Mataayo 22

Ishihwano isha vahensa va shiwungo

(Luuka 14:15-24)

1 UYeesu wálogolaga khanji na Vafalisaayo na vakhome va vatambule kwa fihwano ifinji wáaja, 2 “UWutwa wa Nguluvi wuhwaneene ni shihwano ishi. Akhandi akwali umutwa yumonga yuna wápinyanjile ishiwungo sha mwanaakwe isha kitoola. 3 Ndeeno, wávayaana vinshi vayinse. Uluhaavi ulwa shakiilya lwaganile kifikha, wávafilikha avavanda vaakwe kivashemeela avaanu vala vafishe ku shiwungo, leelo vakhaanaga kiluta.

4 “Baheene wávafilikha khanji avavanda avanji, wávajovela wáaja, ‘Lutaji muvajovele vala vina nikhavayaanile kiija, “Nifipinyanjile ifiinu fyona ifya shiwungo. Nibudile ingʼombe sangu sina sineneepe mandu. Yinsi ku shiwungo!”’ 5 Leelo aveene vasikhatunile. Vawuukha, uyunji wáaluta ku mugunda gwakwe, uyunji ku nsengo saakwe. 6 Avanji vavakhata avavanda vaakwe vala, vavatova mandu na kivabuda. 7 Lino umutwa yula wáganile kipulikha gina gasenjekha kwa vavanda vaakwe, wákhalala mandu. Wávafilikha avasulukhali vaakwe, vaaluta kivabuda avabudaaji vala na kinyaanya amajumbi gaanave. 8 Baheene umutwa yula wávajovela avavanda vaakwe avanji wáaja, ‘Ifiinu fya shiwungo fipinyanjiilwe, leelo vina nikhavayaanile vasisakulwa kiyinsa. 9 Lino lutaji mu lijumbi lyona, muvajovele woona vina musitangaane nawo kiija, vayinse ku shiwungo.’ 10 Avavanda vala vaaluta mu lijumbi lyona na kivayaana avaanu woona vina vakhandi vitangaana nawo avanansi na vina vasili vanansi. Baheene avahensa vaamema mu nanda ya shiwungo.

11 “Leelo umutwa yula wáganile kiyinjila mukhati kivaloleela avahensa, wámwaga umuunu yumonga yuna asifwele umwenda gwa shiwungo. 12 Wámuposa wáaja, ‘Wee mumanyi, wayinjila wuli muno, usifwele umwenda ugwa shiwungo?’ Leelo umuunu yula wápotiilwe ilya kilogola. 13 Lino umutwa yula wávajovela avavanda vaakwe wáaja, ‘Mupinyi umuunu uyu amagulu na mawokho, mumutaaje kunja ku nshiisi. Umo muna avaanu vakhakhoola na kigegejula ameeno kwa kiiva ya wuvafi wukhali.’ 14 Kiiva uNguluvi ikivayaana avaanu vinshi kiyinjila mu wutwa waakwe, leelo vina vabagwilwe, vasheefu.”

AVafalisaayo vikimujela uYeesu ulwa kihomba ikhoodi

(Maluko 12:13-17; Luuka 20:20-26)

15 Baheene aVafalisaayo vawuukha pala, vaaluta kijovana shina vasimusigame uYeesu mu maswi gaakwe, pina ilogola. 16 Ndeeno vavafilikha kwa Yeesu avamanyisiwa vaanave lumo na vanandeje va mutwa uHelode, vaaluta, vamuposa vaajova, “Wee Mumanyisaaji, timeenye kiija owe uli muunu wa shiyooli, khanji wimanyisa insila ya Nguluvi mu shiyooli. Usikimutiila muunu, hata umuunu yuna ana nsengo nkhome. 17 Lino tujovela shina wiiwona. Wuli, indaji sa Musa sikitutawula kihomba ikhoodi kwa Kayisaali, umutwa wa Valuumi, awu ndaali?” 18 Leelo uYeesu wámanyaga ulugulumilo lwanave uluvi, wávayankha wáaja, “Omwe muli vamyansi, kwashi mukinijela? 19 Nisooneli isilinje yina mwihomba ikhoodi.” Woope vamutwalila isilinje. 20 Baheene uYeesu wávaposa wáaja, “Ishimanyilo ishi na mayandikhwa aga gina gakwali mu silinje iyi ga naani?” 21 Aveene vamugomosesa vaaja, “Ga Kayisaali, umutwa wa Valuumi.” UYeesu wávajovela wáaja, “Lino, ifya Kayisaali mupeelaji uKayisaali, ifya Nguluvi mupeelaji uNguluvi.” 22 Vaganile kipulikha amayankho ga Yeesu, vaswigaga mandu. Baheene vamulekha bahala, vawuukha.

Ulufyukho lwa vaanu vina vafwile

(Maluko 12:18-27; Luuka 20:27-40)

23 Baheene aVasadukaayo, vina vakhandi viija kusiina kifyukha vina vafwile, vaaluta kwa Yeesu vamuposa vaaja, 24 “Wee Mumanyisaaji, uMusa wátulajisaaga mu ndaji kiija, umuunu nda afwe na kimulekha umudala angaya mwana, yisakulwa umaame amuhaale umufwile uyo, baheene amusavile avaana, umaame yuna wáfwisaga. 25 Uluhaavi lumonga, panyeesu apa akhandi akwali umuunu yumonga yuna akhandi na vamaame fungati. Uwa wutasi wátoolaga umudala wáafwa, wámulekha umudala angaya mwana. Lino umaame uwa wuvili, wámuhaala uwashimaayi yula umufwile. 26 Woope wáafwa angaya mwana. Kuunyuma uwa wutatu, woope wámuhaala, wáafwa. Yaava shishila ku woona fungati. Avaanu woona vala vamutoolaga umudala yula, leelo woona vafwisaga bila kilekha umwana. 27 Baheene kuwudugo uwashimaayi yula, woope wáafwa. 28 Lino wuli, ilisiku lya kifyukha avaanu woona, umufwile yula akhava mudala wa naani? Kiiva wátolwagwa na vagoosi woona fungati!”

29 UYeesu wávayankha wáaja, “Omwe muyajile, kiiva musiimanya aMayandikhwa aManofu na musiimanya ingufu sa Nguluvi. 30 Kiiva pina vakhafyukha vina vafwile, kukhava kusiina kitoola wala kitoolwa, leelo vakhava ngaja avamalayikha vina vali kwa Nguluvi. 31 Leelo imola ya kifyukha vina vafwile, wuli, musiyimbile mu Mayandikhwa aManofu, pina uNguluvi wáyiwonensiise kwa Musa pala pa musita pina pakhandi piveekha umooto? UNguluvi wámujovile wáaja, 32 ‘One yuune Nguluvi wa Abulahamu, Nguluvi wa Isaaka khanji Nguluvi wa Yaakobo.’ Umwene asili Nguluvi wa vina vafwile, leelo Nguluvi wa vina wuumi!” 33 Shila ishipuga sha vaanu shina shikhandi shikwali shaganaga kipulikha ago, shaswigaga mandu kwa mamanyiso gaakwe.

UYeesu iganula indaji inkhome

(Maluko 12:28-34; Luuka 10:25-28)

34 AVafalisaayo vaganaga kipulikha kiija, uYeesu avavateemye aVasadukaayo, vatangaana lumo, vaaluta kwa Yeesu. 35 Yumonga akhandi mumanyisaaji wa ndaji sa Musa, wámuposa uYeesu kwa kimujela wáaja, 36 “Mumanyisaaji, ndaji nshi inkhome mu ndaji soona?” 37 UYeesu wámuyankha wáaja, “Muganaga uMutwa uNguluvi waakho kwa numbula yaakho yoona, na kwa mahiiva gaakho goona na kwa luhala lwakho loona. 38 Indaji iyi yiyeene nkhome kishila indaji isinji soona, khanji yiyeene ya wutasi. 39 Indaji ya wuvili yihwaneene ni ndaji ya wutasi, yoope yiijova ndeeni, ‘Umuganaje umuyaago ngaja shina uyiganile yuuwe.’ 40 Indaji soona sa Musa na mamanyiso ga vakuwamalago sihuviilila indaji isi sivili.”

UMukulusaaji mwana wa naani?

(Maluko 12:35-37; Luuka 20:41-44)

41 Uluhaavi luna aVafalisaayo vala vashaanali vapikungaanile pala, uYeesu wávaposa wáaja, 42 “Muhiiva wuli ulwa Mukulusaaji yuna uNguluvi wátahisaaga kimufilikha. Wuli, lusawo lwa naani?” Vamuyankha vaajova, “Lusawo lwa mutwa uDawudi.” 43 UYeesu wávaposa wáaja, “Ago nda ga shiyooli, kwashi uDawudi uluhaavi luna ilongosewa nu Numbula wa Nguluvi, iijova kiija uMutwa yula yuna lusawo lwakwe yumwene woope Mutwa waakwe? Kwa kiiva uDawudi wájovile ndeeni,

44 ‘UMutwa uNguluvi wámujeele uMutwa wangu wáaja,

“Khala ku liwokho lyangu ilya kundiilo,

mbakha pina nikhava nakutanga

uvamene avalugu vaakho na kivatema.”’

45 “Nda uDawudi ikimutambula uMukulusaaji kiija, Mutwa, lino uMukulusaaji akwiliile wuli kiiva lusawo lwa Dawudi.” 46 Kusiina umuunu yuna wámuyankhaga lyolyona uYeesu khanji, kihuma uluhaavi ulo kusiina umuunu yuna wájesaaga kimuposa amaswi aganji.