Yohana 12

UMaliya ikimududumisisa uYeesu amafuta

(Mataayo 26:6-13; Maluko 14:3-9; Luuka 7:36-50)

1 Lino, saganaga kisigala nsiku mutanda kifikha ishiwungo sha Pasaakha, uYeesu wáaluta khanji ku lujinji lwa Betaniya, kuna akhandi iikhala uLaasalo, yuna uYeesu wámufyusaaga. 2 Avaanu vamonga ava kula, vamuteleshela ishakiilya isha pashaamihe, uMalita wámugawulila. ULaasalo akhandi munyaayumo wa vahensa vina vakhandi lumo nu Yeesu pa meesa. 3 Ino uMaliya wátoola insupa ya mafuta aga lifungu likhome, gina ginunshilila mandu, wámududumisisa uYeesu mu magulu, wamufyangula ni nyele saakwe. Inanda yoona yanunshilila umununsi umunofu gwa mafuta ago.

4 Leelo umumanyisiwa waakwe yumonga, ilitaawa lyakwe akhandi itambulwa Yuuda Isikaliyoote, yuna wámudolelaga uYeesu wáaja, 5 “Kwashi amafuta ago, gasagusiwa kwa hela nyinshi mandu, na kivapeela avapiina.” 6 UYuuda asikhalogwele ndeeno kwa kiiva ya kivasungupila avapiina, leelo kwa kiiva akhandi muhiiji. Uyo yumwene yuna akhandi iviikha umufukho gwa hela. Akhandi ihiija ihela sina akhandi ikisiviikha na kisitumila mwene duguli. 7 Lino uYeesu wámugomosesa uYuuda wáaja, “Muleshi, wágulaga amafuta ago, kiija agaviishe kwa kiiva ya lijuva lina vakhanisiila. 8 Avapiina muli lumo nsiku soona, leelo one nisiiva lumo noomwe nsiku soona.”

AVayahuudi vilogosania ulwa kimubuda uLaasalo

9 Lino avaanu vinshi vapulikha kiija uYeesu akwali uluvala lula, vaaluta, yisili kimwaga umwene hela, leelo kimuloleela nayu Laasalo, yuna uYeesu wámufyusaaga. 10 Lino avatambule avakhome valamula kimubuda woope uLaasalo. 11 Valamulaga ndeeno, kwa kiiva aVayahuudi vinshi vavalekhaga avakhome vaanave, vamuhuviilila uYeesu, kwa kiiva ya kifyukha uLaasalo.

UYeesu iyinjila ku Yelusalemu kwa filuulu

(Mataayo 21:1-11; Maluko 11:1-11; Luuka 19:28-40)

12 Pamulaawu njine, ishipuga ishikhome sha vaanu vina vakhandi vayinsile ku shiwungo sha Pasaakha, vapulikha kiija uYeesu ali mu nsila, iyinsa ku Yelusalemu. 13 Lino vatoola amansambala ga matende, vaaluta kimuposheela uYeesu. Vakhoosa ishawuti vaajova,

“Hosana!

Ayimililwajwe yuna iyinsa kwa litaawa lya Mutwa uNguluvi!

Ayimiliilwe uMutwa wa Vaisilaheli.”

14 Lino uYeesu wáyaaga inyana dogovi, wáyangala. Ngaja shina yiyandiikhwe mu Mayandikhwa aManofu kiija,

15 “Omwe vaanu va mu lijumbi lya Sayuni musikhatiilaji!

Loleeli, uMutwa weenyu iyinsa,

ayangeele inyana dogovi!”

16 Uluhaavi ulo, avamanyisiwa va Yeesu vasikhamanyile ago. Leelo uYeesu wáganaga kifyukha, baheene vakumbukha kiija, ago gakhayandiikhwe ulwa mwene na shina vamugahilaga ngaja shina yiyandiikhwe.

17 Lino avaanu vina vakhandi nu Yeesu, uluhaavi luna ikimushemeela uLaasalo mu lijooja na kimufyusa, vaveene vina vayalalisaaga imola iso. 18 Ndeeno avaanu vinshi vapulikhaga imola sa mabikha gina wágahaga, lulwene luna vahumaga ku Yelusalemu kiluta kimuposheela uYeesu. 19 Leelo aVafalisaayo vaposania vaajova, “Mukilwaga? Tisikwiliile kigaha shoshoona! Loleeli, avaanu woona vikimufwata umwene.”

UYeesu ilogola ulwa mfwa yaakwe

20 Avaanu vamonga vina vakhalutile ku Yelusalemu kimufuunya uNguluvi mu shiwungo sha Pasaakha, vasikhandi Vayahuudi. 21 Lino avaanu awo vaaluta kwa Filipo yuna wáhumaga ku Betisayida inyi ya Galilaya, vamulomba vaajova, “Mutwa, tilomba tilogole nu Yeesu.” 22 UFilipo wáaluta kimujovela uAndeleya imola iso, baheene woona uFilipo nu Andeleya vaaluta kimujovela Yeesu.

23 UYeesu wávagomosesa wáaja, “Uluhaavi lwafikha ulwa kitupikhwa uLusawo lwa Muunu kiwonekha bahawuvalafu. 24 Shiyooli nikivajovela, imbeyu nda yisisiliilwe mu lilongo yisikwiliile kimela, leelo nda yisiilwe mu lilongo, yiimela na kikhoma amakhomo minshi. 25 Umuunu yoyoona yuna isakula kiwusaajila uwuumi waakwe, uyo asiwuyase, leelo umuunu yoyoona yuna ikiwuyasa uwuumi waakwe kwa kiiva ya one, uyo asiwupate uwuumi wa shiluta. 26 Umuunu yoyoona yuna ikinisenjela one, isakulwa anifwate. Khanji, popoona pala pina nikwali, papeene pina umuvanda wangu akhava akwali. UDaada akhamutuna umuunu yoyoona yuna ikinisenjela one.

27 “Lino nayansa kisugumilwa mandu mu numbula yangu. Nilogole shishi? Wuli nijove, ‘Wee Daada, nikikulomba unikuluse mu luhaavi ulu ulwa malava’? Ndaali, nisikwiliile kilomba ngaja ndeeno, kwa kiiva niyinsile kilava mu nyi muno. 28 Wee Daada Nguluvi, ulitupishe ilitaawa lyakho.”

Baheene uNguluvi wálogola kihuma kushaanya wáaja, “Wee Lusawo lwangu, nalitupikha, khanji nisiyiteneshe kilitupikha.” 29 Ishipuga sha vaanu vina vakhandi pala vaganaga kipulikha ishawuti kihuma kushaanya, vamonga vaajova, “Lugulumo lwa noonya,” avanji vaajova, “Umalayikha wa Nguluvi, wáava ilogola nawo.” 30 Leelo uYeesu wávajovela avaanu vala wáaja, “Iliswi lina mukhandi mupulikha, lisikhandi lya kinitanga one, leelo likhandi lya kivatanga omwe. 31 Lino lwafikha uluhaavi lwa Nguluvi ulwa kivahiga avaanu ava mu nyi iyi. Lino lwafikha uluhaavi lwa Nguluvi ulwa kimudaga uShetaani, umutemi wa nyi iyi. 32 One pina nanyenyulwa kihuma mu nyi, nikhavakweha woona, kiija vayinse kunyangu.” 33 UYeesu wájovaga ndeeno, kiwonensa shina hambi iifwa.

34 Lino ishipuga sha vaanu vamugomosesa uYeesu vaajova, “Tiyimbile mu Mayandikhwa aManofu kiija, uMukulusaaji yuna uNguluvi wátahisaaga kimufilikha, akhava muumi shiluta. Lino kwashi wiijova avaanu vakhamunyenyula pashaanya uLusawo lwa Muunu? Wuli, uLusawo lwa Muunu yu naani?” 35 UYeesu wávajovela wáaja, “Uwuvalafu wiiva lumo noomwe kwa luhaavi lufupi hela. Muyitenekhaje kijenda mu wuvalafu uwu, pina inshiisi yisinaakhome, kwa kiiva umuunu yuna ijenda mu nshiisi asikumeenye kuna iiluta. 36 Huvililaji uwuvalafu uwu pina wushaanali wukwali, baheene muveesaje vana va wuvalafu.” UYeesu wáganaga kilogola ago, wáshilekha ishipuga shila, wáaluta kityega.

AVayahuudi vinshi vikhaana kimuhuviilila uYeesu

37 Hata nda uYeesu wágahaga amabikha minshi paveene, hata ndeeno avaanu vinshi vasikhamuhuviliile. 38 Gakhandi ngaja ndeeno, baheene gakwilane amaswi gina umukuwamalago uIsaaya wájovile kiija,

“Wee Mutwa, yu naani yuna ahuviliile imola seesu?

Khanji, yu naani yuna uMutwa amusoneele ingufu saakwe?”

39 Vasikhamuhuviliile kwa kiiva uNguluvi wájovaga kishilila kwa Isaaya kiija,

40 “Avapofwese ameeho gaanave

na kisigaha nyuumu inumbula saanave,

kiija vasikhaloleelaga, vasikhamanyaga,

baheene vasikhatinaga kunyangu,

kiija vasikhakulukhaga.”

41 UIsaaya wálogwele ago kwa kiiva wáwaagaga uwutupikho wa Yeesu na kilogola imola sa Yeesu.

42 Hata ndeeno, avaanu vinshi vamuhuvililaga uYeesu, avamonga mu awo vakhandi vakhome va Vayahuudi. Leelo vasikhalogwele bahawuvalafu kiija vamuhuviliile, kwa kiiva vavatiilaga aVafalisaayo, kiija hambi vikivadaga mu nanda iya kifuunyila. 43 Avakhome awo vadobokhaga mandu kisufisiwa na vaanu, kulikho kisufisiwa nu Nguluvi.

Avaanu vakhahigwa kwa maswi gina ilogola uYeesu

44 Lino uYeesu wálogola bahawuvalafu wáaja, “Umuunu yuna ikinihuviilila one, asikinihuviilila yuune duguli, leelo ikimuhuviilila na yuna anifiliishe. 45 Umuunu yoyoona yuna wányaaga one, wámwaga na yuna wánifilikha. 46 One nayinsa mu nyi iyi ngaja wuvalafu, baheene shila muunu yuna ikinihuviilila asikhakhalaga mu nshiisi.

47 “Umuunu yoyoona yuna ipuliisa amaswi gangu, leelo asikigayinatila, one nisikhayinsa kimuhiga, kwa kiiva nisikhayinsile mu nyi iyi kivahiga avaanu, leelo nayinsaga kivakulusa. 48 Shiisho ndeeno, umuunu yoyoona yuna ikinikhaana one lumo na maswi gangu, akhahigwa. Amaswi gina nagalogola gageene gina gakhamuhiga mu lisiku ilya kihigwa inyi. 49 Kiiva nisalogola kwa wutawulilwa wangu, leelo yu Daada yuna wánifilikha, yumwene yuna wánilajisa aga kilogola, na shina hambi nilogola. 50 Nimeenye kiija indaji yaakwe yikivapeela avaanu uwuumi wa shiluta. Khanji one nilogola gala hela, gina uDaada anilajiise nigalogole.”