Maluko 7

UYeesu ikigakhaana amamanyiso aga ngʼoma sa vambuya

(Mataayo 15:1-9)

1 Ilisiku limonga, aVafalisaayo na vamanyisaaji vamonga va ndaji sa Musa, vayinsile kihuma ku Yelusalemu. Vamukungaanila uYeesu. 2 Vavaajile avamanyisiwa va Yeesu vamonga viilya ishakiilya na mawokho maafu kiiva vasikhayiyojile. 3 AVafalisaayo na Vayahuudi woona, vakhaniilwe kiilya kuno vasiwuyiliile khanji kiyiyooga wunofu amawokho, shina yisakulwa mu ngʼoma ya vambuyaanave. 4 Khanji umuunu nda ahumile ku munaada asiyiitikhwa kiilya kuno asiyivaleese. Gakwali amaswi aganji gina vaposheelaga na kiyinatila gaali aga kiyoosa wunofu inkhonkholo ngaja ikhoomasi, shifugo nafi finji ifya kiliila.

5 Baheene aVafalisaayo na vamanyisaaji va ndaji sa Musa vamuposiise uYeesu kiija, “Kwashi avamanyisiwa vaakho vasiyinatila ingʼoma sina avambuyeesu vatuleshelaga, leelo viilya na mawokho maafu?” 6 UYeesu wájovile wáaja, “Muli vamyansi omwe! UIsaaya wálogwele ga shiyooli pina wákuwiilwe amalago kwa kiiva yeenyu. Wáyandiishe kiija,

‘UNguluvi iija,

“Avaanu ava vikinitiila kwa kilogola kwene hela,

leelo inumbula saanave sisikinihiiva one.

7 Woope vikinifuunya hela one,

khanji vimanyisa amamanyiso ga ndaji sa vaanu

na kiija ndaji sangu.”’

8 “Omwe musileshile indaji isa Nguluvi, musikheete ingʼoma sa vaanu.”

9 UYeesu wáali apikivajovaga, “Omwe mwidobokha kityega kwa wusugu indaji sa Nguluvi, baheene mupate kikwisa ingʼoma seenyu! 10 UMusa wávajoveele kiija, ‘Uvatiilaje uwiiho nu maayi waakho.’ Khanji wájovile, ‘Yoyoona yuna ikimuliga uwiihe awu umaayi waakwe, uyo wa kibudwa.’ 11 Leelo omwe mwijova kiija umuunu akwiliile kimujovela uwiihe awu umaayi waakwe kiija, ‘Ifiinu fina naava niija nikutanje owe, naahumya kwa Nguluvi.’ 12 Ndeeno, omwe mukimukhamiilisa umuunu aleshe kivatanga uwiihe awu umaayi waakwe. 13 Lulwene mwisala iLiswi lya Nguluvi kiiva ingʼoma sa mamanyiso gina muyanunkhana. Khanji mwisenga amaswi minshi ngaja ago.”

Ifiinu fina fikimushafula umuunu

(Mataayo 15:10-20)

14 UYeesu wáshemeelile khanji ishipuga sha vaanu wáshijovela wáaja, “Munipulisaaje woona, khanji mugamanyaje gina niijova. 15 Ishiinu shina shikimuyinjila umuunu kihuma kunja, shisikwiliile kimushafula. Leelo shina shiihuma mukhati mu numbula ya muunu, shisheene shikimushafula umuunu. [ 16 Umuunu umunya makutu ga kipulikha, apulishe.]”

17 UYeesu na vamanyisiwa vaakwe vashileshile ishipuga, vayinjila mu nanda yimonga. Baheene vamuposiise uluganulo ulwa shihwano shila. 18 UYeesu wávajovela wáaja, “Wuli, na yuumwe mushaanali musiimanya? Wuli, musimeenye kiija ishiinu shina iilya umuunu shisikwiliile kimushafula umuunu? 19 Umuunu pina iilya ishakiilya shisiiluta mu numbula leelo shiiluta mu wutumbu, baheene paanyuma shiihuma kunja.” UYeesu wáganile kilogola ndeeno wáyitiishe kiija ifyakiilya fyona finofu.

20 UYeesu wáyonjelesa wáaja, “Ishiinu shina shiihuma mu numbula, isho shisheene shina shikimushafula umuunu. 21 Kiiva mu numbula ya muunu mumwene muna giihuma amahiiva amavi, uwushemi, uwuhiiji, uwubudaaji, 22 uwaafu uwa kijenda na vadala va kunja, uwushooyo, amaleefi, uwujanjilisaaji, uwiifu, kitofola, uwuhonje nu wuyasu. 23 Uwunansi woona uwu wiihuma mukhati mu numbula ya muunu, gageene gina gikimushafula umuunu.”

Ilihuuvi ilya washimaayi yuna asili Muyahuudi

(Mataayo 15:21-28)

24 UYeesu wáwuukha pala, wáaluta ku mbali isa Tiilo ni Sidoni. Wáyinjila mu nanda yimonga, akhandi asidobweshe umuunu yoyoona amanye kiija akwali pala, leelo hata ndeeno avaanu vamanyaga. 25 Uwashimaayi yumonga yuna wáali nu mwali umunya lilungu, wápuliishe imola sa Yeesu. Baaho, wáyinsa wáfugama pa Yeesu. 26 Uwashimaayi yula yuna asili Muyahuudi, wahumile ku booma ya Foyinike mu nyi ya Siliya. Wámulomba uYeesu kiija, alidaje ililungu lina lili mwa mwali waakwe.

27 Baheene uYeesu wámujovile wáaja, “Uleshe tangusiina avaana valye vayikute, kiiva lusili lunofu kitoola ishakiilya sha vaana na kisitoosesa imbwa.” 28 Umwene wámuyanshile wáaja, “Shiyooli Mutwa, leelo nasi mbwa sina sili pansi pa meesa siilya fina avaana valageese pansi.” 29 UYeesu wámujovile wáaja, “Kiiva iliswi lina wáajova, wuyaga kukhaaya. Ililungu lyamuleshela umwaliwo.” 30 Uwashimaayi yula wáganile kifikha kukhaaya yaakwe, wámwajile umwali agonile pa wusaga, lila ililungu limuhumile.

UYeesu ikimuponia umuunu umbwibwi khanji mudinde

31 UYeesu wáwuukha uluvala ulwa ku Tiilo kishilila ku Sidoni, wáfishile ku lilamba ilikhome ilya Galilaya, mu booma ya Dekapoli. 32 Ukho vamuleteele umuunu umbwibwi, khanji mudinde amakutu. Vamulomba uYeesu kiija amuviishile amawokho, amuponie.

33 UYeesu wámubagwile umuunu yula mu shipuga sha vaanu, wáaluta nawo palubali. Wáfuunyila amata indole saakwe, wámupyasa ulumili wáyinjisa indole mu makutu. 34 Baheene wáloleelile kushaanya ku wulanga wátuuya kwa ngufu, wáaja, “Efata!” Uluganulo lwakwe, “Dindukha!” 35 Baaho amakutu gaakwe gadindukha na ulumili lwahogokha, baheene wáyansa kilogola wunofu.

36 UYeesu wávakhaanile kiija, musikhamujovelaji muunu sina wámusenjela. Pina wáshilile kivakhaana, baheene aveene vashilile kiyalaalisa imola iso ku vaanu woona. 37 Avaanu vaswigaga mandu vaajova, “Insengo sina isenga soona nofu mandu! Umwene avapeelile avadinde kipulikha na vambwibwi vilogola wunofu.”