Mataayo 19

UYeesu imanyisa ulwa litwale nu lwa kilekhana

(Maluko 10:1-12)

1 UYeesu wáganaga kimala kilogola amaswi ago, wáwuukha ku Galilaya, wáaluta ku nyi ya Yudeya ku mwambwa ya mukhoga gwa Yolodani. 2 Avaanu vinshi vamufwata, woope ukho wávaponia woona vina vakhandi vatamu.

3 Baheene aVafalisaayo vamonga vaaluta kimujela uYeesu vaaja, “Wuli, umugoosi iyiitikhwa kimulekha umudala waakwe, kwa likhosa lyolyona lila?” 4 UYeesu wávayankha wáaja, “Wuli, musinayimbe aMayandikhwa aManofu? Yiyandiikhwe kiija kihuma pashiyanso, ‘UNguluvi wávawumbaga umugoosi nu mudala.’ 5 Khanji uNguluvi wáaja, ‘Lino, kwa kiiva ya ilyo, umuunu asimuleshe uwiihe nu maayi waakwe, baheene asiikhale nu mudala waakwe, vavili ava vasiive muvili gumo.’” 6 Baheene uYeesu wáaja, “Ndeeno ava vasili vavili, leelo vali muvili gumo. Kiiva shina wálunganiaga uNguluvi, umuunu asikhabagulaniaga.” 7 AVafalisaayo vala vamuposa khanji vaaja, “UMusa wáyitikhaga mu ndaji kiija, umugoosi amupeelaje umudala waakwe ibalula ya kimulekha. Kwashi wágahaga ndeeno?” 8 UYeesu wávayankha wáaja, “UMusa wákundaga kiija muvalekhaje avadala veenyu kwa kiiva ya numbula seenyu nyuumu, leelo kihuma ulwamwandi ulwa kiwumbwa, ulu lusikhandi lugulumilo lwa Nguluvi. 9 Nikivajovela kiija, nda umuleshe umudala waakho shiishi hela asiwafwishe, ulute utoole khanji, wiiva wawaafukha.”

10 Baheene avamanyisiwa vaakwe vamujovela vaaja, “Nda shiyooli gali ndeeno kwa mugoosi nu mudala, shiba kilekha kitoola!” 11 UYeesu wávayankha wáaja, “Vasili vaanu woona vina vakwiliile kiliyanushila iliswi ili, leelo vala hela vina vayimiliilwe nu Nguluvi. 12 Kiiva kuna fipingansila finshi fina fisivila kitoola. Avanji vasikwiliile kitoola, kwa kiiva vasawaagwa vagumba. Avanji vasitoola, kwa kiiva avaanu vavagahile kiiva vayiipe vasikhasavaga. Vakwali avanji vina vasitoola kwa kiiva vikiyihumya kisenga insengo ya Wutwa wa Nguluvi. Umuunu yoyoona yuna akwiliile kiliyinatila iliswi ili, aliyinatile.”

UYeesu ikivayimiilila avaana avanangʼana

(Maluko 10:13-16; Luuka 18:15-17)

13 Avaanu vamonga valutile na vaana avanangʼana kwa Yeesu kiija, avaviishile amawokho pa matwe gaanave, avayimiilile na kivafuunyila kwa Nguluvi. Leelo avamanyisiwa vaakwe vavakhajila avaanu vala. 14 Leelo uYeesu wávajovela wáaja, “Valeshi avaana avanangʼana vayinse kunyangu, musikhavakhaanaji, kwa kiiva uWutwa wa Nguluvi wuli kwa vaanu vina vali ngaja avaana ava.” 15 UYeesu wávaviishila amawokho gaakwe, wávayimiilila avaana vala, baheene wáwuukha uluvala lula.

Iliposo lya muunu umunya wusi

(Maluko 10:17-31; Luuka 18:18-30)

16 Umudiimi yumonga wálutile kwa Yeesu wámuposa wáaja, “Wee Mumanyisaaji, nigahe manofu mashi baheene nipate uwuumi wa shiluta?” 17 UYeesu wámuyankha wáaja, “Kwashi ukiniposa one ulwa manofu? Loleela, yu Nguluvi mwene duguli yumwene munofu! Leelo nda wisakula kipata uwuumi wa shiluta, yinatilaga indaji sa Nguluvi.” 18 Umudiimi yula wámuposa wáaja, “Ndaji nshi?” Baheene uYeesu wámugomosesa wáaja, “Usikhabudaga, usikhawafukhaga, usikhahiijaga, usikhagabedelaga aga wudehi. 19 Uvatiilaje uwiiho nu maayi waakho, khanji umuganaje umuyaago ngaja shina uyiganile yuuwe.” 20 Umudiimi yula wáaja, “Indaji soona iso nisikheete. Nigahe shishi ishinji shina shinipootile?” 21 UYeesu wámujovela wáaja, “Nda wisakula kiwupata uwuumi wa shiluta, lutaga uguse ifiinu fyona fina unafyo, ihela sina usiipate, uvagavile avapiina. Nda ugahe ndeeno, usiive wayivishilisa uwusi kwa Nguluvi. Baheene uyinse, unifwataje.” 22 Baheene umudiimi yula wáganile kipulikha ago, wáwuushile pala asugumiilwe, kwa kiiva akhandi ana wusi winshi mandu.

23 Baheene uYeesu wávajovela avamanyisiwa vaakwe wáaja, “Shiyooli nikivajovela, yikhava lukhamu mandu umunya wusi kiyinjila mu Wutwa wa Nguluvi. 24 Nikivajovela khanji kiija, lupeefu ingamiya kishila mu mulindi gwa muhonelo, kulikho umunya wusi kiyinjila mu Wutwa wa Nguluvi.” 25 Avamanyisiwa vala vaganile kipulikha ndeeno, vaswiga mandu, vamuposa vaaja, “Lino, yu naani yuna akwiliile kikwava uwuumi wa shiluta?” 26 UYeesu wávahonekha, wávajovela wáaja, “Ku vaanu lisikwiliile, leelo kwa Nguluvi likwiliile, kiiva kwa Nguluvi goona gisenjekha.”

27 UPetulo wámujovela wáaja, “Loleela, ose tifileshile ifiinu fyona, tikikufwata owe! Lino tisiipate shishi?” 28 UYeesu wávayankha wáaja, “Shiyooli nikivajovela kiija, one Lusawo lwa Muunu pina nikhava Mutwa wa nyi imya iya Nguluvi, nikhakhalila ishitengo shangu isha kihijila, na yuumwe muna munifwatile, mukhakhala mu fitengo ishumi na fivili ifya shitwa, mukivahiga avaanu va fikholo ishumi na fivili ifya Isilaheli. 29 Shila muunu yuna ayileshile inanda awu umaame awu uwulumbu waakwe awu uwiihe awu umaayi waakwe awu avanaakwe awu amagunda gaakwe kwa kiiva yangu, akhaposheela finshi kishila ifiinu ifyo. Khanji akhawupata uwuumi wa shiluta. 30 Leelo, avaanu vinshi vina vali kuwudugo, vakhava va wutasi. Avaanu vina vali kuwutasi, vakhava va wudugo.”