Luuka 16

Ishihwano sha muyimililaaji musugu

1 UYeesu wávajovela avamanyisiwa vaakwe ishihwano ishinji wáaja, “Akhandi akwali umunya wusi yumonga, yuna akhandi nu muyimililaaji wa wusi waakwe. Umunya wusi yula wápulikha kiija umuyimililaaji waakwe uyo inanganga uwusi waakwe. 2 Baheene umunya wusi wámushemeela umuyimililaaji, wámujovela wáaja, ‘Njowo nshi isi sina napulikha isa nsengo yaakho? Vasa sina wapataga na sina watumilaga kwa kiiva usikwiliile khanji kiiva muyimililaaji!’

3 “Umuyimililaaji yula wáhiiva mu numbula yaakwe wáaja, ‘Umukhome wangu ikiniwuusa mu nsengo, lino nisiigahe shi? Kilima, nsengo nkhamu nisikwiliile. Khanji kilomba, niiwona nsoni. 4 Lino! Nimeenye shina nisiigahe, baheene pina umukhome wangu asiive wániwuusa mu nsengo iyi, avaanu vanisajisaaje mukhaaya saanave.’

5 “Baheene umuyimililaaji yula wávashemeela yumo yumo, vina vakhandi vana mukhole kwa mukhome waakwe. Wámuposa uwa wutasi wáaja, ‘Una mukhole mushi kwa mukhome wangu?’ 6 Wámugomosesa wáaja, ‘Nina mukhole madebe magana munaana (800) ga mafuta aga museyituni.’ Umuyimililaaji wámujovela wáaja, ‘Toola ilikhalatasi ili lina liyandiikhwe kiija una mukhole, yandikha nyangu magana gana (400).’ 7 Baheene wámuposa uwa wuvili wáaja, ‘Owe una mukhole mushi?’ Wámugomosesa wáaja, ‘Nina mukhole majunila ligana ga ngano.’ Umuyimililaaji yula wáaja, ‘Toola ilikhalatasi ili, lina liyandiikhwe una mukhole, yandikha mashumi munaana.’

8 “Paanyuma umunya wusi wámusufya umuyimililaaji yula yuna agaya shitiilo, shina wáagaha kwa wusugu. Kwa kiiva, avaanu vina vasikimuhuviilila uNguluvi, visenga insengo saanave kwa luhala kishila vina vikimuhuviilila uNguluvi. 9 Lino nikivajovela kiija, muvatanjilisaaje avayeenyu kwa wusi weenyu uwa mu nyi muno, baheene apo pina waasila, muposheelwe ku wiikhasi uwa shiluta.

10 “Umuunu yoyoona yuna iyangalila wunofu ifiinu fisheefu, uyo akwiliile kiyangalila wunofu hata ifiinu finshi. Ndeeni shilushwali, umuunu yoyoona yuna asili muyimililaaji munofu mu fiinu fisheefu, asiive asili muyimililaaji munofu hata mu fiinu finshi. 11 Lino, nda musili vayimililaaji vanofu vawusi va mu nyi iyi, yu naani yuna akhavapeela kiyimiilila uwusi uwa shiyooli! 12 Khanji nda omwe musili vayimililaaji vanofu va wusi uwa muunu uyunji, yu naani yuna angavapeela uwusi weenyu? 13 Kusiina umuvanda yuna akwiliile kiiva muvanda wa vatwa vavili. Kwa kiiva pina ikimudobokha na kimusenjela wunofu umutwa yumo, baheene ikimukhalalila na kimusala uyunji. Uwusi nda wukikutema usikwiliile kisenga insengo ya Nguluvi!”

Amamanyiso ga ndaji sa Musa na ga vakuwamalago

(Mataayo 11:12-13; 5:31-32; Maluko 10:11-12)

14 AVafalisaayo vaganile kipulikha amaswi ago, vayansa kimubedalila, kwa kiiva vasidobokhaga mandu ihela. 15 UYeesu wávajovela wáaja, “Omwe, mukiyiwona vagolofu pa meeho ga vaanu. Leelo uNguluvi iimanya gina gali mu numbula seenyu. Kwa kiiva minshi gina avaanu vikigatuna, uNguluvi ikigakhalalila! 16 Indaji sa Musa na mataafili ga vakuwamalago, gavalongosaaga avaanu mbakha uluhaavi lwa Yohana uMutwiniaji. Kihuma uluhaavi ulo, iMola iNofu iya Wutwa wa Nguluvi yiikhomwa, woona viijowa kwa ngufu kiija, vahulute mu Wutwa uwo. 17 Leelo lupeefu mandu uwulanga ni nyi kishila, kulikho kiwuusiwa hata helufi yimo iya ndaji.

18 “Umuunu yoyoona yuna ikimulekha umudala waakwe na kimutoola uyunji, iwaafukha. Hata yuna ikimutoola umudala yuna aleshiilwe nu mugoosi waakwe, iwaafukha.

Umunya wusi nu mupiina uLaasalo

19 “Akhandi akwali umunya wusi yumonga, yuna akhandi ifwala umwenda munofu gwa hela nyinshi. Insiku soona akhandi iilya ishakiilya sha lutogo. 20 Baheene umupiina yumonga, yuna akhandi itambulwa Laasalo, vakhandi vikimuviikha shila lijuva pa mulyango gwa muwusi yula. ULaasalo akhandi na malonda muvili goona. 21 Imbwa sikhandi sikimunaava amalonda gaakwe. Injala yikhandi yikimuluma mandu, baheene akhandi idobokha kiilya ifisigase fina fikhandi fiigwa kihuma pa meesa, pina akhandi iilya umuwusi yula.

22 “Kuunyuma, umupiina uLaasalo wáafwa. Avamalayikha vamutoola, vamuviikha nkholeela nu Abulahamu kushaanya. Umuwusi yula, woope wáafwa, vamusiila. 23 Baheene umuwusi yula pina iilava mandu ku wusimu, wámwaga uAbulahamu kwa kutali ali nu Laasalo. 24 Wámushemeela mandu wáaja, ‘Wee daada Abulahamu, unitanje! Niilava mandu ku mooto ugu! Umufilishe uLaasalo, ajubishe uludole mu malenga, adomolese mu lumili lwangu baheene lupole.’

25 “Leelo uAbulahamu wámugomosesa wáaja, ‘Muswamu wangu, ukumbukhaje kiija, pina uli muumi ukhandi ni fiinu fyona finofu fina ukhandi wisakula, leelo uLaasalo, akhandi iyanushila amalava. Lino, umwene ituuyisa panu, na owe wiilava. 26 Lumo na ilyo, paakhati yeesu noomwe, pana lilindi likhome mandu. Ililindi ilyo livishiilwe kiija, ava kuno vina visakula kiyinsa kunyeenyu, vagombolaje kilowokha, hata ava ukho vagombolaje kiyinsa kunyeesu.’

27 “Umuwusi yula wámujovela wáaja, ‘Lino daada, nikikulomba umufilishe uLaasalo alute kukhaaya ku litembe lya daada wangu. 28 Ukho nina valukholo lwangu vasaanu. Alute avapavile vawuleshe uwunansi waanave, vasilaave vayinse kuno ku malava amakhome.’ 29 Leelo uAbulahamu wámugomosesa wáaja, ‘Avalukholo lwakho vana maswi gina gayandiikhwe nu Musa na vakuwamalago, vagapulisaaje ago!’

30 “Umuwusi yula wáaja khanji, ‘Ndaali, daada Abulahamu! Leelo, umuunu nda ahume kwa vina vafwile alute kunyaanave, apo vasilambiisile uwunansi waanave.’ 31 UAbulahamu wámugomosesa wáaja, ‘Nda vasiyinatila gina gayandiikhwe nu Musa na vakuwamalago, hata umuunu nda afyushe kihuma kwa vina vafwile, vasikwiliile kiyiitikha.’”