Maluko 6

UYeesu ikhaanwa ku Nasaleti

(Mataayo 13:53-58; Luuka 4:16-30)

1 UYeesu na vamanyisiwa vaakwe vawuushile lumo, valutile ku lijumbi ilya Yeesu ilya ku Nasaleti. 2 Pina lyafishile ilijuva lya Sabaato, wáyansiise kimanyisa mu nanda iya kifuunyila. Avaanu vinshi vina vamupuliishe, vaswijile mandu amamanyiso gaakwe. Vaposeenie vaveene kiija, “Khaa! Wágaaga kwi amaswi aga? Ulumanyo ulu apeliilwe nu naani? Khanji wásaaga kwi ingufu isa kisenjela amabikha aga? 3 Wuli, uyu asili yuyula umuhongolaaji, ulusawo lwa Maliya, na vanangʼana vaakwe uYaakobo, uYoose, uYuuda nu Simoni? Avawulumbu vaakwe vasili vaveene tiikhala lumo baaha panyeesu?” Baheene vakhaana kimuhuviilila.

4 UYeesu wávajoveele wáaja, “Umukuwamalago itiilwa shila luvala, leelo ku nyi yaakwe, na ku valukholo lwakwe, na kukhaaya yaakwe asitiilwa.” 5 Asawuyile asenje amabikha minshi ukho, leelo wávavishiile amawokho avatamu vasheefu, woope vaponile. 6 Wáswijile mandu kiiva avaanu avanji vasamuhuviliile. Baheene uYeesu wáwuushile wájendile jendile mu majumbi aganji kivamanyisa avaanu.

UYeesu ikivafilikha avanandeje vaakwe kikhoma iLiswi lya Nguluvi

(Mataayo 10:5-15; Luuka 9:1-6)

7 UYeesu wávashemeelile avanandeje vaakwe ishumi na vavili, wáyansa kivafilikha vavili vavili, na kivapeela uwutawulilwa uwa kigadaga amalungu. 8 Baheene wávakhanyansiise wáaja, “Nikivatawula musumulaje nkwegu seene, leelo ndaali kisumula ishiinu shoshoona pina mushuula, wala shakiilya, wala mbukuli, wala hela. 9 Nikivatawula mufwalaje indaatu, leelo ndaali kisumula umwenda ugwa kiyanunkhania.” 10 Khanji wávajova wáaja, “Ilitembe lina musiyinjile, mukhalaje muumo mbakha pina muwuukha mu lijumbi ilyo. 11 Khanji pala pina vasikivasaajisa wala kivapuliisa, wuukhaji na kikungʼuuna amankundi gina gali mu nsayo sa magulu geenyu yive shimanyilo sha kihigwa kwa kiyikhaana iMola iNofu.”

12 Baheene avanandeje vaakwe vawuushile viiluta kikhoma kiija, avaanu valambiisile uwunansi waanave. 13 Khanji vadagaga amalungu minshi. Vakhandi vikivasusuuta amafuta avatamu vinshi, woope vakhandi viipona.

UYohana uMutwiniaji iibudwa

(Mataayo 14:1-12; Luuka 9:7-9)

14 Umutwa uHelode wápulikhaga imola sa Yeesu, kiiva ilitaawa lya Yeesu lyapulisikhaga imbali soona. Avaanu avanji vakhandi vapilogola, “UYohana uMutwiniaji wáfyukha kihuma kwa vina vafwile. Lulwene ana ngufu isa kisenga amabikha.” 15 Avanji vaajova, “Yu mukuwamalago uEliya.” Avanji vaajova, “Uyu mukuwamalago ngaja yuyuumo na vakuwamalago ava pawukuulu.” 16 Baheene uHelode wáganile kipulikha imola iso, wájovile, “Uyo yumwene uYohana, yuna namudumwile umutwe, wáfyukha!”

17-18 Isi mola sa Helode pina wámubudile uYohana. UHelode wámutoolile uHelodiya umudala wa munangʼana waakwe uFilipo. Baheene uYohana wámujovile uHelode kiija, “Mwikho kimutoola umudala wa munangʼana waakho uFilipo.” Baheene uHelode wáfiliishe avaanu vamukhate uYohana na kimudindila mu shifungo. 19 Baaho uHelodiya wámukhalaliile uYohana na kimutegama kiija amubude, leelo wágombolaga, 20 kiiva uHelode akhandi ikimudiima uYohana. Wámutiilaga uYohana kiiva uYohana akhandi mugolofu, akhandi munya numbula nofu. UHelode wálunduveele mandu pina akhandi ikimupuliisa uYohana, leelo akhandi apidobokha amupulisaaje.

21 Baheene uHelodiya wápatile imwenshe iya kimubuda uYohana. Ilisiku limonga uHelode wáali ni shiwungo isha kikumbukha kisawa kwa mwene. Wátelekhaga ishakiilya ishinofu, baheene wávashemeela avavaha vaakwe va livansa, avakhome va vayimililaaji va vasulukhali na vina vakhandi vilongosa mu nyi ya Galilaya. 22 Baheene wáyinjiile umwali wa Helodiya, wáneenile, wávashendefiise uHelode na vahensa vina vaali mula. Baheene umutwa uHelode wámujovile umuhinja yula wáaja, “Lomba ishiinu shoshoona shina wisakula, na yuune nisikupeele.” 23 Khanji wáyiyijile wáaja, “Shoshoona shina hambi ukinilomba nisikupeele, hata wuve uwutwa wangu hambi niigava paakhati ulubali lumonga nisikupeele.”

24 Umwali yula wálutile kimuposa umaayi waakwe kiija, “Nilombe shishi?” Umaayi waakwe wáaja, “Lomba umutwe gwa Yohana uMutwiniaji.” 25 Umuhinja yula wátinile nyangu nyangu kwa mutwa uHelode wálomba wáaja, “Nilomba umutwe gwa Yohana uMutwiniaji mu siniya.”

26 Umutwa uHelode wáganile kipulikha ago, wásugumilwagwa mandu. Leelo kiiva akhandi ayiyiijile pa vahensa woona vala, wágombwele kikhaana amalombo gaakwe. 27 Baaho umutwa uHelode wámufilikha umusulukhali aleete umutwe gwa Yohana. Umusulukhali wálutile mu shifungo, wámudumula uYohana umutwe. 28 Wáviikha umutwe gula mu siniya, wámupeela umuhinja yula, woope wámupeela umaayi waakwe. 29 Avamanyisiwa va Yohana uMutwiniaji, vaganile kipulikha imola iyo, valutile kigutoola umufimba na kigusiila mu lijooja.

UYeesu ikivaliisa avaanu magana mashumi gasaanu (5,000)

(Mataayo 14:13-21; Luuka 9:10-17; Yohana 6:1-14)

30 Vala avanandeje vatinile kwa Yeesu, vamutavililaga goona gina vagahaga na gina vamanyiise. 31 UYeesu na vamanyisiwa vaakwe, vakunyaga na kiiva nu luhaavi ulwa kiilya, kiiva avaanu vinshi vakhandi vipyanisania kiyinsa kwa Yeesu. Baheene uYeesu wávajova avamanyisiwa vaakwe wáaja, “Tilute apanji palubali tikhale tituuye padoodo.” 32 Baheene vayinjiile mu shipugo, viiluta palubali pina pangaya vaanu.

33 Leelo avaanu vinshi vavaajile pina viwuukha, vamanyaga kuna viiluta. Avaanu kihuma mu makhaaya goona valutile luvilo valongola kifikha. 34 UYeesu wáganile kiyiikha mu shipugo, wáshaajile ishipuga shikhome sha vaanu. Wávasungupilaga kwa kiiva vakhandi ngaja nkholo sina singaya mudimaaji. Baheene wáyansa kivawulanisa amaswi minshi.

35 Pashinyiijuva, avamanyisiwa vaakwe valutile kwa Yeesu vamujovela kiija, “Panu tikheele pa lunyikha patali na majumbi, khanji yiveele shaamihe. 36 Uvahwese avaanu, valute mu magunda gina gali nkholeela na mu njinji, vayigulilaje ifyakiilya.” 37 Baheene uYeesu wávajovela wáaja, “Omwe muvapeele yuumwe ishakiilya.” Vaaposa kiija, “Wuli! Titoole kwi ihela isa mahombo ga nsiku magana gavili (200), tilute tigule ishakiilya na tivapeele?” 38 Wávaposiise wáaja, “Muna makhaate galinga? Mulute muloleele.” Vaganaga kimanya vamujovela kiija, “Tina makhaate gasaanu ni nswi sivili.”

39 UYeesu wávalajisa avamanyisiwa vaakwe kiija, vajoveli avaanu woona vakhale fipuga fipuga pa lisole iliigu. 40 Woope vaakhala fipuga fipuga, panu ligana, panu mashumi gasaanu. 41 UYeesu wátoola amakhaate gala gasaanu ni nswi sila sivili wáloleela kushaanya, wámuhonjesa uNguluvi. Wámenyulania amakhaate, wávapeela avamanyisiwa vaakwe, kiija vavagavile avaanu. Inswi sivili sila, soope wávagavila woona. 42 Avaanu woona vaalya, vayikuta. 43 Avamanyisiwa vaakwe vakungaania amamenyulanie ni nswi, fyamema matunduti ishumi na gavili. 44 Avaanu woona vina valiisaga vaali vinshi, avagoosi veene duguli vaali magana mashumi gasaanu (5,000).

UYeesu ijenda pashaanya pa malenga

(Mataayo 14:22-33; Yohana 6:16-21)

45 Baaho uYeesu wávalajisa avamanyisiwa vaakwe, vayinjile mu shipugo, valongole kiluta ku mwambwa ya lilamba ilikhome ilya Galilaya, ku lijumbi lya Betisayida. Uluhaavi ulo umwene akhandi ikishihwesa ishipuga sha vaanu. 46 Wáganile kimala kivahwesa avaanu, wálutile ku shidunda kifuunya.

47 Pina shikhandi shaamihe, ishipugo shaali paakhati pa lilamba ilikhome, uYeesu wáali mwene duguli kunja ku nyi inyuumu. 48 Wávaajile avamanyisiwa vaakwe vigombola kikholojela ishipugo, kiiva ilipepo likhandi likivatinia kunyuma. Kwali kusinahenje kunena, uYeesu wáyansa kijenda pashaanya pa malenga iiluta ku vamanyisiwa vaakwe, ngaja ishilanisa. 49 Vaganile kimwaga ijenda pashaanya pa malenga vahiivile kiija linguluvi, valyovile ilyowo, 50 kiiva woona vamwagaga vatiilaga mandu. Baaho uYeesu wávajovela wáaja, “Jimfyaji inumbula, yuune, musikhatiilaji!” 51 Baheene woope wáyinjila mu shipugo muna vakhandi vakwali, nali lipepo lyavatama, vaswijile mandu. 52 Vasikhameenye amabikha ga makhaate, kiiva inumbula saanave sikhandi nyuumu.

UYeesu iiponia avatamu mu Genesaleti

(Mataayo 14:34-36)

53 Vaganile kilowokha mu lilamba ilikhome ilya Galilaya, vafishile mu nyi ya Genesaleti, vayiimya ishipugo pa lilowokho. 54 Vaganile kihuma mu shipugo, baaho avaanu vamanyaga kiija yu Yeesu. 55 Valutile viisiga shila luvala lwa mu nyi yila yoona, vayansa kivatoola avatamu na kivasumula mu lupaasa, na kivatwala kuna vipulikha kiija uYeesu akwali. 56 Shila luvala uYeesu luna akhandi iita, mu njinji indoodo, mu majumbi amavaha, na mu magunda, avaanu vavaviishile avatamu vaanave pa munaada. Vamulombile uYeesu kiija avatawule avatamu vapyase ulupembo lwa mwenda gwakwe hela. Baheene avatamu woona vina vapyasaaga vaponaga.