Mataayo 20

Ishihwano isha kivahomba avasenga nsengo

1 “UWutwa wa Nguluvi wuhwaneene ni shihwano ishi. Akhandi akwali umunya mugunda yuna wáyilaavile mandu kiluta kivasakula avasenga nsengo va kisenga mu mugunda gwakwe. 2 Wáganaga kivapata, wápulinkheene nawo kimuhomba shila muunu ilihombo lya lijuva limo, baheene wávatwala ku mugunda gwakwe. 3 Wápoola mu mugunda uluhaavi lwa lisala lya wutatu ulwamilaawu, wávaaga avaanu avanji vayiimile pa munaada, vangaya nsengo. 4 Wávajovela wáaja, ‘Na yuumwe luti kisenga insengo mu mugunda gwangu, one nisivahombe shina yisakulwa.’ 5 Wápoola khanji mu mugunda uluhaavi lwa lisala lya mutanda ni lisala lya gonja, wáagaha shishila. 6 Uluhaavi lwa lisala lya ishumi na limo pashinyiijuva wápoola mu mugunda, wávaaga avaanu avanji vayiimile. Wávaposa wáaja, ‘Kwashi muhwele muyiimile apa muvagaya nsengo?’ 7 Woope vamuyankha vaaja, ‘Kusiina umuunu uwa kitupeela insengo.’ Umwene wávajovela wáaja, ‘Lutaji na yuumwe musenje insengo mu mugunda gwangu.’

8 “Pashinyiijuva, umunya mugunda yula wámujovela umuyimililaaji uwa nsengo yaakwe wáaja, ‘Vashemeela avasenga nsengo woona uvahombe. Pina ukivahomba, talaga vina vayinsa kuwudugo, baheene uvahombaje vina vaatala kiyinsa.’ 9 Baheene vayinsa avasenga nsengo vala vina vayinsaga shinyiijuva, vaposheela shila muunu ilihombo lya lijuva limo. 10 Vaganaga kiyinsa avasenga nsengo vina vatalaga kifikha, vakhahiivile kiija vasiposheele nyinshi mandu kivashila avayaanave vina vayinsaga ku mugunda pashinyiijuva. Leelo woona vahombwagwa ihela yimo yiyila iya lihombo lya lijuva limo. 11 Baheene pina vaposheela, vayansa kingʼuula kwa munya mugunda viija, 12 ‘Avaanu vala vasenga insengo kwa lisala limo shiishi, lino kwashi watupeela kwa kitujelanisa lumo nawo, kuno ose tasenga insengo nkhamu mandu mu lijuva lyona?’ 13 Umunya mugunda yula wámugomosesa yumonga mu vaanu vala wáaja, ‘Wee mumanyi, one nisakufumba shoshoona. Wuli, tisaava tipulinkheene kiija usisenje insengo iya lihombo lya lijuva limo? 14 Toola ihela yaakho iyi, wuukha apa! One nalamula kimuhomba umuunu uyu uwa kuwudugo ilihombo lina lilingeene ni lyakho. 15 Wuli, nisiyiitikhwa ni ndaji kisenjela uwusi wangu ngaja shina nidobweshe? Awu una shooyo kwa kiiva one nikivapeela mandu avanji?’” 16 Ndeeno uYeesu wálogolaga khanji wáaja, “Avaanu vina vali kuwudugo, vakhava va wutasi. Avaanu vina vali kuwutasi vakhava va wudugo.”

UYeesu ilogola ulwa wutatu shina asiifwe na kifyukha

(Maluko 10:32-34; Luuka 18:31-34)

17 UYeesu pina akhandi ishuula iiluta ku Yelusalemu, wávatoolaga avamanyisiwa vaakwe ishumi na vavili wáaluta nawo kulubali, wávajovela wáaja, 18 “Puliisi! Tiiluta ku Yelusalemu, ukho kukwene one Lusawo lwa Muunu niiluta kidoolelwa kwa vatambule avakhome na vamanyisaaji va ndaji sa Musa. Awo vasinihije kiija nibudwe. 19 Kuwudugo vasinitawule ku vaanu vina vasili Vayahuudi, kiija vanibede, vanitove na majalidi na kinikhomeelela pa musalaaba. Leelo mu lisiku ilya wutatu, uNguluvi akhanifyusa.”

Ililombo lya maayi wa Yaakobo nu Yohana

(Maluko 10:35-45)

20 Baheene umudala wa Sebedayo na vanaakwe wálutile kwa Yeesu, umaayi yula wáfugama na kilomba atanjwe. 21 UYeesu wámuposa wáaja, “Wisakula nikugahile shishi?” Woope wámuyankha wáaja, “Nilomba uvatawule avanangu vavili ava kiija, yumonga akhale ulubali lwakho ulwa kundiilo, uyunji ulubali lwakho ulwa kunshiji ku Wutwa waakho.” 22 UYeesu wávayankha wáaja, “Musimeenye gina mwilomba. Wuli, mukwiliile kingʼwelela ikhoomasi iya malava yina nisingʼwelele one?” Vamugomosesa vaajova, “Tikwiliile.” 23 UYeesu wávajovela wáaja, “Shiyooli musingʼwelele ikhoomasi iya malava yina one nisiilave, leelo kikhala ku liwokho ilya kundiilo awu ilya kunshiji, wusili wutawulilwa wangu. UNguluvi yumwene akhavapeela vina avavishiile shankhaani.”

24 Avamanyisiwa avanji vala ishumi vaganile kipulikha iso, vavakhalalila avanyalukholo vavili vala. 25 Baheene uYeesu wávashemeela woona, wávajovela wáaja, “Mumeenye kiija avakhome va vaanu va mu nyi iyi vidobokha kiiva nu wutawulilwa kwa vaanu vaanave, khanji avakhome vaanave vikivakhamiilisa kisenga insengo kwa ngufu. 26 Leelo yisikhaveesaga ndeeno kunyeenyu. Umuunu yoyoona yuna isakula kiiva mukhome kunyeenyu, isakulwa kivasenjela woona. 27 Khanji, umuunu yoyoona yuna isakula kiiva mukhome weenyu, uyo aveesaje ikivasenjela. 28 Shiisho ndeeno one Lusawo lwa Muunu, nisikhayinsile kiija vanisenjele, leelo nayinsaga kivasenjela avaanu na kiwuyasa uwuumi wangu, baheene nivakuluse avaanu vinshi.”

UYeesu iiponia avapofu vavili

(Maluko 10:46-52; Luuka 18:35-43)

29 UYeesu na vamanyisiwa vaakwe vaafikha mu lijumbi lya Yeliko. Pina vakhandi viwuukha mu lijumbi lila, ishipuga shikhome sha vaanu shikhandi shikimufwata. 30 Avapofu vavili vakhalaga mulubali lwa nsila yina uYeesu akhandi iishila. Ndeeno pina vapulikha kiija yu Yeesu yuna iishila, vashemeela kwa shawuti nkhome vaaja, “Wee Mutwa, Lusawo lwa mutwa uDawudi, utusungupile!” 31 Ishipuga sha vaanu vala shavakhajila kiija vasisime, leelo aveene vayitenekha kishemeela viija, “Wee Mutwa, Lusawo lwa mutwa uDawudi, utusungupile!” 32 UYeesu wáyiima, wávashemeela na kivaposa wáaja, “Mwisakula nivagahile shishi?” 33 Baheene avapofu vala vamuyankha vaaja, “Wee Mutwa, tisakula ameeho geesu galoleele.” 34 Baheene uYeesu wávasungupila, wávapyasa ameeho gaanave. Baaho, ameeho gaanave galoleela, kuwudugo, vamufwata uYeesu.