Nsengo sa Vanandeje 13

UBalinaaba nu Sawuli viviikhwa mu nsengo

1 Mu shipuga sha vahuvililaaji va Yeesu ava ku lijumbi lya Antiyokiya mukhandi muna vakuwamalago na vamanyisaaji ava, uBalinaaba, uSimiyoni yuna vakhandi vikimutambula Nigeeli, uluganulo lwakwe mutiitu, uLukiyo yuna ahumile ku lijumbi lya Kileene, uManaheni yuna wásungwagwa lumo nu mutwa uHelode uAntipa, nu Sawuli. 2 Awo woona pina vakhandi vikimufuunya uMutwa uYeesu, viilekha kiilya, uNumbula uMunofu wávajovela wáaja, “Nibagulili uBalinaaba nu Sawuli kwa nsengo yina nivashemeleele.” 3 Vaganile kimala kimufuunya uNguluvi na kilekha kiilya, vavaviishila amawokho pa mutwe uBalinaaba nu Sawuli vaviikhwe mu nsengo, vavafilikha kiija valute.

USawuli nu Balinaaba ku Kipulo

4 UBalinaaba nu Sawuli pina vakhandi vafiliikhwe nu Numbula uMunofu, vaaluta ku lijumbi lya Selukiya. Kihuma apo vawuukha ni shipugo ishikhome viiluta ku shigunguli sha Kipulo. 5 Vaganile kifikha ku Salami, vaava vikivakhoma avaanu iLiswi lya Nguluvi mu nanda sa kifuunyila isa Vayahuudi. Vakhandi lumo nu Yohana yuna akhandi itambulwa Maluko, yuna wáali mutanjilisaaji waanave.

6 Vaganaga kishuula mu shigunguli shoona isha Kipulo, vaafikha mu lijumbi lya umo, lina likhandi litambulwa Pafo. Vamwaga uMuyahuudi yumonga muhavi. Akhandi mukuwamalago umudehi, ilitaawa lyakwe yu Baali Yeesu. 7 Akhandi lumo nu mukhome wa shigunguli sha Kipulo, ilitaawa lyakwe Seligiyo Pawulo. Umukhome uyo akhandi muunu munya luhala mandu. Wávashemeela uBalinaaba nu Sawuli kiija, valute kunyaakwe apulishe yumwene iLiswi lya Nguluvi. 8 Leelo umuhavi uyo, ilitaawa ilinji kwa Shiyunaani yu Elima, uluganulo lwakwe muhavi, wáyansa kikhaanania nu Balinaaba nu Sawuli, wáajesa kimuhonsa umukhome yula asikhayihuvililaga amamanyiso gaanave aga Yeesu.

9 Baheene uSawuli, ilitaawa ilinji itambulwa Pawulo, pina ilongosewa nu Numbula uMunofu, wámuhonekha uElima wámujovela wáaja, 10 “Owe uli lusawo lwa Shetaani, uli mulugu wa goona gina ga wugolofu pa Nguluvi! Umemile uwudehi hela, nu wusugu uwa kivajanga avanji. Kwashi usiilekha kiseetula insila sa shiyooli isa Mutwa uNguluvi, kiiva mu wunansi? 11 Loleela lino, uMutwa uNguluvi asikupeele amalava, usipofole ameeho, usiloleela uwuvalafu wa lijuva kwa luhaavi.”

Baaho, uluwiiwi ni nshiisi yamugubikha uElima ku meeho, wáava asiloleela, wáyansa kipilima pilima kisakula umuunu uwa kimukhata iliwokho na kimulungamya. 12 Baheene umukhome yula wáganile kigaaga gina gasenjekha, wámuhuviilila uMutwa uYeesu, kwa kiiva akhandi iswiga amamanyiso aga Mutwa uYeesu.

UPawulo iikhoma ku Antiyokiya mu nyi ya Pisidiya

13 UPawulo na vayine vawuukha ku lijumbi lya Pafo kwa shipugo ishikhome, vaafikha mu lijumbi lya Pelige mu nyi ya Pamufiliya. Leelo uYohana Maluko wávalekha apo, wáawuya ku Yelusalemu. 14 Baheene uPawulo nu Balinaaba vawuukha ku Pelige, vayitenekha kishuula vaafikha mu lijumbi lya Antiyokiya mu nyi ya Pisidiya. Lyaganile kifikha ilijuva lya Sabaato, vayinjila mu nanda iya kifuunyila, vaakhala. 15 Umuunu yumonga wáganile kiyimba mu litaafili lya ndaji sa Musa, na mu Mayandikhwa ga vakuwamalago, avayimililaaji va nanda iya kifuunyila vafilikha umuunu kwa Pawulo nu Balinaaba, avajovele kiija, “Valukholo lwangu, nda muna liswi lya kivajovela avaanu kivajinia inumbula, mujove.”

16 Baheene uPawulo wáyiima, wányenyula iliwokho kiija vamupuliise, wávajovela avaanu vala wáajova, “Omwe vagoosi aVaisilaheli, na omwe muna musili Vayahuudi muna muhuviilila ilihuuvi ilya Shiyahuudi, munipuliise! 17 UNguluvi weesu ose ti Vaisilaheli, yumwene wávabagulaga avambuyeesu. Mu luhaavi luna vakhalaga ku wuhensa mu nyi ya Misili, wávaviikha vaava shimyanja shikhome mandu. Paanyuma wávalungamya, wávahumya mu Misili kwa ngufu saakwe inkhome. 18 Wávagugumila injendo saanave kwa maakha mashumi gana mu lunyikha. 19 Wáfibuda ifimyanja fungati mu nyi ya Kanaani, wávapeela avambuyeesu inyi iyo yive yaanave. 20 Goona ago gasenjekhaga kwa luhaavi lwa maakha magana gana na mashumi gasaanu (450).

“Paanyuma, uNguluvi wávapeela avambuyeesu avalamulaaji va kivalongosa, mbakha uluhaavi luna umukuwamalago uSamweli pina wávalongosaaga. 21 Baheene valomba kiija vave nu mutwa. UNguluvi wávapeela uSawuli, ulusawo lwa Kishi, wa shikholo sha Benyamini ave mutwa waanave kwa maakha mashumi gana. 22 Pina uNguluvi wámuwuusa uSawuli, wámuviikha uDawudi ave mutwa waanave. UNguluvi wámuyiitikha uDawudi wáaja, ‘Namwaga uDawudi ulusawo lwa Yeese, ikiyishendeefya inumbula yangu. Umwene asiigahe goona gina nisakula gasenjeshe.’

23 “Kihuma mu shikholo sha Dawudi mumwene uNguluvi wávaletelaga aVaisilaheli uMukulusaaji uYeesu, ngaja shina wátahisaaga. 24 Pina uYeesu ashaanali asinayanse insengo yaakwe, uYohana wálongolaga kivakhoma aVaisilaheli woona kiija valambiisile uwunansi waanave, na kitwinisiwa. 25 UYohana pina akhandi iimala insengo yaakwe, akhandi ikivajova avaanu kiija, ‘Muhambula one yuune naani? One nisili Kilisito yuna mumuheepile! Loleeli, uyo yuna iyinsa kunyuma yangu, one nisikwiliile hata kihudula ingalawo sa ndaatu saakwe.’

26 “Omwe valukholo lwangu, avaanu va shikholo sha Abulahamu, na omwe muna musili Vayahuudi muna muhuviilila ilihuuvi ilya Shiyahuudi, imola isi sa wukulukho satuyinsila ose kihuma kwa Nguluvi. 27 Avaanu vina vakhaaya va ku Yelusalemu lumo na vakhome vaanave vasikhamumanyile uYeesu kiija yumwene Mukulusaaji, na vasikhagameenye amaswi ga vakuwamalago aga Yeesu gina viyimba nsiku soona isa Sabaato. Vaganile kimuhiga uYeesu kiija vamubude, vagakwisa amaswi ago. 28 Hata nda vasikhapatile iliswi ilya shiyooli lina liwonensa kiija visakulwa kimubuda uYeesu, vamulomba uPilaato kiija amuhije, baheene vamubude. 29 Vaganile kikwisa goona gina uYeesu wáyandishilwagwa, vamuyiisa pa musalaaba, vamuviikha mu lijooja. 30 Leelo uNguluvi wámufyusa kihuma kwa vina vafwile. 31 UYeesu akhandi ikivatwiwushila nsiku nyinshi kwa vaanu vina valutaga lumo na woope kihuma ku nyi ya Galilaya, kiluta ku Yelusalemu. Awo vaveene valunjikhaaji vaakwe mu vaanu veesu aVaisilaheli.

32 “Ose tikivakhoma iMola iNofu kiija, gala gina uNguluvi wátahisaaga kwa vambuyeesu, 33 lino wákwisa ulutaahiso lwakwe kunyeesu, tili vasukulu vaakwe, kwa nsila ya kimufyusa uYeesu. Ngaja shina yiyandiikhwe mu Sabuli ya wuvili kiija,

‘Owe yuuwe Lusawo lwangu,

iminsiyaano naava nili Wiiho.’

34 “UNguluvi wámufyusa uYeesu kihuma kwa vina vafwile kiija, umuvili gwakwe gusikhawolaga kaa. Yili ngaja shina uNguluvi wájovile,

‘Nafingaga kimupeela uDawudi uluyimiililo ulunofu,

shiyooli uluyimiililo ulo lulwene nikhavayimiilila na yuumwe.’

35 “Iliswi ilyo liyandiikhwe na pa luvala ulunji kiija,

‘Usikhayiitikha kiija, umuvili gwangu guwole kukula,

one nili Munofu waakho.’ ”

36 UPawulo wáyitenekha kilogola kiija, “UDawudi wáganile kigaha gina idobokha uNguluvi kwa vaanu va shisafi shaakwe, wáafwa. Vamugubishila nkholeela na majooja ga vambuye, wáawola. 37 Leelo yula yuna uNguluvi wámufyusaaga, asikhawolile.

38-39 “Lino omwe valukholo lwangu, mumanye kiija, tikivakhoma kiija, kishilila uYeesu, mukwiliile kisaajilwa uwunansi weenyu. Kwa kiiva ya ilyo, umuunu yoyoona yuna ikimuhuviilila uYeesu, ivasiwa kiiva mugolofu pa Nguluvi. Iliswi ili lisikwiliile kigahwa kwa kiyinatila indaji sa Musa. 40 Lino muveesaje meeho, gasilaave gavafishile gina gakhayandiikhwe mu mataafili ga vakuwamalago kiija,

41 ‘Omwe muna mwisala, loleeli,

na kiswiga, mufwile kutali.

Kwa kiiva aga gina niigaha mu nsiku seenyu

musikwiliile kigahuviilila kaa,

hata nda umuunu avajovele!’”

42 UPawulo nu Balinaaba, vakhandi viihuma mu nanda iya kifuunyila, avaanu vavalomba kiija vatine khanji mu lijuva lya Sabaato lina liyinsa, kiija valogole mandu ulwa mola isa maswi ago. 43 Pina avaanu vawuukha kihuma mu nanda ya kifuunyila, aVayahuudi vinshi, lumo na vina vasikhandi Vayahuudi leelo vahuvililaga ilihuuvi ilya Shiyahuudi, vavafwata uPawulo nu Balinaaba. Avanandeje vavili awo, vakhandi vilogola na woope kwa kivajinia inumbula, kiija vayitenekhaje kihuviilila ulusungu lwa Nguluvi.

44 Ilijuva lya Sabaato lina lyafwataga, vafishile ngaja vaanu woona ava lijumbi lila, kipuliisa iMola iNofu iya Mutwa uYeesu. 45 Leelo avakhome va Vayahuudi vaganile kivaaga avaanu vakungaanile, ililugu ilikhome vikivapuliisa avanandeje awo, vaava ni jiila mandu. Vakhaania amaswi gina uPawulo akhandi ilogola na kimuliga. 46 Hata ndeeno, uPawulo nu Balinaaba vavagomosesa aVayahuudi vala kwa wujimfu vaajova, “Yayifwaya iLiswi lya Nguluvi likhomwe tangusiina kunyeenyu omwe Vayahuudi. Leelo mwalikhaana, na kiyiwona kiija musifwaya kiiva nu wuumi wa shiluta. Lino tikivalekha, tiiluta kwa vaanu vina vasili Vayahuudi. 47 Kiiva uMutwa uNguluvi atulajiise kiija,

‘Nikuviishile uve lumuli kwa vaanu vina vasili Vayahuudi,

kiija uvatwalile uwukulukho avaanu kifikha muna inyi yijelile.’”

48 Avaanu vina vasili Vayahuudi, vaganile kipulikha amaswi ago, vamwemweta, vayisufya iMola iNofu iya Mutwa uYeesu. Woona vina vabagulwagwa kiiva nu wuumi wa shiluta, vamuhuviilila uMutwa uYeesu.

49 IMola iNofu iya Mutwa uYeesu yikhandi yiyalaalila mu nyi yila yoona. 50 Leelo aVayahuudi vavahonsa avashimaayi va lishima, vina vakhandi vihuviilila ilihuuvi ilya Shiyahuudi na vagoosi avakhome va lijumbi lila. Awo vayansa kivalafya uPawulo nu Balinaaba, vavadaga mu nyi yaanave. 51 Baheene uPawulo nu Balinaaba vavapavila kwa kikungʼuuna amankundi gina gakhandi mu nsayo sa magulu gaanave, kiija uNguluvi akhavahiga. Baheene vaaluta ku lijumbi lya Ikoniyo. 52 Leelo avahuvililaaji ava pala pa Antiyokiya vakhandi vimwemweta mandu, vakhandi vilongosewa nu Numbula uMunofu.