Mataayo 9

UYeesu munya wutawulilwa wa kisaajila uwunansi

(Maluko 2:1-12; Luuka 5:17-26)

1 UYeesu wáyinjiile mu shipugo, wálowokha khanji ililamba ilikhome ilya Galilaya, wáatina mu lijumbi lyakwe ilya Kapelinawumu. 2 Baheene avaanu vamonga vayinsaga kwa Yeesu, vamusumwile pa lupaasa umuunu yuna atengelemwishe umuvili. UYeesu pina wályajile ilihuuvi lyanave, wámujovile umutamu yula, “Wee lusawo lwangu, jimfyaga inumbula! Wasaajilwa uwunansi waakho.” 3 Baheene avaanu vamonga mu vamanyisaaji va ndaji sa Musa vina vakhandi vakwali pala, vahiiva vaajova, “Loleela umuunu uyu ikimutofola uNguluvi!” 4 Leelo uYeesu wámanyaga goona gina vakhandi vihiiva, wávaposa wáaja, “Kwashi muhiiva imbi mu numbula seenyu? 5 Lino! Lili kwi lina lipeefu? Kimujova kiija, ‘Wasaajilwa uwunansi waakho,’ awu kiija, ‘Yiima, ujende’? 6 Lino mumanye kiija, one Lusawo lwa Muunu nitawuliilwe uwutawulilwa uwa kisaajila avaanu uwunansi mu nyi muno.” Baheene wámujovela umunya kitengelemukha umuvili, “Yiima! Yitwikha umushekha gwakho, ulutaje kukhaaya yaakho.” 7 Baheene umuunu yula wáyiinukha, wáawuya kukhaaya. 8 Ishipuga ishikhome isha vaanu vina vakhandi pala vaganile kigaaga ago, vatiilaga mandu. Vamusufya uNguluvi yuna wávapeelaga avaanu uwutawulilwa ngaja uwo.

UYeesu ikimushemeela uMataayo ave mumanyisiwa waakwe

(Maluko 2:13-17; Luuka 5:27-32)

9 UYeesu wáganaga kiwuukha pala, wátangaanaga nu mutofya khoodi yumonga, ilitaawa lyakwe yu Mataayo, akheele mu nanda muna akhandi itofesa ikhoodi. UYeesu wámujovela wáaja, “Nifwataga.” UMataayo wáyiima, wáyansa kimufwata. 10 Baheene uYeesu wálutile kiilya ishakiilya kwa Mataayo. Pina vali mukhati mu nanda yila, vayinjila avatofya khoodi vinshi na vanya wunansi vinshi, vaakhala kiilya lumo nu Yeesu na vamanyisiwa vaakwe. 11 AVafalisaayo vaganile kigaaga ago, vavaposaaga avamanyisiwa vaakwe vala vaajova, “Kwashi uMumanyisaaji weenyu iilya lumo na vatofya khoodi na vanya wunansi?” 12 UYeesu wáganile kipulikha ago wávajovela wáaja, “Avaanu vina vasili vatamu vasikimusakula umuhusi, leelo avatamu vaveene vina vikimusakula umuhusi! 13 Ndeeno lutaji muyimanyise uluganulo lwa maswi mu Mayandikhwa aManofu gina giijova, ‘Nisakula ulusungu kulikho isadaakha.’ Kwa kiiva nisiyinsile kivashemeela avaanu vina vikiyiwona kiija vagolofu pa Nguluvi, leelo niyinsile kivashemeela avaanu vina vikiyiwona kiija vanansi.”

Iliposo ilya kilekha kiilya

(Maluko 2:18-22; Luuka 5:33-39)

14 Baheene avamanyisiwa va Yohana uMutwiniaji vaaluta kwa Yeesu, vamuposa vaajova, “Ose na Vafalisaayo tiilekha kiilya kwa kiiva ya kifuunya. Kwashi avamanyisiwa vaakho vasiilekha kiilya ishakiilya?” 15 Umwene uYeesu wávagomosesa wáaja, “Vina vayaniilwe ku shiwungo sha noolana, vakwiliile wuli kisugumilwa, pina vali nu munya shiwungo? Leelo, sikhayinsa insiku sina vakhamuwuusa umunya shiwungo, baheene vakhalekha kiilya. 16 Kusiina umuunu yuna itoola ishilakha ishipya na kihona mu mwenda umukuulu, nda agahe ndeeno ishilakha isho shisideemule umwenda umukuulu ugo. 17 Khanji, kusiina umuunu yuna iviikha idivaayi imya mu fiiwo ifikuulu. Kiiva nda agahe ndeeno, ifiiwo fideemukha, idivaayi yikunukha na ifiiwo finanjikha. Leelo, avaanu viviikha idivaayi imya mu fiiwo ifipya. Baheene fyona fivili fiiva finofu!”

UYeesu ikimuponia uwashimaayi na kimufyusa umuhinja

(Maluko 5:21-43; Luuka 8:40-56)

18 UYeesu pina ashaanali ilogola na vaanu vala, baaho, wáyinsile umuyimililaaji yumonga uwa nanda iya kifuunyila, wáfugama pamwandi ya Yeesu, wámujovela wáaja, “Umwali wangu afwile lilino ndeeni. Leelo nilomba ulute umuviishile amawokho gaakho, umuponie ave muumi khanji.” 19 Baheene uYeesu wáwuukha lumo na vamanyisiwa vaakwe, vamufwata umuyimililaaji yula. 20 Loleela, mu luhaavi lulula uwashimaayi yumonga yuna akhandi nu wutamu wa kihuma idanda kwa maakha ishumi na gavili, wámufwatile uYeesu kunyuma, wálupyasa ulupembo lwa mutote gwakwe. 21 Wáhiivile kiija, “Nda nipyase umutote gwakwe hela, nisiipone.” 22 Wáganile kipyasa hela, baaho uYeesu wáseetukha wáloleela kunyuma, wámwaga uwashimaayi yula, wámujova wáaja, “Wee mwali wangu, jimfyaga inumbula. Kiiva wahuviilila, lulwene waapona!” Baaho, uwashimaayi yula wáapona.

23 UYeesu wáganile kifikha mu nanda ya muyimililaaji yula, wávaajile avatova mbaasi sa fivembo lumo na vaanu vinshi, vikhoola ishivembo. 24 UYeesu wávajovelaga wáaja, “Muwuushe panu! Umuhinja uyu afwile, leelo imfwa yaakwe yili ngaja agonile hela!” Avaanu vala vaganile kipulikha ndeeno, vamuheshile uYeesu. 25 Baheene wávahumya panja, wáyinjila mukhati kumwandi, wámukhata iliwokho umuhinja yula, woope wáyiima. 26 Imola iso sayalaliile mu nyi yila yoona.

UYeesu iiponia avapofu vavili

27 UYeesu wáganile kiwuukha pala, avapofu vavili vamufwataga, vashemeela kwa ngufu viijova, “Wee Lusawo lwa mutwa uDawudi, utusungupile!” 28 UYeesu wáganaga kiyinjila mu nanda, avapofu vala vamulutila mumula. Baheene wávaposa wáaja, “Wuli, muhuviilila kiija nikwiliile kivaponia?” Vamugomosesa vaajova, “Eena, Mutwa! Tihuviilila.” 29 Baheene uYeesu wávapyasa ameeho gaanave, wávajovela wáaja, “Gasenjeshe kunyeenyu ngaja shina muhuviilila.” 30 Baaho ameeho gaanave gaava giloleela. UYeesu wávasimila mandu wáaja, “Musikhamujovelaji umuunu yoyoona imola isi!” 31 Hata ndeeno, vaaluta vayalaalisa imola saakwe mu nyi yila yoona.

UYeesu ikimuponia umbwibwi

32 Avaanu awo pina valiyiwuukha pala, avaanu avanji vamuleeta kwa Yeesu umuunu yuna akhandi ana lilungu lina limugahile kiiva mbwibwi. 33 UYeesu wálidaga ililungu lila, baaho umuunu yula wáyansa kilogola. Avaanu vina vakhandi vakwali pala vaswigaga mandu, vaajova, “Mu nyi yoona iya Isilaheli gasinawonekhaje hata lisiku limo injowo ngaja iso!” 34 Leelo aVafalisaayo vaajova, “Ikigadaga amalungu kwa ngufu sa mukhome wa malungu!”

Avakungulaaji vasheefu

35 UYeesu akhandi ipilima pilima mu nyi yoona iya Galilaya. Akhandi iyinjila mu nanda saanave isa kifuunyila isa Vayahuudi, ikivamanyisa avaanu. Iikhoma iMola iNofu iya Wutwa wa Nguluvi na kivaponia avaanu amatamu gaanave goona. 36 Wáganaga kifyaga ifipuga fya vaanu, wávasungupilaga kwa kiiva vakhandi viilava. Vakhandi vangaya muunu uwa kivatanga, vakhandi ngaja nkholo sina singaya mudimaaji. 37 Baheene wávajovelaga avamanyisiwa vaakwe wáaja, “Mu mugunda muna nkungulo nkhome, leelo avakungulaaji vasheefu. 38 Lino, mufuunyaje kwa Nguluvi umunya mugunda, avafilishe avakungulaaji.”