Yohana 2

Ishiwungo sha noolana isha ku Kana

1 Saganile kishila nsiku sivili, kukhandi kuna shiwungo sha noolana ku lujinji lwa Kana, mu nyi ya Galilaya. Pa shiwungo isho, akhandi akwali umaayi wa Yeesu. 2 UYeesu na vamanyisiwa vaakwe woope vakhandi vayaniilwe ku shiwungo isho. 3 Avahensa vaganaga kiingʼwa idivaayi, yaasila. Baaho umaayi waakwe wámujovela uYeesu wáaja, “Wee muswamu wangu, idivaayi yaasila.” 4 UYeesu wámugomosesa umaayi waakwe wáaja, “Nyineesu, kwashi wilogola ndeeno? Uluhaavi lwangu lusinaafishe.” 5 Baheene umaayi waakwe wávajovela avavanda ava shiwungo shila wáaja, “Goona gina ikivajovela, mugasengaje.”

6 Ku luvala lula, kukhandi kuna nsimikho mutanda sina sikhandi sitendiilwe na mangʼanga. Mu nsimikho iso, aVayahuudi vakhandi viviikha amalenga ga kigahila ingʼoma yaanave iya kiyivalasa. Insimikho yimo yikhandi yiimema madebe gasaanu awu mutanda. 7 Baheene uYeesu wávajovela avavanda vala wáaja, “Mumemye amalenga mu nsimikho.” Woope vaamemya amalenga mu nsimikho mbakha pashaanya. 8 Baheene uYeesu wávajovela wáaja, “Neji amalenga, mumupeele umuyimililaaji wa shiwungo sha noolana.” Woope vaagaha shishila. 9 Umuyimililaaji wáangʼwa amalenga gala, gina uYeesu wágasetulaga kiiva divaayi. Umwene asikhameenye kuna yihumile, leelo avavanda vina vanegaga amalenga, vamanyaga kuna yihumile. Baheene wámushemeela umunya shiwungo isho. 10 Umuyimililaaji yula wáaja, “Umuunu yoyoona iyansa kigava idivaayi inofu, kuwudugo pina vaangʼwa na kiyikuta, baheene iigava idivaayi yina yisili nofu. Leelo owe waleeta idivaayi inofu kuwudugo!”

11 UYeesu wágahaga ilibikha ili, mu lujinji lwa Kana ku nyi ya Galilaya. Ilibikha ilyo likhandi lya wutasi kiligaha, kiwonensa uwutupikho waakwe kwa vaanu. Kwa kiiva ya ilyo, avamanyisiwa vaakwe vamuhuviilila. 12 Ishiwungo shaganaga kishila, uYeesu wáaluta ku lijumbi lya Kapelinawumu lumo nu maayi waakwe, avamaame vaakwe na vamanyisiwa vaakwe, vaakhala ukho nsiku ndoodo.

UYeesu ivalasa inanda imbaagule iya kifuunyila

(Mataayo 21:12-13; Maluko 11:15-17; Luuka 19:45-46)

13 Uluhaavi lwa shiwungo sha Vayahuudi isha Pasaakha, pina shili nkholeela, uYeesu wáaluta ku Yelusalemu. 14 Baheene wáhuluta mu lukeeke lwa nanda imbaagule iya kifuunyila. Umo wávaaga avaanu vina vakhandi viigusa ingʼombe, inkholo ni nkunda, na vina vakhandi vibadiilisa ihela. 15 UYeesu pina wágaagaga ago, wáapota ulugalawo luve lujambo, wávadaga woona vina vakhandi viigusa mula, lumo ni ngʼombe ni nkholo. Wásigalavandula imeesa isa vina vibadiilisa ihela na kisikunula ihela saanave. 16 Baheene uYeesu wávajovela vina vakhandi viigusa inkunda wáaja, “Siwuusi inkunda apa! Musikhagahaga inanda ya Daada wangu kiiva munaada!” 17 Avamanyisiwa vaakwe vaganaga kipulikha ago, vakumbukha amaswi gina gayandiikhwe mu Mayandikhwa aManofu kiija, “Ulugano lwangu ku nanda yaakho, luveekha mukhati yangu ngaja mooto.”

18 Baheene avakhome va Vayahuudi pina vagaagaga gina uYeesu agahile, vamuposa vaaja, “Usiigahe shimanyilo shishi kiwonensa kiija, una wutawulilwa wa kigaha aga?” 19 UYeesu wávajovela wáaja, “Bojoli inanda iyi iya Nguluvi, one nisisenje khanji kwa nsiku sitatu.” 20 Baheene aveene vamugomosesa vaaja, “Inanda iyi, yasengwagwa kwa maakha mashumi gana na mutanda. Lino owe, ukwiliile wuli kiyisenga kwa nsiku sitatu?”

21 Leelo uYeesu asikhalogwele ulwa nanda iyi, leelo akhandi ilogolela ulwa muvili gwakwe yumwene. 22 Baheene uYeesu wáganaga kifyukha kihuma kwa vina vafwile, avamanyisiwa vaakwe vakumbukha amaswi gina wájovile. Kwa nsila iyo, vagahuviilila amaswi gina gayandiikhwe mu Mayandikhwa aManofu, na maswi gina uYeesu wájovile.

UYeesu ameenye gina gali mu numbula sa vaanu

23 UYeesu pina akhandi ku shiwungo sha Pasaakha ku Yelusalemu, avaanu vinshi vakhayansiise kimuhuviilila, kwa kiiva vagaagaga amabikha gina akhandi iigaha. 24 Leelo uYeesu asikhavahuviliile, kwa kiiva wágamanyaga gina gakwali mu numbula saanave. 25 Khanji asikhadobweshe umuunu yoyoona kimujovela gina avaanu vihiiva, kwa kiiva wámanyaga goona gina gakwali mu numbula sa vaanu woona.