Mataayo 14

UYohana uMutwiniaji iibudwa

(Maluko 6:14-29; Luuka 9:7-9)

1 Mu luhaavi lula umutwa uHelode uwa ku Galilaya, wápulikhaga gina uYeesu akhandi iigaha. 2 Baheene wávajovelaga avavanda vaakwe wáaja, “Uyo yu Yohana uMutwiniaji, yuna wáfyukha kihuma kwa vina vafwile. Lulwene ana ngufu isa kisenga amabikha.”

3-4 Isi mola sa Helode, pina wámubudile uYohana. UHelode wámutoolile uHelodiya, umudala wa munangʼana waakwe uFilipo. Baheene uYohana wámujovile uHelode kiija, “Mwikho kimutoola umudala wa munangʼana waakho uFilipo.” Baheene uHelode, wáfiliishe avaanu vamukhate uYohana na kimudindila mu shifungo. 5 Lino uHelode akhandi isakula insila ya kimubuda uYohana, leelo wávatiilaga avaanu, kwa kiiva vakhandi vihuviilila kiija uYohana Mutwiniaji yumwene mukuwamalago.

6 Lyaganile kifikha ilijuva lya shiwungo sha kikumbukha kisawa umutwa uHelode, umwali wa Helodiya wáneenile pa vahensa va Helode. 7 Wáganaga kineena, uHelode wáshendeevaga mandu. Wáyiyiiga kwa muhinja yula shoshoona shina hambi ilomba asimupeele. 8 Umuhinja yula wáhonsewaagwa nu maayi waakwe, wámujovela uHelode wáaja, “Nipeela umutwe gwa Yohana uMutwiniaji mu siniya.” 9 Umutwa uHelode wáganile kipulikha ago, wásugumilwagwa mandu. Leelo kiiva akhandi ayiyiijile pa vahensa woona vala, wálajisa kiija umuhinja yula apeelwe. 10 Baheene uHelode wámufiliishe umuunu kiluta kimudumula uYohana umutwe mu shifungo. 11 Umuunu yula wáyinsile nu mutwe gwa Yohana mu siniya, wámupeela umuhinja yula, woope wámupeela umaayi waakwe. 12 Kuwudugo, avamanyisiwa va Yohana uMutwiniaji vaaluta kigutoola umufimba na kigusiila mu lijooja. Baheene vaaluta kimujovela uYeesu goona gina gasenjekhaga.

UYeesu ikivaliisa avaanu magana mashumi gasaanu (5,000)

(Maluko 6:30-44; Luuka 9:10-17; Yohana 6:1-14)

13 UYeesu wáganaga kipulikha goona ago, wáwuushile pala kwa shipugo, wáaluta palubali pina pangaya vaanu. Leelo avaanu vaganile kipulikha, vajendile kwa magulu kihuma mu majumbi, vamufwata kuna akhandi akwali uYeesu. 14 Wáganile kiyiikha mu shipugo, wáshaajile ishipuga shikhome sha vaanu, wávasungupila na kivaponia avatamu vaanave.

15 Pashinyiijuva, avamanyisiwa vaakwe valutile kwa Yeesu vamujovela kiija, “Panu tikheele pa lunyikha patali na majumbi, khanji yiveele shaamihe. Uvahwese avaanu valute kigula ifyakiilya mu njinji.” 16 UYeesu wávayankha wáaja, “Vasisakulwa kiluta. Muvapeele yuumwe ishakiilya.” 17 Aveene vamuyankha vaajova, “Tina makhaate gasaanu hela, ni nswi sivili.” 18 UYeesu wávajovelaga wáaja, “Nileeteli panu.” 19 Baheene wávalajisa avaanu vala kiija vakhale pansi pa masole. Wátoola amakhaate gala gasaanu ni nswi sivili sila, wáloleela kushaanya, wámuhonjesa uNguluvi. Baheene wámenyulania amakhaate gala, wávapeela avamanyisiwa vaakwe, woope vavapeela avaanu. 20 Avaanu woona vaalya, vayikuta. Avamanyisiwa vaakwe vakungaania amamenyulanie, gaamema matunduti ishumi na gavili. 21 Avaanu woona vina valiisaga vaali vinshi, avagoosi veene duguli vaali magana mashumi gasaanu (5,000).

UYeesu ijenda pashaanya pa malenga

(Maluko 6:45-52; Yohana 6:16-21)

22 Baaho uYeesu wávalajisa avamanyisiwa vaakwe, vayinjile mu shipugo, valongole kiluta ku mwambwa ya lilamba ilikhome ilya Galilaya. Uluhaavi ulo umwene akhandi ikishihwesa ishipuga sha vaanu. 23 Wáganile kishihwesa, baheene wátaana mwene duguli ku shidunda uluvala lwa shipata, kiija afuunye kwa Nguluvi. Pina yaafikha shaamihe, akhandi ashaanali ali ku shidunda mwene duguli. 24 Uluhaavi ulo ishipugo shikhandi shifishile paakhati ya lilamba, leelo ilipepo likhandi likutukha mandu na mavingu gayansa kishitova ishipugo. 25 Kwali kusinahenje kunena, uYeesu wáyansa kijenda pashaanya pa malenga iiluta ku vamanyisiwa vaakwe. 26 Leelo avamanyisiwa vaakwe pina vamwajile uYeesu ijenda pashaanya pa malenga, vatiila mandu na kilyova vaajova, “Ili linguluvi!” 27 Baaho uYeesu wávajovela wáaja, “Jimfyaji inumbula, yuune, musikhatiilaji.” 28 UPetulo wámuyankha wáaja, “Wee Mutwa, shiyooli nda yuuwe, nijova nijende pashaanya pa malenga, niyinse kunyaakho.” 29 UYeesu wámugomosesa wáaja, “Yinsa.” Baheene uPetulo wáyiikha mu shipugo shila, wáyansa kijenda pashaanya pa malenga kiluta kwa Yeesu. 30 Leelo ilipepo ilikhome lyaganaga kikutukha na kimupuga, uPetulo wátiilaga mandu, wáyansa kijuda mu malenga. Baheene akhayansiise kilyova iijova, “Wee Mutwa, nikulusa!”

31 Baaho uYeesu wágolosa iliwokho, wámukhata, wámujovela wáaja, “Wee munya lihuuvi lidoodo, kwashi witungumala?” 32 UYeesu nu Petulo vaganaga kiyinjila mu shipugo, ilipepo lila lyavatama. 33 Baheene avamanyisiwa vina vakhandi mu shipugo, vamufuunya uYeesu vaajova, “Shiyooli, owe uli Lusawo lwa Nguluvi!”

UYeesu iiponia avatamu mu Genesaleti

(Maluko 6:53-56)

34 UYeesu na vamanyisiwa vaakwe vaganile kilowokha mu lilamba ilikhome ilya Galilaya, vafishile mu nyi ya Genesaleti. 35 Avaanu va mu nyi yila vaganaga kimanya kiija yu Yeesu, vayansa kiyalaalisa imola saakwe imbali soona. Baheene avaanu vayansa kivatwala avatamu woona kwa Yeesu. 36 Vamulomba uYeesu kiija, avatawule avatamu vapyase ulupembo lwa mwenda gwakwe hela. Baheene avatamu woona vina vapyasaaga, vaponaga.