Mataayo 21

UYeesu iyinjila ku Yelusalemu kwa filuulu

(Maluko 11:1-11; Luuka 19:28-40; Yohana 12:12-19)

1 UYeesu na vamanyisiwa vaakwe pina vakhandi nkholeela mu lijumbi lya Yelusalemu, vaafikha ku lujinji lwa Betifage ku shidunda shina shikhandi shitambulwa shidunda sha Miseyituni. Baheene uYeesu wávafilikha avamanyisiwa vavili. 2 Wávajovela wáaja, “Lutaji mu lujinji lula luna luli pamwandi yeenyu. Pina muhuluta mula, baaho musiyaaje idogovi ni nyanaakwe sipinyiilwe. Baheene siyawulili, muyinse naso kunyangu. 3 Umuunu nda avapose ulwa dogovi iso, mujovelaji kiija, ‘UMutwa ana nsengo naso,’ woope asivatawulile muyinse naso.” 4 Aga goona gasenjekhaga ndeeno, baheene likwilane iliswi lila lina uNguluvi wálilogolaga kwa nsila ya mukuwamalago waakwe kiija,

5 “Vajovela avaanu va mu lijumbi lya Sayuni kiija,

‘Loleeli, uMutwa weenyu iyinsa kunyeenyu, muhuugu,

ayangeele inyana dogovi.

Idogovi iyo, ni nyanaakwe.’”

6 Baheene avamanyisiwa vala vaaluta na kigaha ngaja shina uYeesu wávalajisaaga. 7 Vamutwalila uYeesu idogovi yila ni nyanaakwe, vatandikha amenda gaanave pa dogovi, baheene uYeesu wáyangala. 8 Ishipuga shikhome mandu isha vaanu vatandikha amenda gaanave mu nsila, avanji vakhandi videenya amansambala ga mapishi na kiyalaalisa mu nsila kiwonensa ulugoto kunyaakwe. 9 Avaanu vala vina valongwele pamwandi na vina vakhandi vifwata kunyuma kwa Yeesu, valogola kwa shawuti nkhome vaaja,

“Atunwajwe uNguluvi, kwa kiiva ya Lusawo lwa mutwa uDawudi!

Ayimililwajwe yuna iyinsa kwa litaawa lya Mutwa uNguluvi!

Atunwajwe uNguluvi yuna ali kushaanya!”

10 UYeesu wáganile kiyinjila mu lijumbi lya Yelusalemu, ilijumbi lyona lyaswigaga mandu. Avaanu vayansa kiposania viija, “Yu naani uyu?” 11 Ishipuga sha vaanu vala shayankha shaajova, “Uyu yu Yeesu uwa mu lijumbi lya Nasaleti ku nyi ya Galilaya, yu mukuvamalago wa Nguluvi.”

UYeesu ivalasa inanda imbaagule iya kifuunyila

(Maluko 11:15-19; Luuka 19:45-48; Yohana 2:13-22)

12 Baheene uYeesu wáyinjilaga mu lukeeke lwa nanda imbaagule iya kifuunyila. Pina wáyinjila, wáyansa kivadaga woona vina vakhandi viigusa na kigula ifiinu mula. Wásigalavandula imeesa isa vina vakhandi vibadiilisa ihela na kifigalavandula ifitengo ifya vagusaaji va nkunda. 13 UYeesu wávajovela wáaja, “Yiyandiikhwe mu Mayandikhwa aManofu, ‘Inanda yangu yikhava nanda ya mafuunyo.’ Leelo omwe mwaseetula kiiva ‘wiikhasi wa vahiiji.’ ”

14 UYeesu pina akhandi ali mu lukeeke lwa nanda imbaagule, avapofu na valema valutaga kunyaakwe, woope wávaponiise. 15 Leelo avatambule avakhome na vamanyisaaji va ndaji sa Musa, vagaajile amabikha ga Yeesu gina wágahaga, khanji vapulikha avaana vilyova kwa shawuti mu lukeeke lwa nanda imbaagule viija, “Atunwajwe uLusawo lwa mutwa uDawudi.” Vaganile kipulikha ago vakhalala mandu. 16 Vamuposa uYeesu vaaja, “Wuli, wipulikha avaana ava shina viijova?” UYeesu wávayankha wáaja, “Nipulikha, ndeeno musinayimbe amaswi gina gayandiikhwe mu Mayandikhwa aManofu giijova,

‘Mu maswi ga vaana avashaali na vina viyonkha,

mumwene muna lusufyo’?”

17 UYeesu wávalekha avaanu vala, wáaluta kigona mu lujinji lwa Betaniya.

UYeesu ikiguyiijila umujombe

(Maluko 11:12-14, 20-24)

18 Pamulaawu njine ulwamilaawu, pina uYeesu akhandi iitina ku Yelusalemu, injala yamulumaga. 19 Baheene wágwaga umupishi gumonga ugwa mujombe palubali pa nsila, wávejeela nkholeela wágwaga gungaya makhomo gogoona, leelo guna mahamba hela. Ndeeno wágujova umupishi gula wáaja, “Kiyansisa iminsiyaano mbakha shiluta, gasikhakhomaga amakhomo khanji!” Baaho umupishi gula gwayuuma goona. 20 Avamanyisiwa va Yeesu vaganile kigaaga ago, vaswiga mandu, vamuposa vaajova, “Umupishi ugu gwayuuma shitu, shihwana wuli?” 21 UYeesu wávayankha wáajova, “Shiyooli nikivajovela kiija, nda muna lihuuvi lingaya muninu muninu, omwe mukwiliile kigaha ngaja shina gasenjekha ku mupishi ugu. Khanji musiigaha aga geene duguli, leelo hata nda mushijove ishidunda ishi, kuulikha na kiyitoosa ku bahali, lyope lisisenjeshe. 22 Nda muve ni lihuuvi, shoshoona shina hambi mwilomba kwa Nguluvi kwa kifuunya, huvililaji kiija hambi shisenjekha.”

UYeesu iposewa ulwa wutawulilwa waakwe

(Maluko 11:27-33; Luuka 20:1-8)

23 UYeesu wáyinjiile khanji mu lukeeke lwa nanda imbaagule iya kifuunyila, wáyansa kimanyisa. Avatambule avakhome na vakhome va Vayahuudi vaaluta kimuposa vaajova, “Aga gina wiigaha, wiigaha kwa wutawulilwa wa naani? Yu naani yuna wákupeela uwutawulilwa uwo?” 24 UYeesu wávayankha wáaja, “Na yuune nisivapose liswi limo. Nda muniyanshe, na yuune nisivajovele kiija, niigaha aga kwa wutawulilwa wa naani. 25 Wuli, uwutawulilwa wa Yohana uwa kitwinia avaanu wahumaga kwi? Wahumaga kwa Nguluvi awu kwa vaanu?” Baheene vaposania veene vaaja, “Nda timuyanshe kiija, wahumaga kwa Nguluvi, asitupose kiija, ‘Lino kwashi musikhamuhuviliile?’ 26 Khanji, nda timuyanshe kiija, wahumaga kwa vaanu, titiila ishipuga sha vaanu ishi. Kiiva woona vahuvililaga kiija, shiyooli uYohana akhandi mukuwamalago.” 27 Baaho vamuyankha vaaja, “Tisimeenye.” Woope uYeesu wávajovela wáaja, “Na yuune nisikivajovela kiija, yu naani anipeelile uwutawulilwa uwa kisenga aga.”

Ishihwano sha vaana vavili

28 UYeesu wálogolaga khanji wáaja, “Omwe muhiiva wuli ulwa shihwano ishi? Wáali akwali umuunu yumonga, yuna akhandi ana vaana vadiimi vavili. Wáaluta kwa muswamuve uwa wutasi, wámujovela wáaja, ‘Wee muswamu wangu, iminsiyaano ulute kisenga insengo mu mugunda.’ 29 Umwana yula wámuyankha wáaja, ‘Nisiiluta.’ Leelo paanyuma wáhiiva, wáaluta kisenga. 30 Baheene uwiihe yula wáaluta kwa muswamuve uwa wuvili, wámujovela ngaja umuyine. Woope wámuyankha wáaja, ‘Nisiilute wiheesu.’ Leelo asikhaatile. 31 Wuli, mu vala vavili, yu naani yuna wágahaga ngaja shina uwiihe akhandi isakula?” Avaanu vala vamugomosesa vaajova, “Yula uwa wutasi.” Baheene uYeesu wávajovela wáaja, “Shiyooli nikivajovela kiija, avatofya khoodi na vashemi vakhayinjila mu Wutwa wa Nguluvi, leelo omwe musikhayinjila. 32 Kwa kiiva uYohana wáyinsile kunyeenyu, kiija avasoonele insila iya wugolofu, leelo omwe musikhalambisiile na kimuhuviilila. Leelo avatofya khoodi na vashemi vamuhuvililaga. Hata nda mwawona kiija valambisilaga uwunansi waanave, hata ndeeno omwe musikhalambisiile uwunansi weenyu na kimuhuviilila.”

Ishihwano sha valimaaji avadehi

(Maluko 12:1-12; Luuka 20:9-19)

33 UYeesu wáyitenekhaga kilogola kiija, “Puliisi ishihwano ishinji. Akhandi akwali umuunu yumonga yuna wálimaga umugunda gwakwe na kivyala amasabiibu. Wápilimya ulukeeke, wákwimba paakhati ililindi ilya kihuujila umulengu gwa masabiibu, khanji wásenga insimbili inali iya kiyiima pashaanya avayangalilaaji. Kuwudugo, wávakhoodesa avalimaaji umugunda gula, baheene umwene wáshuula.

34 “Lwaganile kifikha uluhaavi ulwa kiyava amasabiibu, wávafilikha avavanda vaakwe kwa valimaaji vala, kiija vamutoolele iligawo lyakwe ilya nkungulo. 35 Leelo avalimaaji vala vavakhata avavanda vala, yumo vamutova, uyunji vamubuda na uyunji vamutova na mangʼanga. 36 Umuunu yula wávafilikha khanji avavanda avanji, vina vakhandi vinshi kishila vina wávafilikhaga ulwamwandi. Avalimaaji vala vavagahila fivi avavanda vala ngaja shina vavagahilaga fivi ava wutasi vala. 37 Kuwudugo, wámufilikha umwanaakwe, wáaja, ‘Uyu mwanangu, vasimutiile.’ 38 Leelo avalimaaji vala vaganile kimwaga umwana yula, vajovelana vaajova, ‘Uyu yumwene umunya kihaala umugunda ugu. Lino, timubude, baheene uwuhaasi waakwe wuve weesu.’ 39 Baheene vamukhata, vamudaga kunja ya mugunda, vamubuda.” 40 Baheene uYeesu wávaposa wáaja, “Nda umunya mugunda yula iitina kuna wáshuulaga, asivagahe shi avalimaaji vala?” 41 Aveene vamuyankha vaaja, “Asivabude avanansi vala bila kivasungupila. Umugunda gwakwe gula, asivakhoodese avalimaaji avanji vina vakhamuhomba amakhomo uluhaavi ulwa nkungulo.”

42 Baheene uYeesu wávajovela khanji wáaja, “Wuli, musinayimbe mu Mayandikhwa aManofu, muna gayandiikhwe kiija,

‘Ilingʼanga lina avasengaaji valikhaanaga,

lilyene liveele lingʼanga likhome ilya ku mbogonyo ya luutu lwa nanda.

UMutwa uNguluvi yumwene wáagaha ilyo,

lyope lya miitu kunyeesu.’

43 “Kwa kiiva ya ili, nikivajova kiija, uNguluvi asiwuwuuse uWutwa waakwe kunyeenyu, asivapeele avaanu avanji vina vakhasava amakhomo gaakwe. 44 Umuunu nda agwile pa lingʼanga ilyo, asidenyenkhane, khanji umuunu yoyoona yuna lisimugwile, lisimuhaawule mandu.”

45 AVafalisaayo na vatambule avakhome vaganile kipulikha ifihwano ifya Yeesu, vaamanya kiija, akhandi ikivajova vaveene. 46 Baheene vayansa kisakula insila iya kimukhata, leelo vatiilaga ishipuga sha vaanu kwa kiiva aveene vamuhuvililaga uYeesu, kiija mukuvamalago.