Luuka 20

UYeesu iposewa ulwa wutawulilwa waakwe

(Mataayo 21:23-27; Maluko 11:27-33)

1 UYeesu akhandi ikivamanyisa avaanu mu lukeeke lwa nanda imbaagule iya kifuunyila, na kivajovela avaanu iMola iNofu. Ilijuva limonga, avatambule avakhome, avamanyisaaji va ndaji sa Musa na vakhome va Vayahuudi vamulutilaga. 2 Vamuposiise kiija, “Tujovela, aga gina wiigaha, wiigaha kwa wutawulilwa wa naani? Yu naani yuna wákupeela uwutawulilwa uwo?”

3 Wávajovela wáaja, “Na yuune nisivapose. Munijovele, 4 uwutawulilwa wa Yohana uwa kitwinia avaanu wahumaga kwi? Wahumaga kwa Nguluvi awu kwa vaanu?” 5 Baheene vaposania veene vaaja, “Nda timuyanshe kiija, wahumaga kwa Nguluvi, asitupose kiija, ‘Lino kwashi musikhamuhuviliile?’ 6 Leelo nda tijove wápelwagwa na vaanu, avaanu woona ava, vasituhude, kwa kiiva vakhandi vihuviilila kiija uYohana akhandi mukuwamalago.” 7 Kuunyuma, vamujovela vaaja, “Tisimeenye uwutawulilwa uwo kuna wahumaga.” 8 UYeesu wávajovela wáaja, “Na yuune, nisikivajovela kiija yu naani anipeelile uwutawulilwa uwa kisenga aga.”

Ishihwano sha valimaaji avadehi

(Mataayo 21:33-46; Maluko 12:1-12)

9 Baheene uYeesu wáyansa kivajovela avaanu ishihwano ishi, wáaja, “Akhandi akwali umuunu yumonga yuna wálimaga umugunda gwakwe na kivyala amasabiibu. Wávakhoodesa avalimaaji umugunda gula, baheene umwene wáshuula, wáakhala nsiku nyinshi. 10 Pina lwafikha uluhaavi ulwa kiyava amasabiibu, wámufilikha umuvanda kwa valimaaji vala, kiija amutoolele iligawo lyakwe ilya nkungulo. Leelo avalimaaji vala vamutova na kimudaga, bila kimupeela shiinu.

11 “Umuunu yula wámufilikha khanji umuvanda uyunji. Uyo woope vamutova na kimuyegula, khanji vamudaga bila kimupeela shiinu. 12 Baheene wámufilikha uwa wutatu. Uyo woope vamutesa, vamudaga kunja ya mugunda.

13 “Kuunyuma, umunya mugunda wáaja, ‘Lino nisiigahe shishi? Uluhaavi ulu nisimufilishe umwanangu umugani! Pamonga uyu vasimutiile.’ 14 Umwanaakwe wáwuukha iiluta, leelo avalimaaji vala pina vamwaga, vajovelana vaajova, ‘Uyu yumwene umunya kihaala umugunda ugu. Lino, timubude, baheene uwuhaasi waakwe wuve weesu.’ 15 Vamudaga kunja ya mugunda, vamubuda.”

Baheene uYeesu wávaposa, “Lino, muhiiva umunya mugunda yula asivagahe shi avalimaaji vala? 16 Asiyinse kivabuda, nagu mugunda gula asivakhoodese avaanu vanji!” Avaanu vaganaga kipulikha amaswi ago, vaaja, “Ago gasikhawonekhaga hata lijuva limo!” 17 Leelo uYeesu wávaloleela, wávaposa wáaja, “Lino, aMayandikhwa aga gana luganulo lushi?

‘Ilingʼanga lina avasengaaji valikhaanaga,

lilyene liveele lingʼanga likhome ilya ku mbogonyo ya luutu lwa nanda.’

18 “Umuunu nda agwile pa lingʼanga ilyo, asidenyenkhane, khanji umuunu yoyoona yuna lisimugwile, lisimuhaawule mandu.”

19 Baheene avamanyisaaji va ndaji sa Musa na vatambule avakhome, vaamanya kiija ishihwano shila shikhandi shikivajova vaveene. Baheene vaava visakula kimukhata bahala, leelo vavatiilaga avaanu.

Kihomba ikhoodi kwa Kayisaali

(Mataayo 22:15-22; Maluko 12:13-17)

20 Baheene avakhome va Vayahuudi vaava vikimusigama uYeesu. Vavafilikhaga avaanu vina vayigahaga ngaja vagolofu, kiija vamuyangalilaje gina iigaha. Vakhandi viigaha ilyo kiija vamanye amahiiva gaakwe, baheene vamukhate na kimutwala kwa mukhome wa nyi vamuhije.

21 Baheene avaanu vala vamuposa uYeesu vaaja, “Mumanyisaaji, timeenye kiija wiijova na kimanyisa aga shiyooli. Khanji usikimutiila hata muunu yuna ana nsengo nkhome, leelo wimanyisa ishiyooli kwa vaanu kiyinatila shina isakula uNguluvi. 22 Wuli, indaji sa Musa sikitutawula kihomba ikhoodi kwa Kayisaali, umutwa wa Valuumi, awu ndaali?”

23 Leelo uYeesu wáamanya uwumyansi waanave, wávajovela wáaja, 24 “Muniwonense isilinje iya dinaali. Ishimanyilo ishi na mayandikhwa aga gina gakwali mu silinje iyi ga naani?” Aveene vamugomosesa vaaja, “Ga Kayisaali, umutwa wa Valuumi.” 25 Baheene uYeesu wávajovela wáaja, “Lino, ifya Kayisaali mupeelaji uKayisaali, ifya Nguluvi mupeelaji uNguluvi.”

26 Avaanu vala vaswigaga mandu iliyankho lya Yeesu, vasisima tototo. Vapootwa ulujowo ulwa kimukhatila, kwa kiiva ya maswi gina wávajovaga pa vaanu.

Ulufyukho lwa vaanu vina vafwile

(Mataayo 22:23-33; Maluko 12:18-27)

27 Baheene aVasadukaayo vina vakhandi viija kusiina kifyukha vina vafwile, vaaluta kwa Yeesu vamuposa vaaja, 28 “Mumanyisaaji, uMusa wátuyandishilaga indaji kiija, umuunu nda afwe na kimulekha umudala angaya mwana, yisakulwa umaame amuhaale umufwile uyo, baheene amusavile avaana umaame yuna wáfwisaga. 29 Lino, vakhandi vakwali avanyalukholo fungati, vina vakhandi vaana va wiihe yumo. Uwa wutasi wátoola umudala, wáafwa angaya mwana. 30 Uwa wuvili, [wámuhaala umufwile yula, woope wáafwa angaya mwana]. 31 Kuunyuma uwa wutatu, woope wámuhaala, wáafwa. Yaava shishila ku woona fungati. Avaanu woona vala vamutoolaga umudala yula, leelo woona vafwisaga bila kilekha umwana. 32 Baheene kuwudugo, uwashimaayi yula woope wáafwa. 33 Lino wuli, ilisiku lya kifyukha avaanu woona, umufwile yula akhava mudala wa naani? Kiiva wátolwagwa na vagoosi woona fungati!”

34 UYeesu wávajovela wáaja, “Avaanu va lino, vitoola na kitoolwa. 35 Leelo avaanu vina uNguluvi ikivaaga kiija visakulwa kifyusiwa kihuma kwa vina vafwile na kikhala mu nyi imya, awo vasikhatoola, wala kitoolwa khanji. 36 Lumo na ago vasikhafwa khanji, kwa kiiva vakhava ngaja avamalayikha. Viiva vaana va Nguluvi, kwa kiiva vafyusiwa kihuma kwa vina vafwile.

37 “Woope uMusa wájovile kiija vina vafwile vakhafyusiwa. Wájovile ilyo pala pa musita guna gukhandi guveekha, wámutambulaga uMutwa uNguluvi, ‘Nguluvi wa Abulahamu, Nguluvi wa Isaaka, khanji Nguluvi wa Yaakobo.’ 38 Umwene asili Nguluvi wa vina vafwile, leelo Nguluvi wa vina wuumi. Kiiva, kunyaakwe avaanu woona wuumi.”

39 Apo, avamanyisaaji avanji va ndaji sa Musa vaaja, “Mumanyisaaji, walogola wunofu!” 40 Kiyansa apo, vaava vitiila kimuposa.

UMukulusaaji mwana wa naani?

(Mataayo 22:41-46; Maluko 12:35-37)

41 Baheene uYeesu wávaposa wáaja, “Aasi, kwashi avaanu viijova, uMukulusaaji yuna uNguluvi wátahisaaga kimufilikha, Lusawo lwa mutwa uDawudi? 42 Kwa kiiva uDawudi yumwene, wáyandikhaga mu litaafili lya Sabuli, wájovile ndeeni,

‘UMutwa uNguluvi wámujeele uMutwa wangu,

“Khala ku liwokho lyangu ilya kundiilo,

43 mbakha pina nikhava nakutanga

uvamene avalugu vaakho na kivatema.”’

44 “Lino, nda uDawudi ikimutambula uMukulusaaji kiija, Mutwa waakwe, uMukulusaaji akwiliile wuli kiiva mwanaakwe?”

Ilipavilo lya vamanyisaaji va ndaji sa Musa

(Mataayo 23:1-36; Maluko 12:38-40; Luuka 11:37-54)

45 Avaanu woona pina vikimupuliisa uYeesu, umwene wávajovela avamanyisiwa vaakwe wáaja, 46 “Muyivavalaje na vamanyisaaji va ndaji sa Musa. Vidobokha kijenda jenda vafwalile inkhansu inali na kihunjilwa na vaanu kwa kitiilwa pa munaada. Pina vali mu nanda isa kifuunyila, visakula kikhala mu fitengo ifya kumwandi. Mu fiwungo, viikhala mu fitengo ifya kitiilwa. 47 Avaanu ava viipokha ifiinu ifya vina vafwiliilwe! Khanji mu wumyansi waanave, vifuunya amafuunyo matali, baheene avaanu vave vikivaaga vagolofu. Ilijuva lya mukhole, uNguluvi akhavalafya mandu!”