Luuka 10

UYeesu ikivafilikha avamanyisiwa mashumi fungati na vavili

1 Kuunyuma, uMutwa uYeesu wáhagulaga avamanyisiwa avanji mashumi fungati na vavili. Baheene wávafilikha vavili vavili, valongole kiluta mu majumbi ni mbali soona sina akhandi agulumiile kiluta. 2 UYeesu wávajovela wáaja, “Mu mugunda muna nkungulo nkhome, leelo avakungulaaji vasheefu. Lino, mufuunyaje kwa Nguluvi umunya mugunda, avafilishe avakungulaaji. 3 Lino mulute, leelo mumanyaje wunofu kiija, nikivafilikha ngaja nyana nkholo sina sijenda paakhati naakhati ya mbwawa! 4 Musikhasumulaji ihela, wala mbukuli, wala ndaatu sa kiyanunkhania. Pina muhunjila avaanu mu nsila, muleshe kihunjila kwa luhaavi lutali.

5 “Pina muhuluta mu nanda ya muunu, yansaaji kihunjila mwijova, ‘UNguluvi avapeele uwulindamafu mukhati muno.’ 6 Umunya khaaya nda ikivayanushila kwa wulindamafu, apo ikhaaya iyo yisiive nu wulindamafu. Leelo, umunya khaaya nda asikivayanushila kwa wulindamafu, apo uNguluvi asimuyimiilila. 7 Musikhaheganisaaji. Leelo, ilitembe pina vikivayanushila mukhalaje muumo na kiilya ishakiilya shina vikivapeela. Kwa kiiva umusenga nsengo isakulwa kitanjilisiwa fyona fina isakula.

8 “Nda muhulute mu lijumbi lyolyona, avakhaaya nda vavayanushile kwa wushendeefu, liisaji ishakiilya shoshoona shina vikivapeela. 9 Avatamu vina vakwali mu lijumbi ilyo, vaponiaji. Vajovelaji kiija, ‘UWutwa wa Nguluvi wahejeela kunyeenyu.’ 10 Leelo, pina muhuluta mu lijumbi, nda vasavasaajisa, pina mwishila mu nsila saanave, jovaji, 11 ‘Amankundi ga mu lijumbi lyenyu gina gali mu nsayo sa magulu geesu, tikigakungʼuuna, baheene wuve wubedelo kunyeenyu. Khanji, mumanyaje kiija uWutwa wa Nguluvi wahejeela kunyeenyu!’ 12 Lino, nikivajovela kiija mu lisiku ilya kihigwa inyi, yikhava lupeefu kwa vaanu va lijumbi lya Sodoma kipona kihigwa kulikho ilijumbi ilyo!

UYeesu ipavila amajumbi gina gakhaanaga kimuhuviilila

(Mataayo 11:20-24)

13 “Aka! Omwe vaanu va lijumbi lya Kolasiini, noomwe muna muli va lijumbi lya Betisayida! Kiiva, amabikha gina nagasengaga kunyeenyu, gaali gave gasenjeeshe mu lijumbi lya Tiilo ni Sidoni, avaanu va mu majumbi ago vaali viwonensa kilambiisila kwa kifwala amagunila na kiyipakha amafuliikho. 14 Lino, nikivajovela kiija mu lisiku ilya kihigwa inyi, yikhava lupeefu kwa vaanu ava ku Tiilo na ku Sidoni kipona kihigwa kulikho omwe! 15 Na yuumwe muna muli vaanu va ku Kapelinawumu, muhiiva kiija mukhafikha kushaanya kwa Nguluvi? Ndaali, yisikhava ndeeno! Leelo mukhataagwa pansi ku wusimu na kilafisiwa.”

16 Baheene uYeesu wávajovela avamanyisiwa vaakwe wáaja, “Umuunu yuna ikivapuliisa omwe, asiive ikinipuliisa one, yuna ikivakhaana omwe, asiive ikinikhaana one. Khanji yuna ikinikhaana one, iiva ikimukhaana yuna wánifilikha one.”

Ilimwemwe lya vamanyisiwa va Yeesu

17 Kuunyuma, avamanyisiwa va Yeesu mashumi fungati na vavili vaawuya vashendeevile. Vamujovela uYeesu vaaja, “Mutwa, amalungu pina tikigadaga kwa litaawa lyakho, gikitutiila!” 18 UYeesu wávajovela wáaja, “Nikhandi nikimwaga uShetaani iigwa ngaja lumuli lwa noonya kihuma kushaanya. 19 Loleeli, navapeela ingufu isa kimumena umulugu mu goona. Kwa ngufu iso mukhakhanya injokha ni nje, khanji kusiina shiinu sha kivatesa. 20 Leelo, hata nda mushendeeva kwa kiiva amalungu gikivatiila, musikhashendeevaji kwa ilyo lyene. Shendeevaji kwa kiiva uNguluvi agayandiishe amataawa geenyu kushaanya muve vaanu vaakwe.”

Ilimwemwe lya Yeesu

(Mataayo 11:25-27; 13:16-17)

21 Uluhaavi luulo, uNumbula uMunofu wámupeela uYeesu ilimwemwe mandu wáajova, “Wee Daada, wee Mutwa wa kushaanya na mu nyi iyi. Nikikuhonjesa kwa kiiva amaswi aga, wavafihaga avaanu avanya luhala na vina vayimbiile, leelo wavawonensa avaanu vina vikiyiyiisa ngaja vanangʼana. Eena Daada, ndeeno shilushwali shina uganile.” 22 Wáajova khanji, “UDaada anipeelile goona. Kusiina umuunu yuna amumeenye uLusawo, leelo uDaada mwene duguli. Khanji, kusiina umuunu yuna amumeenye uDaada, leelo uLusawo mwene duguli nu muunu yoyoona yuna uLusawo isakula kimuwonensa.”

23 Baheene uYeesu wávasetushila avamanyisiwa vaakwe wávajovela wáaja, “Shiba omwe vaanu muna mukigaaga aga! 24 Nikivajovela kiija, vakhandi vakwali avakuwamalago vinshi na vatwa vina vakhandi visakula kigaaga gina mukigaaga omwe, leelo vasikhagaajile. Khanji vakhandi vidobokha kipulikha gina mwipulikha omwe, leelo vasikhagapuliishe.”

Ishihwano sha Musamaliya umunofu

25 Baaho, umumanyisaaji yumonga wa ndaji sa Musa, wáyiima kimuposa uYeesu kwa kimujela wáaja, “Wee Mumanyisaaji, nigahe shishi, baheene nipate uwuumi wa shiluta?” 26 UYeesu wámugomosesa wáaja, “Indaji sa Musa siijova wuli? Usimeenye?” 27 Wámugomosesa wáaja, “Umuganaje uMutwa uNguluvi waakho kwa numbula yaakho yoona, kwa mahiiva gaakho goona, kwa ngufu saakho soona na kwa luhala lwakho loona. Khanji umuganaje umuyaago ngaja shina uyiganile yuuwe.” 28 UYeesu wáajova, “Wayankha wunofu! Ugahaje shiisho ndeeno, apo ukhava nu wuumi wa shiluta.”

29 Leelo, umumanyisaaji wa ndaji yula, akhandi isakula kiyiwona kiija mugolofu, wámuposa khanji uYeesu wáaja, “Lino, umuyangu yu naani?” 30 UYeesu wámugomosesa wáaja, “Akhandi akwali umuunu yumonga, wáyiishile kihuma ku Yelusalemu, iiluta ku lijumbi lya Yeliko. Mu nsila, vamuyalushila avapokhaaji, vamuyaawula amenda, vamutova mandu, vamulekha asiliishe. 31 Umutambule yumonga akhandi iishila mu nsila yiyila, wáganaga kimwaga umuunu yula wáashila kulubali. 32 Khanji uMulaawi, wáganile kifikha pala wámwaga umuunu yula, woope wáashila kulubali. 33 Kuunyuma wáyinsa uMusamaliya yumonga, yuna akhandi ishuula kishilila insila yiyila. Wáganile kimwaga umuunu yula, wámusungupilaga, 34 wámuvejeela, wámususuuta idivaayi na mafuta mu nyeeya saakwe kwa kiiva ya kimuponia, wámupinya inyeeya. Wámutaania pashaanya pa dogovi yaakwe, wámutwala mu litembe lya vahensa, wáava ikimusunga.

35 “Pina kwasha, wáahumya ihela isa mahombo ga nsiku sivili, wámupeela umunya litembe lila, baheene wámujovela wáaja, ‘Mutamyaga umuunu uyu. Ihela isi nda sisile, na uhumye isinji kwa kiiva ya kimusunga, pina naatina, nikhakugomosesa.’ ” 36 Baheene uYeesu wámuposa umumanyisaaji wa ndaji sa Musa yula wáaja, “Lino! Mu vatatu ava, yu naani yuna wihiiva kiija muyine wa shiyooli wa yuna wáyalushilwagwa na valugu?” 37 Wámugomosesa wáaja, “Umuunu yuna wámusungupilaga.” UYeesu wámujovela wáaja, “Lino na yuuwe lutaga ugahe shiisho ndeeno!”

UMaliya ipuliisa amamanyiso ga Yeesu

38 UYeesu na vamanyisiwa vaakwe pina vakhandi mu nsila viiluta ku Yelusalemu, vaafikha mu lujinji lumonga. Uwashimaayi yumonga, yuna akhandi itambulwa Malita, wámusaajisa uYeesu mu litembe lyakwe. 39 UMalita akhandi nu munangʼana waakwe yuna akhandi itambulwa Maliya. Uluhaavi ulo, uMaliya wákhalaga pansi pa magulu ga Yeesu, ipuliisa amamanyiso gaakwe. 40 Leelo uMalita wáava iilava ni nsengo nyinshi isa kimuyandaalila uYeesu. Baheene wámujovela uYeesu wáaja, “Wee Mutwa, usiiwona luvi umunangʼana wangu pina anilesheele nisenga yuune? Lino mujovela anitanjilise!”

41 UMutwa wámugomosesa wáaja, “Wee Malita, Malita! Owe wiilava ni nsengo nyinshi! 42 Leelo, shisakulwa ishiinu shimo ishinofu, shisheene shina uMaliya ahagwile, kusiina umuunu yuna akwiliile kishiwuusa kunyaakwe!”