiwa na vaanu vina vipulikha iLiswi lya Nguluvi, leelo paanyuma mu wiikhasi waanave, umuninu, uwusi, nu wupafu wa kiyishendeefya mu fiinu fya mu nyi, fikivaminyiilisa. Ilyo likivagaha vapootwe kikhoma amakhomo. 15 Leelo imbeyu sina sagwiliile pa lilongo ilinofu, sihwananisiwa na vaanu vina vipulikha iLiswi, viyinatila kwa numbula nofu na kwa kitiila, khanji viikhoma amakhomo kwa kigugumila mu malava goona.

Goona gasiive pa wuvalafu

(Maluko 4:21-25)

16 “Akwasiina umuunu yuna ikunga ulumuli na kigubikha ni shiinu shimonga, na kiviikha mu lifungu. Leelo, iviikha pa liwumbila kiija avaanu pina vihuluta, valwaje ulumuli lwakwe. 17 Shoshoona shina shifihiilwe shikhafumbulwa, khanji imbuusa yoyoona yikhamanyikha na kiwonekha, shiyooli fikhava bahawuvalafu.

18 “Lino, munipuliise wunofu! Kiiva umuunu yoyoona yuna iimanya gina nilogola, uNguluvi asimupeele kimanya mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo, akhapokhwa.”

Unyina na valukholo lwakwe uYeesu

(Mataayo 12:46-50; Maluko 3:31-35)

19 Baheene umaayi wa Yeesu na valukholo lwakwe, vaaluta kwa Yeesu. Leelo vapootwa kivejeela pamwene kwa kiiva avaanu vakhandi vinshi mandu. 20 Avanji vamujovela uYeesu kiija, “Umaayi waakho na valukholo lwakho vali panja vikikusakula.” 21 UYeesu wávayankha wáaja, “Avaanu woona vina vipulikha iLiswi lya Nguluvi na kigaha ngaja shina limanyisa, awo vava maayi na valukholo lwangu.”

UYeesu ivatamya ilipepo ilikhome na mavingu

(Mataayo 8:23-27; Maluko 4:35-41)

22 Ilijuva limonga, uYeesu na vamanyisiwa vaakwe vayangeele mu shipugo shikhome, wávajovela, “Tilowoshe ku mwambwa yila iya lilamba ilikhome ilya Galilaya.” Baheene, vayansa kilowokha. 23 Pina vilowokha, uYeesu wáagona utulo. Ilipepo ilikhome lyayansa kipuga na kiviikha amavingu makhome mu lilamba. Amalenga gayansa kimema mu shipugo, woope vakhasheele vafwe.

24 Baheene avamanyisiwa vaaluta kwa Yeesu, vamulamusa, vaaja, “Wee Mutwa, Mutwa! Tiifwa!” UYeesu wálamukha, wálikhajila ilipepo na mavingu, fyavatama, kwava tototo! 25 Baheene uYeesu wávaposa wáaja, “Ilihuuvi lyenyu lili kwi?” Avamanyisiwa vaswigaga na kitiila kuno viposania veene viija, “Uyu yu naani yuna nda akhajile ilipepo ilikhome na mavingu, fyona fikimutiila?”

UYeesu iiponia umunya malungu

(Mataayo 8:28-34; Maluko 5:1-20)

26 UYeesu na vamanyisiwa vaakwe, valowokha ililamba ilikhome ilya Galilaya, vaafikha ku mwambwa ku nyi ya Vagelaasi. 27 UYeesu wáganaga kihuma mu shipugo, umuunu yumonga wa lijumbi lila wáaluta kwa mwene.

Umuunu uyo akhandi na malungu. Nsiku nyinshi akhandi ijenda bwinda, khanji akhandi asiikhala kukhaaya yaakwe, leelo akhandi iikhala ku majooja. 28-29 Amalungu ago gamulafyaga mandu. Wiila avaanu vakhandi vikimudindila mukhati na kimupinya kwa manyololo ni pingo kiija vamuyangalile. Leelo wiila akhandi idumulanga, baheene amalungu gakhandi gikimutwala mu lunyikha.

Umuunu yula wáganaga kifikha kwa Yeesu, uYeesu wágakhajila amalungu gala, kiija gamuhume. Umuunu yula pina ikimuloleela uYeesu, wákhoola mandu. Wáagwa pa Yeesu wáajova kwa shawuti, “Wee Yeesu, Lusawo lwa Nguluvi uMukhome, wisakula shi kunyangu? Nikikulomba mandu, usikhanilafyaga.”

30 UYeesu wámuposa wáaja, “Ilitaawa lyakho yuuwe naani?” Wámugomosesa wáaja, “Ilitaawa lyangu yuune Legiyoni.” Kwa kiiva amalungu gakhandi minshi kunyaakwe. 31 Amalungu gala, gamulombile uYeesu kiija, asikhagatwalaga ku lilindi ilikhome ilya malungu.

32 Uluhaavi ulo palubali pa shidunda pakhandi pana shidiimilo shikhome sha ngubi, shidiimwa. Amalungu gala gamubembelesa uYeesu kiija, agatawule gayinjile mu ngubi sila. Baheene wágatawula. 33 Gamupoola umuunu yula, gayinjila mu ngubi. Baheene ingubi soona sayiikha luvilo ku munjeema, sagwila mu lilamba ilikhome na kiifwa.

34 Avadimaaji va ngubi sila vaganaga kigaaga ago, vasijile luvilo, vaaluta kiyalaalisa imola mu lijumbi na mu njinji, goona gina vakhagaweene. 35 Avaanu vina vakhapuliishe valutaga kiloleela lina lyasenjekha. Vaganaga kifikha pina akhandi akwali uYeesu, vamwaga umuunu yuna wáhumisiwaagwa amalungu, akheele pansi nkholeela nu Yeesu, afwalile amenda, khanji ana luhala loona. Baheene avaanu awo vatiilile mandu. 36 Avaanu vala vina vakhagabedeele gina gasenjekhaga, vavataviliilaga avanji shina wáponisiwaagwa umunya malungu yula. 37 Avaanu va lilugu ilyo, vina vakhandi vakungaanile kihuma imbali iso isa nyi ya Vagelaasi, vatiilaga. Baheene vamulomba uYeesu awuushe kuveene. UYeesu wáyinjila mu shipugo, wáwuukha.

38 UYeesu pina akhandi iwuukha, umuunu yula yuna wáhumisiwaagwa amalungu, wámulomba uYeesu kiija valutaniaje na kiiva lumo. Leelo uYeesu asikhamuyitiishe, wámujova, 39 “Uwuyaje kukhaaya yaakho, uvataviilile goona gina uNguluvi wákusenjela.” Baheene umuunu yula wáwuukha pala, wáawuya kukhaaya. Ukho, ku lijumbi lyona, wáyalaalisa goona gina wámusenjelaga uYeesu.

UYeesu ikimuponia uwashimaayi na kimufyusa umuhinja

(Mataayo 9:18-26; Maluko 5:21-43)

40 UYeesu pina wáatina imwambwa iyinji ya lilamba ilikhome, ishipuga sha vaanu shamuposheela kwa wushendeefu, kwa kiiva vakhandi vamuheepile. 41 Apo, baheene wáyinsa umuyimililaaji yumonga uwa nanda iya kifuunyila, yuna akhandi itambulwa Yayilo. Wáfugama pamwandi ya Yeesu, wámulomba kiija alute kukhaaya yaakwe, 42 kwa kiiva umwali waakwe uwa maakha ishumi na gavili, yuna akhandi mwene duguli kwa wiihe, akhandi mutamu mandu ali nkholeela kiifwa.

Baheene uYeesu wáava iiluta kukhaaya kwa Yayilo. Pina akhandi mu nsila, avaanu vinshi vina vakhandi lumo nu mwene, vaava vikimuminyiilisa. 43 Mu shipuga shila, akhandi akwali uwashimaayi, yuna akhandi nu wutamu wa kihuma idanda kwa maakha ishumi na gavili. [Khanji wámalile uwusi waakwe woona kivahomba avahusi] leelo kusiina yuna wámuponiise.

44 Baheene uwashimaayi yula wámufwata uYeesu kunyuma, wálupyasa ulupembo lwa mutote gwakwe, baaho wáapona uwutamu waakwe. 45 UYeesu wáaposa, “Yu naani yuna wánipyasa?” Avaanu woona vakhaana. Baheene uPetulo wámujovela uYeesu wáaja, “Wee Mutwa weesu, avaanu vinshi mandu vakupiliime, khanji vakuminyiliise!” 46 Leelo uYeesu wáajova, “Akwali umuunu yuna wánipyasa, kwa kiiva mukhati yangu, nikiyiwona kiija ingufu isa kiponia umuunu sanipoola.” 47 Uwashimaayi yula pina wáweene kiija uYeesu wámumanya, wáaluta kuno itetema. Wáfugama pamwandi yaakwe, wámujovela pa vaanu woona shina shamugaha amupyase uYeesu na shina shamuponia nyangu. 48 UYeesu wámujovela wáaja, “Mwali wangu, wahuviilila, lulwene waapona. Ulutaje kwa wulindamafu!”

49 UYeesu pina wáali apilogola, wáyinsa umuunu ahumile ku nanda ya Yayilo, umuyimililaaji wa nanda iya kifuunyila. Wámujovela uYayilo, “Nilomba uleshe kimulafya uMumanyisaaji, kwa kiiva umwali waakho wáafwa.” 50 Leelo uYeesu wáganaga kipulikha ago, wámujovela uYayilo wáaja, “Usikhatiilaga, nihuvililaga hela. Umwali waakho asiipone.”

51 UYeesu wáganaga kifikha kukhaaya kwa Yayilo, wávakhaana avaanu avanji kiyinjila lumo nu mwene, leelo vayinjila nu Petulo, uYohana, uYaakobo, uwiihe nu maayi wa muhinja yula.

52 Avaanu woona vina vakhandi vakwali pala, vaava vikhoola. UYeesu wávajovela wáaja, “Musikhakhoolaji! Umuhinja uyu asifwile, leelo agonile tulo hela.” 53 Avaanu vala vaganile kipulikha ndeeno, vamuheshile uYeesu, kwa kiiva vakhandi vameenye kiija umuhinja yula afwile.

54 Leelo umwene wámukhata iliwokho umuhinja yula, wámushemeela kwa shawuti wáaja, “Mwali wangu wee, lamukha!” 55 Uluhaavi luulo, umwana yula, uwuumi waakwe wamugomoshela, wáyiima. UYeesu wáajova vamupeele ishakiilya. 56 Avasafi vaakwe vaswigaga mandu. Leelo uYeesu wávalajisa kiija, vasikhamutavililaga umuunu yoyoona aga gina gasenjekha.