UYeesu nu Yohana uMutwiniaji
11
1 UYeesu wáganaga kimala kivalajisa avamanyisiwa vaakwe ishumi na vavili,
wáwuukhaga pala.
Wáaluta mu majumbi ga Galilaya kikhoma na kivamanyisa avaanu iLiswi lya Nguluvi.
2 UYohana uMutwiniaji pina akhandi adindiilwe mu shifungo,
wápulikhaga gina uKilisito akhandi iigaha.
Baheene wávafilikhaga avamanyisiwa vaakwe
3 vamupose uYeesu kiija,
“Wuli,
owe yuuwe yuna uNguluvi wátahisaaga kimufilikha awu timuheepaje uyunji?”
4 Baheene wávayankha avamanyisiwa vala wáaja,
“Lutaji mumujovele uYohana goona gina mwagaaga na kigapulikha.
5 Avapofu viloleela,
avalema vijenda,
avanya nyawulova viipona,
avadinde vipulikha,
vina vafwile vifyukha.
Khanji,
avapiina viikhomwa iMola iNofu.a
6 Shiba umuunu yoyoona yuna ikinihuviilila one,
yuna mugaya muninu muninu.”
7 Avamanyisiwa va Yohana pina vawuukha,
uYeesu wáyansa kishijovela ishipuga sha vaanu,
ulwa Yohana uMutwiniaji wáaja,
“Pina mukhandi mwiluta ku lunyikha,
mukhandi mwija musiite mushaaje shishi?
Mukhandi muhuviliile kilwaga ulutete luna ludegensiwa ni lipepo?
Ndaali!
8 Leelo mukhandi mwiluta kimuloleela yu naani?
Wuli,
umuunu yuna ayigojeele amenda aga hela nyinshi?
Ndaali,
avaanu vina vikiyigojela amenda aga hela nyinshi,
viikhala mu nanda isa shitwa.
9 Lino,
mukhandi mulutile kimuloleela yu naani?
Mukhandi muhuviliile kimwaga umukuwamalago?
Eena!
Nikivajovela kiija,
uyo asili mukuwamalago hela,
leelo uyo yu mukhome kimushila umukuwamalago.
10 UYohana uyu yumwene aMayandikhwa aManofu gayandiishe ndeeni ulwa mwene,
‘Loleela,
nikimufilikha umunjaajila wangu
yuna akhakulongola kumwandi.
Uyo yumwene yuna akhakunosesa insila yaakho.’b
11 “Shiyooli nikivajovela kiija,
mu vaanu woona asinawonekhaje umuunu yoyoona kiiva mukhome kimushila uYohana uMutwiniaji.
Leelo yuna mudoodo mandu mu Wutwa wa Nguluvi,
uyo yumwene mukhome kimushila uYohana.
12 Kihuma insiku sa Yohana uMutwiniaji akhandi iikhoma mbakha iminsiyaano,
uWutwa wa Nguluvi wusakulwa kwa ngufu.
Woope avanya ngufu,
viijesa kiwupata kwa ngufu.
13 Kiiva avakuwamalago woona nu Musa mu ndaji saakwe vakuwaagwa amalago mbakha kijela mu luhaavi luna uYohana wáwonekhaga.
14 Lino nda mukiwuyiitikha uwukuwamalago waanave,
uYohana yu mukuwamalago uEliya,
yuna wájowaagwa kiija akhayinsa.c
15 Umuunu yoyoona umunya makutu,
apulishe!
16 “Wuli,
avaanu va shisafi ishi nivahwananise ni shishi?
Vahwaneene na vaana vina viikhala pina vigusisa ifiinu na kivashemeela avayaanave viija,
17 ‘Mbona tavatovela indemo sa wushendeefu,
leelo musikhashimile!
Tavayeyemelaga injeyemo isa kisugumila,
leelo musikhakhoolile!’
18 “Shiisho ndeeno uYohana pina wáyinsaga.
Akhandi asiilya wala asiingʼwa,
avaanu vajovaga,
‘Ana malungu.’d
19 Lino,
one Lusawo lwa Muunu,
nayinsa niilya na kiingʼwa,
aveene viijova,
‘Loleeli!
Uyu mupafu khanji mugaasi,
mumanyi wa vatofya khoodi na vanya wunansi!’
Leelo ulumanyo lwa Nguluvi lumanyikha kiija lwa shiyooli mu nsengo isa vaanu vaakwe.”
UYeesu ipavila amajumbi gina gakhaanaga kimuhuviilila
20 Baheene uYeesu wáyansa kigapiikha amajumbi muna wágahaga amabikha minshi,
kwa kiiva avaanu va mu majumbi ago vasikhalambisiile.
21 “Aka!
Omwe vaanu va lijumbi lya Kolasiini,
noomwe muna muli va lijumbi lya Betisayida!
Kiiva,
amabikha gina nagasengaga kunyeenyu,
gaali gave gasenjeeshe mu lijumbi lya Tiilo ni Sidoni,
e avaanu va mu majumbi ago vaali viwonensa kilambiisila kwa kifwala amagunila na kiyipakha amafuliikho.
22 Leelo nikivajovela kiija,
mu lisiku ilya kihigwa inyi,
yikhava lupeefu kwa vaanu ava ku Tiilo na ku Sidoni kipona kihigwa,
kulikho omwe.
23 Na yuumwe muna muli vaanu va ku Kapelinawumu,
muhiiva kiija mukhafikha kushaanya kwa Nguluvi?
Ndaali,
yisikhava ndeeno!
Leelo,
mukhataagwa pansi ku wusimuf na kilafisiwa.
Kiiva,
amabikha gina gasenjekhaga kunyeenyu,
gaali gave gasenjeeshe mu lijumbi lya ku Sodoma,
g ilijumbi ilyo ndi lyava likwali mbakha iminsiyaano.
24 Leelo nikivajovela kiija,
mu lisiku ilya kihigwa inyi,
yikhava lupeefu kwa vaanu va lijumbi lya Sodoma kipona kihigwa,
kulikho owe.”
Kwa Yeesu kuna lutuuyo
25 Mu luhaavi luulo uYeesu wáajova,
“Wee Daada,
wee Mutwa wa kushaanya na mu nyi iyi,
nikikuhonjesa kwa kiiva amaswi aga,
wavafihaga avaanu avanya luhala na vina vayimbiile,
leelo wavawonensa avaanu vina vikiyiyiisa ngaja vanangʼana.
26 Eena Daada,
ndeeno shilushwali shina uganile.”
27 “UDaada anipeelile goona.
Kusiina umuunu yuna amumeenye uLusawo,
leelo uDaada mwene duguli.
Khanji,
kusiina umuunu yuna amumeenye uDaada,
leelo uLusawo mwene duguli nu muunu yoyoona yuna uLusawo isakula kimuwonensa.
28 “Yinsaji kunyangu omwe woona muna mwilava na kifunwa na masigo amafuno,
one nisivayanushile.
29 Yavalaji ijooki yangu,
muyimanyise kunyangu kiija muve nu wulindamafu mu numbula seenyu,
kwa kiiva one nili muhuugu khanji nili munya kiyiyiisa.
30 Ijooki yangu yina nikivayaavasa meefu kiyisumula,
umusigo gwangu goope guna nikivatwikha,
mupeefu.”