Maluko 10

UYeesu imanyisa ulwa litwale nu lwa kilekhana

(Mataayo 19:1-12; Luuka 16:18)

1 UYeesu wáwuushile pala iiluta ku nyi ya Yudeya na ku mwambwa ya mukhoga gwa Yolodani. Khanji ifipuga fya vaanu vaaluta kwa mwene, wávamanyisa ngaja shina yikhandi ngʼoma yaakwe. 2 Baheene aVafalisaayo vamonga vaaluta kimujela uYeesu vaaja, “Wuli, umugoosi iyiitikhwa kimulekha umudala waakwe?” 3 UYeesu wávagomosesa wáaja, “UMusa wávalajisaaga shishi?” 4 Vamugomosesa vaaja, “UMusa wáyitikhaga mu ndaji kiija, umugoosi amupeelaje umudala waakwe ibalula ya kimulekha.”

5 UYeesu wávajovela wáaja, “UMusa wáyandikhaga indaji iyo, kwa kiiva ya numbula seenyu nyuumu. 6 Leelo pashiyanso uNguluvi wávawumbaga umugoosi nu mudala. 7 Khanji uNguluvi wáaja, ‘Lino, kwa kiiva ya ilyo, umuunu asimuleshe uwiihe nu maayi waakwe, baheene asiikhale nu mudala waakwe. Vavili ava, vasiive muvili gumo.’ ” 8 Baheene uYeesu wáaja, “Ndeeno ava vasili vavili, leelo vali muvili gumo. 9 Kiiva shina wálunganiaga uNguluvi, umuunu asikhabagulaniaga.”

10 Vaganaga kiyinjila khanji mu nanda, avamanyisiwa vaakwe vamuposa ulwa mola iyo. 11 UYeesu wávajovela kiija, “Umuunu yoyoona yuna ikimulekha umudala waakwe iiluta kitoola khanji, iiva wáwaafukha. 12 Woope umudala yuna ikimulekha umugoosi waakwe na kitoolwa nu mugoosi uyunji, iiva mwafu kwa mugoosi uwa wutasi.”

UYeesu ikivayimiilila avaana avanangʼana

(Mataayo 19:13-15; Luuka 18:15-17)

13 Ilijuva limonga avaanu vakhandi vikimuleetela uYeesu avaana vanangʼana, kiija avaviishile amawokho gaakwe baheene avayimiilile. Avamanyisiwa vaakwe vaganile kilyaga ilyo, vayansa kivakhajila avasafi va vaana. 14 UYeesu wáganaga kivaaga avamanyisiwa vaakwe viigaha ndeeno, wákhalalaga. Wávajovela kiija, “Valeshi avaana avanangʼana vayinse kunyangu, musikhavakhaanaji, kwa kiiva uWutwa wa Nguluvi wuli kwa vaanu vina vali ngaja avaana ava. 15 Shiyooli nikivajovela, umuunu yoyoona yuna asikimuhuviilila uNguluvi ngaja umwana umunangʼana, asikwiliile kiyinjila mu Wutwa wa Nguluvi hata lijuva limo.” 16 Baheene wávakumbaatila avaana vala, wávaviishila amawokho gaakwe, wávayimiilila.

Iliposo lya muunu umunya wusi

(Mataayo 19:16-26; Luuka 18:18-30)

17 UYeesu na vamanyisiwa vaakwe vayansa kiwuukha, baheene umuunu yumonga wáyinsa luvilo, wáfugama pa Yeesu. Wámuposa uYeesu wáaja, “Mumanyisaaji munofu, nigahe shishi baheene nipate uwuumi wa shiluta?” 18 UYeesu wámugomosesa wáaja, “Kwashi ukinijova kiija nili munofu? Kusiina yuna munofu, leelo yu Nguluvi mwene duguli. 19 Usimeenye indaji sa Nguluvi, ‘Usikhawafukhaga, usikhabudaga, usikhahiijaga, usikhagabedelaga aga wudehi, uvatiilaje uwiiho nu maayi waakho.’” 20 Umuunu yula wámugomosesa wáaja, “Mumanyisaaji, indaji iso soona nisikheete kihuma uwaana wangu.”

21 UYeesu wámuloleelaga, wámugana, wámujovela wáaja, “Ugayile shiinu shimo. Lutaga uguse ifiinu fyona fina unafyo, ihela sina usiipate, uvagavile avapiina. Nda ugahe ndeeno, usiive wayivishilisa uwusi kwa Nguluvi. Baheene uyinse, unifwataje.” 22 Umuunu yula wáganaga kipulikha ago, wágonja uweeni, wáwuukha pala asugumiilwe, kwa kiiva akhandi ana wusi winshi mandu.

23 UYeesu wávahonekha avaanu koona koona, wávajovela avamanyisiwa vaakwe wáaja, “Lukhamu mandu avanya wusi kiyinjila mu Wutwa wa Nguluvi!” 24 Avamanyisiwa vaakwe vaswiga kwa maswi gaakwe aga wukhamu uwa kihuluta mu Wutwa wa Nguluvi. UYeesu wávajovela khanji wáaja, “Vanangu, lukhamu mandu kihuluta mu Wutwa wa Nguluvi! 25 Lupeefu ingamiya kishila mu mulindi gwa muhonelo, kulikho umunya wusi kiyinjila mu Wutwa wa Nguluvi.”

26 Avamanyisiwa vaakwe vaswijile mandu, vaposeenie kiija, “Lino yu naani yuna akwiliile kikwava uwuumi wa shiluta?” 27 UYeesu wávahonekha, wávajovela wáaja, “Ku vaanu lisikwiliile, leelo kwa Nguluvi likwiliile, kiiva kwa Nguluvi goona gisenjekha.”

28 UPetulo wáyansa kimujovela wáaja, “Loleela, ose tifileshile ifiinu fyona, tikikufwata owe.” 29 UYeesu wáaja, “Shiyooli nikivajovela, shila muunu yuna ayileshile inanda awu umaame awu uwulumbu waakwe awu uwiihe awu umaayi waakwe awu avanaakwe awu amagunda gaakwe kwa kiiva yangu ni Mola iNofu, 30 uyo akhapeelwa ulutono lwa fiinu ifi mala ligana uluhaavi luulu. Akhapeelwa inanda, avamaame, avawulumbu, avanyina, avaana, na magunda. Amalava goope asiipate. Khanji nu luhaavi luna luyinsa akhapeelwa uwuumi wa shiluta. 31 Leelo avaanu vinshi vina vali kuwudugo, vakhava va wutasi. Avaanu vina vali kuwutasi, vakhava va wudugo.”

UYeesu ilogola ulwa wutatu shina asiifwe na kifyukha

(Mataayo 20:17-19; Luuka 18:31-34)

32 UYeesu na vamanyisiwa vaakwe vakhandi mu nsila viiluta ku Yelusalemu. UYeesu akhandi avalongwele, avamanyisiwa vaakwe na vaanu woona vina vakhandi valongoseenie vaswijile na kitiila. Baheene uYeesu wávatoola khanji vala ishumi na vavili, wáaluta nawo palubali wáyansa kivajovela imola sina sikhasa kimupata. 33 Wáaja, “Puliisi! Tiiluta ku Yelusalemu, ukho kukwene one Lusawo lwa Muunu niiluta kidoolelwa kwa vatambule avakhome na vamanyisaaji va ndaji sa Musa. Awo vasinihije kiija nibudwe. 34 Kuwudugo vasinitawule ku vaanu vina vasili Vayahuudi, kiija vanibede, vanitove na majalidi na kinikhomeelela pa musalaaba. Leelo mu lisiku ilya wutatu, nikhafyukha.”

Ililombo lya Yaakobo nu Yohana

(Mataayo 20:20-28)

35 Baheene uYaakobo nu Yohana, avashina Sebedayo, vamulutiile uYeesu vaaja, “Mumanyisaaji, tilomba utugahile lina tisakula.” 36 UYeesu wávaposa wáaja, “Musakula nivagahile shishi?” 37 Vamugomosesa vaaja, “Pina ukhatema mu Wutwa waakho uwa wutupikho, tilomba na yuuse tive noowe baaho, yumonga akhale ulubali lwakho ulwa kundiilo, uyunji ulubali lwakho ulwa kunshiji.”

38 UYeesu wávajovela wáaja, “Musimeenye gina mwilomba. Wuli, mukwiliile kingʼwelela ikhoomasi iya malava yina nisingʼwelele one, awu mukwiliile kitwinisiwa ulutwinisiwo lwa mfwa luna hambi nitwinisiwa one?” 39 Vamugomosesa vaajova, “Tikwiliile.” UYeesu wávajovela wáaja, “Shiyooli musingʼwelele ikhoomasi iya malava yina one nisiilave, na kiiva mu luhaavi ulukhamu ngaja one. 40 Leelo, kikhala ku liwokho ilya kundiilo awu ilya kunshiji, wusili wutawulilwa wangu. UNguluvi yumwene akhavapeela vina avavishiile shankhaani.”

41 Avamanyisiwa avanji vala ishumi vaganile kipulikha iso, vayansa kivakhalalila uYaakobo nu Yohana. 42 Baheene uYeesu wávashemeela woona, wávajovela wáaja, “Mumeenye kiija avakhome va vaanu va mu nyi iyi, vidobokha kiiva nu wutawulilwa kwa vaanu vaanave, khanji avakhome vaanave vikivakhamiilisa kisenga insengo kwa ngufu. 43 Leelo yisikhaveesaga ndeeno kunyeenyu. Umuunu yoyoona yuna isakula kiiva mukhome kunyeenyu, isakulwa kivasenjela woona. 44 Khanji, umuunu yoyoona yuna isakula kiiva mukhome weenyu, uyo aveesaje ikivasenjela omwe woona. 45 Kiiva one Lusawo lwa Muunu, nisikhayinsile kiija vanisenjele, leelo nayinsaga kivasenjela avaanu na kiwuyasa uwuumi wangu, baheene nivakuluse avaanu vinshi.”

UYeesu iiponia umupofu uBatimayo

(Mataayo 20:29-34; Luuka 18:35-43)

46 UYeesu na vamanyisiwa vaakwe vaafikha mu lijumbi lya Yeliko. Pina vakhandi viwuukha mu lijumbi lila, vamwajile umupofu yumonga akheele mulubali mu nsila, ilomba ifiinu. Akhandi itambulwa Batimayo, mushina Timayo. 47 Wáganile kipulikha kiija uYeesu uwa ku Nasaleti iishila, wáshemeela kwa shawuti nkhome wáaja, “Owe Yeesu, Lusawo lwa mutwa uDawudi, unisungupile!” 48 Avaanu vinshi vakhandi vikimukhajila kiija asisime, leelo umwene wáyonjelesaaga kishemeela mandu iijova, “Wee Lusawo lwa mutwa uDawudi, unisungupile!”

49 UYeesu wáyiima, wáaja, “Mushemeeli ayinse panu.” Vamushemeela umupofu yula vamujova, “Jimfyaga inumbula! Yiima, ikikushemeela.” 50 Baheene wátaaga umutote gwakwe, wáanyila, wáaluta kwa Yeesu. 51 UYeesu wámuposa wáaja, “Wisakula nikugahile shishi?” Umupofu yula wáaja, “Mumanyisaaji, nisakula kiloleela.” 52 UYeesu wámujovela wáaja, “Lutaga, waapona kiiva wayihuviilila.” Baaho umupofu yula wáloleela, wáyansa kimufwata uYeesu kuna iiluta.